Juan 9:1-41
9 Tej in bʼet Jesús, til jun xinaq* moẍ atxix tej tul itzʼj.
2 Xi kyqanin tdiscípulo te: «Xnaqʼtzal,* ¿alkye ma bʼinchan il tuʼn tul itzʼj xinaq lu moẍ? ¿A, moqa aqe tman?».
3 Xi ttzaqʼweʼn Jesús kye: «Mintiʼ ma bʼinchan xinaq lu il ex mintiʼ ma che bʼinchan tman il, pero ma bʼaj jlu tuʼn tok kykeʼyin xjal tiʼ jaku bʼant tuʼn Dios.
4 Il tiʼj tuʼn t-xi qbʼinchaʼn taqʼun tzaj samante weye akux at qʼij, porke aj ttzaj qlolj mlay bʼant tuʼn taqʼunan jun xjal.
5 Akux atine tzalu twitz txʼotxʼ, aqine spikʼun kye xjal».
6 Tej tbʼaj tqʼamaʼn Jesús jlu, kubʼ ttzubʼan twitz txʼotxʼ ex bʼaj tbʼinchaʼn chʼin xoqʼl tukʼil taʼl ttziʼ.* Yajxitl ok tqʼoʼn tiʼj twitz xinaq
7 ex xi tqʼamaʼn te: «Txiʼya txʼajol twitza toj aʼ te Siloam», (a tzʼelpuna yol Siloam «samaʼn»). Entonces ikʼ bʼet xinaq ex xiʼ txʼajol twitz. Ex tej tmeltzʼaj, ya in bʼanttoq tkeʼyin.
8 Tej kyil vesin ex qe xjal otoq tzʼok kyqʼoʼn kywitz tiʼj xinaq in qanin tkotz, kyqʼama: «¿Nyapetzun a xinaq lu in kubʼ qeʼ qanil tkotz kye xjal?».
9 Ateʼ junjun xjal kyqʼama: «Atzun». Atzun junjuntl kyqʼama: «Nya a, pero chʼixme ik keʼyin ik tzeʼn te». Pero atzunte xinaq tqʼama: «Aqine».
10 Tuʼntzunju xi kyqanin te: «¿Tzeʼn tten ma che jaqet twitza?».
11 Xi ttzaqʼweʼn xinaq kye: «Aju xjal Jesús tbʼi, ma kubʼ tbʼinchaʼn xoqʼl ex ma tzʼok tqʼoʼn tiʼj nwitze. Yajxitl ma tzaj tqʼamaʼn weye: ‹Txiʼya txʼajol twitza toj aʼ te Siloam›. In nikʼ bʼete ex in xiʼye txʼajol nwitze ex ma bʼant nkeʼyine».
12 Xitzun kyqanin te xinaq: «¿Jatumel taʼ xjal lu?». Xi ttzaqʼweʼn kye: «Mintiʼ bʼin wuʼne».
13 Entonces xi kyiʼn xinaq moẍ kubʼ tqʼanin Jesús kyukʼil fariseo.
14 Toj qʼij sábado kubʼ tbʼinchaʼn Jesús xoqʼl ex jaqet twitz xinaq tuʼn.
15 Tuʼntzunju, ax ikx kye fariseo xi kyqanin te xinaq tzeʼn bʼant tkeʼyin. Xi ttzaqʼweʼn xinaq kye: «Ma tzʼok tqʼoʼn xoqʼl tiʼj nwitze, yajxitl ma tzʼel ntxʼajoʼne ex ma bʼant nkeʼyine».
16 Entonces kyqʼama junjun kyxol fariseo: «Nya te Dios xjal lu, porke mintiʼ in nok tqʼoʼn toklen sábado». Atzun junjuntl kyqʼama: «¿Tzeʼn jaku che bʼant milagro* tuʼn jun xjal aj il ik tzeʼn jlu?». Ex jun xichaq kyximbʼetz ten.
17 Xi kyqʼamaʼn juntl maj te xinaq moẍ kubʼ tqʼanin Jesús: «¿Tiʼ t-xima tiʼj xjal ma jaqet twitza tuʼn?». Xi ttzaqʼweʼn xinaq kye: «Jun profeta».
18 Pero mintiʼ xi kyokslaʼn judiy qa moẍ xinaq lu tnejel ex qa otoq che jaqet twitz, tzmaxi tej kytzaj kytxkoʼn tman.
19 Xi kyqanin kye: «¿Nyapetzun a kykʼwale lu aju in tzaj kyqʼamaʼne qa moẍ tej tul itzʼj? Entonces, ¿tzeʼn in bʼant tkeʼyin jaʼlo?».
