Noa, im baam̦le eo an, kab menninmour ko rar del̦o̦ñ ilowaan wa eo. Jeova ear kiil kõjãm eo, im ear jino an wõt. Joñan an kar wõt mijeljel, wa eo ear jino eppepe. Ejjabto, aolepen lal̦ in ear jakol̦o̦k kõn dãn. Aolep armej ro renana me rar pãd nabõjin wa eo, rar mej. Ak Noa im baam̦le eo an rar mour kõnke rar pãd ilowaan wa eo. Baj pijaikl̦o̦k m̦õk aer em̦m̦õn̦õn̦õ kõn aer kar pokake Jeova!

Ear wõt mijeljel ium̦win 40 raan im 40 boñ, innem ear bõjrak an wõt. Dãn eo ear jino an dikl̦o̦k. Ãliktata, wa eo ear eo̦tõk ioon juon tol̦. Ak ear ibwiji wõt aolep jikin. Kõn men in, Noa im baam̦le eo an rar jab maroñ diwõj jãn wa eo ilo iien eo wõt.

Jidik kõn jidik, ear etal im lukkuun pããt im m̦õrã bwidej. Noa im aolepen baam̦le eo rar pãd ilowaan wa eo ium̦win juon jim̦a iiõ. Innem Jeova ear ba ñan er bwe ren diwõjl̦o̦k jãn wa eo ñan nabõj. Ke rar diwõj, ear ãinwõt ñe rar pãd ilo juon lal̦ ekããl. Baam̦le in ear lukkuun kam̦m̦oolol Jeova kõn an kar lo̦mo̦o̦ren er, innem rar kwal̦o̦k aer kam̦m̦oolol ilo aer kar kõm̦m̦an aer menin katok im katok ñane.

Jeova ear m̦õn̦õn̦õ kõn menin katok eo aer. Innem ear kallim̦ur bwe ejjãmin bar bõktok juon ibwijleplep ñan ko̦kkure aolepen lal̦ in. Ear kõm̦m̦ane juon iia ak rainbow bwe en kõkal̦l̦en kallim̦ur in an. Ej kab kein kajuon in an kar wal̦o̦k juon iia. Em̦õj ke am̦ ellolo iia?

Innem Jeova ear ba ñan Noa im baam̦le eo an bwe ren neji im koobrak lal̦ in.