Uwaak ko Armej Rej Pukoti

“Enañin aolep armej ewõr aer l̦õmn̦ak kõn kar wõn Jijej. Meñe el̦ap ad tõmak ilo Jijej ak jab, kõj aolep jej kajjitõkin kõj make, ‘Kar wõn armej in?’”​—JUON RI JEJE ETAN STAN GUTHRIE.

ARMEJ rekõn̦aan jel̦ã wõn Jijej. Elõñ bok im pija in alwõj ko kõn e me el̦ap aer buñbuñ ippãn armej ro. Bõtab, ejjab bõjrak an armej ro kwal̦o̦k kajjitõk ko kõn Jijej. L̦õmn̦ak ko an armej kõn wõn in Jijej relukkuun oktak jãn doon.

Jet iiõ ko remootl̦o̦k, ruo ri jeje ripoot rar kũr armej ilo internet bwe ren kwal̦o̦k l̦õmn̦ak ko aer kõn kajjitõk in “Kar wõn in Jijej?” Erkein ej uwaak ko aer:

● “Bõlen ear juon rũkaki me ear likũt juon joñak em̦m̦an kõn tũriam̦o.”

● “Ear juon armej ettã me mour eo an ear lukkuun kabwilõñlõñ.”

● “Ejjel̦o̦k kein kam̦ool bwe Jijej ear lukkuun juon armej.”

● “Jijej ej Nejin Anij, ear l̦otak, mej, im ear jerkakpeje bwe en lo̦mo̦o̦ren kõj jãn jerawiwi ko ad. Ej mour rainin im Enaaj bar itok ñan lal̦ in.”

● “Ij tõmak bwe Jijej Kũraij ej make wõt Nejin Anij. Ej juon armej im ilo ejja iien eo wõt ej bar juon anij.”

● “Jijej ej juon bwebwenato bajjek an ajri.”

El̦ap an oktak l̦õmn̦ak kein an armej ro jãn doon. Alikkar bwe ejjab aoleper im jim̦we. Innem, ia eo jemaroñ bõk uwaak ko rejim̦we im rem̦ool kõn kajjitõk ko ad kõn Jijej? Ro rar kõm̦m̦ane bok in rej tõmak bwe Baibõl̦ eo ej Naan in Anij im ej bok eo wõt me ej kwal̦o̦k aolep men ko rem̦ool kõn Jijej. * (Lale kõmel̦el̦e eo itulal̦.)​—2 Timote 3:16.

Ilo katak in tok juon, jenaaj lale uwaak ko ilo Baibõl̦ ñan jet kajjitõk ko me ekkã an armej ro kajjitõk kaki kõn Jijej. Jijej make ear ba bwe ial̦ eo ñan bõk lo̦mo̦o̦r epel̦l̦o̦k ñan “jabdewõt eo ej tõmak ilo e.” (Jon 3:16, UBS) Kõmij rõjañ eok ñan etale naaj uwaak kein. Innem, pepe ippam̦ make el̦aññe kwõj aikuj kal̦apl̦o̦k am̦ mel̦el̦e kõn Jijej im wãween eo ñan jerbale tõmak eo am̦ ilo e.

[Komel̦el̦e eo itulal̦]