Anij Ej Kea kin Ritto Ro

EJJAB juõn men in bwilõñ bwe kajorrãn ritto ro elap an jededlok ilo ran kein. Elõñ yiõ ko remotlok, Bible eo ear kanan bwe ilo “ran ko eliktata” an jukjuk im bed in enana, armij ro renaj “anij lo burueir, . . . Im ro re jab yokwe ro nukiir.” (2 Timote 3:1-3) Ekkar ñan kanan ko ilo Bible, yokwe rot in kin ro nukiir ej alikar an diklok ilo ran kein.

Juõn oktak elap ikõtan ro rej kajorrãn ritto ro im Jehovah Anij, eñin bwe elap an kaorõk im kea kake ro reritto. Lemnak kin ewi wãwen men in ej alikar ilo Bible eo.

“Dri Ekajet an Ro Ejelok Leo Beleir”

Itoklimo eo an Jehovah Anij kin ritto ro ej alikar ilo Jeje ko ilo kajin Hebrew. Ilo Sam Ko 68:5, ñan wanjoñok, David ej naetan Anij “Dri ekajet an ro ejelok leo beleir,” ro me ekkã air ritto. * Ilo ukok in Bible ko jet, nan in “Dri ekajet” rej ukõte einwõt “ri jojomar,” im “ri kejbãrok.” Alikar, Jehovah ej kea kake kõrã ro ejako beleir. Ilo mol, Bible ej ba bwe elañe rej kajorrãn ir, illu eo an enaj bwil nae ir. (Exodus 22:22-24) Kõrã ro ejako beleir—im aolep ritto ro retiljek—raorõk ñan Anij im ri karejar ro an. Jabõn Kennan Ko 16:31 ej kwalok lemnak eo an Jehovah Anij im armij ro an ke ej ba: “Uõn in juõn armij ej belin aibujuij, elañe rej loe ilo ial in wãnik.”

Ejelok bwilõñ bwe, kautiej ritto ro kar  juõn mõttan elap ilo Kien eo Jehovah ear lelok ñan Ri Israel ro. Kar kakien Ri Israel ro: “Kwon jutõk im aber iman armij e uõn bõran, im kõñiajoik turin mejen eo e lõlap, im kwon mijõk am Anij: Ña Jeova.” (Livitikõs 19:32) Kin men in, ilo Israel kautiej kin ritto ro ear jelet kõtan eo an juõn armij ibben Jehovah Anij. Juõn armij ear jab maroñ ba bwe ear yokwe Anij elañe ear kajorrãn ritto ro.

Ri Christian ro rejjab bed iumin Kien Moses. Bõtab, rej bed iumin “kien Kraist,” eo elap an kar jelet mwiliir im lemnak ko air, ekoba air kwalok yokwe im itoklimo kin ro jemeir im jineir im ro reritto. (Dri Galetia 6:2; Dri Epesõs 6:1-3; 1 Timote 5:1-3) Im Ri Christian ro rej kwalok yokwe jab kinke kar kakien ir ñan air kõmmane ak kinke burueir ej kamakit ir. “Komin kanuij yokwe dron kin buruemi,” ri jilek Peter ear rejañ kake.​—1 Piter 1:22.

Ri kalor eo James ej letok un ko jet unin ad aikwij kejbãrok ro reritto. Ear je: “Men in kabuñ erreo im jab etton iman mejen ar Anij im Jemer, eñin, bwe armij en lolok ro atajinemjen im kõra ejoko beleir ilo air jorran, im bwe en drebij e im jab lipjinjin kin lõl in.” (Jemes 1:27) James ej kwalok juõn lemnak ekamãnãn buru. Ej kalikar ñan kij kin aorõkin armij rein ñan Jehovah.

Kin men in, ejjab bwe ñan ad baj kejbãrok kij jen ad kajorrãn ro reritto. Jen an eindein, jej aikwij kwalok ad itoklimo kake ir, ilo ad kõmman jerbal ko remõn im ewõr tokjen ñan ir. (Lale box eo “Yokwe ej Alikar kin Jerbal Ko,” ilo page 6-7.) James ear je: “Tõmak e jibil jen jerbal emij.”—Jemes 2:26.

