KATAK 24

Ta M̦ool eo kõn Enjel̦ Ro?

PLAY

Jeova ekõn̦aan bwe jen katak kõn baam̦le eo an ilañ. Baam̦le in ej kitibuj enjel̦ ro, ro me Baibõl̦ ej n̦aetaer “ro nejin Anij.” (Job 38:7) Ta eo Baibõl̦ ej ba kõn enjel̦ ro? Ewi wãween aer jelõt armej ro? Im aolep enjel̦ ro rej ke m̦õttan baam̦le eo an Anij?

1. Wõn enjel̦ ro?

Jeova ear kõm̦anm̦an enjel̦ ro m̦okta jãn an kar kõm̦anm̦ane lal̦ in. Ãinwõt e, rej jetõb ro me jejjab maroñ loe er, im rej jokwe ilañ. (Hibru 1:14) Elõñ milien enjel̦ ro, im kajjojo iaaer eoktak wãween ko ippãer jãn doon. (Revelesõn 5:11) Rej bõkl̦o̦k “Naan ko An [Jeova] im pokake ainikien naan ko An.” (Sam 103:20) Ilo tõre ko etto, jet iien Jeova ear jilkinl̦o̦k enjel̦ ro ñan bõkl̦o̦k ennaan ko an im ñan rejetake im lo̦mo̦o̦ren armej ro an. Rainin, enjel̦ ro rej tõl Kũrjin ro ñan armej ro me rekõn̦aan katak kõn Anij.

2. Wõn Setan im tim̦on̦ ro an?

Ewõr jet enjel̦ ro rar jab dãpij wõt aer tiljek ñan Jeova. Enjel̦ eo m̦oktata ear jum̦ae, ej eo me “etan Tepil̦ im Setan, eo ej m̦on̦e aolepen lal̦ in.” (Revelesõn 12:9) Setan ear kõn̦aan irooj ioon ro jet, kõn men in ear kapo Adam im Iv im tokãlik ear bar kapoik enjel̦ ro jet bwe ren kobal̦o̦k ippãn ilo an jum̦ae. Etan enjel̦ rein me rej ri-jum̦ae ej tim̦on̦ ro. Jeova ear kaddiwõj er jãn lañ ñan ijin ioon lal̦, im naaj ko̦kkure er.—Riit Revelesõn 12:9, 12.

3. Ewi wãween an Setan im tim̦on̦ ro kajjioñ tõlpilouk kõj?

Setan im tim̦on̦ ro rej tõlpilouk elõñ armej ikijjeen anijnij, juon m̦anit me armej rej kõm̦m̦ane ilo aer kajjioñ kõnono ippãn jetõb ro. Ñan waanjoñak, jet armej rej jibadekl̦o̦k ri-jedjed iju ro, ri-bubu ro, ro rej kõmel̦el̦eik kõn ilju im jekl̦aj, im ri-m̦adm̦õd ro. Ewõr bar jet rej pukot kein taktõ ko ak uno ko me rej kitibuj jerbalin anijnij ak kajjetõbtõb. Im em̦õj bar m̦on̦e armej ro ñan tõmak bwe remaroñ kõnono ippãn ro remej. Bõtab Jeova ej kakkõl kõj ñan jab jibadekl̦o̦k “ro [me] tim̦on̦ rej pãd ippãer, ak ro ri-m̦adm̦õd.” (Livitikõs 19:31) Ej letok naanin kakkõl in ñan kõjparok kõj jãn Setan im tim̦on̦ ro. Rein rej ri-kõjdat ro an Anij, im rekõn̦aan ko̦kkure kõj.

KAM̦WILAL̦L̦O̦K AM̦ MEL̦EL̦E

Katak kõn men ko rem̦m̦an enjel̦ ro rej kõm̦m̦ani, men ko rekauwõtata kõn anijnij, im wãween ad maroñ kõjparok kõj jãn Setan im tim̦on̦ ro.

4. Enjel̦ ro rej jipañ armej ro ñan katak kõn Jeova

Enjel̦ ro an Anij rejjab kwal̦o̦k naan ñan armej ro. Meñe ãindein, ak remaroñ tõl ri-karejar ro an Anij ñan armej ro me rekõn̦aan katak kõn E. Riit Revelesõn 14:6, 7, innem bwebwenato kake kajjitõk kein:

Etke jej aikuji jipañ eo an enjel̦ ro ñan kwal̦o̦k naan?
Kwõj ke bõk kõketak ilo am̦ jel̦ã bwe enjel̦ ro remaroñ tõl eok ñan armej ro me rej aikuj jel̦ã kõn Baibõl̦ eo? Etke kwõj ba men in?

