Jim̦we im Bõd: Juon Jokãlõt Kwõj Aikuj Make Kõm̦m̦ane
Jokãlõt ko jej kõm̦m̦ani ilo mour ko ad renaaj tõll̦o̦k kõj ñan lo m̦õn̦õn̦õ ilo mour ko ad ak jaab. Jeova Anij ejel̦ã men in. Eñin unin ekõn̦aan bwe jen mour ekkar ñan kien ko an.
Jeova ekõn̦aan bwe jen lo juon mour eaenõm̦m̦an im elem̦õn̦õn̦õ.
“Ña Jeova am̦ Anij, Eo ewõr tokjãn An katakin eok, Eo ej tõl eok ilo ial̦ eo em̦m̦an kwõn etal ie. O el̦aññe kwaar eo̦roñ kien ko Aõ! Innem am̦ aenõm̦m̦an enaaj kar ãinwõt juon reba, im am̦ wãnõk ãinwõt n̦o ko in lo̦meto.”—Aiseia 48:17, 18.
Kõnke ej ri-Kõm̦anm̦an eo ad, Anij ejel̦ã wãween mour eo em̦m̦antata ñan kõj. Ej kũr kõj ñan l̦oore naanin tõl ko an kõnke renaaj bõktok tokjãn ko rem̦m̦an ñan kõj. Ñe jej l̦oore kien ko an Anij, jeban aikuj l̦õmn̦ak im lale el̦aññe jokãlõt ko ad renaaj tõll̦o̦k kõj ñan ad lo tõprak im jeraam̦m̦an. Jenaaj aolep iien kõm̦m̦ane jokãlõt eo ejim̦we me enaaj tõll̦o̦k kõj ñan ad lo aenõm̦m̦an im m̦õn̦õn̦õ.
Jeova ejjab kajjitõk bwe jen kõm̦m̦ani men ko jejjab maroñi.
“Kien eo ij lewaj ñan kom̦ rainin ejjab pen im kom̦ naaj maroñ tõpare.”—Duteronomi 30:11, UBS.
Bwe jen maroñ mour ekkar ñan kien ko an Anij, jemaroñ aikuj kõm̦m̦an oktak ko ilo wãween ad l̦õmn̦ak im kõm̦m̦an. Meñe ãindein, ak ejjab l̦e jãn joñan men ko Jeova ej kajjitõk bwe jen kõm̦m̦ani. Kõnke ej ri-Kõm̦anm̦an eo ad, ejel̦ã ewi joñan maroñ ko ad. Im ilo ad kal̦apl̦o̦k ad jel̦ã kajjien Jeova, jenaaj lo bwe “kien ko an rejjab eddo.”—1 Jon 5:3.
Jeova ej kallim̦ur bwe enaaj jipañe ro rej kããlõt ñan mour ekkar ñan kien ko an.
“Ña Jeova, am̦ Anij, Inaaj jibwe peim̦ anmoon̦ im ba ñan eok, ‘Kwõn jab mijak; Inaaj jipañ eok.’”—Aiseia 41:13.
Ewõr ad maroñ ñan mour ekkar ñan kien ko an Anij kõnke enaaj jipañ kõj. Emaroñ letok jipañ ikijjeen Naan ko an, Baibõl̦ eo, bok eo me ej kõketak kõj im letok kõjatdikdik.
Elõñ milien armej ro ipel̦aakin lal̦ in rar lo bwe mour ko aer ear em̦m̦anl̦o̦k itok wõt jãn aer mour ekkar ñan kien ko ilo Baibõl̦. Kwõmaroñ ke kal̦apl̦o̦k am̦ jel̦ã kõn naanin kakapilõk ko ilo Baibõl̦? Kwõmaroñ jinoe ikijjeen am̦ etale brochure eo ej pedped ioon Baibõl̦ etan M̦õn̦õn̦õ kõn Mour ñan Indeeo! ilo jw.org/mh. Im ejjel̦o̦k on̦ããn bok in. Ilo brochure in, ewõr katak kein ie:
-
Ewi Wãween Baibõl̦ eo Emaroñ Jipañ Eok?
-
Baibõl̦ Ej Letok Juon Kõjatdikdik Em̦m̦an
-
Kwõmaroñ Ke Lõke Baibõl̦ Eo?
Ilo am̦ etale Naanin Anij, Baibõl̦ eo, kwõnaaj kile bwe ejjab juon bokin etto me ejjel̦o̦k tokjãn ilo raan kein ad. Ijello̦kun an ãindein, jemaroñ lõke Baibõl̦ eo kõnke ‘em̦õj kapene . . . im em̦ool im jim̦we’ ñan indeeo. (Sam 111:8) Ad l̦oore kien ko ilo Baibõl̦ ikijjeen ta ko rejim̦we im rebõd, ej wãween mour eo em̦m̦antata. Ijoke, Anij eban iuun kõj bwe jen l̦oore kien ko an. (Duteronomi 30:19, 20; Joshua 24:15) Men in ej juon jokãlõt me kõj kajjojo jej aikuj make kõm̦m̦ane.
