Kajur eo an Anij Ej Kabukot Men ko Remulõl an Anij

‘Kajur eo an Anij ej kabukot men otemjej, aet, men ko re mũlõl an Anij.’​—1 KOR. 2:​10.

1. Ta jerbal eo an kajur eo an Anij Paul ear kwalok kake ilo 1 Dri Korint 2:​10, im ta kajitõk ko rej walok?

 JEJ lukkun kamolol kin jerbal ko an kajur eo an Jeova! Jeje ko ilo Baibel eo rej kwalok bwe kajur eo an Anij ej einwõt juõn dri jibõñ, juõn menin letok, juõn dri kennan, im juõn eo ej akwelap kin kij. (Jon 14:16; Jerb. 2:​38; Rom 8:​16, 26, 27) Dri jilik Paul ear kwalok bar juõn jerbal eaurõk an kajur eo an Anij ke ear ba, ‘Kajur eo an Anij ej kabukot men otemjej, aet, men ko re mũlõl an Anij.’ (1 Kor. 2:​10) Emol, Jeova ej kajerbal kajur eo an ñõn kalikar katak ko remulõl ilo Baibel eo. Elañe ejjab kin jibõñ eo jen kajur eo an Anij, jemaroñ ke kar lukkun melele kin karõk ko an Jeova? (Riit 1 Dri Korint 2:​9-​12.) Bõtab, eor jet kajitõk ko kin men in: Ewi wãwen kajur eo an Anij ej kabukot “men ko re mũlõl an Anij”? Wõn ro Jeova ear kwalok men kein remulõl ñõn ir ilo ebeben eo kein kajuõn? Ewi wãwen im wõn ro kajur eo an Anij ear kamakõt ir ñõn bukot men kein remulõl ilo ran kein ar?

2. Ta wãwen ko ruo kajur eo an Anij enaj kar jerbal?

² Jisõs ear kwalok ruo wãwen ko kajur eo an Anij enaj kar jerbal. Mokta wõt jen an kar mij, ear jiroñ dri jilik ro an, ‘Ri Jibañ eo, kajur eo  an Anij, eo Jema enaj jilkintok ilo eta, enaj katakin kom men otemjej, im kakememej kom kin aoleb men ko iar jiroñ kom kaki.’ (Jon 14:26, UBS) Kajur eo an Anij enaj kar jerbal einwõt juõn dri katakin im juõn dri kakememej. Einwõt juõn dri katakin, enaj kar jibõñ dri Kristian ro ñõn melele kin katak ko rar jab melele kaki mokta. Einwõt juõn dri kakememej, enaj kar jibõñ ir bwe ren kememej im jerbale ilo jime men ko emwij air kar katak kaki.

Ilo Ebeben eo Kein Kajuõn

3. Ta nan ko an Jisõs rej kwalok bwe jidrik kin jidrik enaj kar alikarlok “men ko re mũlõl an Anij”?

³ Elõñ katak ko rekãl Jisõs ear katakin dri kalor ro an kaki. Bõtab, ear lõñ wõt men ko rar aikwij katak. Jisõs ear jiroñ dri jilik ro an, ‘Elõñ men ko iba bwe In ba ñõn kom, a kom jab maroñ in bõki kiõ. A ñe Eo, kajur eo an Anij, Ej itok, E naj tel kom ñõn loan mol otemjej.’ (Jon 16:12, 13) Jisõs ear kwalok bwe kajur eo an Anij enaj jidrik kin jidrik kalikarlok katak ko remulõl an Anij.

4. Ilo ran in Pentekost eo ilo yiõ eo 33, ewi wãwen kajur eo an Anij ear juõn dri katakin im juõn dri kakememej?

⁴ Ilo ran in Pentekost eo ilo yiõ eo 33, kajur eo an Anij ear lutõklok ion dri Kristian ro 120 ke rar kwelok iben dron ilo Jerusalem. Ke men in ear walok, elõñ armij rar roñ im loe. (Jerb. 1:​4, 5, 15; 2:​1-4) Dri kalor ro rar konono ilo elõñ kajin ko kin “men ko relap an Anij.” (Jerb. 2:​5-​11) Ear jejit ien kiõ bwe en walok juõn men ekãl. Dri kanan Joel ear kanan kin ien in me kajur eo an Anij enaj kar lutõklok. (Joel 2:​28-​32, UBS) Armij ro ijo rar kamole jejit in kitien kanan in ilo juõn wãwen rar jab kõtõmene, im dri jilik Piter ear bõk tel eo ñõn kemelele kin men in. (Riit Jerbal 2:​14-​18.) Ilo wãwen in, kajur eo an Anij ear einwõt juõn dri katakin ilo an kalikar ñõn Piter bwe men eo ear walok ñõn dri kalor ro ear kajejit kitien kanan in. Bareinwõt, kajur eo an Anij ear juõn dri kakememej, kinke Piter ear jab baj eliji wõt nan ko an Joel ak ear bar eliji ruo eon ko jen buk in Sam an Devid. (Sam 16:​8-​11; 110:1; Jerb. 2:​25-​28, 34, 35) Men ko aolep armij ro rar roñ im loi ijo, emol bwe rar men ko remulõl an Anij.

