Etke Jen Kõtl̦o̦k bwe Kajoor eo an Anij En Tõl Kõj?

“Kwe aõ Anij; Am̦ jetõb [kajoor, NW] em̦m̦an, Kwõn tõl eõ.”​—SAM 143:⁠10.

1. Ewi wãween an juon kajoor eo me jejjab loe maroñ tõl juon armej?

 EWÕR juon kein jerbal rej n̦aetan kam̦bõj im ewõr juon nitõl̦ ilowaan im ej jitõñl̦o̦k tueañ. Ej jipañ armej ñan jel̦ã ia eo rej pãd ie im ia eo rej jibadekl̦o̦k. El̦aññe kwõj kõjerbale kam̦bõj eo ñe kwõj itoitak, jekdo̦o̦n ia eo kwõj etal ñan e, nitõl̦ eo enaaj jitõñl̦o̦k tueañ. Enaaj jipañ eok ñan jel̦ã ia eo kwõj etal ie l̦o̦k, rõkeañl̦o̦k ke, irearl̦o̦k ke, irilikl̦o̦k ke, ak niñeañl̦o̦k. Ta eo ej kõm̦akũt nitõl̦ in bwe en jitõñl̦o̦k tueañ? Ewõr juon kajoor ilo lal̦ in jejjab maroñ loe me ej ãinwõt jitũũl im ej kõm̦akũt nitõl̦ eo ilo kam̦bõj eo. Jãn etto, elõñ armej rar kõjerbal juon kam̦bõj ñan tõl er ñe rej itoitak ioon ãne ak ejerakrõk ilo̦jet.

2, 3. (1) Ta eo Jeova ear kõjerbale ñan kõm̦anm̦an lañ im lal̦? (2) Etke jejel̦ã bwe kajoor eo an Anij emaroñ tõl mour ko ad rainin?

² Ebar wõr juon kajoor jejjab maroñ loe me el̦apl̦o̦k an aorõk im emaroñ tõl kõj. Ta in? Eoon ko jinointata ilo Baibõl̦ rej kwal̦o̦k kõn kajoor in. Bok in Jenesis ej kwal̦o̦k ta eo Jeova ear kõm̦m̦ane ilo iien ko etto. Jenesis 1:1 ej ba: “Ilo jinoin Anij ear kõm̦anm̦an lañ im lal̦.” Ear jilkintok juon kajoor ñan kõm̦m̦ane men in kõnke Sam 33:6 ej ba: “Kõn naan in Jeova, ar kõm̦anm̦an lañ ko, im aolep men ko ilañ kõn menono eo an [ak kõtwõn].” Ta eo Anij ear kõjerbale? Ear kõjerbale “kõtwõn” ak kajoor eo an. Jej kam̦m̦oolol Jeova kõnke ear kõjerbale kajoor in ñan kõm̦anm̦an men otemjej.​—Job 33:4; Sam 104:⁠30.

³ Jejel̦ã bwe Jeova ear kõjerbale kajoor eo an ñan kõm̦anm̦an kõj. Ak kajoor in emaroñ ke tõl mour ko ad ilo bar jet wãween? Nejin Anij ear ba bwe emaroñ kõnke ear jiroñ rũkal̦oor ro an bwe kajoor eo an Anij enaaj tõl er. (Jon 16:​13) Etke jej aikuj kõtl̦o̦k bwe kajoor eo an Anij en tõl kõj?

Kajoor eo an Anij

4, 5. (1) Ta l̦õmn̦ak eo ebõd kõn kajoor eo an Anij me ro rej tõmak ilo jilu anij ilo juon rej bõke? (2) Ewi wãween an Anij kõjerbal kajoor eo an?

⁴ Bõlen ewõr jet armej kwõj kwal̦o̦k naan ippãer im rej tõmak ilo men eo Baibõl̦ ko ilo kajin M̦ajel̦ rej n̦aetan Jetõb Kwõjarjar. Rein me rej tõmak ilo jilu anij ilo juon rej bõk l̦õmn̦ak eo ebõd bwe men in ej juon jetõb emour im ej joñan wõt juon ippãn Anij, Jemed.​—1 Korint 8:⁠6.

