Jodrikdrik ro, Ta eo Kom Naj Kõmõne ilo Mour ko Ami?

“Ein drein ij jekanunõk [bait], im jab einwõt dreñlok kõto.”​—1 KOR. 9:​26.

1, 2. Bwe kwon maroñ lo tõbrõk ilo am ridtolok, ta ko ej aikwij or ibem?

 ELAÑE dri jerakrõk ro rej jerak ñõn bar juõn ailiñ, ekkã air bõk ibeir juõn map im juõn compass. Map eo enaj jibõñ ir ñõn jela ia eo rej ber ie im ijo rej aikwij kaioklok. Compass eo enaj jibõñ ir bwe ren ber wõt ilo kooj in wa eo. Bõtab, enaj ejelok tokjen map eo im compass eo elañe rejaje ia eo rekõnan jibareklok. Bwe ren jab ejerakrõk bajjek ilo lomalo, rej aikwij jela ia eo rej ilok ñõne.

² Eindrein ñe kwoj ridtolok. Eor juõn map im juõn compass kwomaroñ kajerbali. Baibel eo ej juõn map im emaroñ jibõñ yuk ñõn jela ial eo ejime ñõn am kãlete ilo mour eo am. (Ken. 3:​5, 6) Elañe ejejit wãwen am kamineneik bõklikõt eo am jen katak ko ilo Baibel, emaroñ lukkun jibõñ yuk ñõn ber wõt ilo ial eo ejime. (Rom 2:​15) Bõklikõt eo am emaroñ jerbal einwõt juõn compass. Bõtab, bwe kwon lo tõbrõk ilo mour eo am, kwoj aikwij bareinwõt jela ia eo kwokõnan ilok ñõne. Kwoj aikwij kõmõn mejenkajik ko remõn.

3. Ta tokjen ko remaroñ walok ñe juõn ej kõmõni mejenkajik ko, einwõt an kar Paul kwalok kake ilo 1 Dri Korint 9:​26?

³ Dri jilik Paul ear kwalok tokjen ko remaroñ walok ñe juõn ej kõmõni mejenkajik ko im kate ñõn jibareki ke ear je: “Inem eindrein ña ij etõr, jab einwõt I toñõñ; ein drein ij jekanunõk, im jab einwõt dreñlok kõto.” (1 Kor. 9:​26) Elañe eor am mejenkajik, kwonaj jela ia eo kwoj ilok ielok. Ejjabto, kwonaj aikwij kõmõni bebe ko relap ilo mour eo am einwõt kin kabuñ, jerbal, mare, baamle, im ko eierlok wõt. Jet ien kin an lõñ bebe ko kwoj aikwij kõmõni, kwomaroñ jab jela ta eo kwon kõmõne ilo mour eo am. Bõtab, elañe kwoj kõmõn am bebe lok iman im ej berber ion katak ko remol ilo Nan in Anij, kwoban jebwãbwe im ilok ilo ial eo ebwir.​—2 Tim. 4:​4, 5.

4, 5. (a) Ta eo emaroñ walok elañe kwojjab kõmõn am mejenkajik? (b) Etke kõnan eo am ñõn kabuñburuen Anij ej aikwij jelet jokãlet ko am ilo mour?

⁴ Elañe kwojjab kõmõn am mejenkajik, jodrikdrik ro jet im dri kaki ro am renaj kajeoñ iun yuk bwe kwon kõmõni men ko rej lemnok bwe remõn ñõn yuk. Emol, meñe kwar kõmõn mejenkajik ko remõn, jet remaroñ wõnmanlok wõt im kwalok lemnok ko air. Ilo am roñjake men ko rej ba, kwon kajitõkin yuk mõke, ‘Mejenkajik kein im rej konono kaki renaj ke jibõñ iõ ñõn kememej Dri Kõmõnmõn eo aõ ilo ien emõn ridta, ak renaj ke bõpraik iõ jen aõ kõmõne men in?’​—Riit Ekklisiastis 12:1.

⁵ Etke kõnan eo am ñõn kabuñburuen Anij ej aikwij jelet jokãlet ko am ilo mour? Juõn un ej kinke Jeova ear letok aolep men ko remõn ñõn kij. (Jem. 1:​17) Ilo mol, kij aolep jej muri ñõn Jeova im jej aikwij kwalok ar kamolol. (Rev. 4:​11) Ejelok bar juõn men emõnlok kwomaroñ kõmõne ñõn kwalok am kamolol Jeova, ijellokin am kememej e ilo aolep mejenkajik ko am. Jen etale ta mejenkajik ko raurõk im ta ko kwoj aikwij kõmõni ñõn tõbari.

