Ta Unin Elõñ Rej Jepel?

“Parisi ro rej itok ñan ippãn [Jijej] im [kajjioñ] kapo e im ba, ‘E mãlim ke bwe armej en jol̦o̦k lio pãleen kõn nana ko jabdewõt?’”—Matu 19:3.

JET armej ro ilo raan ko an Jijej rar kõn̦aan jepel. Jijej ear ba ñan er: “Kom̦ ar jab kõnono ilo bok, Eo e ar kõm̦m̦an er ke e jino, E ar kõm̦m̦an er m̦aan im kõrã, im ba, Kõn men in m̦aan enaaj likũt jeman im jinen, im enaaj pãd ippãn lio pãleen, im erro renaaj juon wõt kanniõk ke? Kõn men eo erro re jab ruo, a juon wõt kanniõk. Innãm men eo Anij ear kobaik, armej en jab kõjepeli.” * (Matu 19:4-6) Ealikkar bwe Anij ejjab kõn̦aan bwe ro rej m̦are ren jepel jãn doon.

Ipel̦aakin lal̦ in rainin, elõñ ri m̦are ro rej jepel jãn doon. Mel̦el̦ein ke bwe naan in kakapilõk ko jãn Baibõl̦ eo rejjab jejjet ñan kõj? Ak bõlen elikjab karõk eo an Anij kõn mour in m̦are?

Ñan jipañ kõj kal̦apl̦o̦k ad mel̦el̦e, jouj im l̦õmn̦ak kõn waanjoñak in: Ruo baam̦le rar jim̦or wia juon wõt kain aer injin in kwal̦kol̦. L̦eo im lio kein kajuon rar lukkuun tiljek in kõjparok injin in kwal̦kol̦ eo aerro. Injin in kwal̦kol̦ eo aerro etto an pãd. Bõtab, jar eo juon rar jab tiljek in kõjparok injin in kwal̦kol̦ eo aerro. E añjerak injin eo ñan tabwin̦o. Ekkã aer jojo nuknuk ko ium̦win elõñ raan ko iloan injin eo. Im ñe rej kwal̦kol̦ el̦e jãn joñan aer kanne. Injin in kwal̦kol̦ eo aerro e bwiin bũto, el̦õjo kilin im m̦õkaj an jorrããn. Tokãlik rej jol̦o̦k ilo kwõpej. Ia eo likjab eo ej itok jãn e? Injin eo ke ak armej ro aer injin eo? Ealikkar bwe likjab eo ear itok jãn armej ro im jab jãn injin eo.

Ilo ejja wãween in wõt, an elõñl̦o̦k ri m̦are ro jepel jãn doon, ejjab kõnke elikjab karõk eo an Anij kõn mour in m̦are. Elõñ milien ri m̦are ro im rej m̦õn̦õn̦õ wõt ippãn doon rej kam̦ool bwe ejjab likjab karõk eo jãn Anij. Mour in m̦are rot in ej kõm̦m̦an bwe ri m̦are ro, ro nejier, im jukjuk im pãd ko rej jokwe ie en m̦õn̦õn̦õ im jokwane. Bõtab, ãinwõt injin in kwal̦kol̦ eo, ri m̦are ro rej aikuj tiljek im kõjparok jem̦jerã eo aerro bwe ren m̦õn̦õn̦õ wõt ippãn doon toõn wõt aerro mour.

Meñe kom̦ro ej kab m̦are ak etto amiro kar m̦are, naan in kaiñi ko jãn Baibõl̦ eo ñan kõjparok im kakajoor jem̦jerã eo amiro renaaj lukkuun jipañ. Jouj im lale waanjoñak ko ilo peij ko tok im̦aan.

[Footnote]