⁵ Ak ta lukkuun mel̦el̦ein naan in me rar ukote ñan Jetõb Kwõjarjar? Naan in Hibru eo ruʹach me kar kõjerbale ilo Jenesis 1:​2, kar bar ukote ilo naan ko jet me rej jitõñl̦o̦k ñan kajoor eo an Anij. Ñan waanjoñak ilo kõmel̦el̦e jidikdik eo itulal̦ kõn Jenesis 1:2 ilo UBS, ej ba: “Jetõbõn Anij: bar juon mel̦el̦ein naan kein ilo kajin Hibru, ‘kõtwõn Anij’ ak ‘kajoor an Anij.’ ” Meñe jejjab maroñ lo kõto ak jemaroñ lo ta ko ej kõm̦m̦ani. Ilo ejja wãween in wõt, jejjab maroñ loe kajoor eo an Anij ak kajoor in emaroñ kõm̦m̦an bwe elõñ men ko ren wal̦o̦k. Kajoor eo an Anij ejjab juon men emour. Ej kajoor eo ej itok jãn Anij. Anij ej kõjerbale kajoor in an ioon armej ak men ko ñan kajejjet ankilaan. Epen ke ñan tõmak bwe kajoor in el̦ap ej itok jãn Anij eo ekajoor otem kajoor? Ejjab ñan jidik!​—Riit Rom 1:⁠20.

6. Ta eo Devid ear kajjitõk ippãn Jeova?

⁶ Jeova emaroñ ke wõnm̦aanl̦o̦k im  kõjerbale kajoor eo an ñan tõl mour ko ad? Jeova ear kallim̦ur ñan Devid: “Inaaj kõjjel̦ãik eok im katakin eok ilo ial̦ eo kwõnaaj etal ie.” (Sam 32:⁠8) Devid ear ke kõn̦aan bwe Anij en tõl e? Jejel̦ã bwe ear kõn̦aan kõnke ear jar ñan Jeova: “Kwõn katakin eõ in kõm̦m̦an ankil Am̦, bwe Kwe aõ Anij; Am̦ Jetõb [kajoor, NW] em̦m̦an, Kwõn tõl eõ.” (Sam 143:​10) Kõj bareinwõt jej aikuj kõn̦aan bwe kajoor eo an Anij en tõl kõj. Etke? Jenaaj etale emãn un ko.

Jejjab Maroñ Tõl Kõj Make

7, 8. (1) Etke jejjab maroñ tõl kõj make? (2) Ta waanjoñak eo emaroñ jipañ kõj ñan mel̦el̦e kõn unin ad aikuj bwe Anij en tõl kõj ilo lal̦ in enana?

⁷ Un eo kein kajuon unin ad aikuj kõn̦aan bwe kajoor eo an Anij en tõl kõj ej kõnke jejjab maroñ tõl kõj make. Ñan tõl juon armej ej mel̦el̦ein ñan kwal̦o̦k ñan e ial̦ eo ejim̦we en etal ie l̦o̦k. Jeova ear jab letok maroñ in ñan kõj. Im kõnke jejjab weeppãn, elõñ alen jej likjab ñe jej kajjioñ in tõl kõj make. Ri kanaan Jeremaia ear je: “I jel̦ã, Jeova, bwe ial̦ eo an juon armej e jab ilo e make; e jab an juon armej eo ej etetal bwe en jiniet buñtõn neen.” (Jeremaia 10:​23) Taunin? Ikijjeen Jeremaia, Anij ear kwal̦o̦k ñan kõj unin ej ãindein. Jeova ear ba: “Wõn emaroñ mel̦el̦e kõn bũruon armej? Ejel̦ã m̦on̦ jen men otemjej, ejjel̦o̦k en emaroñ kõmouri jãn mej in an.”​—Jeremaia 17:​9, UBS; Matu 15:⁠19.