 Ta Mejenkajik ko Kwomaroñ Kõmõni?

6. Ta mejenkajik eo eaurõk kwomaroñ kõmõne, im etke?

⁶ Einwõt kar kwalok ilo katak eo lok, juõn mejenkajik eaurõk im kwomaroñ kõmõne ej ñõn kamol ñõn yuk mõke bwe men ko Baibel ej ba remol. (Rom 12:2; 2 Kor. 13:5) Jodrikdrik ro jet remaroñ tõmak ilo katak eo bwe jar waloktok jen menin mour ak katak ko jet rewan an kabuñ kinke ro jet rar jiroñ ir bwe eñin men ko rej aikwij tõmaki. Bõtab, kwojjab aikwij tõmak ilo men kein kinke ro jet rej kõnan bwe kwon tõmaki. Kwon kememej bwe Jeova ekõnan bwe kwon korijer ñõn e kin aolepen am lolãtãt. (Riit Matu 22:36, 37.) Jemeruij ilõñ ekõnan bwe kwon kalek tõmak eo am ion katak ko remol jen Baibel eo.​—Hib. 11:1.

7, 8. (a) Ta mejenkajik ko redrik kwomaroñ kõmõni im renaj kakajurlok tõmak eo am? (b) Ta eo enaj walok elañe kwoj tõbar jet ian mejenkajik kein am?

⁷ Ñõn kakajurlok tõmak eo am, etke kwojjab kõmõne jet mejenkajik ko redrik? Juõn mejenkajik kwomaroñ kõmõne ej ñõn jar kajjojo ran. Ñõn kõmõn bwe kwon jab eliji jar ko am, im ren alikar, kwomaroñ kalomõnlokjen ak je jet men ko rar walok ilo ran eo im kwokõnan kakobaiki ñe kwoj jar. Emõn ñe kwojjab jar wõt kin abañ ko kwoj iioni ak kin bareinwõt men ko kwoj mõnõnõ kaki. (Pil. 4:6) Bar juõn mejenkajik ej ñõn riiti Baibel eo ran otemjej. Kwar jela ke bwe elañe kwoj riiti emen peij kajjojo ran, kwomaroñ kajemlok aolepen Baibel eo iloan wõt juõn yiõ? * Sam 1:1, 2 ej ba: “Emõnõnõ armij eo . . . ej lõñliñ ilo kien Jeova; im ej lemnok kin kien eo ran im boñ.”

⁸ Mejenkajik eo kein kajilu kwomaroñ kõmõne ej ilo am kapoj juõn uak bwe kwon bõk kwonam ilo kajjojo kwelok ko an congregation. Ilo jinoin, kwomaroñ riiti uak eo ak juõn eon. Tokelik, kwomaroñ kõmõn am mejenkajik bwe kwon uak ilo nan ko am mõke. Emol,  kajjojo ien kwoj uak, kwoj lelok juõn menin jortak ñõn Jeova. (Hib. 13:15) Elañe emwij am tõbar jet ian mejenkajik kein, enaj laplok am kamolol Jeova im liki eo am enaj bar laplok, im kwonaj kiõ pojõk ñõn kõmõni mejenkajik ko relaplok.

9. Elañe kwojañin erom juõn dri kwalok nan, ta mejenkajik ko relap kwomaroñ kõmõni?

⁹ Ta mejenkajik ko relap kwomaroñ kõmõni? Elañe kwojañin jino bõk kwonam ñõn keañ kin nuuj eo emõn, kwomaroñ kõmõn bwe am erom juõn dri kwalok nan en am mejenkajik. Elikin am tõbar mejenkajik in emõn, kwomaroñ kate yuk bwe kwon erom juõn ej ekkeini im ebolemen ilo jerbal in kwalok nan im ejjab joko jen kwalok nan ilo kajjojo aliñ. Kwomaroñ bareinwõt katak kilen kajerbal Baibel eo ilo jerbal in kwalok nan. Ilo am kõmõne men in, enaj laplok am mõnõnõ kin jerbal in kwalok nan. Inem kwomaroñ kaitoklok ien am kwalok nan jen im ñõn im ak kate yuk bwe en or juõn am dri katak Baibel. Einwõt juõn eo ejañin baptais, mejenkajik eo emõntata kwomaroñ jibareke ej ilo am kate yuk bwe en tellokõm ñõn baptais im wujleplok mour eo am im erom juõn ian Dri Kennan an Jeova.

