Ekabũrom̦õjm̦õj bwe ke iar rũttol̦o̦k im juon jo̦dikdik, ear jino jako aõ epaake Jeova. Ippa, ekar ãinwõt ñe elukkuun l̦ap an ri-jikuul̦ ro m̦õtta anemkwõj in kõm̦m̦ani kõn̦aan ko aer, im iar bar kõn̦aan bõk kain anemkwõj rot in. Iar l̦õmn̦ak bwe el̦ap an pen kien ko an jema im jinõ im kien ko an juon Kũrjin, im bwe men ko jej kõm̦m̦ani ilo ad karejar ñan Jeova el̦ap jerbali. Meñe iar jab pere bwe em̦ool an Jeova pãd, ak ear jino m̦õjn̦o̦l̦o̦k kõtaan eo aõ ippãn.

Ijoke, ear jab jako aõ bõk kun̦aõ ilo jerbalin kwal̦o̦k naan, bõtab ekar lukkuun dik aõ bõk kun̦aõ. Im ilo iien ko ij etal im kwal̦o̦k naan, ikõn jab kõppojakl̦o̦k im̦aan, kõn men in ear pen aõ jino bwebwenato ippãn ro jet ak wõnm̦aanl̦o̦k wõt im bwebwenato ippãer. Itok jãn men in, iar jab lo tõprak im m̦õn̦õn̦õ ilo aõ kwal̦o̦k naan, im men in ear kõm̦m̦an bwe en l̦apl̦o̦k an jab em̦m̦an ippa kwal̦o̦k naan. Ikõn kajjitõk ippa make, ‘Ewi wãween an juon maroñ kõm̦m̦ane men in aolep wiik kab aolep allõñ?’

Ilo iien eo ear 17 aõ iiõ, ekar wõr juon kõn̦aan ekajoor ippa ñan anemkwõj. Kõn men iar bõk men ko m̦weiõ, etal jãn m̦weo m̦õm̦mim, im em̦m̦akũt  ñan Australia. Ekar lukkuun pen ñan jema im jinõ ke iar em̦m̦akũt. Erro ear inepata, bõtab rar l̦õmn̦ak bwe inaaj wõnm̦aanl̦o̦k wõt im karejar ñan Jeova.

Ilo Australia, kõtaan eo aõ ippãn Jeova ear l̦apl̦o̦k an m̦õjn̦o̦l̦o̦k. Ear jino jo̦kkutkut aõ etal ñan iien kweilo̦k ko. Iar m̦õttãiki jo̦dikdik ro rar ãinwõt ña, me rar m̦õn̦õn̦õ in etal im kweilo̦k juon boñ, innem boñõn eo tok juon rej etal im idaak im disco ilo club ko. Il̦ak l̦õmn̦ak likl̦o̦k kõn mour eo aõ ilo kar tõre eo, ij kile bwe iar pãd ilo m̦ool eo im iar bareinwõt m̦õttan lal̦ in, bõtab ear jab kon̦ aõ pãd ilo juon iaaer.

Enañin ruo iiõ tokãlik, iar iioone juon jeid im jatid kõrã me iar jel̦ãl̦o̦k kajjien ium̦win jidik iien, im ilo ejjel̦o̦k an jel̦ã ear kõm̦m̦an aõ jino l̦õmn̦ak kõn wãween aõ kõjerbale mour e aõ. Iar jokwe ippãn l̦alem jiroñ ro me rejjañin m̦are, im kõmar kũrtok em̦m̦aan eo ej lol̦o̦k eklejia im kõrã eo pãleen etan, Tamara, ñan jokwe ippemmim ium̦win juon wiik. Ilo iien ko l̦eo ippãn ej poub kõn men ko an eklejia, Tamara ej jol̦o̦k an iien im m̦õn̦õn̦õ im limo ippemmim. Elukkuun kar em̦m̦an ippa. Ear juon eo elukkuun ettã im epidodo kepaake im kõnnaan ippãn. Iar lukkuun bwilõñ ñan lo bwe juon eo me ekajoor kõtaan eo an ippãn Jeova, emaroñ bar lukkuun kalimomo.

Tamara ear juon eo ekam̦õn̦õn̦õ im ekãitoktoklimo. Yokwe eo an ñan m̦ool eo im jerbalin kwal̦o̦k naan, ear kõm̦akũt eõ ñan bar kõn̦aan bõk ejja eñjake rot in. Ear lukkuun m̦õn̦õn̦õ ke ej lel̦o̦k aolepen an ñan Jeova, ijoke ñan ña iar jab m̦õn̦õn̦õ ke iar lel̦o̦k jidikin wõt aõ ñan Jeova. An em̦m̦an wãween an l̦õmn̦ak im an lukkuun m̦õn̦õn̦õ ear l̦ap an jelõt eõ. Joñak eo an ear jipañ eõ ñan kile juon men em̦ool ilo Baibõl̦, eñin bwe: Jeova ekõn̦aan bwe jen aolep karejar ñan e “ilo m̦õn̦õn̦õ” im “kõn al in lañlõñ.”—Sam 100:2, UBS.