⁸ Baj l̦õmn̦ak m̦õk kõn juon armej me ej aikuj etal ñan juon jikin, bõtab emarok jilõñlõñ im ejejiniete jikin eo. Enaaj kauwõtata ñan an etal ñan jikin eo el̦aññe ejjel̦o̦k kein tõl e. Enaaj aikuji juon teeñki im juon armej ejiniete jikin eo. El̦aññe ejjab innem enaaj jebwãbwe ilo ial̦ eo, im emaroñ iioon jorrããn. Ãindein bar armej eo ej l̦õmn̦ak emaroñ tõl e make ilo lal̦ in enana. El̦aññe ejjab kõtl̦o̦k bwe Anij en kwal̦o̦k ñan e ial̦ eo ejim̦we, ej pãd ilo kauwõtata. Ãinwõt Devid, jej aikuj jar im kajjitõk jipañ ippãn Jeova. Ear ba: “Kwõn kwal̦o̦k ñan eõ ial̦ ko am̦, O Jeova; kwõn katakin eõ kõn ial̦ ko am̦.” (Sam 25:4; 23:⁠3) Ta ko jemaroñ kõm̦m̦ane bwe Jeova en tõl kõj?

9. Ewi wãween kajoor eo an Anij emaroñ jipañ im tõl kõj?

⁹ El̦aññe ettã bũruod im jej m̦õn̦õn̦õ in atartar ioon Jeova, enaaj letok kajoor eo an bwe en tõl kõj. Ewi wãween an naaj kajoor in jipañ kõj? Jijej ear jiroñ rũkal̦oor ro an bwe Anij enaaj jilkinl̦o̦k kajoor eo an bwe en jipañ er. Ear ba bwe kajoor eo an Anij ‘enaaj katakin er men otemjej, im kakeememej er kõn aolep men ko ear jiroñ er kaki.’ (Jon 14:​26, UBS) Ñe jej jar im katak Naan in Anij, ekoba katak ko an Kũraij, kajoor eo an Anij enaaj jipañ kõj ñan mel̦el̦e mãlõtlõt eo el̦ap an Jeova bwe jen maroñ pokake e. (1 Korint 2:​10) Bareinwõt, ñe jej jelm̦ae wãween ko me jaar jab kõtmãne kaki, kajoor eo an Anij enaaj jipañ kõj ñan jel̦ã ta eo jen kõm̦m̦ane. Kajoor eo an enaaj jipañ kõj ñan keememej naan in kakapilõk ko ilo Baibõl̦ me jaar katak kaki. Bareinwõt enaaj jipañ  kõj ñan jel̦ã ewi wãween jemaroñ jerbali naan in kakapilõk kein ñan kõm̦m̦ani pepe ko rem̦m̦an.

Kajoor eo an Anij Ear Tõl Jijej

10, 11. Ta eo Jijej ear kõtmãne bwe kajoor eo an Anij enaaj kõm̦m̦ane ñan e? Ewi wãween kajoor eo an Anij ear jipañ e?

¹⁰ Un eo kein karuo unin ad aikuj kõn̦aan bwe kajoor eo an Anij en tõl kõj ej kõnke kajoor in ear tõl Nejin Anij. Jijej ear kõtmãne bwe kajoor eo an Anij enaaj jipañe ñe enaaj kar pãd ioon lal̦ in. Ear jel̦ã kõn kanaan eo kar je kõn e. Kar kanaan bwe kajoor eo an Jeova enaaj pãd ioon, im enaaj lel̦o̦k mãlõtlõt im jel̦ãl̦o̦kjen̦, pepe im kajoor, jel̦ã im mijak Jeova. (Aiseia 11:⁠2) Mour eo an Jijej ioon lal̦ in eban kar pidodo ñan e. Baj l̦õmn̦ak m̦õk kõn joñan an kar lukkuun kõn̦aan bwe kajoor eo an Anij en jipañ e!