5, 6. (a) Elikin Pentekost eo ilo yiõ eo 33, ta kajitõk ko raurõk rar aikwij uaki ikijen bujen eo ekãl? (b) Wõn ro rar bõkmantak kajitõk kein bwe ren uaki, im ewi wãwen rar maroñ kõmõni bebe ko?

⁵ Elõñ wõt men ko rar aikwij in kemeleleiki ñõn dri Kristian ro ilo ebeben eo kein kajuõn. Ñõn wanjoñok, ear lõñ kajitõk ko kin bujen eo ekãl im ear ijjino ilo ran in Pentekost eo. Bujen in ekãl ear ke ñõn dri Ju ro wõt im ro rar oktõk ñõn kabuñ eo an dri Ju ro? Dri ailiñ ko rar ke bar maroñ dreloñ ilo bujen in, im ekkabit kin kajur eo an Anij? (Jerb. 10:45) Eman ro jen ailiñ ko rar ke aikwij mwijmwij mokta im lore Kien Moses? (Jerb. 15:​1, 5) Kajitõk kein kar jet kajitõk ko raurõk. Kar aikwiji kajur eo an Jeova ñõn kabukot men kein remulõl. Bõtab, wõn ro kajur eo an Anij ear kamaroñ ir ñõn kabukot men kein?

⁶ Ear kamaroñ eman ro rej tel ñõn air bõkmantak kajitõk ko rar aikwij etali im bukot uakir. Piter, Paul, im Barnebas rar ber ilo kwelok eo iben kumi eo ej tel ilo Jerusalem ke rar etale abañ eo kin mwijmwij. Rar kwalok ñõn rein kin wãwen Jeova ear jerbal iben dri ailiñ ko meñe rar jab mwijmwij. (Jerb. 15:​7-​12) Kumi eo ej tel ear kõmõne juõn bebe elikin air kar etale abañ in ilo air kajerbale Jeje ko ilo kajin Hibru im jen jibõñ eo jen kajur eo an Anij. Rar kajelaik congregation ko kin bebe eo air ikijen air kar je letter ko.​—Riit Jerbal 15:25-​30; 16:​4, 5; Ep. 3:​5, 6.

7. Ewi wãwen kar kalikarlok men ko remulõl an Anij?

⁷ Uak ko ñõn kajitõk ko jet rar alikar ilo jeje ko rekakõrmol an Jon, Piter, Jemes, im Paul. Elikin an kar rerelok air je Jeje ko ilo Kajin Grik, ear jemlok an armij ro maroñ kwalok kanan ko im jelalokjen ko ilo kabwilõñlõñ. (1 Kor. 13:8) Kajur eo an Anij enaj ke wõnmanlok wõt im jerbal einwõt juõn dri katakin  im dri kakememej? Enaj ke wõnmanlok wõt im jibõñ dri Kristian ro ñõn kabukot men ko remulõl an Anij? Kanan ko rej kwalok bwe enaj.

Ilo Ien ko Eliktata

8, 9. Wõn ro renaj “romak” kin meletlet eo jen Anij ilo ien ko eliktata im ilo wãwen it?

⁸ Juõn enjel ear kanan kin ran ko eliktata: “Ro remeletlet renaj romak einwõt an mejatoto kanuij in meram. Im ro rar katakin elõñ armij bwe ren kõmmõni men ko rejimwe, renaj romak indrio einwõt iju. . . . [im jelalokjen eo emol enaj laplok, NW].” (Dan. 12:3, 4, UBS) Wõn ro renaj meletlet im wõn ro renaj romak? Jisõs ear kwalok jidrik in uak eo ilo parebõl eo an kin wit im tãõ ko. Ilo an kennan kin ‘jemlokõn lõl,’ ear ba nan kein: “Ien eo ro remõn re naj rabõlbõl im einwõt al ilo ailiñ in Jemeir.” (Matu 13:39, 43) Ilo kemelele in an, Jisõs ear kwalok bwe “ro remõn” rej “nejin ailiñ in lõñ,” me rej jitõñlok ñõn dri Kristian dri kabit ro.​—Matu 13:38.

