Eyemena nyuma wa Nzambi padi malu ashintuluka mu nsombelu webe

“Udikoleshe mua kumueneka ku mesu kua [Nzambi] bu muntu muanyishibue.”​—2 TIMOTE 2:15, MML.

1. Mmashintuluka kayi adi aluisha makanda etu a mu nyuma?

 MALU adi enzeka pa buloba adi anu enda ashintuluka. Tudi tumona mudi malu a siyanse ne a biamu aya kumpala, eku bikadilu bia bantu bienda binyanguka. Anu mutuvua bamone mu tshiena-bualu tshishale, bena Kristo badi ne bua kutantamena nyuma wa pa buloba udi muluishi wa Nzambi. Kadi bu mudi malu a pa buloba ashintuluka, tuetu petu tudi tushintuluka mu mishindu ya bungi. Tudi tumbuka ku buana tulua bantu bakole. Tudi mua kupeta anyi kujimija bintu, kujimija makanda etu a mubidi anyi kufuisha bananga betu. A bungi a ku mashintuluka aa mmatupite bulobo, ne adi mua kutulelela ntatu idi mua kuluisha makanda etu a mu nyuma.

2. Mmunyi muvua nsombelu wa Davidi mushintuluke?

² Bantu bakese ke batu bapeta mashintuluka manene a nunku mu nsombelu wabu amu bu muvuabi bua Davidi, muana wa Yishayi. Davidi wakadi nsonga mulami wa mikoko uvua kayi nansha mumanyike  wakalua diakamue muntu wa lumu anyi tshilobo tshia ditunga. Pashishe wakalua muena tshimuangi uvuabu benda bipata bu nyama bua kushipa kudi mukalenge kampanda uvua ne mukawu. Kunyima, Davidi wakalua mukalenge ne mukokeshi. Wakatantamena malu avua afila tunyinganyinga tuvule avua mpekatu munene uvuaye muenze mupatuishe. Makenga ne matapuluka biakabuela mu dîku diende. Wakapeta bubanji, kukulakajaye ne kupetaye bisama bia bukulakaje. Kadi nansha muvuaku kuenzeke mashintuluka manene mu nsombelu wende, Davidi wakeyemena Yehowa ne nyuma Wende mu matuku ende onso a muoyo. Wakenza muende muonso bua kumueneka kumpala kua Nzambi bu “muntu muanyishibue,” ne Nzambi wakamubenesha. (2 Timote 2:15, MML) Nansha mudi nsombelu wetu mushilangane ne wa Davidi, mushindu wakapitaye ne malu mu nsombelu wende udi mua kutulongesha. Tshilejilu tshiende tshidi mua kutuambuluisha bua kumanya tshia kuenza bua nyuma wa Nzambi kutungunukaye ne kutuambuluisha padi mashintuluka enda amueneka mu nsombelu wetu.

Budipuekeshi bua Davidi ntshilejilu tshimpe

3, 4. Mmunyi muakashintuluka Davidi nsonga eu uvua mulami wa mikoko e kulua muntu muende lumu mu ditunga diabu?

³ Pavua Davidi nsonga, kavua muntu munene nansha mu dîku diabu to. Pakalua muprofete Samuele ku Beteleheme, tatuende wa Davidi wakaleja muanda-mutekete wa mu bana bende ba balume muanda-mukulu. Bakapua Davidi uvua muana mutekete ku bonso muoyo, bualu uvua ulama mikoko. Pabi, Davidi ke uvua Yehowa musungule bua kulua mukalenge wa Isalele. Bakabikidija Davidi mu mpata muvuaye. Pashishe, Bible udi wamba ne: ‘Samuele wakangata lusengu lua manyi, wakamuela manyi pa mutu pende munkatshi mua bana babu; nyuma wa Yehowa wakatulukila Davidi bikole ku dituku adi.’ (1 Samuele 16:12, 13) Davidi wakeyemena nyuma au mu matuku ende onso a muoyo.