20 Xi kytzaqʼweʼn tman xinaq kye: «Ikju, atzun qkʼwale lu ex moẍ tej tul itzʼj.
21 Pero mintiʼ bʼin quʼne tzeʼn ma bʼant tkeʼyin ex alquʼn ma jaqet twitz. Kyqaninxe te porke ya ma chʼiy ex tzul tqʼamaʼn kyeye».
22 Xi kytzaqʼweʼn tman xinaq jlu kye porke e tzaj xobʼ kywitz judiy. Porke ya otoq kubʼ kyximen judiy tuʼn tetz kylajoʼn jun xjal toj ja te kʼulbʼil* qa ma txi tqʼamaʼn qa a Jesús Cristo.
23 Tuʼntzunju xi kyqʼamaʼn tman: «Kyqaninxe te porke ya ma chʼiy».
24 Tzajtzun kytxkoʼn juntl maj xinaq moẍ kubʼ tqʼanin Jesús ex xi kyqʼamaʼn te: «Twitz Dios qʼamantza axix tok. Porke ojtzqiʼn quʼne qa aj il xjal lu».
25 Xi ttzaqʼweʼn xinaq kye: «Mintiʼ ojtzqiʼn wuʼne qa jun aj il moqa nya. Oʼkx ojtzqiʼn wuʼne qa moẍ qine tnejel ex jaʼlo in bʼant nkeʼyine».
26 Entonces xi kyqanin te: «¿Tiʼ ma tzʼok tbʼinchaʼn tiʼja? ¿Tzeʼn ma che jaqet twitza tuʼn?».
27 Xi ttzaqʼweʼn kye: «Ma txi nqʼamaʼne kyeye, pero mintiʼ in chinx kybʼiʼne. ¿Tiquʼn kyajbʼile tuʼn tok kybʼiʼne juntl maj? ¿In kubʼpe kyximane tuʼn kyoke te tdiscípulo?».
28 Tej tok kybʼiʼn jlu, xi kyqʼamaʼn te tukʼil qʼoj: «Aya tdiscípulo xjal lu, atzun qeye tdiscípulo Moisés qoʼye.
29 Ojtzqiʼn quʼne qa yolin Dios tukʼil Moisés, atzunte xjal lu mintiʼ ojtzqiʼn quʼne jatumel ma tzaj».
30 Xi ttzaqʼweʼn xinaq kye: «Mlay txi wokslaʼne. ¿In tzajpe kyqʼamaʼne weye qa mintiʼ ojtzqiʼn kyuʼne jatumel ma tzaj xinaq ma jaqet nwitze tuʼn?
31 Ojtzqiʼn quʼn qa mintiʼ in tzaj tbʼiʼn Dios qe xjal aj il, pero in tzaj tbʼiʼn alkye qeju in che xobʼ twitz ex in xi kybʼinchaʼn tajbʼil.
32 Qa ma qo ximen tiʼj, ni jun xjal moẍ tej tul itzʼj o jaqet twitz tuʼn juntl xjal.
33 Noqwit nya te Dios xjal lu, mintiʼwtlo jun tiʼ jaku bʼant tuʼn».
34 Entonces xi kyqʼamaʼn te: «Aj ila tej tul itzʼja, ¿ex tajbʼila tuʼn ttzaj tqʼoʼna xnaqʼtzbʼil qeye?». Ex etz kylajoʼn xinaq kywitz.
35 Oktzun tbʼiʼn Jesús qa otoq tzʼetz lajoʼn xinaq kyuʼn, ex tej tkanet tuʼn, xi tqanin te: «¿In nokpe qeʼ tkʼuʼja tiʼj Tkʼwal Xinaq?».
36 Xi ttzaqʼweʼn xinaq te: «Tat, ¿alkyetzun? Qʼamantza weye tuʼn tok qeʼ nkʼuʼje tiʼj».
37 Xi tqʼamaʼn Jesús te: «Ya ma tila, ex in yolina tukʼil jaʼlo».
38 Xi ttzaqʼweʼn xinaq te: «Tat, in nok qeʼ nkʼuʼje tiʼj». Ex jaw tnimsaʼn* Jesús.
39 Entonces tqʼamatl Jesús jlu: «Ma chin ule tzalu twitz txʼotxʼ tuʼn tbʼant kykeʼyin xjal moẍ tuʼnju in bʼant wuʼne ex tuʼn tmoẍix kywitz qeju in che keʼyin».
40 Tej tok kybʼiʼn junjun fariseo ateʼtoq tukʼil Jesús jlu, xi kyqʼamaʼn te: «Yajtzun qeye, ¿in kubʼpe t-ximana qa moẍ qoʼye?».
41 Xi ttzaqʼweʼn Jesús kye: «Noqwit moẍ qeye, mintiʼwtlo kyile. Pero kukx at kyile jaʼlo porke in kyqʼamaʼne: ‹Nya moẍ qoʼye›».
