Nomba 23:1-30
23 Pashishe Balâma wakambila Balaka ne: “Asa bioshelu muanda mutekete muaba eu ne undongoluele ngombe milume muanda mutekete+ ne bimpanga bia mikoko muanda mutekete.”
2 Diakamue Balaka kuenza anu muvua Balâma mumuambile. Pashishe Balaka ne Balâma kulambulabu ngombe mulume ne tshimpanga tshia mukoko pa tshioshelu tshionso.+
3 Ke Balâma kuambilaye Balaka ne: “Shala muaba eu pabuipi ne mulambu webe wa kuosha, meme nye. Imue misangu Yehowa neayukile nanyi. Bualu buonso buangambilaye, nenkuambilabu.” Nunku wakaya ku mukuna mukese uvua kawuyi ne tshintu.
4 Nunku Nzambi wakayukila ne Balâma+ uvua mumuambile ne: “Ndi muase bioshelu muanda mutekete mu milongo, ne ndi mulambule ngombe mulume ne tshimpanga tshia mukoko pa tshioshelu tshionso.”
5 Yehowa wakateka dîyi edi mukana mua Balâma ne:+ “Pingana kudi Balaka, umuambile nunku.”
6 Nunku wakapingana, kumonaye ne: Balaka ne bakokeshi bonso ba Moaba bavua bimane pabuipi ne mulambu wende wa kuosha.
7 Ke kuelaye lusumuinu elu ne:+
“Balaka mukalenge wa Moaba mmungumbushishe ku Alama,+Ku mikuna ya ku est:
‘Luaku ungelele Yakoba mulawu.
Eyowa, luaku upishe Isalele!’+
8 Mmunyi mundi mua kuela bantu badi Nzambi kayi muele mulawu mulawu?
Mmunyi mundi mua kupisha bantu badi Yehowa kayi mupishe?+
9 Ndi mbamuenena ku nsongo ya mabue,Ne ndi mbamuenena ku mikuna mikese.
Mbobu abu basombe pa nkayabu bu tshisamba;+Kabena badibala munkatshi mua bisamba bikuabu.+
10 Nnganyi udi mua kubala nsenga ya Yakoba+Anyi kubala nansha tshia binayi tshia Isalele?
Ndekela meme* mfue lufu lua muntu muakane,Ne lekela nshikidilu wanyi ikale bu wabu.”
11 Ke Balaka kuambila Balâma ne: “Tshiudi mungenzele ntshinyi? Ndi mulue nebe bua kuela bena lukuna banyi mulawu, mpindieu tshionso tshiudi muenze tshidi anu kubabenesha.”+
12 Yeye kuandamuna ne: “Tshiena ne bua kuamba bualu buonso budi Yehowa uteka mukana muanyi anyi?”+
13 Balaka wakamuambila ne: “Luaku koku tuye muaba mukuabu uudi mua kubamuenena. Neumone anu tshitupa tshiabu; kuakubamona bonso to. Ubangelele mulawu lua muaba au.”+
14 Nunku wakaya nende mu mpata wa Sofima, ku mutu kua Pisega,+ kuasaye bioshelu muanda mutekete ne kulambulaye ngombe mulume ne tshimpanga tshia mukoko pa tshioshelu tshionso.+
15 Nunku Balâma wakambila Balaka ne: “Shala muaba eu pabuipi ne mulambu webe wa kuosha pandi nyukila ne Nzambi kuntu kuaka.”
16 Nunku Yehowa wakayukila ne Balâma, kutekaye dîyi edi mukana muende ne:+ “Pingana kudi Balaka, umuambile nunku.”
17 Nunku wakapingana kudiye, kumonaye ne: uvua muindile pabuipi ne mulambu wende wa kuosha, ne bakokeshi ba Moaba bavua nende. Balaka kumukonka ne: “Yehowa mmuambe tshinyi?”
18 Nunku wakela lusumuinu elu ne:+
“Juka, Balaka, umvue.
Nteleja, wewe muana wa Sipô.
19 Nzambi kena bu muntu wetu utu ushima eu,+Nansha bu muana wa muntu utu ushintulula lungenyi luende.*+
Padiye wamba bualu kampanda, kakubuenza anyi?
Padiye wakula, kakukumbaja anyi?+
20 Tangila! Mbalue nanyi bua kubenesha;Mpindieu Yeye mmubeneshe,+ ne tshiena mua kukudimuna dibenesha adi to.+
21 Kena witaba bua malu a majimbu enzele Yakoba bibi,Ne kena ulekela bualu kampanda butatshisha Isalele.
Yehowa Nzambi wende udi nabu,+Ne badi bamutumbisha bikole bu mukalenge munkatshi muabu.
22 Nzambi udi ubapatula mu Ejipitu.+
Yeye udi bu nsengu ya ngombe mulume wa tshisuku buabu bobu.+
23 Bualu kakuena bimanyinu bia diakabi bua Yakoba,+Anyi lubuku ludi mua kuenzela Isalele bibi.+
Dîba edi nebambe bua Yakoba ne bua Isalele ne:
‘Tangila tshidi Nzambi muenze!’
24 Etshi ntshisamba tshiajuka bu nyama wa ntambue,Ne anu bu nyama wa ntambue netshidijukile.+
Katshiakulala too ne paditshi tshidia nyama uditshi tshikuateNe tshinua mashi a nyama mishipa.”
25 Ke Balaka kuambila Balâma ne: “Ku lumue luseke, biwikala kuyi mua kumuela mulawu, nunku, ku lukuabu luseke kuena ne bua kumubenesha nansha.”
26 Balâma wakandamuna Balaka ne: “Tshivua mukuambile ne: ‘Nengenze malu onso adi Yehowa wamba’ anyi?”+
27 Balaka wakambila Balâma ne: “Luaku koku nye nebe muaba mukuabu kabidi. Misangu mikuabu nebikale bimpe ku mêsu kua Nzambi mulelela bua wewe kumungelela mulawu lua muaba au.”+
28 Ke Balaka kuyaye ne Balâma ku mutu kua Peô, udi mutangile lua ku Yeshimone.*+
29 Pashishe Balâma wakambila Balaka ne: “Asa bioshelu muanda mutekete muaba eu ne undongoluele ngombe milume muanda mutekete ne bimpanga bia mikoko muanda mutekete.”+
30 Nunku Balaka kuenzaye anu muvua Balâma muambe, yeye kulambula ngombe mulume ne tshimpanga tshia mukoko pa tshioshelu tshionso.
