Romanos 13:1-14
13 Qkyaqilx il tiʼj tuʼn t-xi qniman qeju in che kawin qibʼaj. Porke mintiʼwtlo qe aj kawil noqwit nya tuʼn Dios. Kykyaqil qeju in che kawin qibʼaj, a Dios o txi qʼonte kyoklen.
2 Porke alkye in jaw tin tibʼ kyiʼj qeju in che kawin, in jaw tin tibʼ tiʼjju o kubʼ t-ximen Dios. Ex alkye in jaw tin tibʼ tiʼjju o kubʼ t-ximen Dios, kbʼel qʼoʼn tkastiw.
3 Porke qe xjal in che bʼinchan bʼaʼn mintiʼ in che xobʼ kye qeju in che kawin, oʼkx qeju in che bʼinchan nya bʼaʼn. Tuʼntzunju, qa nya taja tuʼn t-xobʼa kye, kukx bʼinchama aju bʼaʼn ex che yolil bʼaʼn tiʼja.
4 Porke in che ajbʼen aj kawil tuʼn Dios tuʼn ttena bʼaʼn. Pero qa in bʼinchana nya bʼaʼn, xobʼa kywitz, porke ma tzaj qʼoʼn kyoklen tuʼn tkubʼ kyqʼoʼn kykastiw xjal. Ajbʼel qe te Dios tuʼn tkubʼ kyqʼoʼn kykastiw* xjal in che bʼinchan nya bʼaʼn.
5 Tuʼntzunju, il tiʼj tuʼn t-xi kynimane qe aj kawil, nya oʼkx tuʼnju in che xobʼe tuʼn tkubʼ qʼoʼn kykastiwe, sino ax ikx tuʼnju in tqʼamaʼn kyanmiye qa bʼaʼn.
6 Tuʼntzunju, ilxix tiʼj tuʼn t-xi kychjoʼne impuesto, porke in che ajbʼen aj kawil tuʼn Dios tuʼn kyajbʼen kye xjal.
7 Kyqʼonxe kye tkyaqilju il tiʼj tuʼn tchjet: kychjonxe impuesto, teju in qanin impuesto; kychjonxe tributo, teju in qanin tributo; alkye tajbʼil tuʼn tok respetarin, che respetarine te; ex alkye tajbʼil tuʼn tok qʼoʼn toklen, kyqʼonke toklen.
8 Miʼn che kyaj tene toj kʼas, oʼkx kykʼujlam kyibʼe kyxolxe. Porke alkye in nok tkʼujlaʼn tukʼil, in japun twi ley tuʼn.
9 Porke aqeju mandamyent, «miʼn kubʼ tbʼinchaʼna aj pajil, miʼn bʼiyuna, miʼn tzʼelqʼana, miʼn pon tkʼuʼja tiʼjju at te juntl» ex alkyexku juntl mandamyent, jaku txi qʼamet kyukʼil yol lu: «Kʼujlama qe txqantl ik tzeʼn in nok tkʼujlan tibʼa».
10 Porke qa at tkʼujlabʼil jun xjal, mlay tzʼok tbʼinchaʼn nya bʼaʼn tiʼj tukʼil. Tuʼntzunju, tuʼn tkʼujlabʼil jun xjal, in japun twi ley tuʼn.
11 Kybʼinchame tkyaqilju ma txi nqʼamaʼne kyeye, porke ojtzqiʼn kyuʼne toj alkye tyemp in qo anqʼin jaʼlo. Ma pon or tuʼn tel kywatle, porke mas nqayin taʼ qʼij tuʼn qklet jaʼlo twitzju tej qokslaʼn.
12 Ya chʼinx tkubʼaj qonikʼen ex ya chʼinx qsqix. Tuʼntzunju, miʼn kubʼ qbʼinchaʼn jun tiʼ at toklen tukʼil qlolj ex qqʼonk armadura qiʼj aju in najbʼen te qʼijtl.
13 Qo bʼet toj tumel ik tzeʼn in qo bʼet te qʼijtl. Miʼn qo bʼet kyoj fiesta jatumel in che ikʼ xjal tibʼaj, miʼn qo kʼan nim qʼeʼn, miʼn qo yaẍin, miʼn qo ok ik tzeʼn qeju mintiʼ in tzaj kychʼixwi tiʼj nya bʼaʼn,* miʼn qo qʼojin ex miʼn tzaj txʼaʼl tiʼj qkʼuʼj tiʼj juntl.
14 Sino, qqʼonk Qajaw Jesucristo qiʼj* ex miʼn qo ximen tuʼn tkubʼ qbʼinchaʼn aju nya bʼaʼn tajbʼil qchibʼjal.
Tqanil
^ Moqa «tuʼn tkubʼ tyekʼin tqʼoj kyiʼj».
^ Aju yol griego asélgueia tzalu toj plural taʼ. Qʼonka twitza tiʼj diccionario.
^ Moqa «qkanoʼmil tiʼj tmod Qajaw Jesucristo».