⁴ Diakamue, nsonga mulami wa mikoko eu wakenda lumu mu ditunga diabu dijima. Bakamuangata kua mukalenge bua kuikala umuimbila mijiki. Davidi wakashipa Goliata, muluanganyi wa mvita wa dilambu, muntu munene mule mule wa kafiondo uvua basalayi bapiluke ba Isalele kabayi nansha bakimina to. Pakamutekabu ku mutu kua balume baluanganyi ba mvita, Davidi wakatshimuna bena Peleshete. Bantu bavua bamunange. Bakenza misambu ya kumuanyisha nayi. Kumpala, mufidi kampanda wa mibelu wa Mukalenge Shaula wakamba bua nsonga Davidi ne: uvua “mumanye mua kuimba tshisanji bimpe” ne uvua ‘muntu wa bukitu, muena mvita mene, udi wamba mêyi a lungenyi, udi ne mpala mulengele.’​—1 Samuele 16:18; 17:23, 24, 45-51; 18:5-7.

5. Ntshinyi tshivua mua kuikala tshivuije Davidi muena diambu, ne ntshinyi tshidi tshituleja ne: kakalua muena diambu to?

⁵ Bikala bua lumu, bua mpala muimpe ni mbua bunsonga mene, anyi bua ludimi lupepele ni mbu-kangimba, bua dimanya mene mudimu wa busalayi anyi bua dianyishibua kudi Nzambi, Davidi uvua umueneka bu uvua mukumbaje malu onso mimpe avua muntu mua kujinga. Buonso bua ku malu aa buvua mua kumuvuija muena diambu, kadi nansha bumue kabuakamuvuija muena diambu to. Mona mêyi akambila Davidi Mukalenge Shaula pakamuseleshaye muanende wa bakaji. Ne budipuekeshi bulelela, Davidi wakamba ne: ‘Meme ndi nganyi, ne ba mu nzubu wa tatu wanyi badi banganyi mu Isalele bua meme kuikala muku wa mukalenge?’ (1 Samuele 18:18) Mumanyi mukuabu wa malu a mu Bible wakela nseke pa mêyi aa e kufunda ne: “Davidi kakadiangata ne mushinga wa bungi bua mamanya avuaye nawu anyi bua muanzu uvuaye nawu peshi bua bankambua bende bua kudiamba muvuaye muakanyine kupeta lumu lua kulua muku wa mukalenge to.”

6. Bua tshinyi tudi ne bua kudima budipuekeshi?

⁶ Budipuekeshi bua Davidi buvua bushindamene pa ditaba diende dia se: Yehowa mmutambe bantu bapange bupuangane  mu bionso. Davidi wakafika ne ku dikema bua padi Nzambi mumanye muntu. (Musambu 144:3) Davidi uvua kabidi mumanye ne: lumu luonso luvuaye mua kuikala nalu luvuaku anu bualu Yehowa wakaleja budipuekeshi, kudipuekeshaye bua kumukuatshisha, kumukuba ne kumutabalela. (Musambu 18:35) Ndilongesha kayipu bulenga kutudi! Bipedi bietu, malu atudi tukumbaja ne midimu ya pa buayi itudi nayi mu tshisumbu kabiena ne bua kutuvuija bena lutambishi to. Mupostolo Paulo wakafunda ne: ‘Udi ne tshintu kayi tshiudi kuyi muangate kudi mukuabu? Biwikala mutshiangate kudi mukuabu, mmunyi muudi uditumbisha bu muudi kuyi mutshiangate?’ (1 Kolinto 4:7) Bua tuetu kuikala ne nyuma muimpe wa Nzambi, ne yeye kufika ku dituanyisha, tudi ne bua kukuama budipuekeshi ne kubulama.​—Yakobo 4:7.

“Kanudisombuedi”

7. Mmushindu kayi wa kushipa Mukalenge Shaula wakamueneka kumpala kua Davidi?

⁷ Nansha muvua lumu luvua Davidi muende kaluyi lujule lutambishi mu mutshima wende, luakajula mukawu ne lungenyi lua dishipangana munda mua Mukalenge Shaula ukavua katshiyi kabidi ne nyuma wa Nzambi. Nansha muvua Davidi kayi ne bualu bubi buvuaye muenze, wakanyema bua kusungila muoyo wende ne kusombela mu tshipela. Munga musangu, pavua Mukalenge Shaula wenda ukeba anu kukeba Davidi, wakabuela mu lubuebue kampanda, kayi mumanye ne: Davidi ne bena diende bavua basokomemu to. Bantu ba Davidi bakamuambila ne: au uvua umueneka mushindu uvuaye kayi mua kupitshisha uvua Nzambi mumupeshe bua kushipa Shaula. Tufuanyikijabi bantu abu mu muidima mukole, ne banungena Davidi ku ditshi ne: ‘Mona dituku diakakuambila Yehowa ne: mona nemfile muena lukuna webe mu tshianza tshiebe, diakufika; wewe umuenzele bu muudi umona ne: mbimpe.’​—1 Samuele 24:2-6.