⁹ Aolep dri Kristian dri kabit ro renaj ke “romak”? Ilo juõn wãwen, aet, kinke aolepeir rej bõk kwonair ilo jerbal in kwalok nan im kõmõn dri kalor ro, im ilo air kõkãtok dron ilo ien kwelok ko. Ilo wãwen in, dri kabit ro rej likit  juõn joñok ñõn aolep dri Kristian ro jet. (Zek. 8:​23, UBS) Kobalok iben men in, katak ko remulõl renaj alikarlok ilo ien ko eliktata. Kanan eo ilo buk in Daniel ear “nojak” mae ran ko eliktata. (Dan. 12:9, UBS) Ewi wãwen im wõn ro kajur eo an Anij enaj kamaroñ ir ñõn kabukot men kein remulõl?

10. (a) Wõn ro kajur eo an Anij ej kamaroñ ir ñõn air kwalok katak ko remulõl ilo ran ko eliktata? (b) Kemelele kin ewi wãwen kar kalikarlok melele ko kin tempel eo elap an Jeova ilo kõkkar?

¹⁰ Ilo ran kein, elañe ej ien ñõn kalikarlok melele ko kin juõn katak ilo Baibel eo, kajur eo an Anij ej jibõñ Kumi eo Ej Tel ilo Ra eo ilo New York me ej jutõk ikijen “dri korijer e tiljek im meletlet.” Rein rej etali melele kein remulõl im jar jab melele kaki mokta. (Matu 24:45; 1 Kor. 2:​13) Kumi eo Ej Tel Dri Kennan ro an Jeova rej etale katak kein iben dron im kõmõn oktõk ko ilo kemelele ko. (Jerb. 15:6) Men ko rej katak im loi, rej likiti ilo buk ko im kajededi bwe ro jet ren bõk tokjeir. (Matu 10:27) Ilo ar mour manlok wõt, emaroñ lõñ oktõk ko im rej menin aikwij. Elõñ kemelele ko remol kin oktõk kein.​—Lale box eo “Wãwen Kajur eo an Anij ej Kwalok Melelen Tempel eo ilo Kõkkar.”

Bõk Tokjen jen Jerbal eo an Kajur eo an Anij ilo Ran Kein

11. Ewi wãwen aolep dri Kristian ro ranin remaroñ bõk tokjen jen jerbal eo an kajur eo an Anij ilo an kwalok men ko remulõl?

¹¹ Aolep dri Kristian ro retiljek rej bõk tokjen jen jerbal eo an kajur eo an Anij ilo an kwalok men ko remulõl an Anij. Einwõt kar dri Kristian ro ilo ebeben eo kein kajuõn, jej katak im tokelik jerbali katak ko me kajur eo an Anij ej jibõñ kij bwe jen melele kaki. (Luk 12:11, 12) Jejjab aikwij ber ilo jikuul ko reutiej ñõn ar melele kin katak ko remulõl ilo Baibel eo me rej ber ilo buk ko. (Jerb. 4:​13) Ewi wãwen jemaroñ kalaplok melele eo ar kin men ko remulõl an Anij? Jen etale jet wãwen ko.

12. Ñãt eo jej aikwij jar kin kajur eo an Anij?

¹² Jar kin kajur eo an Anij. Mokta jen ar etale jet katak ko jen Baibel eo, jej aikwij mokta kajitõk kin kajur eo an Anij ñõn tel kij. Jemaroñ kõmõne men in meñe jej mõke iar ak jej boub. Ar kajitõk ilo etã buru enaj kamõnõnõik buruen Jemer ilõñ. Einwõt an kar Jisõs kwalok, Jeova enaj mõnõnõ in letok kajur eo an Anij elañe jej kajitõk kake.​—Luk 11:13.

13, 14. Ewi wãwen kapojõklok iman ñõn kwelok ko ej jibõñ kij kalaplok melele ko ar kin men ko remulõl an Anij?

¹³ Kapojõk ñõn kwelok ko. Kumi in dri korijer eo ej ‘najirik kij ilo ien emõn.’ “Dri korijer” in ej kajejit erro eo an ikijen an letok katak ko jen Baibel eo, im ikijen an karõk lajrõk in katak ko im kwelok ko. Eor un ko remõn unin air kajitõk iben aolep ro “jimjãn jimjãten” ilo congregation ko ibelakin lõl bwe ren etale jet melele ko. (1 Pit. 2:​17; Kol. 4:​16; Jud 3) Jej burukuk iben kajur eo an Anij elañe jej kate kij joñõn wõt ar maroñ ñõn lore nan in kakabilek ko rej litoki.​—Rev. 2:​29.