Iar kõn̦aan bõk ejja lañlõñ eo wõt ear wõr ippãn Tamara, bõtab bwe in bõk lañlõñ in, iar aikuj in kõm̦m̦an jet oktak ko rel̦l̦ap. Ear bõk iien, bõtab tokãlik iar maroñ jino kõm̦m̦an wõnm̦aanl̦o̦k ko reddik. Iar jino kõppojakl̦o̦k im̦aan ñan iien kwal̦o̦k  naan im iar akjel̦õri bainier jãn iien ñan iien. Men in ear jipañ eõ ñan kadikl̦o̦k aõ ikkũm̦kũm̦ im ñan peranl̦o̦k. El̦ak ikkutkutl̦o̦k aõ kar kõjerbal Baibõl̦ eo ilo jerbalin kwal̦o̦k naan, ear em̦m̦anl̦o̦k ippa kwal̦o̦k naan. Ejjabto tokãlik, iar akjel̦õri bainier aolep allõñ.

Iar jino kõn̦aan epaake ro ekajjo iiõ ko aer jãn doon me em̦m̦an aer kõm̦m̦an wõnm̦aanl̦o̦k ko ilo m̦ool eo, im rej bareinwõt m̦õn̦õn̦õ ilo aer jerbal ñan Jeova. Joñak ko aer rem̦m̦an rar jipañ eõ ñan etali ta ko el̦ap aõ kaorõki ilo mour eo aõ im ñan jino riit Baibõl̦ kajjojo raan. Ekar jino l̦apl̦o̦k wõt an em̦m̦an ippa kwal̦o̦k naan, innem tokãlik iar jino jerbal ãinwõt juon rekũl̦ar bainier. Ej kab tõn kein kajuon ium̦win elõñ iiõ, ij kab bar eñjake aõ m̦õn̦õn̦õ im jokwane ilo eklejia eo.

Juon iiõ tokãlik, iar iioone Alex, juon eo elukkuun jouj me ej yokwe Jeova im jerbalin kwal̦o̦k naan. Ear jerbal ãinwõt juon rijjipañ ilo eklejia im jijino de iiõ in an l̦akkar bainier. Alex ear bar kwal̦o̦k naan ium̦win 7 l̦o̦k ñan 8 allõñ ilo juon jikin el̦ap aikuj ri-kwal̦o̦k naan ie ilo Malawi. Ilo kar ijin, ear pãd ippãn mijinede ro me rar likũt juon joñak elukkuun em̦m̦an ñan e im rar rõjañe bwe en wõnm̦aanl̦o̦k wõt im likũt men ko an Aelõñ eo m̦oktata ilo mour eo an.

Ilo 2003 eo, kõm̦ro Alex ar m̦are, im kõm̦ro ar wõnm̦aanl̦o̦k wõt im jerbal in full-time ilo kwal̦o̦k naan jãn kar tõre in tok ñan kiiõ. Elõñ men ko relukkuun em̦m̦an kõm̦ro ar katak, im Jeova ear kõjeraam̦m̦an kõm̦ro ilo elõñ wãween ko.

Ilo 2009 eo, kar kũr kõm̦ro ñan bõk jerbalin mijinede ilo Timor-Leste, juon aelõñ edik ilo Indonesia. Ilo tõre eo, kõm̦ro ear bwilõñ, kijooror, im ikkũm̦kũm̦ ilo juon wõt iien. Im l̦alem allõñ tokãlik, kõm̦ro ear pãd ilo Dili, capital eo an jikin in.

Ke kõm̦ro ear em̦m̦akũtl̦o̦k ñan Timor-Leste, kõm̦ro ear aikuj in kõm̦m̦an oktak ko rel̦l̦ap ilo wãween am̦ro mour. Kõm̦ro ear aikuj in jel̦ã kõm̦m̦an  ukoktak ñan men ko rekããl ãinwõt m̦anit eo, kajin eo, m̦õñã ko, im wãween mour ilo jikin in. Ilo jerbalin kwal̦o̦k naan, ekkã am̦ro lo armej ro rejeram̦õl, edik jel̦ãl̦o̦kjen̦ ko ippãer ak rar jab jikuul̦, im ro me rar iioon matõrtõr. Kõm̦ro ear bar lo elõñ ro rar iioon apañ ko ikijjeen ãjmour im rar lukkuun bũrom̦õj kõn wõt tarin̦ae im lãj im kowadoñ. *