Kainemõn Ir “ilo Ien Abañ ko Air”

Ewõr bar juõn men jemaroñ katak jen nan ko an James. Lale bwe James ear jiroñ Ri Christian ro ñan air lale kõrã ro ejako beleir “ilo air jorran.” Nan in Greek eo rej ukõte ijin einwõt “jorran” ej melelen buromõj, inebata, ak eñtan me rej walok jen ijjibed ko kin wãwen mour ko ad. Ejelok bere bwe elõñ ian ro reritto rej iion eñtan rot in. Jet rej buromõj kin air make iair. Ro jet rej buromõj kinke rejjab maroñ kalaplok air jerbal kin air ritto. Ro me rekijejeto ilo jerbal eo air ñan Anij remaroñ buromõj bareinwõt. Lemnak kin John, * juõn ri kwalok kin Ailiñ in Anij etiljek iumin elõñlok jen eñoul yiõ ko, im yiõ ko jilu eliktata ear bed ilo jerbal in kwalok nan full-time einwõt juõn special pioneer. Kiõ ej 80 jima an yiõ, John ej ba bwe jet ien ewõr jitõb in ebwer ibben. Ej ba: “Emakijkij aõ ememlokjen im kememej bwid ko iar kõmmani, elukkun lõñ bwid ko. Aolep ien ij lemnak bwe emaroñ kar emõnlok aõ jerbal.”

Rein remaroñ bõk kainemõn in jelã bwe Jehovah, meñe ewãppen, ejjab kõtmene bwe en wãppen men ko jej kõmmani. Meñe ej jelã bwid ko ad, Bible eo ej ba kin e: “Elañe Kwe, O Jeova, kwo naj kakõle jerawiwi ko, O Iroij, wõn e naj jutõk?” (Sam Ko 130:3) Aet, Jehovah ejjab kalimjek bwid ko ad ak ej lale ta eo ej bed ilo buruõd. Ekijkan ad jelã men in?

 King David—eo ear jerawiwi im kõmman elõñ bwid ko—ear jeje nan kein rekakõrmol an Anij, ilo Psalm 139:1-3: “O Iroij, kwar etale iõ, im kwo jelã wãweõ. Kwo jelã men otemjej ij kõmmõni; Jen ijo ettolok kwo jelã lemnak ko aõ otemjej. Kwoj lo iõ ñe ij jerbal ak kakkije; Kwo jelã makitkit ko aõ otemjej.” Ijin, nan ko rej ukõte einwõt “lo iõ” ilo jeje ko jinoin ej melelen ñan “liklik,” ilo ejja wãwen eo wõt juõn ri kallip ej kajenolok menoknok ko jen wheat ko. Iumin kakõrmol an Anij, David ej kamol ñan kij bwe Jehovah emaroñ jeorlok bwid ko ad im kememej jerbal ko ad remõn.

Jemed ilañ etiriamokake ej kememej—im ej kaorõk—jerbal ko ad remõn elañe jej tiljek wõt ñan e. Ilo mol, Bible eo ej ba bwe enaj watõke einwõt juõn jerbal ejjab wãnik elañe ej meloklok jerbal ko ad im yokwe eo jaar kwaloke kin etan.—Dri Hibru 6:10.

“Men ko Mokta Re Joko”

Bible eo ej kwalok bwe ear jab karõk eo an Anij kin armij bwe ren iion abañ ko kin air ritto. Kar elikin wõt an ro jemed im jined moktata jumae Ri Kõmanman eo  air, inem wãwen ko renana kin rittolok rar erom mõttan wãwen mour eo an armij. (Jenesis 3:17-19; Dri Rom 5:12) Wãwen in ejamin wõnmanlok ñan indio.

