“Pãd Wõt ilo Aõ in Naan”

‘El̦aññe kom̦ij pãd wõt ilo Aõ in naan innem kom̦ rũkal̦oora rem̦ool, im kom̦ naaj jel̦ã m̦ool, im m̦ool enaaj kanemkwojami.’​—JON 8:31, 32.

Mel̦el̦ein Men In: “Naan” ko an Jijej ej mel̦el̦ein katak ko an me rar itok jãn Anij. Jijej ear ba: “Jema eo ear jilkintok Eõ, Ear letok ñan Eõ kien, men eo In ba im men eo In kõnono kake.” (Jon 12:49) Ilo an jar ñan Jemen ilañ, Jeova Anij, Jijej ear ba: “Am̦ in naan m̦ool eo.” Ekkã an kwal̦o̦k kõn Naan in Anij ñan rejetake katak ko an. (Jon 17:17; Matu 4:4, 7, 10) Innem, Kũrjin ro rem̦ool, rej ‘pãd wõt ilo naan ko an,’ mel̦el̦ein bwe rej bõk Naan in Anij, Baibõl̦ eo, ãinwõt “m̦ool” im maroñ eo eutiejtata ikijjeen tõmak im kõm̦m̦an ko aer.

Wãween Kũrjin ro M̦okta Rar Jerbale Men In: Rijjelõk Paul ej juon wõt l̦õmn̦ak ippãn Jijej ilo an kautiej Naan in Anij. Ear je: “Jeje ko otemjej em̦õj letok kõn kakũrm̦ool an Anij ej bareinwõt wõr tokjãer.” (2 Timote 3:16) L̦õm̦aro kar kabbeik er bwe ren katakin Kũrjin ro jet rar aikuj “dãpij wõt naan e m̦ool” ak Naan in Anij. (Taitõs 1:7, 9) Kar rõjañ Kũrjin ro m̦okta bwe ren el̦l̦o̦k jãn ‘katak in mãlõtlõt ak m̦on̦ pata, ekkar ñan m̦anit ko m̦okta an armej ran̦, im ñan katak ko jinoin an lal̦, im jab ñan Kũraij.’​—Kolosse 2:8.

Wõn Ro Rainin Rej Kwal̦o̦k Ejja Wãween in Wõt?: Ekkar ñan juon bok in Katlik (Catechism of the Catholic Church) ej ba naan kein: “Katak ko me kabuñ in [Katlik] rej kwal̦o̦ki rar jab bũki jãn Jeje Ko Rekwõjarjar wõt. Ak rar bar bũki jãn m̦anit in kabuñ ko an armej ro jãn etto, men kein jim̦or el̦ap an kabuñ in Katlik kautieji.” Juon bwebwenato ilo bok in etan Maclean’s, ear kwal̦o̦k kõn kajjitõk in an juon kõrã in ri kaki jãn Toronto ilo Canada. Ej ba: “Etke jen baj tin l̦oor wõt katak ko an Jijej im Jeje ko Rekwõjarjar me rej jãn ruo to̦ujin iiõ ko remootl̦o̦k? L̦õmn̦ak ko ad make el̦apl̦o̦k aer em̦m̦an, bõtab enañin aolep iien rem̦õjn̦o̦ kõn ad kobaikl̦o̦k ippãn ko an Jijej im Jeje ko Rekwõjarjar.”

Juon bok in Katlik (New Catholic Encyclopedia), ej ba men in kõn Ri Kõnnaan ro an Jeova: “Rej lukkuun likũti Baibõl̦ eo bwe ej wũnjãn tõmak im kõm̦m̦an ko aer.” Jet iien ko rej kab mootl̦o̦k, juon em̦m̦aan jãn Canada ekar kabõjrake juon Ri Kõnnaan an Jeova ke ej iten kwal̦o̦k kajjien. L̦ein ej ba ñan kõrã in, “Ijel̦ã wõn kwe” im ej jitõñl̦o̦k Baibõl̦ eo ilo pein im ba, “eñn̦e ej kakõl̦l̦e eo.”