Jerbalin kwal̦o̦k naan ear lukkuun em̦m̦an! Ñan waanjoñak, juon iien iar iioone juon leddik me ebũrom̦õj im 13 an iiõ me etan in Maria. * Ear mej jinen jejjo iiõ ko m̦oktal̦o̦k, im ejeja an kar lo jemãn. Ãinwõt bar elõñ iaan ajri ro dettan wõt e, Maria ear jab jel̦a ta eo ekõn̦aan kõm̦m̦ane ilo mour eo an. Ij keememej juon iien ke ear jañ im lutõktok bũruon ñan eõ. Ijoke, iar jab mel̦el̦e ta ko ej ba tok kõnke ijjañin kar lukkuun jel̦ã kajin eo an. Iar jar ñan Jeova im kajjitõk ippãn bwe en jipañ eõ kõkajoor e, innem iar jino riitil̦o̦k eoon ko rekaenõm̦m̦an ñan e. Im ium̦win jejjo iiõ ko tokãlik, iar lo an m̦ool eo ukot wãween an Maria l̦õmn̦ak, paotokin, im aolepen mour eo an. Ear peptaij, im kiiõ ewõr ro ej katak Baibõl̦ ippãer. Rainin, ewõr juon an Maria baam̦le ekilep me ej ejaakin armej ro an Jeova im ej eñjake an rein yokwe e.

Jeova ej kõjeraam̦m̦ane jerbalin kwal̦o̦k naan eo ilo Timor-Leste. Meñe enañin aolep ri-kwal̦o̦k naan ro rej kab peptaij ium̦win joñoul iiõ ko remootl̦o̦k, ak elõñ iaaer rej jerbal ãinwõt bainier ro, rijjipañ ro ilo eklejia, ak em̦m̦aan ro rej lale eklejia. Ro jet rej jerbal ilo im̦õn ukok eo im rej jipañ kõm̦m̦ani m̦õñã ko ilo kõkkar ilo kajin ko ilo aelõñ in. Iar lukkuun m̦õn̦õn̦õ ke iar roñ aer al ilo iien kweilo̦k ko, lo aer ettõñdikdik, im aõ kar maroñ lo aer epaakel̦o̦k Jeova.

Mour ilo Timor-Leste ear lukkuun oktak jãn mour ilo Australia, meñe ãindein ak ejjel̦o̦k bar juon mour el̦apl̦o̦k an kam̦õn̦õn̦õ. Ewõr iien ko kõm̦ro ear uwe ilo juon bus jiddik eobrak kõn armej, ekoba ek m̦õrã im elõñ leen wõjke ko jãn jikin wia m̦õñã eo. Ilo jet raan, kõm̦ro ekõn katak Baibõl̦ ilo juon em̦ jiddik elukkuun bwil me lal̦in m̦weo kar bwidej im ekar wõr bao ko rej ettõrto ettõrtak. Meñe ear jab pidodo, ak ekkã aõ kar l̦õmn̦ak im ba, ‘Wow elukkuun em̦m̦an!’

Ilo aõ reilikl̦o̦k, el̦ap aõ kam̦m̦oolol bwe jema im jinõ rar kate er joñan wõt aer maroñ ñan katakin eõ ial̦ ko an Jeova im aer kar jipañ eõ, ekoba ilo iien ko reppen ke iar juon jo̦dikdik. Iar maroñ kam̦ool naan ko ilo Jabõn Kõnnaan 22:6. M̦am̦a im Baba jim̦or rej buñbũrueer kõn kõm̦ro Alex; erro ej m̦õn̦õn̦õ in lo an Jeova kõjerbal kõm̦ro. Jãn 2016 eo tok ñan kiiõ, kõm̦ro ej pãd ilo jerbalin lol̦o̦k eklejia ko ilo jikin ko rej pãd ium̦win ra eo an Australasia.

Epen ñan aõ tõmak bwe ear wõr juon iien iar ñate jerbalin kwal̦o̦k naan. Ak kiiõ elukkuun em̦m̦an ippa jerbal in! Ij kile bwe jekdo̦o̦n ta ko jej iiooni ilo mour ko ad, ak m̦õn̦õn̦õ eo em̦ool ej itok wõt jãn ad karejar ñan Anij kõn aolepen bũruod. Aet, 18 iiõ ko remootl̦o̦k in aõ kar karejar ñan Jeova ippãn Alex rej iiõ ko me rekam̦õn̦õn̦õtata ilo mour e aõ. Kiiõ ij kab lukkuun mel̦el̦e im lo an m̦ool naan ko an ri-jeje sam eo Devid ñan Jeova, ke ear ba: “Ro otemjej rej lõke Eok [renaaj] lañlõñ; [renaaj] al kõn lañlõñ indeeo, . . . ro rej yokwe Etam̦ renaaj lañlõñ ilo Eok.”—Sam 5:11.