Mateu 21:1-46
21 Omu vapwile kwakamwihi naYelusalema, vemanyine kuMbetefwaje haPili yaMilive. Kaha Yesu atumine tumbaji vavali,+
2 ambile kuli vakiko ngwenyi: “Yenu mwimbo lize muli nakumona, kaha namuwana chimbulu vanamukase, nalivuvu lyenyi hamwe. Vakasununenu muvanehe kuli ami.
3 Kachi nge mutu mwamihula, ambenu ngwenu, ‘Mwata ali nakuvasaka.’ Omu mwevwa ngocho, mwavasuula washiwashi.”
4 Chuma kanechi chasolokele mangana mazu vahanjikile kuhichila muli kapolofweto atesemo, akwamba ngwavo:
5 “Lwezenu mwanapwevo Zeyone ngwenu: ‘Tala! Mwangana wove ali nakwiza kuli ove.+ Apwa wamuvwovu,+ kaha natwame hachimbulu, halivuvu lyachimbulu, hamwanakanyama wakumbata viteli.’”+
6 Ngocho tumbaji vayile, kaha valingile vene muze avalwezele Yesu.+
7 Vanehele uze chimbulu nayauze livuvu lyenyi, vahakile uvwalo wavo wahelu hali vaze vimbulu, kaha atwamineho.+
8 Vatu vavavulu haliyongomena valile uvwalo wavo wahelu mujila,+ oku veka vali nakuteta mitango kumitondo nakuyala mujila.
9 Kaha mayongomena aze atetekelele kulutwe lwenyi nawaze nawa akavilenga munyima, vatambakanyinenga lika ngwavo: “Tuli nakukulomba umulwile MwanaNdavichi.+ Vakisula ou mweza mulijina lyaYehova.*+ Tuli nakukulomba ove watwama mwilu umulwile.”+
10 Omu engilile muYelusalema, munganda mwosena mwakatukile liuya ngwavo: “Nyi ou iya?”
11 Aze mayongomena ambilenga lika ngwavo: “Ou ikiye kapolofweto Yesu+ wakuNazaleta yakuNgalileya.”
12 Jino Yesu engilile mutembele nakuhangamo vosena vaze vapwile nakulanjisa navaze vapwile nakulanda. Akatumwine jimesa javaka-kutambasana jimbongo, navitwamo vyavaka-kulanjisa mayembe.+
13 Kaha ambile kuli vakiko ngwenyi: “Vasoneka ngwavo, ‘Zuvo yami navakayivulukanga ngwavo zuvo yakulombela,’+ oloze enu munayitenge kupwa nge wina wakuswama vihwanga.”+
14 Kaha nawa tupuputa navitonji vejile kuli ikiye mutembele, kaha avokile.
15 Vapilishitu vavakulwane navaka-kusoneka vevwile kupihya chikuma+ omu vamwene vyuma vyakukomwesa vize alingile, navanyike vaze vapwile nakutambakana mutembele ngwavo: “Tuli nakukulomba umulwile MwanaNdavichi.”+
16 Kaha vambile kuli ikiye ngwavo: “Unevuko omu vali nakuhanjika ava nyi?” Yesu ambile kuli vakiko ngwenyi: “Eyo, ngunevuko. Uno kanda mutangengaho lyehi mazu awako tahi, ngwavo, ‘Unalingisa tunwa twavana vavandende navakemba kukwalisa’?”+
17 Kaha avasezele, afumine munganda nakuya kuMbetane nakukasavalila vene kuze.+
18 Jino hakukinduluka kunganda nachimenemene, evwile zala.+
19 Kaha amwene mukuyu kusali yajila. Ayileko, oloze kawanyineko vimweko, shina mafwo kaha.+ Ngocho awambile ngwenyi: “Kanda ukema mihako chekako.”+ Kaha uze mukuyu womine chau hahaze vene.
20 Omu tumbaji vamwene chuma kana, valikomokelele nakwamba ngwavo: “Uno ou mukuyu unomu ngachilihi chau aha vene?”+
21 Yesu avakumbulwile ngwenyi: “Chamuchano vene nangwamba kuli enu ngwami, kachi nge muli nalufwelelo nakuzeneka kuhuhwasana, kamweshi kukumina kaha hakulinga chuma ngunalingi kumukuyuko, oloze numba nge namwamba kupili yino ngwenu, ‘Tutuka ukalimbile mukalungalwiji,’ nachilingiwa vene ngocho.+
22 Shikaho nge muli nalufwelelo, kaha vyuma vyosena namulombanga namuvitambula.”+
23 Omu engilile mutembele, vapilishitu vavakulwane navakulwane javatu vejile kuli ikiye omu apwile nakunangula vatu. Vambile ngwavo: “Ngolo jakulinga vyuma kanevi unajiwane kulihi? Iya akuhana ngolo kaneji?”+
24 Yesu avakumbulwile ngwenyi: “Nayami nawa nangumihula chuma chimwe. Kachi nge namungulweza, kaha nayami nawa nangumilweza okwo ngunawane ngolo jakulinga vyuma kanevi.