¹¹ Naan ko an Jeova rar jejjet im m̦ool. Bok in Luk ej jiroñ kõj ta eo ear wal̦o̦k ãlikin wõt an kar Jijej peptaij. Ej ba bwe Jijej ear obrak kõn kajoor eo an Anij. Innem ear jepl̦aak jãn Jordan, im kajoor eo an Anij ear ãñinl̦o̦k e ilo ãne jem̦aden. (Luk 4:⁠1) Ke Jijej ear jitlo̦k, jar im kõl̦mãnl̦o̦kjen̦ ilo ijin, bõlen Jeova ear lel̦o̦k naan in jiroñ ko ñan e im jipañ e ñan jel̦ã ta ko renaaj wal̦o̦k ñan e. Kajoor eo an Anij ear jerbal ilo bũruon Jijej im l̦õmn̦ak ko an. Ear tõl wãween an l̦õmn̦ak im kõm̦m̦ani pepe ko. Tokjãn men in, aolep iien Jijej ear jel̦ã ta eo Jemen ekõn̦aan bwe en kõm̦m̦ane im ear kõm̦m̦ani men kein.

12. Etke jej aikuj kajjitõk bwe kajoor eo an Anij en tõl kõj?

¹² Jijej ear jel̦ã joñan an aorõk kajoor eo an Anij ilo mour eo an. Innem ear kanooj rõjañ rũkal̦oor ro an ñan jar kõn kajoor eo an Anij im kõtl̦o̦k bwe en tõl mour ko aer. Jijej ear ba: “Kajjitõk, im naaj lewõj ñan kom̦; kappukot, im kom̦ naaj loe; kal̦l̦al̦l̦al̦, im enaaj pel̦l̦o̦k ñan kom̦. . . . Innãm el̦aññe kom̦ eo ri nana, kom̦ jel̦ã kõjkan lel̦o̦k men ko rem̦m̦an ñan ro nejõmi; ta, e jamin l̦ap an Jememwõj i lañ lel̦o̦k Jetõb Kwõjarjar [kajoor eo an, NW] ñan ro otemjej rej kajjitõk ippãn ke?” (Luk 11:​9-13) Etke jej aikuj kajjitõk bwe kajoor eo an Anij en tõl kõj? Kõnke emaroñ ukot l̦õmn̦ak ko ad im jipañ kõj ñan bõk “l̦ol̦ãtãt an Kũraij.” (1 Korint 2:16; Rom 12:​2, UBS) Mel̦el̦ein men in bwe ñe jej kõtl̦o̦k bwe kajoor eo an Anij en tõl mour ko ad, jemaroñ l̦õmn̦ak ãinwõt Kũraij im anõke joñak eo an.​—1 Piter 2:⁠21.

Kajoor eo an Setan Emaroñ Tõl Kõj ñan Ial̦ eo Ebõd

13. Ta eo kajoor eo an Setan ej kõm̦m̦an bwe armej ro ren kõm̦m̦ani?

¹³ Un eo kein kajilu unin ad kõn̦aan bwe kajoor eo an Anij en tõl kõj ej kõnke el̦aññe ejjab innem kajoor eo an Setan enaaj tõl kõj ñan ial̦ eo ebõd. Enañin aolep armej rainin rej pãd ium̦win kajoor eo an Setan. Eñin kajoor eo ej kõm̦m̦an bwe armej ren jum̦ae men ko kajoor eo an Anij ej tõl kõj ñan kõm̦m̦ani. Kajoor in ejjab jipañ armej ro ñan bõk l̦õmn̦ak eo an  Kũraij. Ak ej kõm̦m̦an bwe armej ren l̦õmn̦ak im kõm̦m̦an ãinwõt Setan, irooj in lal̦ in. (Riit 1 Jon 2:16; Taitõs 3:⁠3.) El̦aññe juon armej ej kõtl̦o̦k bwe kajoor eo an Setan en irooj ioon im ej jino kõm̦m̦ani ‘jerbal ko an kanniõk’ ak men ko renana, innem enaaj lo tokjãn ko renana. Armej in ejamin “jolõt aelõñ in Anij.”​—Galetia 5:​19-21.

14, 15. Ewi wãween jemaroñ jum̦ae kajoor eo an Setan?