10, 11. Ta mejenkajik ko relap jodrikdrik ro emwij air baptais remaroñ jibareki?

¹⁰ Elañe kwoj juõn dri korijeran Jeova im emwij am baptais, erkein ej jet mejenkajik ko relap im kwomaroñ jibareki. Kwomaroñ jibõñ congregation ko ilo am kwalok nan ilo jikin ko ejeja an armij kwalok nan ie. Kwomaroñ bareinwõt kajerbal ien in kwoj kajur im ejmour wõt ñõn am bõk jerbal in auxiliary ak regular pioneer. Elõñ tausan pioneer ro remõnõnõ renaj jiroñ yuk bwe jerbal in pioneer ej juõn wãwen ekanuij emõn ñõn kememej Dri Kõmõnmõn eo am ilo ien emõn ridtõm. Erkein ej mejenkajik ko kwomaroñ tõbari ilo ijo kwoj jokwe ie. Congregation eo am enaj bareinwõt bõk tokjen ilo am kõtõbar mejenkajik kein.

¹¹ Eor jet bar mejenkajik ko im renaj tellok yuk bwe kwon jibõñ congregation ko jet. Ñõn wanjoñok, kwomaroñ bebe ñõn etal im jibõñ ilo jikin ak ailiñ ko elaplok aikwij ie. Kwomaroñ bõk kwonam ñõn jibõñ kalek Imõn Kwelok ko ak Ra ko ilo ailiñ ko jet. Kwomaroñ bareinwõt ilok im jerbal ilo Betel ak erom juõn mejinede. Emol, mejenkajik eo jinointata im eaurõk kwoj aikwij tõbare mokta jen am maroñ jibarek mejenkajik kein ej ilo am baptais. Elañe kwojañin baptais, kwon etale ta ko kwoj aikwij kõmõni bwe kwon tõbar mejenkajik in eaurõk ilo mour eo am.

Kõtõbar Mejenkajik eo ñõn Baptais

12. Ta un ko unin an jet jodrikdrik baptais, im etke un kein rejjab jime?

¹² Ewi wãwen am maroñ kemeleleik unleplep in an juõn armij baptais? Jet remaroñ lemnok bwe ej juõn men im emaroñ kejbãrok ir bwe ren jab jerawiwi. Bar jet rej lemnok bwe rej aikwij baptais kinke ro mõtair rej baptais. Im jet jodrikdrik rej baptais kinke rekõnan kabuñburuen jineir im jemeir. Mekarta, baptais ejjab juõn kon ak kalimur im ej bõprae yuk bwe kwon jab kõmõni men ko kwokõnan kõmõni ilo ittino, im jejjab aikwij baptais kin wõt an ro jet jibed kij ñõn kõmõne men in. Kwoj aikwij in baptais wõt elañe kwojela ta melelen an juõn erom juõn Dri Kennan ro an Jeova, im ilo ien eo kwoj kile bwe kwo pojõk im kwoj mõnõnõ in bõk erro in.​—Ekk. 5:​4, 5.

13. Etke kwoj aikwij baptais?

¹³ Juõn un eaurõk unin ar baptais ej kinke Jisõs ear kakien dri kalor ro an ñõn “kõmõn dri kalor . . .  im baptais ir.” Ear likit juõn joñok ilo an kar mõke baptais. (Riit Matu 28:19, 20; Mark 1:9.) Bareinwõt, baptais ej juõn buñten ne eaurõk ñõn ro im rekõnan bõk lomor. Elikin an kar kwalok kin wa eo Noa ear kaleke ñõn lomoren e mõke im baamle eo an jen Ibijliplip eo, dri jilik Piter ear ba: “Ilo wãwen men in kajeoñ emol, ej lomoren kom, aet baptais, . . . kin jerkakbiji eo an Jisõs Kraist.” (1 Pit. 3:​20, 21) Bõtab, ejjab melelen men in bwe baptais ej einwõt juõn kein jortoklik, im kwoj manjabpopo kake elañe eor jorran enaj walok  ñõn kwe. Ijo turãjet, kwoj baptais kinke kwoj yokwe Jeova im kwokõnan korijer ñõn e kin aolepen buruõm, aolepen am, im aolepen am lolãtãt im kajur.​—Mark 12:29, 30.

