Wãwen eo Kwomaroñ Melele Baibel Eo

 2. Riit kin Juõn Lemnok Epojõk ñõn Bõk Katak ko Rekãl

Juõn mõtõm enañin ke kar jiroñ yuk kin men ko renana nae juõn armij me kwojañin kar iione? Kiõ ke kwoj iione armij eo, nan ko an eo mõtõm ej ke bõprae yuk jen am kile kabel ko im karkar ko remõn karkarin armij eo? Juõn wãwen einwõt in, emaroñ walok ñe jej riiti Baibel eo.

DRI jilik Paul ear kakkil kin ta eo emaroñ walok elañe jej likjõp in riiti Baibel eo kin juõn lemnok epojõk ñõn bõk katak ko rekãl. Ear je kin jet dri Ju ro ilo ran ko an: “Ij kennan kin ir, bwe eor kijejeto ñõn Anij ibeir, a e jab ekar ñõn jela.”​—Dri Rom 10:2.

Jet ian dri Ju ro mokta rar jab tõmak bwe Jisõs kar Messaia eo, meñe Jeje ko ilo kajin Hibru rar kwalok kake ilo alikar. Aolep men ko Baibel eo ear kwalok kin Messaia eo ear jejit iben Jisõs dri Nazeret eo, im ear bareinwõt kajejit kitien aolep kanan ko kin ta ko Messaia eo enaj kõmõni. Bõtab, kin an elõñ dri Ju ro drebij wõt katak ko rar tõmak kaki mokta, men in ear bõprae ir jen air melele kin Nan in Anij.

 Ta eo jemaroñ katak jen bwebwenato in ilo Baibel? Jej katak bwe elukkun aurõk ñõn riit Baibel eo kin juõn lemnok epojõk ñõn bõk katak ko rekãl. An juõn drebij wõt katak ko ear tõmak kaki mokta emaroñ bõprae e jen an melele mol eo ilo Baibel.

Ñõn wanjoñok, juõn dri kaki ilo jikuul in kabuñ eo ilo North Carolina, ilo Amerika, ej kwalok bwe Baibel eo ej “juõn buk me armij ro rar je, im eor lemnok ko an armij ro ie me rej oktõk jen dron, im ejelok juõn iair emaroñ letok nan in tel ko rejime kin wãwen eo jej aikwij mour.” Elañe juõn armij ear watõk Baibel eo einwõt “juõn buk me armij ro rar je,” inem emaroñ kejekron nan in tel ko ak nan in kakabilek ko ilo Baibel me rej bõprae e jen an kõmõni kõnan ko an.

Ilo okõtõn men in, Baibel eo ej rejañ kij bwe en let ar katak kin Nan ko an Anij. Ikijen armij ro ilo Beria, Jeje ko ilo Baibel eo ej ba: “Emõkõj air bõk nan im mõnõnõ, im bukot ilo Jeje ko ran otemjej, bwe ren jela men kein remol ke jab ke.” (Jerbal 17:11) Einwõt dri Beria rein, emaroñ juõn menin aikwij ñõn jolok lemnok ko am rebwir me remaroñ jelet melele eo am. Kwon riit Nan in Anij kin juõn lemnok epojõk, im mõnõnõ ñõn katak kin ennan ko rekaitoktoklimo an Anij.