¹⁴ Jeova ej letok men ko jej aikuji ñan jum̦ae kajoor eo an Setan. Rijjelõk Paul ear ba: “Kom̦win ejaaki kajoor ko ami ilo ami juon wõt ippãn Irooj, kab ilo aolepen kajoor eo an.” Etke ear ba men in? Ear wõnm̦aanl̦o̦k im ba: “Bwe ñe raan eo enana ej itok, kom̦ naaj maroñ jutak n̦ae ri kõjdat ro.” (Epesõs 6:​10, 13, UBS) Jeova ej kõjerbal kajoor eo an ñan kakajoor kõj bwe jen jum̦ae jibadbad ko an Setan ñan tõl kõj ñan ial̦ eo ebõd. (Revelesõn 12:⁠9) Kajoor eo an Setan ekajoor im jenaaj baj jelm̦aiki wõt bwe jej mour ilo lal̦ in an. Bõtab, jemaroñ jum̦aeiki kajoor in an Setan. Kajoor eo an Anij ekajoorl̦o̦k im enaaj jipañ kõj!

¹⁵ Rijjelõk Piter ear kõnono kõn jet iaan ri tõmak ro m̦okta me rar ilo̦k jãn m̦ool eo. Ear ba: “Rar ilo̦k jãn ial̦ e jim̦we, im rar jebwãbwe.” (2 Piter 2:​15) Jemaroñ lukkuun kam̦m̦oolol kõnke jaar bõk, jab kajoor an Setan, ak kajoor eo jãn Anij! (1 Korint 2:​12) Ilo ad kõtl̦o̦k bwe kajoor eo an Anij en tõl kõj im kortokjãn aolep men ko Jeova ej litok bwe jen maroñ kakajoor kõtaan eo ad ippãn, jenaaj maroñ kõm̦m̦ani men ko rejim̦we im jum̦ae kajoor eo an Setan.​—Galetia 5:⁠16.

Kajoor eo an Anij Ej Jebar Men ko Rem̦m̦an

16. Ta men ko rem̦m̦an kajoor eo an Anij enaaj jipañ kõj ñan kwal̦o̦ki?

¹⁶ Un eo kein kaemãn unin ad kõn̦aan bwe kajoor eo an Anij en tõl kõj ej kõnke ej kõm̦m̦an bwe armej ro ren kwal̦o̦k men ko rem̦m̦an. Mel̦el̦ein bwe ej jipañ armej ro ñan kwal̦o̦k “yokwe, lañlõñ, aenõm̦m̦an, meanwõd, jouj, em̦m̦an, tiljek [tõmak, NW], ineem̦m̦an, jatõr.” (Galetia 5:​22, 23) Alikkar bwe kõj aolep jekõn̦aan bwe en l̦apl̦o̦k ad kwal̦o̦k yokwe, lañlõñ, im aenõm̦m̦an. Jekõn̦aan bwe en bar l̦apl̦o̦k ad meanwõd, jouj im em̦m̦an. Enaaj em̦m̦an ñe ekanooj l̦ap im kajoor tõmak eo ad im ñe jej ineem̦m̦an im jatõr ak jel̦ã irooj ioon kõn̦aan ko ad. Men kein rej jipañ kõj im ro uwaan baam̦le eo ad im ro ilo congregation eo. Jej aikuj wõnm̦aanl̦o̦k im kate kõj ñan kwal̦o̦k men kein. Eban jem̦l̦o̦k ad aikuj im maroñ kwal̦o̦k aolep men kein rem̦m̦an.