¹⁴ Ilo ien ar kapojõk ñõn kwelok ko, jej aikwij lali eon ko rej walok ilo katak eo im kajeoñ lali ewi wãwen rej jerbal ekkar ñõn katak eo. Ar kõmõne wãwen in, jidrik kin jidrik enaj kalaplok melele eo ar kin Baibel eo. (Jerb. 17:11, 12) Elañe jej lale eon kein emaroñ jibõñ  kij kememej kobbair ikijen jibõñ eo an kajur eo an Anij. Bareinwõt, jenaj kememeji ia ko eon kein rej ber ie ilo peij in Baibel eo, im enaj birurulok ar loi elañe jej aikwiji.

15. Etke jej aikwij bõk melele ko rekãl ilo magazine ak buk ko ar, im ewi wãwen kwomaroñ kõmõne men in?

¹⁵ Bõk melele ko rekãl. Jet buk ko jejjab etali ilo ien kwelok ko ar, bõtab kar kapoji bwe jen bõk tokjen jeni. Katak ko ilo magazine ko me jej lelok ñõn armij ro rar kapoji bareinwõt ñõn kij. Ilo lõl in elap an armij ro boub, ekkã ar aikwij kõtar juõn armij ak juõn men. Elañe jej bõkto bõktak juõn buk iber me jejañin riiti ak jar riiti jidrik, jemaroñ kajerbal ien in jej kõtar ñõn riiti. Jet rej bõk melele ko rekãl ikijen air roñjake katak ko ilo kein roñjake ko ñe rej etetal ak uwe ilo wa ko. Kar lukkun kõmõn etale ko im je katak ko ilo juõn wãwen ej kaitoklimoen ro rej riit, im aolep melele kein rej kalaplok kamolol eo ar kin katak ko kin Anij.​—Hab. 2:2, UBS.

16. Ta tokjen ko jej bõki ñe jej je im bukot melele ko kin kajitõk ko rej walok ilo lemnok ko ar?

¹⁶ Kalomõnlokjen. Ñe kwoj riiti Baibel eo ak buk ko rej berber ion Baibel eo, bõk ien ñõn lemnok. Ñe kwoj lukkun riiti nan ko im lemnok kaki, enaj or kajitõk ko renaj walok ilo lemnok eo am. Kwomaroñ je kajitõk kein im kõmõn etale ko kaki tokelik. Ekkã wõt ar kõnan kamulõllok ar katak ñe jej kõmõn etale ko kin men ko jej itoklimo kaki. Inem melele ko jej bõki rej erom mweiuk ko raurõk iber me jemaroñ kajerbali ñe jej aikwiji.​—Matu 13:52.

17. Ta eo kwoj katak kake ilo ien katak eo an baamle eo ak ñe kwoj katak ibõm mõke?

¹⁷ Karõk juõn ien kabuñ an baamle eo. Kumi eo Ej Tel Dri Kennan ro an Jeova ear rejañ kij aolep ñõn kajenolok juõn jota ak juõn ran kajjojo wik ñõn katak iber mõke ak katak iben baamle ko ar. Karõk eo ekãl kin ien kwelok ko ar ej kebellok juõn ien ñõn ar jerbale nan in kakabilek in. Ta eo kwoj katak kake ilo Ien Kabuñ an Baamle eo ilo jota? Jet rej riiti Baibel eo, kõmõn etale kin eon ko me ear or air kajitõk kaki ke rar riiti, im je kemelele ko rekaru ilo Baibel ko air. Elõñ baamle ko rej bõk ien ñõn kõmõn bwe baamle eo en jerbale men ko rej katak kaki. Jet bõran baamle ko rej kãlet katak ko me rej lemnok bwe baamle eo ej aikwij etali, ak katak ko me rej ekkejellok ñõn kajitõk ko, ak men ko baamle eo ear bõkmantak bwe ren etali. Ejelok berre bwe enaj bar or katak ko jet kwonaj kõnan etali ilo ran ko rej ber iman. *

18. Etke jejjab aikwij jenliklik jen ar katak kin katak ko remulõl ilo Nan in Anij?

¹⁸ Jisõs ear ba bwe kajur eo an Anij enaj einwõt juõn dri jibõñ. Inem jejjab aikwij jenliklik jen ar katak kin katak ko remulõl ilo Nan in Anij. Katak kein rej mõtõn ‘jelalokjen eo kin Anij’ me eaurõk, im Anij ej rejañ kij ñõn kabukoti. (Riit Jabõn Kennan Ko 2:​1-5.) Elap air kwalok kin “men ko jabrewõt Anij e ar [kapoji] ñõn ro rej yokwe E.” Ke jej kate kij ñõn kalaplok ar katak kin Baibel eo, kajur eo an Anij enaj jibõñ kij kinke “kajur eo an Anij ej kabukot men otemjej, aet, men ko re mũlõl an Anij.”​—1 Kor. 2:​9, 10.

