“Masaahiti a Yehova yaanawaawacera saana kahi atthu yaavira paahi, masi ciicammo yaanaawacera saana ilapwa caka. Nihuku nimoca, athiyana Saahiti a Yehova yeehaniya Elaine yeemenle wakariinyuni yahovaha ilapwa caka mikatthe. Vano khula ikwaha yaaviraaka nno nipuronno, ilapwa caka caanaapheela urwaa wakariinyuni wiira civahiye mikatthe.

“Cahovira myeeri cinci ilapwa caka cipheelaka uvahiya mikatthe ni mi kipheelaaka uwoopana mwaha vakaani Masaahiti a Yehova. Masi akaapheela ukhala ukati mwinci kawoopanaka mwaha. Mi kahopiiha myaakha 70 ni akaacuwela citthu Masaahiti a Yehova caakupalyaaya. Ukhala wiira kahoona ufaalusu mmakereeca cinci, mi kahoopuwela wiira phataari usoma Ibiiblya veekha.

“Uyo ukatyuuyo, mi kanwoonaka Masaahiti a Yehova mapuro makhwaawe o wasittatti yalalyeeraka niikariinyu. Ayo ciicammo yaanawaawacera saana atthu yaavira. Khula ikwaha yaakohaaka itthu, ayo yankaakhula yavarelaka nteko Ibiiblya. Iyo itthwiiyo yaanaakiriha utepa waakhuluvela.

“Nihuku nimoca, athiyana Saahiti a Yehova yeehaniya Elaine yahokikoha: ‘Nnaakupali wiira inama cikhanle iparakha inivahilyaawe Nluku?’ Mi kahowaakhula kiiraka: ‘Iyee, kinaakupali!’ Vano yahokisomela Isaiya 11:6-9. Iyo phi itthu yaakiirihile upheela wiitthuca Ibiiblya. Masi nanlelo akaapheela waakhelela ilivuru co Masaahiti a Yehova.

“Ukhuma nno nihukunno, mi kahancera uwoopana mwaha saana ayo athiyanaayo wamoca naawannyaya yeehaniya Brent. Ayo yahokikurumica usoma Ibiiblya ukhuma ilivuru ya Matewus mpaka Miteko wiira kicuwele ukhala nkristau eekhweeli isiyani. Ni mi kahopanka iyo itthwiiyo. Woohipica, mi kahotthuna wiira Brent ni Elaine yancere ukisomiha Ibiiblya. Iyo itthwiiyo yiirannyeele mwaakha wo 2016.

“Mi wankitteela nrima cinene nlattu wo wiitthuca itthu inhimyaaya Ibiiblya. Uvira waya ukati vakaani, mi kahopattisiya. Vano kirina myaakha 79 ni kinaasukhuru cinene nlattu woophwanya ittiini yeekhweeli. Yehova hokicaaliha niiparakha yoopanka mphantte waapoovwaawe anonswalela.”