17. Ewi wãween ad maroñ kate kõj bwe jen kwal̦o̦k yokwe, lañlõñ, aenõm̦m̦an, im men ko ãierl̦o̦k wõt?

¹⁷ Em̦m̦an bwe jen kõl̦mãnl̦o̦kjen̦ kõn kajjitõk kein: Naan ko ad im kõm̦m̦an ko ad rej ke kwal̦o̦k bwe kajoor eo an Anij ej tõl kõj? Im rej ke kalikkar bwe jej kwal̦o̦k yokwe, lañlõñ, aenõm̦m̦an im ko erl̦o̦k wõt? (2 Korint 13:5; Galetia 5:​25) Ta el̦aññe jej kile bwe jej aikuj jipañ ñan kwal̦o̦k jet iaan men kein? Jemaroñ kal̦apl̦o̦k ad kate kõj ñan kõtl̦o̦k bwe kajoor eo an Anij en tõl kõj ñan kwal̦o̦k men kein rem̦m̦an. Jej kõm̦m̦ane men in ikijjeen ad katak kõn kajjojo iaan men kein ilo ad lale Baibõl̦ eo im bok ko jãn doulul eo. Jej aikuj l̦õmn̦ak kõn ewi wãween jemaroñ kwal̦o̦k men kein aolep raan. Innem jen kate kõj ñan kwal̦o̦ki ilo mour eo ad. * (Lale kõmel̦el̦e eo itulal̦.) Jej kile bwe el̦ap ad aikuji kajoor eo an Anij ñe jej lo wãween an jipañ kõj ilo mour ko ad make im ko an ro jeid im jatid ilo tõmak.

Kwõj Ke Kõtl̦o̦k bwe Kajoor eo an Anij En Tõl Eok?

18. Ta eo jemaroñ katak jãn Jijej ilo an kar kõtl̦o̦k bwe kajoor eo an Anij en tõl e?

¹⁸ Baibõl̦ eo ej ba bwe kajoor eo an Anij ear  tõl Jijej ilo mour eo an ke ear juon armej. Ear kõn̦aan bwe kajoor eo an Anij en tõl e. Ke kajoor in ekar tõl e bwe en kõm̦m̦ane juon men, ear l̦oore im kõm̦m̦ane. (Mark 1:​12, 13; Luk 4:​14) Kwõj ke kõtl̦o̦k bwe kajoor eo an Anij en tõl eok ãinwõt kar Jijej?

19. Ta eo jen kõm̦m̦ane bwe kajoor eo an Anij en tõl kõj?

¹⁹ Rainin, kajoor eo an Anij ej wõnm̦aanl̦o̦k im tõl ro rej m̦õn̦õn̦õ in kõtl̦o̦k bwe en tõl mour ko aer. Ewi wãween kwõmaroñ kõtl̦o̦k bwe kajoor in en tõl eok ilo ial̦ eo ejim̦we? Iien otemjej kwõn jar ñan Jeova bwe en lewõj kajoor eo an im jipañ eok ñan l̦oore. Paul ear ba kõn Jeova: “En lewõj ñan kom̦, ekkar ñan m̦weien aiboojoj eo An, bwe ilo maroñ kom̦win kajoorl̦o̦k kõn Jetõb eo An [kajoor eo an, NW] ilo ami.” (Epesõs 3:​14-16) Kwõn kalikkar bwe kwõj kõn̦aan bwe kajoor eo an Anij en tõl eok ilo am̦ katak Baibõl̦. Etke? Kõnke Anij ear kõjerbale kajoor in ñan kõm̦akũt ro rar je Baibõl̦ eo. (2 Timote 3:​16, 17) Bareinwõt, pokake naan in jiroñ ko ilo Baibõl̦ im kõtl̦o̦k bwe kajoor eo an Anij en tõl eok. Ilo am̦ kõm̦m̦ani men kein, kwõj kwal̦o̦k am̦ tõmak ilo kajoor eo an Jeova bwe en tõl eok ñan ial̦ eo em̦m̦antata ilo lal̦ in enana.

[Kamelele eo itulal]

Kwõj Keememej Ke Un ko Raorõk?

• Ewi wãween kajoor eo an Anij emaroñ tõl mour ko ad?

• Ta un ko emãn unin ad aikuj kõn̦aan bwe kajoor eo an Anij en tõl kõj?

• Ewi wãween kwõmaroñ kõtl̦o̦k bwe kajoor eo an Anij en tõl eok ñan ial̦ eo ejim̦we?

[Kajitõk ko ñan katak]

[Pija ilo peij 15]

Kajoor eo an Anij ear tõl mour eo an Jijej

[Pija ilo peij 17]

Kajoor eo an Anij ej jerbal ilo l̦õmn̦ak ko im bõro ko ñan kõm̦akũt im tõl armej ro