Einwõt ededelok an kar ba, elõñ ian wãwen ko renana jej iioni ilo ran kein—ekoba kajorrãn ro reritto​—rej kamol bwe jej bed ilo “ran ko eliktata” an jukjuk im bed in. (2 Timote 3:1) Ej karõk eo an Anij bwe en jolok men ko rej waloktok jen jerawiwi, ekoba wãwen ko renana kin rittolok im mij. Bible eo ej ba: “Im [Anij] E naj kõmõraik jen mejeir dren in kemjãlãl otemjej, im e naj ejelok bar mij, im re jamin bar liãjlol, ak jõñ, ak iñtan; bwe men ko mokta re joko.”​—Reveles̃õn 21:4.

Ilo lal eo ekãl an Anij, metak ko kin ad ritto renaj men ko an ien ko remotlok. Enaj eindein kin kajorrãn ro reritto. (Micah 4:4) Ro remij im rej bed ilo lemnak eo an Anij renaj bar mour, bwe ir bareinwõt ren maroñ bõk juõn ien emõn ñan air mour ñan indio ilo juõn paradise ion lal. (Jon 5:28, 29) Ilo ien eo, enaj lukkun alikar bwe Jehovah Anij ej kea kake ejjab ro reritto wõt ak aolep ro rej bokake e.

[Kamelele ko itulal]

[Bo̦o̦k/Pija ko ilo peij 6, 7]

Yokwe ej Alikar kin Jerbal Ko

Ilobwilijin Ri Kennan ro an Jehovah, elder ro rej bõk eddo eo ñan lale ritto ro. Rej kaorõk nan in kakkõl eo an ri jilek Paul: “Komin s̃eperd bwijin Anij ej ber ibemi.” (1 Piter 5:2) Lale ritto ro ilo wãwen ko remõn ak ekkar ej mõttan lale im kejbãrok bwij eo an Anij. Ak, ta eo ej kitibuji?

Ej aikwij wõr kijenmij im bõlen lolok elõñ alen im bwebwenato ko rekaemololo ñan lale aolep aikwij ko an juõn eo eritto. Bõlen ej aikwij jibañ kin kaikujkuj im karreo, kin ial ñan kwelok ko an Christian, kin readi Bible eo im book ko an Christian, im elõñ bar men ko jet. Ilo jabdewõt jikin ko, jej aikwij kõmman ilo jejjet karõk ko ewõr tokjeir im rekeie. *

Ta elañe, eo jeid im jatid maan ak kõrã ilo congregation eo ej lukkun aikwij jibañ ko ilo mõkaj, bõlen aikwij money ko? Mokta, enaj emõn ñe jej lale elañe ewõr ro nejiir ak ro jet nukiir me remaroñ jibañ. Menin enaj jejjet ibben ta eo ej ba ilo 1 Timote 5:4: “A elañe jabrewõt kõra ejoko belen, im eor nejin ak jibwin ak jiman, ren katak mokta kin lale ro nukiir, im ren emõn mwiliir kake, im nawõnan ro jemeir im jineir; bwe men in men in kabuñburuen iman mejen Anij.”

Bõlen eo eritto emaroñ aikwij jibañ ñan etale elañe emaroñ bõk jibañ ko jen kien eo ilo jikin eo. Bõlen jet ilo congregation eo remaroñ jibañ. Ñe ejelok juõn ian wãwen kein eo eritto emaroñ bõk jibañ jeni, elder ro remaroñ lale elañe eo eritto ej maroñ bõk jibañ jen congregation eo. Ilo jet ien, wãwen in kar kõtlok ilo congregation eo ilo ebeben eo kein kajuõn, kinke ri jilek Paul ear jeje lok ñan ri jerbal eo mõttan Timothy: “Ren kãlet kõra ejoko belen drer jõbne jiljinoñoul yiõ, im kar juõn wõt belen, Im en buñbuñ kin an jerbal ko remõn; elañe emwij an kakajiririik ro nejin, im lale ro drua maijet, im kwoli neen ro remõn, im jibõñ ro rej iñtan, im niknik ilo jerbal emõn otemjej.”—1 Timote 5:9, 10.

[Kamelele eo itulal]

[Pija eo ilo peij 5]

Dorcas ear kwalok an kea kake kõrã ro ejako beleir me rej bed ilo aikwij.​—Jerbal 9:36-39.