Bukot Nan in Kakabilek ko Rekeie

ELAÑE kwoj kabukot nan in kakabilek, elõñ jikin ak wãwen ko kwomaroñ loi ie. Jerbal ko me armij ro rej kõmõni buk ko ak pija ko ñõn jibõñ armij ñõn katakin ir wãwen mour im jerbal ej juõn ian jerbal ko rebuñbuñ iaolepen lõl in. Ilo ailiñ ko einwõt Britain, Latin Amerika, Japan, im Amerika, emõntata buk rot kein ibeir. Oran video ko, kwelok ko, im program ko ilo television kin kilen katakin armij wãwen mour rej laplok wõt im buñbuñ iben armij. Unin an buñbuñ men kein iben armij ej bwe ren maroñ kamarmiri abañ ko air mõke, ijellokin air bõk jibõñ jen dri meletlet eo ej katak kin lemnok ko an armij, dri kakabilek kin mour in mare, im dri tel in kabuñ. Ta nan in kakabilek ko rej kwalok kaki ilo buk kein?

Kõtõbar kõnan ko air mõke, kabuk beleir, im kakajiririk ajiri ro rej mõtõn men ko me elõñ armij rej itoklimo kaki. Katak ko jet me armij ro rej itoklimo kaki ej wãwen ko ñõn kijenmij iomin inebata, buromõj, im abañ ko rej walok jen jibel jen ro beleir. Bareinwõt elõñ armij ro rekõnan bõk nan in kakabilek ko ñõn kejbãrok ir jen broklep, kõbatat, im karek. Ekeie ke nan in kakabilek ko ilo buk ko armij ro rej kõmõni kin wãwen kein? Jet ien aet, ak ejjab aolep ien. Kin men in, ej menin meletlet ñõn lemnok kin nan in kakkõl eo ilo Baibel: “Dri bwebwe eo, ej tõmak nan otemjej; a armij dri jelalokjen, ej kanuij lale an etetal.”​—Jabõn Kennan Ko 14:15.

 Buk ko me rej katakin kin kilen kajerbal camera, kejbãrok jããn, im katak kin kajin ko, rekeie im edriklok wõnair jen air katak kaki ilo jikuul bõtab, buk ko rej katakin armij kin wãwen mour ikijen jikin jerbal, mare, kakajiriri, ak nañinmij in kamelij, rej oktõk jen buk kein. Ekkã air rejañ armij bwe ren mour ilo bar juõn wãwen ak rej kowõnmanlok lemnok ko an armij mõke. Inem ej menin meletlet ñõn kajitõk: ‘Wõn eo ej letok nan kakabilek kein? Ta berberin nan in kakabilek ko an?’

Ekkã an ejelok kein kamol ñõn lemnok ko an dri meletlet ro. Jet remaroñ lelok nan in kakabilek ko me remõntata bwe rejela renaj kõmõn elap jããn ñõn ir mõke ilo air jiroñ armij ro ta ko rekõnan roñjaki. Ej juõn menin bwilõñ bwe ilo juõn wõt jikin, jerbal ko me rej kõmõn buk ko kin katakin armij kin wãwen air mour ej kõmõn elõñlok jen drualitõk billion dala kajjojo yiõ!

Ewi Joñõn an Keie Nan in Kakabilek ko ilo Buk Kein?

Ñe kwoj bõk melele ko jen buk ko me rej katakin armij kin wãwen mour, kwoj kõtõmene bwe kwonaj lo nan in kakabilek ko rekeie. Bõtab, jet ien nan in kakabilek ko kwoj bõk jen buk kein ejelok berberir ak rejjab alikar. Ekkã wõt an nan in kakabilek kein jiroñ yuk: ‘Elañe kwokõnan bwe en or am jããn, emõn ejmour eo am, ak bwe en or jeram, kwoj aikwij lemnok jime wõt bwe kwon lo tõbrõk.’ Nan in kakabilek rot in emaroñ ke jibõñ yuk kamarmire abañ ko am? Enaj ke jibõñ yuk jelmae abañ ko kwoj iioni ilo mour?

Ñõn wanjoñok, buk ko kin ikijen jimjera eo ikõtar im ro jet im ikõtan dri belele ro, rej men ko rebuñbuñ iben armij. Rej ke jibõñ armij ro kalek juõn mour in baamle elemõnõnõ? Ejjab aolep ien. Ekar ñõn juõn kõra ear riiti buk kein me rebuñbuñ iben armij ro ilo Latin Amerika, ear ba bwe dri jeje buk kein “ej rejañ dri riit ro kin wãwen ejaake juõn kõtan emõn kin mour in belele im kalaplok air liki ir mõke.” Dri jeje buk in ear ba bwe kwoj mone yuk mõke elañe kwoj ber wõt iben eo beleõm meñe kwojjab lo mõnõnõ ilo mour in mare eo amiro. Melelen nan kein bwe men eo eaurõktata ej ñõn kamõnõnõik yuk mõke ijellokin am kile abañ ko an eo mõtõn im kajeoñ in kamarmiri.

Emol, nan in kakabilek ko jen buk kein emaroñ or nan in rejañ ko remõn ie. Bõtab, remaroñ bareinwõt kauwatata. Nan in kakabilek ko an juõn dri meletlet emaroñ jerbal ilo juõn wãwen ekkar ilo juõn unin konono ak ilo bar juõn unin konono ejjab ekkar im emaroñ kõmõn an men ko nanalok. An eindrein, jeban kile oktõk ko ikõtan lemnok ko remõn jen ko renana me buk kein rej kwalok kaki. An wõn nan in kakabilek ko kwomaroñ liki? Kajitõk ibõm mõke: ‘Dri jeje eo ear ke lukkun etali nan in kakabilek ko an, ak rej ke jen lemnok ko an mõke? Ewi joñõn an mweiuk ak buñbuñ lukkun jelet lemnok eo an?’

Juõn buk in tel me eto an ber im emol an or tokjen ej Baibel eo. Ej letok nan in kakabilek ko rekeie kin men ko me buk ko armij ro rej kõmõni rej bareinwõt kemelele kaki. Ear kamakit million armij ro bwe ren jerbale nan in kakabilek in: “Erom ekãl ilo buruemi . . . komin kõnõk armij ekãl.” (Epesõs 4:​23, 24) Baibel eo ej kalikar kin ta eo ej kõmõn an or ar abañ im katakin kij kilen kamarmiri. Men eo eaurõktata, ej letok un eo ekajur im bolemen unin ar kõmõne men eo ejime. Katak in tok juõn enaj kemelele ewi wãwen jej kõmõne men in.