Kwoj Ke Kwalok Am Kamolol kin Jerammõn ko jen Jeova?

ELIKIN kar lomoren dri Israel ro jen air kamakoko ilo Ijipt ilo juõn wãwen ekabwilõñlõñ, rar mõnõnõ kinke rar maroñ kabuñ ñan Jeova. (Ex. 14:29–15:1, 20, 21) Bõtab ejjabto tokelik, rar oktak. Rar jino ellotan kin wãwen ko rebin rar iioni. Etke? Kinke ear laplok air lemnak kin abañ ko rar iioni ilo ene jemaren jen air lemnak kin men ko Jeova ear kejerammõn ir kaki. Rar ba ñan Moses: “Etke kom ar ãñintok kim jen enen Ijipt bwe kimin mij ilo ene jemaren? Bwe ejelok bred, im ejelok dren? Im kimij [mõk] kin bred [ak manna] in e nana.”—Bwin. 21:5.

Jet ebeben ko tokelik, Devid, Kiñ eo an dri Israel ro, ear al: “A ña, I ar liki Am joij; buruõ e naj lõñliñ ilo Am lomor. I naj al ñõn Jeova, bwe E ar wujleptok emõn ñõn iõ.” (Sam 13:5, 6) Devid ear jab meloklok kin wãwen Jeova ear kwalok joij ñan e. Ilo ijo turãjet, ear lemnak kaki men kein ien otemjej. (Sam 103:2) Jeova ej kwalok joij ñan kij bareinwõt, im jejjab aikwij kajitokjen jerammõn ko ej litoki ñan kij. Kiõ jen etale jet ian men ko ej kejerammõn kij kaki ilo ran kein.

Jimjerã eo Ad Ibben Jeova

Dri jeje sam eo ear al: “Iroij ej jeran ro rej bokake e.” (Sam 25:14, UBS) An armij ro rejjab wãppen maroñ ejaak juõn jimjerã ebak ibben Jeova ej juõn jerammõn elap! Bõtab, ta elañe elap ad ailbãro kin makõtkit ko jej kõmmani jen ran ñan ran im kin men in ejeja lok ad jar? Lemnak kin ewi wãwen men in enaj jelet kõtan eo ad ibben Jeova. Kinke Jeova ej jimjerãik kij kajjojo, ej kõtõmene bwe jen liki e im lutõklok aolepen  burued ñan e ilo jar. Ekõnan bwe jen kwalok ñan e men ko jekõnan im men ko jej inebata kaki. (Ken. 3:5, 6; Pil. 4:6, 7) Eñin unin eaurõk bwe jen etale elañe jej aikwij kakõmmanman lok wãwen ad jar.

Ke juõn dri Kristian jodrikdrik etan Paul ear kalomõnlokjen kin wãwen an jar, ear kile bwe ear aikwij kakõmmanman lok jar ko an. * Ear ba, “Iar eliji ejja nan ko wõt ke iar jar ñan Jeova.” Ke Paul ear kõmman etale ko kin men in ilo Lajrak in Book ko Jet an Drolul In, ear lo bwe ewor enañin 180 jar ko kar jei ilo Baibel eo. * Dri karejar ro an Jeova ilo ien ko etto rar jab ãliklik in kwalok burueir. Paul ear ba: “Ilo aõ kar kalomõnlokjen kin wanjoñok ko an ro jet ilo Baibel eo, iar katak ñan kwalok men otemjej ñe ij jar. Men in ear jibañ iõ bwe in kebellok buruõ ñan Jeova. Kiõ elap aõ lõñliñ im mõnõnõ ñe ij jar im kebake e.”

Katak ko ilo “Ien Emõn”

Bar juõn jerammõn me Jeova ej letok ñan kij ej men ko jej katak jen Baibel eo. Ke jej kalaplok ad melele kin katak ko an Anij, ewor unin ad “al kin lõñliñ an buru.” (Ais. 65:13, 14) Bõtab, jej aikwij ekil im jab kõtlok bwe jabrewõt men enana en kadriklok ad itoklimo kin mol eo. Ñan wanjoñok, ad lale katak ko an ro rar buñ jen tõmak im rej jumae emaroñ kokkure lemnak ko ad im kabiloik kij jen katak ko raurõk im mol me Jeova ej litok ikijen “dri korijer e tiljek im meletlet” ilo “ien emõn.”—Matu 24:45-47.

Juõn jeid im jatid eman etan Anre, eo im ear karejar ñan Jeova iomin elõñ yiõ, ear jebwãbwe kinke ear bo ilo katak ko an ro rebuñ jen tõmak im rej jumae. Ear lemnak bwe ejjab kauwatata ñan an baj lale katak ko an dri jumae ro ilo Internet. Ej ba: “Ilo jinoin, iar reel kin katak ko an ro rar buñ jen tõmak. Kinke ear lap aõ riiti katak ko air, iar lemnak bwe ejimwe aõ kar ilok jen drolul eo an Jeova. Bõtab tokelik, ke iar bar lukkun etale nan in jumae ko air nae Dri Kennan ro an Jeova, iar kile joñan an dri jumae rein lukkun etao. Rar bõk jet melele ko an Dri Kennan ro an Jeova im ukoti ilo juõn wãwen etao. Kin men in, iar bar jino riiti book ko an Dri Kennan ro an Jeova im bed ilo kwelok ko. Ejjabto tokelik iar ajlok kinke iar etal jen mol eo.” Jej mõnõnõ bwe Anre ear bar jeblak ñan congregation eo.