[Kamelele eo itulal]

Ewi Wãwen Kwonaj Uak?

• Ta wãwen ko ruo kajur eo an Anij ej jibõñ kij ñõn kabukot “men ko re mũlõl an Anij”?

• Wõn ro kajur eo an Anij ear kamaroñ ir ñõn kalikar katak ko remulõl ilo kar ebeben eo kein kajuõn?

• Ewi wãwen kajur eo an Anij ej kalikarlok katak ko ilo ran kein ar?

• Ta eo kwomaroñ kõmõne ñõn bõk tokjen jen jerbal eo an kajur eo an Anij?

[Kajitõk ko ñan katak]

[Box ilo peij 22]

Wãwen Kajur eo an Anij Ear Kalikarlok Melelen Tempel eo ilo Kõkkar

Juõn ian “men ko re mũlõl an Anij” kar kwaloki ilo ebeben eo kein kajuõn ej bwe imõn kaber eo im tokelik tempel ko rar annañelok juõn men eaurõklok. Paul ear naetan men in “imõn kaber emol, eo [Jeova] e ar kalek im jab armij.” (Hib. 8:2) ‘Imõn kaber eo emol’ ej tempel eo elap ilo kõkkar, juõn karõk ñõn kebak Anij ilo kabuñ, me ej berber ion katok eo an Jisõs Kraist im jerbal in pris eo an.

‘Imõn kaber eo emol’ ear ejaak ilo yiõ eo 29 ke Jisõs ear baptais, im Jeova ear watõk e einwõt eo enaj kar erom juõn menin katok ewãppen. (Hib. 10:​5-​10) Elikin an mij im jerkakbiji, Jisõs ear dreloñ iloan Jikin Kwojarjar otem Kwojarjar ilo tempel eo ilo kõkkar im waloklok kin aurõkin menin katok eo an “iman mejen Anij.”​—Hib. 9:​11, 12, 24.

Ilo bar juõn eon, Paul ear jeje kin dri Kristian dri kabit ro bwe rej “edrek ñõn juõn tempel ekwojarjar ilo [Jeova].” (Ep. 2:​20-​22) Tempel in ekwojarjar ej ke ‘imõn kaber eo emol’ me Paul ear kwalok kake ilo letter eo an ñõn dri Hibru ro? Iomin elõñ yiõ ko, eñin kar lemnok eo an dri korijer ro an Jeova. Rar lemnok bwe emwij kar kapoje dri Kristian dri kabit ro ion lõl in ñõn air erom “dreka ko” me renaj ejaake tempel eo an Jeova ilõñ ilo kõkkar.​—1 Pit. 2:5

Bõtab, iturinlok 1971, ro uan kumi in dri korijer eo etiljek rar jino lemnok bwe tempel eo Paul ear konono kake ilo buk in Epesõs ejjab maroñ jitõñlok ñõn tempel eo elap an Jeova ilo kõkkar. Elañe ‘imõn kaber eo emol’ ear ejaakin dri Kristian dri kabit ro rar jerkakbiji, enaj kar walok elikin air kar jino jerkakbiji ilo ien ‘ber eo an Iroij.’ (1 Tes. 4:​15-​17) Bõtab, ilo an kar jitõñlok ñõn imõn kaber eo, Paul ear je: “[Imõn kaber] eo ej men in kõkar iomin ien kein.”​—Hib. 9:9.

Ilo air kar lukkun keiri eon kein iben eon ko jet ilo Baibel, ear alikar bwe tempel eo ilo kõkkar emwij kaleke karere im bwe dri Kristian dri kabit ro rejjab “dreka ko” rej ber ion lõl me rej ejaakin tempel eo ilo kõkkar. Ijellokin, dri Kristian dri kabit ro rej jerbal iloan worwor in tempel eo im jikin eo Ekwojarjar ilo tempel eo ilo kõkkar, ilo air “katok ñõn Anij kin wijtak ien otemjej.”​—Hib. 13:15.

[Pija ilo peij 23]

Ewi wãwen jemaroñ kalaplok ar melele kin “men ko re mũlõl an Anij”?