Revelesõn 6:1-17
-
L̦aam̦ eo ej kõpel̦l̦o̦k m̦okta jiil̦ ko jiljino (1-17)
-
Eo ej iuwe ioon kidia emouj ej bõk anjo̦ (1, 2)
-
Eo ej iuwe ioon kidia ebũrõrõ ej jol̦o̦k aenõm̦m̦an (3, 4)
-
Eo ej iuwe ioon kidia ekilmeej ej bõktok ñũta (5, 6)
-
Eo ej iuwe ioon kidia eu kilin, etan ej Mej (7, 8)
-
Bõtõktõkin ro kar m̦an er ej pãd ium̦win lokatok eo (9-11)
-
Juon m̦akũtkũt lal̦ elukkuun l̦ap (12-17)
-
6 Iar lo an L̦aam̦ eo kõpel̦l̦o̦ke jiil̦ eo kein kajuon iaan jiil̦ ko jimjuon, im iar roñ ainikien juon iaan enjel̦ ro emãn im ainikien ear ãinwõt jourur, im ej ba: “Itok!”
2 Im iar reilo̦k im lo juon kidia emouj, im eo ej jijet ioon ej jibwe juon lippo̦n̦; im kar lel̦o̦k ñane juon kũrawũn, im ilo an ilo̦k ej bõk anjo̦, im ej etal wõt ñan an kadedeikl̦o̦k an bõk anjo̦.
3 Im ke L̦aam̦ eo ej kõpel̦l̦o̦ke jiil̦ eo kein karuo, iar roñ an enjel̦ eo kein karuo ba: “Itok!”
4 Innem bar juon kidia ebũrõrõ ej jãdetok, im eo ej jijet ioon kar lel̦o̦k ñane juon jãje ekilep, im kar kõmaroñe bwe en jol̦o̦k aenõm̦m̦an jãn lal̦ kõnke armej ren m̦an doon.
5 Im ke L̦aam̦ eo ej kõpel̦l̦o̦ke jiil̦ eo kein kajilu, iar roñ an enjel̦ eo kein kajilu ba: “Itok!” Im iar reilo̦k im lo juon kidia ekilmeej im eo ej uwe ioon ej jibwe juon kein bo̦un.
6 Innem iar roñ juon ainikien ej itok jãn ibwiljin enjel̦ ro emãn im ej ba: “On̦ããn juon joñak* in wiit ej juon denariõs* im on̦ããn jilu joñak* in baarl̦i ej juon denariõs; im jab ko̦kkure olive weil̦ ko im wain ko.”
7 Ke L̦aam̦ eo ej kõpel̦l̦o̦ke jiil̦ eo kein kãmen, iar roñ ainikien an enjel̦ eo kein kãmen ba: “Itok!”
8 Im iar reilo̦k im lo juon kidia eu kilin, im etan eo ej jijet ioon ej Mej, im Lõb* ej l̦oore. Im kar lel̦o̦k ñan er maroñ ioon juon m̦õttan emãn in lal̦ bwe ren m̦anm̦an kõn juon jãje eaetok, kõn ñũta, kõn nañinmej ko rekauwõtata, im kõn menninmour ko rawiia ioon lal̦.
9 Innem ke L̦aam̦ eo ej kõpel̦l̦o̦ke jiil̦ eo kein kal̦alem, iar lo ium̦win lokatok eo bõtõktõkin armej ro kar m̦an er kõn wõt naan eo an Anij im kõn men eo rar kwal̦o̦k kake.
10 Rein rej lam̦õj ilo juon ainikien el̦ap im ba: “Irooj Bõtata, eo eokkwõjarjar im m̦ool, enaaj ewi toon am̦ jab idenon̦e kõn bõtõktõkim im am̦ jab ekajete ro rej jokwe ioon lal̦?”
11 Innem kar lel̦o̦k nuknuk mouj ñan er kajjojo, im kar ba ñan er bwe ren kakkije ium̦win bar jidik iien, m̦ae iien euñ oran ri-karejar ro m̦õttaer im rej jeier im jatier, ro naaj pojakin m̦an er ãinwõt kar er.
12 Im ke ij lo an L̦aam̦ eo kõpel̦l̦o̦ke jiil̦ eo kein kajiljino, ear lukkuun l̦ap an m̦akũtkũt lal̦; im al̦ ear oktak im kilmeej ãinwõt nuknuk kilmeej emijel iden kõm̦m̦an jãn kool̦an menninmour,* im allõñ ear oktak im ãinwõt bõtõktõk,
13 im iju ko ilañ rar wõtlo̦k ñan lal̦ ãinwõt an fig ko rejjañin kalo wõtlo̦k jãn juon wõjke fig ñe ej lukkuun l̦ap an ekkõtoto.
14 Im lañ ear jakol̦o̦k, ãinwõt ñe rej limi juon bok lemlem, im tol̦ otemjej im ãne otemjej kar kõm̦akũti jãn ijoko jikier.
15 Innem, kiiñ ro an lal̦, ri-utiej ro, ri-tõlin jarin tarin̦ae ro, ro rem̦weiie, ro rekajoor, ri-kõm̦akoko otemjej, im ro otemjej ranemkwõj, rar kũttiliek ilo ro̦ñ ko ilo tol̦ ko im ibul̦õn dekã ko rekkillep ilo tol̦ ko.
16 Im elõñ alen aer ba ñan tol̦ ko im dekã ko rekkillep: “Kom̦win pineje kõm im n̦ooje kõm jãn mejãn Eo ej jijet ioon tũroon eo im jãn illu eo an L̦aam̦ eo,
17 kõnke raanin illu eo aer el̦ap emoottok, im wõn emaroñ el̦l̦ã im mour jãne?”
Footnotes
^ Ak “quart.” Juon joñak in wiit me eddon ej tarrin 1.5 lb.
^ Jããn jelba in Rom. Lale “Denariõs” ilo Kõmel̦el̦e Ko.
^ Ak “jilu quart.” Jilu joñak in baarl̦i me eddon ej tarrin 4 lb.
^ Ak “Hedis,” ej kõkkar kake lõb eo libõn aolep armej. Lale “Lõb” ilo Kõmel̦el̦e Ko.
^ Emaroñ kool̦an koot.