8. Bua tshinyi Davidi wakadikanda bua kudisombuela?

⁸ Davidi wakabenga bua kuenzela Shaula bibi. Wakaleja ditabuja ne lutulu, kusankaye bua kushiya malu mu bianza bia Yehowa. Pakapatuka Mukalenge mu lubuebue alu, Davidi wakamuela dîyi ne kuamba ne: ‘Yehowa atulumbuluishe pankatshi petu nebe, Yehowa ansombuele bualu buebe, kadi tshianza tshianyi katshiena tshikala kuudi.’ (1 Samuele 24:12) Nansha muvuaye mumanye ne: Shaula ke uvua mu tshilema, Davidi kakadisombuela to, kakamuamba mêyi mabi anyi kumujana to. Misangu mikuabu ya bungi kabidi, Davidi wakadikanda bua kudisombuela. Kadi uvua weyemena Yehowa ne umulekeela malu onso mu bianza.​—1 Samuele 25:32-34; 26:10, 11.

9. Bua tshinyi katuena ne bua kudisombuela padibu batuluisha anyi batukengesha?

⁹ Anu bu Davidi, udi mua kuikala ne ntatu kampanda. Pamu’apa badi bakuluisha anyi bakukengesha kudi balongi benu, bena mudimu benu, bena dîku dienu anyi bantu bakuabu badi kabayi bena Kristo nebe. Kudisombuedi to. Indila Yehowa,  umulombe bua nyuma wende muimpe akuamuuluishe. Pamu’apa ngikadilu webe muimpe neasake bantu badi kabayi bena Kristo bua kulua bena Kristo. (1 Petelo 3:1) Nansha bia munyi, ikala mujadike ne: Yehowa udi umona nsombelu webe ne neenze bualu kampanda bua nsombelu eu mu tshikondo tshiakanyine. Mupostolo Paulo wakafunda ne: ‘Kanudisombuedi, bana betu banangibue, kadi nushile tshiji tshia Nzambi muaba; bualu bua bakafunda ne: Busombuedi mbuanyi, meme nemfute; mudi muamba Mukalenge.’​—Lomo 12:19.

“Teleja diyisha”

10. Mmunyi muakapona Davidi mu mpekatu, ne mmunyi muakakebaye kumusokoka?

¹⁰ Bidimu biakapita. Davidi wakalua mukalenge uvua bantu batambe kunanga ne uvua muende lumu bikole. Nsombelu wende wa muntu uvua ne lulamatu lua pa bualu, pamue ne misambu milenga ya kutumbisha nayi Yehowa yakimbaye biakasua kuleja bipepele ne: uvua muntu uvua kayi mua kupona mu mpekatu munene to. Kadi wakaponamu. Dimue dituku pavua mukalenge eu kulu kua nzubu wende wakamona mukaji kampanda muimpe kumona wowa mâyi. Wakakonkonona bua kumanya mukaji au ni uvua nganyi anyi nganyi. Pakamanyaye ne: mukaji au uvua Beta-sheba, ne bayende Uliya uvua muye ku mvita, Davidi wakamubikidisha ne kulalaye nende. Pashishe, wakamona ne: Beta-sheba uvua ne difu. Bivua mua kuikala bualu bua bundu be bu muanda au mua kumanyika kudi bantu! Mu Mikenji ya Mose, muntu uvua wenda masandi uvua ne tshibawu tshia lufu. Pamu’apa mukalenge wakela meji ne: mpekatu wende au uvua mua kusokokibua. Wakatumina tshiluilu dîyi bua Uliya apingane ku Yelushalema. Davidi uvua mutekemene ne: Uliya uvua ne bua kulala kuende ne Beta-sheba, kadi kabiakenzeka nanku to. Meji akashikila Davidi, mpindieu yeye kupingaja Uliya ku mvita ne mukanda wakupesha Yoaba mfumu wa basalayi. Mukanda au uvua wamba bua kutekabu Uliya muaba uvua mvita minunke bua bamushipe. Ke tshiakenza Yoaba, buobu e kushipa Uliya. Kunyima kua Beta-sheba mumane kujikija matuku ende a madilu bu muvua tshilele tshiabu, Davidi wakamuangata, kushalaye mukajende wa nzubu.​—2 Samuele 11:1-27.