14. Etke jet rej jenliklik jen air baptais, ak ta nan in rejañ ko kwomaroñ bõki?

¹⁴ Jet rej jenliklik in baptais kinke remijõk elañe renaj bukwelok tokelik. Kwoj ke bõk iñjake rõt in? Elañe aet, eokwe mijõk rõt in ejjab nana. Emaroñ melelen bwe kwoj kile joñõn aurõkin erro eo ñe juõn ej erom juõn ian Dri Kennan ro an Jeova. Bõtab eor ke un ko jet unin am jab baptais? Bwelen kwojañin lukkun tõmak bwe mour iomin kien ko an Anij ej wãwen mour eo emõntata. Kin men in, kwomaroñ kõmõn jokãlet ko kin mour eo am elañe kwoj kalomõnlokjen kin men ko renaj walok ñõn ro rej kejekron kien ko jen Baibel eo. Ijo turãjet, bwelen kwoj yokwe kien ko an Anij ak kwojjab liki yuk mõke ñõn mour iomin kien kein. Ilo mol, men in emaroñ juõn kakõle emõn, kinke kwoj kwalok am etã buru. Baibel eo ej mõke ba bwe buruen aolep armij ro rejjab wãppen, ejela mon. (Jer. 17:9) Bõtab, kwomaroñ lo elap tõbrõk ko elañe kwoj ‘kanuij lale ial eo ekar ñõn An in Nan.’ (Riit Sam 119:9.) Jekron ta un ko im rej kõmõn bwe kwon jenliklik jen am baptais, kwoj aikwij bukot kilen ñõn jolok lemnok kein im rej kabañ yuk. *

15, 16. Ewi wãwen am jela bwe kwo pojõk ñõn baptais?

¹⁵ Ewi wãwen kwomaroñ jela bwe kwoj pojõk ñõn baptais? Juõn wãwen ej ilo am kajitõkin yuk mõke kin kajitõk ko einwõt: ‘Imaroñ ke kemeleleik ro jet kin katak ko rebiruru ilo Baibel eo? Ij ke bõk kwonaõ ilo jerbal in kwalok nan meñe jinõ im jema rejjab? Ij ke kate iõ bwe in ber ilo aolep kwelok ko an dri Kristian? Ij ke kememej jet ien ko im iar jumae ijjibed ko jen jodrikdrik ro jet? Inaj ke wõnmanlok wõt im jerbal ñõn Jeova meñe jema im jinõ im ro mõta renaj bwijrõk jen air korijer ñõn e? Inañin ke jar ñõn Jeova kin aurõkin kõtan eo aõ iben? Im emwij ke aõ wujleplok mour eo ñõn Jeova kin aolepen buruõ ilo jar?

¹⁶ Baptais ej juõn buñten ne im enaj ukot mour eo am, im ej juõn jokãlet ekanuij aurõk. Ebwe ke am ridto ñõn lemnok kin buñten ne in elap an aurõk? Am ridto ej kitibuj elaplok jen am baj kwalok wõt katak ko remõn ak kwalok uak ko remõn ilo ien kwelok ko. Ej kitibuj am kõmõn bebe ko rej berber ion melele eo am jen nan in kakabilek ko ilo Baibel. (Riit Dri Hibru 5:​14.) Elañe kwoj tõbar yiõ ko im eor am maroñ ñõn kõmõne men in, kwomaroñ bõk jerammõn eo elaptata ñõn jerbal ñõn Jeova kin aolepen buruõm, im mour ilo juõn wãwen ej kalikar bwe kwoj lukkun wujleplok mour eo am ñõn e.

17. Ta eo emaroñ jibõñ yuk bwe kwon kijenmij wõt iomin melejoñ ko kwoj iioni elikin am baptais?

 ¹⁷ Elikin wõt am baptais, enaj lukkun lap am kõnan korijer ñõn Jeova. Bõtab elikin jidrik ien, kwonaj iion abañ ko im renaj melejoñwe joñõn kajurin tõmak eo am. (2 Tim. 3:​12) Kwon jab bõk lemnok eo bwe kwe wõt kwoj aikwij kamarmire abañ kein. Kajitõk iben jemõm ak jinõm ñõn jibõñ. Kwon kebake ro reridto ilo congregation eo ñõn bõk jibõñ. Kwon drebij jimjera eo am iben ro rekõnan jibõñ yuk. Jab meloklok bwe Jeova ej kea kake yuk, im enaj lewoj ñõn yuk kajur eo kwoj aikwiji ñõn jelmae jabrewõt abañ ak melejoñ ko remaroñ walok.​—1 Pit. 5:​6, 7.