Ro Jeid im Jatid

Ad burukuk ibben ro jeid im jatid ibelakin lal ej juõn jerammõn jen Jeova. (Sam 133:1) Eñin unin dri jilik Piter ear je: “Komin yokwe jimjãn jimjãten.” (1 Pit. 2:17) Kinke jej mõttan drolul in jimjãn jimjãtin eo ibelakin lal, ewor ro im rej einwõt jemed im jiner, im jeid im jatid ilo tõmak im rebojak in jibañ kij.—Mark 10:29, 30.

 Bõtab, jet ien jemaroñ inebata ibben ro jeid im jatid. Ñan wanjoñok, ebidrodro ad kõrraate ro jet kin likjap ko air im lemnak nana kin ir. Elañe men in ej walok ñan kij, jen kememej bwe Jeova ej yokwe dri karejar ro an meñe rej kõmman likjap. Bareinwõt, “elañe jej ba bwe ejelok jerawiwi iber, jej mõke moni kij, im mol e jab ilo kij.” (1 Jon 1:8) Jej aikwij kate kij ñan “meaniwõr ñõn dron, im jeorilok nana jen dron.”—Kol. 3:13.

Juõn jiroñ etan Ann, ilo jinoin ear jab kile aurõkin an kobalok ibben dri Kristian ro jein im jatin mae ien eo ear jako jen ir. Ear jebwãbwe jen congregation eo an Kristian einwõt nejin eo ejerwan ilo wanjoñok eo an Jisõs. Bõtab, tokelik ear kajimwe lemnak ko an im bar jeblak ñan congregation eo. (Luk 15:11-24) Ta eo Ann ear katak jen men eo ear iione? Ear ba: “Kiõ ke emwij aõ jeblaktok ñan drolul eo an Jeova, elap aõ kaurõk aolep ro jeiũ im jatũ meñe rej kõmman likjap. Kar mokta, emõkaj aõ kõrraate ir. Bõtab, kiõ ijamin kõtlok bwe jabrewõt men en bõpraik iõ jen aõ mõnõnõ ibben dri tõmak ro jeiũ im jatũ. Ainemõn im burukuk ibben dri tõmak ro jeid im jatid ej juõn jerammõn ejej uan. Eñin unin ejelok tokjen ad karmijeteiki im ilok ñan lal in.”

Ien Otemjej Kwon Kwalok Am Kamolol

Kejatdrikdrik eo ad bwe Ailiñ eo an Anij enaj namejelan aolep abañ ko an armij ro ej juõn jerammõn elap. Ke jaar katak kin kejatdrikdrik in, burued ear obrak kin kamolol. Jaar einwõt dri wia eo ilo parebõl eo an Jisõs me ear “wiakaki men ko otemjej an” bwe en wiaik “juõn bõr im elap wõnan.” (Matu 13:45, 46) Jisõs ear jab ba bwe tokelik ear driklok an dri wia eo kaurõk bõr eo. Eindrein, jen kwalok wõt ad kamolol kin kejatdrikdrik eo ad emmõn.—1 Tes. 5:8; Hib. 6:19.

Jen lale wanjoñok eo an Jean, eo me elõñlok jen 60 yiõ ko in an karejar ñan Jeova. Lilap in ej ba: “Ke iar konono ibben ro jet kin Ailiñ in Anij men in ear jibañ iõ bwe in drebij wõt kejatdrikdrik eo aõ. Ñe ij lo air mõnõnõ kin katak ko rej kab melele kaki kin Ailiñ in Anij, men in elukkun kamõnõnõik iõ. Aõ lo wãwen an mol eo kakõmmanman lok mour ko an dri katak Baibel ro ej kõmman bwe in lemnak im ba ibba make, ‘Ejelok emmõn in katak ko remol ij kwaloki ñan ro jet!’”

Elõñ un ko remmõn unin ad kamolol kin jerammõn ko relap me Jeova ej litoki. Bwelen jej iion matõrtõr, nañinmij, rittolok, bãrok, buromõj ñe juõn ej mij, im abañ kin an jabwe jããn, bõtab jejelã bwe mõttan jidrik men kein renaj jako. Iomin iroij eo an Ailiñ in Anij, jenaj bar lõñliñ kin jerammõn kein jaar etali im bareinwõt naj kabwe aikwij ko ad. Abañ ko jej kijenmij wõt kaki ilo ran kein renaj jako ilo jukjuk im bed eo ekãl.—Rev. 21:4.

Ilo tõre in, jen kakememej kij make kin men ko Anij ej kejerammõn kij kaki im kwalok ad kamolol einwõt kar dri jeje sam eo ear al: “O Jeova aõ Anij, elõñ men in bwilõñ, jerbal ko Kw’ar kõmõne, kab lemnok ko Am ñõn kim: re ban kilajrõk ir ñõn Kwe; elañe I naj kõnan kwalok im konono kaki, relõñ jen maroñ in bwini.”—Sam 40:5.

[Footnotes]

[Picture on page 18]

Emwij litok jerammõn kein ñan jibañ kij ilo ien ko rebin