Mukanda mutumina Tito 2:1-15

  • Malongesha mimpe bua bansonga ne bakulumpe (1-15)

    • Kulekela malu adi kaayi a Nzambi (12)

    • Tshisumi bua midimu mimpe (14)

2  Kadi wewe, tungunuka ne kuamba malu adi mu diumvuangana ne dilongesha didi dikolesha.*+ 2  Balume bakulumpe bikale ne nkatshinkatshi mu bienzedi biabu, bikale bantu badibu banemeka, bikale ne meji majalame, bakole mu ditabuja, mu dinanga ne mu dinanukila. 3  Bia muomumue, bakaji bakulumpe bikale ne bikadilu bidi bileja mudibu batshina Nzambi, kabikadi bashiminyinyanganyi ba malu, kabikadi bapika ba mvinyo wa bungi, kadi bikale balongeshi ba malu mimpe, 4  bua babele* bansongakaji bua kunanga babayabu, kunanga bana babu balela, 5  kuikala ne meji majalame, bakezuke, benza midimu ya kumbelu,* bakaji bimpe, bakokela babayabu,+ bua bantu kabakudi bibi bua dîyi dia Nzambi. 6  Bia muomumue, tungunuka ne kulomba bansongalume bua bikale ne meji majalame,+ 7  uleja muudi tshilejilu tshia bienzedi bimpe mu mishindu yonso. Longesha malu adi makezuke* ne bunême buonso,+ 8  wakula ne mêyi adi akolesha* adibu kabayi mua kudiula,+ bua bantu badi batuluisha bafuishibue bundu, kabayi ne bualu bubi* bua kuamba bua bualu buetu.+ 9  Bapika bakokele bamfumu babu mu malu onso,+ badienzeja bua kubasankisha, kabayi batontolola, 10  kabayi babiba,+ kadi badileja ba kueyemena mu malu onso, bua bamone mua kulengeja dilongesha dia Nzambi Mupandishi wetu mu mishindu yonso.+ 11  Bualu ngasa wa Nzambi mmumueneke, utuadila bantu ba mishindu yonso lupandu.+ 12  Ngasa eu udi utulongesha bua kulekela malu adi kaayi a Nzambi ne majinga a panu+ ne bua kuikala ne meji majalame ne buakane ne dilamata Nzambi munkatshi mua ndongoluelu wa malu udiku eu,*+ 13  patudi tuindila ditekemena dia disanka+ ne dimueneka dia butumbi dia Nzambi munene ne dia Mupandishi wetu Yezu Kristo 14  uvua mudifile bua bualu buetu+ bua kutumbusha*+ ku dishipa dia mikenji dia mishindu yonso ne bua kudilengejila bantu badi tshisamba tshiende tshia pa buatshi, bikale ne tshisumi bua midimu mimpe.+ 15  Tungunuka ne kuambila bantu malu aa ne kubadimuija* ne kubabela ne bukokeshi buonso.+ Muntu nansha umue kakupetudi to.

Mamanyisha

^ Anyi “didi diambuluisha bua kuikala bimpe; didi dikuatshisha.”
^ Anyi “bapingaje ku meji; balongeshe.”
^ Anyi “batabalela mbanza yabu.”
^ Anyi “Longesha ne bukezuke.”
^ Anyi “adi ambuluisha bua kuikala bimpe; adi akuatshisha.”
^ Anyi “bualu bua patupu.”
^ Anyi “tshikondo etshi.” Tang. Diumv.
^ Ku mua.: “bua kutupikula; bua kutukuula.”
^ Anyi “kubakankamija.”

Bua mukanda eu bukenji buonso mbua bafundi