25 Uno lumbapachiso lwaYowano lwafumine kulihi? Lwafumine mwilu tahi, nyi lwafumine kuli vatu?” Oloze vakiko vaputukile kulihanjikisa mwavomwavo ngwavo: “Kachi nge natwamba ngwetu, ‘Lwafumine mwilu,’ kaha mwatwamba ngwenyi, ‘Nyi ikaze mwahonene kumwitavila?’+
26 Oloze nge natwamba ngwetu, ‘Lwafumine kuli vatu,’ kaha katweshi kupuluka kuliyongomenako, mwomwo vosena vamona Yowano kupwa kapolofweto.”
27 Ngocho vakumbulwile Yesu ngwavo: “Katwatachikijileko.” Kaha ikiye nawa ambile kuli vakiko ngwenyi: “Nayami nawa kangweshi kumilweza okwo ngunawane ngolo jakulinga vyuma kaneviko.
28 “Munashinganyeka muka? Lunga umwe apwile navana venyi vavali. Ayile kuli uze wakulivanga nakwamba ngwenyi, ‘Ove mwanami, lelo yako ukazate muwande wamivinyo.’
29 Ikiye akumbulwile ngwenyi, ‘Kangweshi kuyako.’ Oloze hakukuminyina alumwine muchima wenyi, kaha ayile.
30 Ayile nawa kuli uze wamuchivali nakwamba mwomumwe. Ikiye akumbulwile ngwenyi, ‘Nanguya tata,’ oloze kayileko.
31 Hali ava vavali, ulihi alingile mwayile muchima waise?” Vambile ngwavo: “Ou wakulivanga.” Yesu ambile kuli vakiko ngwenyi: “Chamuchano vene nangwamba kuli enu ngwami, vaka-kutambula mitelo navaka-ujila navalivanga kwingila muWangana waKalunga.
32 Mwomwo Yowano ejile kuli enu mujila yakwoloka, oloze enu kamwamwitavilileko. Oloze vaka-kutambula mitelo navaka-ujila vamwitavilile.+ Kahenu numba tuhu mwamwene chuma kanechi, kamwalumwine michima yenu mangana mumwitavileko.
33 “Ivwenu nawa chifwanyisa chikwavo: Kwapwile mutu, mwenyawande uze atumbile wande wamivinyo+ nakushitako chipato che ndo. Afulilemo chikamwino chavinyo nakutungamo kaposhi.+ Auhanyine vaka-kulima, kaha ayile kulifuchi lyeka.+
34 Omu yahetele ngonde yakwaha mihako, atumine vandungo jenyi kuli vaze vaka-kulima mangana vakamutambwile mihako yenyi.
35 Oloze vaze vaka-kulima vakwachile vaze vandungo jenyi, kaha umwe vamuvetele, mukwavo vamujihile, kaha mukwavo vamwashile malolwa.+
36 Cheka nawa atumine vandungo jenyi veka vavavulu kuhambakana vaze vakulivanga, oloze navakiko nawa vavalingile mwomumwe.+
37 Kukuminyinako, avatuminyine mwanenyi walunga nakwamba ngwenyi, ‘Mwanaminyi navakamuvumbika.’
38 Oloze vaze vaka-kulima hakumona mwanenyi, valihanjikishile mwavomwavo ngwavo, ‘Ou ikiye swana.+ Twayenu tumujihe mangana tutambule uswana wenyi.’
39 Ngocho vamukwachile nakumumbila kusali yauze wande wamivinyo, kaha vamujihile.+
40 Omu mwakeza uze mwenyawande wamivinyo, mwakavalinga muka vaze vaka-kulima?”
41 Vakiko vambile kuli ikiye ngwavo: “Hakuwana nge vatu kana vavapi, mwakavanongesa mwamupi nakuhana uze wande wamivinyo kuli vaka-kulima veka vaze navakamuhananga mihako hangonde yakwaha.”
42 Yesu ambile kuli vakiko ngwenyi: “Uno kanda mutangengaho lyehi muVisoneka ngwavo, ‘Lilolwa lize vakanyine vaka-kutunga linapu jino lilolwa lyalinene lyamumbango,*+ Yehova* ikiye nachilingisa chipwenga ngocho, kaha chinapu chakukomwesa kumeso etu’ nyi?+
43 Shikaho nguli nakwambila kuli enu ngwami, Wangana waKalunga navakamitambulawo nakukauhana kumuyachi uze naukalovolanga mihako yawo.
44 Kaha nawa mutu mwakaholokela halilolwa lino mwakasanyuka sanyusanyu.+ Kaha weshowo nalikaholokela, nalikamuchika.”+
45 Omu vapilishitu vavakulwane navaFwaliseu vevwile vize vifwanyisa vyenyi, vatachikijile ngwavo apwile nakuhanjika hali vakiko.+
46 Numba tuhu vasakile ngwavo vamukwate, oloze vevwile woma aze mayongomena, mwomwo vatu vamumwenenga kupwa hikapolofweto.+
Kwinyikila Chamwishi
^ Tala Chihande A5.
^ Hela., “linapu jino mutwe wamumbango yazuvo.”
^ Tala Chihande A5.
