Yeshaya 39:1-8
-
Batuadi ba mukenji bafumina ku Babilona (1-8)
39 Tshikondo atshi Melodaka-baladana mukalenge wa Babilona, muana wa Baladana, wakatumina Hezikiya+ mikanda ne dipa, bualu uvua mumvue ne: uvua musame ne mumvue bimpe.+
2 Hezikiya wakabakidila ne disanka,* kubalejaye nzubu wende wa tshibutshilu tshia bintu biende bia mushinga:+ arjan, or, mafuta a mutshi wa bome ne mafuta makuabu a mushinga, bia mvita biende bionso, ne bintu bionso bivua mu bibutshilu biende. Kakuvua tshintu tshivua Hezikiya kayi mubaleje mu nzubu* muende ne mu bukalenge buende buonso to.
3 Pashishe muprofete Yeshaya wakabuela kudi mukalenge Hezikiya, kumuebejaye ne: “Bantu aba bavua bamba tshinyi? Mbafumine penyi?” Ke Hezikiya kuamba ne: “Mbafumine ku buloba bua kule, ku Babilona.”+
4 Pashishe wakebeja ne: “Mbamone tshinyi mu nzubu* muebe?” Hezikiya kuandamuna ne: “Mbamone bintu bionso bia mu nzubu* muanyi. Kakuvua tshintu nansha tshimue tshimvua tshiyi mubaleje mu bibutshilu bianyi to.”
5 Ke Yeshaya kuambila Hezikiya ne: “Umvua dîyi dia Yehowa wa biluilu,
6 ‘Mona! Matuku adi alua, ne bionso bidi mu nzubu* muebe ne bionso bidi bankambua bebe badibutshile too ne dituku edi nebaye nabi mu Babilona. Kabakushiya tshintu nansha tshimue,’+ ke mudi Yehowa wamba.+
7 ‘Nebangate bamue ba ku bana bebe bawalela, nebalue bena mudimu ba mu dibalasa dia mukalenge wa Babilona.’”+
8 Ke Hezikiya kuambila Yeshaya ne: “Dîyi dia Yehowa diudi muambe ndimpe.” Pashishe yeye kuamba kabidi ne: “Bualu nekuikale ditalala ne dishindama* tshikondo tshintshidi ne muoyo.”*+
