Bwebwenato eo ilo Duteronomi 22:25-27 ejjab ñan kwal̦o̦k bwe ewõr ruõn l̦eo, kõnke ealikkar bwe ewõr ruõn kadede. Kien in ej ñan kam̦ool bwe ear ejjel̦o̦k ruõn kõrã eo. Jen lale eoon ko jet.

Eoon ko jet m̦oktal̦o̦k rej kwal̦o̦k kõn juon em̦m̦aan me ear babu ippãn juon kõrã me ear pojakin m̦areik bar juon em̦m̦aan, ilo “jikin kweilo̦k eo.” An kõm̦m̦ane men in, ewõr ruõn kõn an lejãn, kõnke kar watõk kõrã eo me ear pojakin m̦are ãinwõt juon eo em̦õj an m̦are. Ak ta kõn kõrã eo? Ear ‘jab lam̦õj, ilowaan jikin kweilo̦k’ eo. Ñe ear kõm̦m̦ane men in, ro jet ren kar roñ an lam̦õj im jipañe. Bõtab ear jab lam̦õj. Kõn men in, ear bõk kun̦aan ilo lejãn, im erro jim̦or im wõr rueer.​—Dut. 22:23, 24.

Kien eo ej bar kwal̦o̦k kõn juon wãween emaroñ bar wal̦o̦k: “A el̦aññe m̦aan eo ej lo jiroñ eo em̦õj an kallim̦ur ñan l̦eo enaaj an imel̦aaj, im m̦aan eo ej kam̦akokoik lio im babu ippãn; innem l̦eo wõt en mej. A kwõn jab kõm̦m̦an jabdewõt ñan jiroñ eo; ejjel̦o̦k ruõn jiroñ eo bwe en mej. Bwe ãinwõt ñe juon armej ej jutak n̦ae ri-turin im m̦ane, ãindein men in. Bwe ke l̦eo ear loe ilo mel̦aaj, jiroñ eo em̦õj an kallim̦ur ear lam̦õj, im ekar ejjel̦o̦k ri-lo̦mo̦o̦ren.”​—Dut. 22:25-27.

Ilo wãween in, ri-ekajet ro rar tõmake kõrã eo. Etke? Remaroñ ba bwe rej tõmake kõnke “ear lam̦õj, im ekar ejjel̦o̦k ri-lo̦mo̦o̦ren.” Innem ear jab bõk kun̦aan ilo lejãn. Bõtab, l̦eo ewõr ruõn kõn an kar ko̦kkure lio im kõn an lejãn kõnke ear “kam̦akokoik lio im babu ippãn,” kõrã in me ear pojakin m̦are.

Ijoke, meñe el̦ap wõt an kar kien in kwal̦o̦k kõn an ejjel̦o̦k ruõn kõrã eo, ejim̦we an kar eoon in kwal̦o̦k bwe ewõr ruõn l̦eo kõn an ko̦kkure lio im an lejãn. Innem jemaroñ lõke bwe ri-ekajet ro rar “lukkuun etale” men eo ear wal̦o̦k im kõm̦m̦an juon pepe me ej ekkar ñan naanin tõl ko Anij ear kaalikkar im ãlijil̦o̦k ñan er.​—Dut. 13:14, UBS; 17:4, UBS; Ex. 20:14, UBS.