5. Kõjekdo̦o̦n im jum̦ae anijnij

Setan im tim̦on̦ ro rej ri-kõjdat ro an Jeova. Rej bareinwõt ri-kõjdat ro ad. Riit Luk 9:38-42, innem bwebwenato kake kajjitõk in:

Ta ko tim̦on̦ ro rej kõm̦m̦ani ñan armej ro?

Jejjab kõn̦aan kõtl̦o̦k bwe tim̦on̦ ro ren del̦o̦ñ ilo mour ko ad. Riit Duteronomi 18:10-12, innem bwebwenato kake kajjitõk kein:

Ewi wãween an tim̦on̦ ro kajjioñ jelõt mour ko ad im kõnono ippãd? Ta jet iaan jerbalin anijnij ko ekkã aer kõm̦m̦ani ilo jikin eo kwõj jokwe ie?
Kwõl̦ak lale ekkar im jim̦we ke an Jeova kõmo̦ ad bõk kun̦aad ilo jerbalin anijnij? Etke kwõj ba men in?

Kõjo̦e PIJAIN ALWÕJ eo, innem bwebwenato kake kajjitõk kein:

PIJAIN ALWÕJ: “Oppose the Devil” (5:02)

Kwõl̦ak lale em̦m̦an ke an kar niñniñ eo nejin Palesa kõn̦ake kein kõjparok ak karwaan eo? Etke kwõj ba men in?
Ta eo Palesa ear aikuj in kõm̦m̦ane bwe en bõk kõjparok jãn tim̦on̦ ro?

Jãn iien ko etto tok ñan raan kein, Kũrjin ro rem̦ool rej jum̦ae tim̦on̦ ro. Riit Jerbal 19:19 im 1 Korint 10:21, innem bwebwenato kake kajjitõk in:

Etke elukkuun aorõk ñan am̦ julo̦ki im ko̦kkuri jabdewõt men me ej ekkejell̦o̦k ippãn anijnij?

6. Bõk anjo̦ ioon Setan im tim̦on̦ ro an

Setan ej irooj ioon tim̦on̦ ro. Bõtab Maikõl, arkenjel̦ eo me ãt eo juon ej Jesus, ej irooj im tõl aolep enjel̦ ro retiljek ilañ. Ewi joñan kajoorin Maikõl? Riit Revelesõn 12:7-9, innem bwebwenato kake kajjitõk kein:

Wõn ro el̦apl̦o̦k aer kajoor? Maikõl im enjel̦ ro an ke, ak Setan im tim̦on̦ ro an?
Ta am̦ l̦õmn̦ak, ri-kal̦oor ro an Jesus rej aikuj ke mijak Setan im tim̦on̦ ro an?

Kwõmaroñ bõk anjo̦ ioon Setan im tim̦on̦ ro an. Riit Jemes 4:7, innem bwebwenato kake kajjitõk in:

Ewi wãween am̦ maroñ kõjparok eok make jãn Setan im tim̦on̦ ro?

JET ARMEJ REJ BA: “Ejjel̦o̦k jorrããn ñan iukkure keem ak mijjin im alwõje pijain alwõj ko me rej kwal̦o̦k kõn anijnij. Rej kein iukkure bajjek wõt.”

Etke ekauwõtata l̦õmn̦ak rot in?

TARLEP IN KATAK EO ILO TUKADU

Enjel̦ ro retiljek rej jipañ kõj. Ak Setan im tim̦on̦ ro an rej ri-kõjdat ro an Jeova, im rej kõjerbale anijnij ñan m̦on̦e im tõlpilouk armej.

Ãlij

Ewi wãween an enjel̦ ro an Jeova jipañ armej ro ñan katak kõn E?
Wõn Setan im tim̦on̦ ro an?
Etke kokõn̦aan kõjparok eok make jãn anijnij?

Kar kadedel̦o̦k katak in ilo:

Mejãnkajjik

Lale el̦aññe ewõr ippam̦ jabdewõt men me ej ekkejell̦o̦k ippãn anijnij, innem jar im kajjitõk ippãn Jeova bwe en lewaj mãlõtlõt bwe kwõn jel̦ã ta eo kwõn kõm̦m̦ane.

Mejãnkajjik ko jet:

Your other goal