Ewi Wãwen Kwomaroñ Tõbar Mejenkajik ko Am?

18, 19. Ewi wãwen kwomaroñ bõk tokjen ko ilo am etale men ko kwoj kaurõki ilo mour eo am?

¹⁸ Meñe kwoj lukkun kate yuk, kwoj ke kile bwe ejelok ien ñõn am kõmõne men ko kwokõnan im kwoj aikwij kõmõni? Elañe kwoj iion men in, kwoj aikwij etale men ko raurõk ilo mour eo am. Ñõn wanjoñok: Bõk juõn bakõj im likit jet dreka ko rekilep iloan. Elikin, kwon kanne bakõj eo kin bok. Kiõ, bakõj eo eobrõk kin dreka im bok. Lutõklok kiõ men kein jen loan bakõj eo, ak kwon jab joloki. Elañe emwij, kwon kanne mokta bakõj eo kin bok, im elikin kwon kajeoñ in karollok dreka ko ñõn loan bakõj eo. Eor ke jikiir? Unin an ejelok jikiir ej kinke kwar kanne bakõj eo kin bok mokta.

¹⁹ Kwoj bar iion ejja wãwen in wõt ilo ien am karõke ien ko am. Elañe kwoj likit men ko einwõt kein kamõnõnõ ko mokta, enaj ejelok jikin men ko raurõk ilo mour eo am einwõt men ko rej ekkejellok ñõn ar korijer ñõn Jeova. Bõtab, elañe kwonaj lore nan in rejañ eo jen Baibel ñõn “melejoñ men ko relijiklok” ak men ko raurõk, kwonaj lo bwe enaj lõñ am ien ñõn kõmõni men ko an Ailiñ eo im bareinwõt menin kamõnõnõ ko.​—Pil. 1:​10.

20. Elañe kwoj inebata ak jino am berre ilo am kate yuk ñõn tõbar mejenkajik ko am, ta eo kwoj aikwij kõmõne?

²⁰ Ilo am kate yuk ñõn tõbar mejenkajik ko am, ekoba ñõn baptais, jet ien kwomaroñ inebata im jino am berre. Elañe kwonaj iion men kein, “kwon jolok inek eo am ion Jeova, im E naj baur yuk.” (Sam 55:22) Kiõ, eor juõn ial ebellok bwe kwon bõk kwonam ilo jerbal in eaurõktata im ekaitoktoklimo, jerbal in kwalok nan im katakin armij ro iaolepen lõl. (Jerb. 1:8) Kwomaroñ kãlet ñõn aluije an ro jet kõmõne jerbal in, ak kwomaroñ bõk kwonam. Kwon jab jenliklik jen am kajerbale maroñ im kabel eo am ñõn kowõnmanlok men ko an Ailiñ eo an Anij. Kwojamin ajlok kin jokãlet eo am ñõn korijer ñõn ‘Dri Kõmõnmõn eo am ilo ran ko ñe emõn ridtõm.’​—Ekk. 12:1.

[Kamelele eo itulal]

Ewi Wãwen Kwonaj Uak?

• Etke kwoj aikwij kõmõn am mejenkajik?

• Ta jet mejenkajik ko raurõk im kwomaroñ jibareki?

• Bwe kwon maroñ tõbar mejenkajik eo ñõn baptais, ta ko kwoj aikwij kõmõni?

• Ewi wãwen kwomaroñ tõbar mejenkajik ko am ilo am etale men ko kwoj kaurõki ilo mour eo am?

[Kajitõk ko ñan katak]

[Pija ilo peij 13]

Eor ke am mejenkajik ñõn riiti Baibel eo kajjojo ran?

[Pija ilo peij 15]

Ta eo enaj jibõñ yuk bwe kwon maroñ tõbar mejenkajik eo ñõn baptais?

[Pija ilo peij 16]

Ta eo kwomaroñ katak jen wanjoñok in?