11. Mbualu kayi buvua Natana mulondele Davidi, ne ntshinyi tshiakenza Davidi?

¹¹ Mayele au akamueneka bu avua enda bilenga, nansha muvua Davidi mumanye bimpe ne: Yehowa uvua mumone bionso bivua bienzeke. (Ebelu 4:13) Ngondo ndambu mimane kupita, muana wakaledibua. Pashishe Nzambi wakatuma muprofete Natana bua kuya kutangila Davidi. Muprofete eu weyeka, yeye e kulondela mukalenge bualu bua muntu mubanji kampanda uvua ne mikoko ya bungi, kadi kushipaye mukoko umuepele ne munangibue bikole wa muntu mukuabu mupele. Muyuki au wakasonsola dimanya dia buakane dia Davidi, pende kayi nansha mumanye ne: bualu abu buvua ne diumvuija disokome munda muabu to. Davidi wakakosela muntu mubanji au tshibawu kayi ujingakana. Wakambila Natana ne tshiji tshikole ne: “Muntu wakenza bualu ebu udi ne bua kufua.”​—2 Samuele 12:1-6.

12. Mmushindu kayi wakakosela Nzambi Davidi tshilumbu?

¹² Muprofete wakamuambila ne: “Wewe mene udi muntu eu.” Davidi uvua mudikosele tshilumbu yeye nkayende. Bushuwa, Davidi wakalekela tshiji tshivuaye natshi ne lukasa luonso ne kumvuaye bundu bua bungi ne kanyinganyinga kakole. Mupange tshia kuamba, wakateleja muvua Natana umanyisha dilumbuluisha dia Yehowa mu mushindu uvua kauyi kuepela. Kakuvua mêyi a dimukolesha nawu ku muoyo anyi dimusamba nawu  nansha. Davidi uvua mupetule dîyi dia Yehowa pa kuenza malu mabi. Kavua mushipe Uliya ne muele wa mvita wa baluishi bende anyi? Muele wa mvita kauvua ne bua kumbuka mu nzubu mua Davidi to. Kavua muangate mukaji wa Uliya mu musokoko anyi? Bualu bua muomumue buvua ne bua kumuenzekela, ki mmu musokoko to, kadi ku mêsu kua bantu bonso.​—2 Samuele 12:7-12.

13. Mmunyi muakangata Davidi dinyoka dia Yehowa?

¹³ Bumue bualu buimpe buakenza Davidi buvua bua se: kakavila mpekatu wende to. Kakafikila muprofete Natana tshiji nansha. Kakela bakuabu tshilumbu pambidi anyi kudibingisha bua malu avuaye muenze to. Pakamulejabu mpekatu yende, Davidi wakitaba tshilema tshiende, kuambaye ne: ‘Ngakenzela Yehowa bibi.’ (2 Samuele 12:13) Musambu wa 51 udi uleja dibungama divuaye nadi bua mpekatu wende ne dinyingalala dikole divuaye nadi kabidi. Wakasengelela Yehowa ne: ‘Kungipatshi bua tshikadi kumpala kuebe, kungumushidi nyuma webe muimpe.’ Uvua mujadike ne: mu luse luende, Yehowa kavua mua kubenga ‘mutshima wa majiya’ a mpekatu nansha. (Musambu 51:11, 17) Davidi wakatungunuka ne kueyemena nyuma wa Nzambi. Nansha muvua Nzambi kayi muepule Davidi ku bipeta bibi bia mpekatu wende, tshidibi wakamubuikidilayi.

14. Ntshinyi tshitudi ne bua kuenza padi Yehowa utupesha dinyoka?

¹⁴ Tuetu bonso tudi bapange bupuangane, ne bonso buetu tutu tuenza mpekatu. (Lomo 3:23) Pamu’apa tudi mua kupona mu mpekatu kampanda munene anu bu muakapona Davidi. Anu mutu tatu wa dinanga unyoka muanende, Yehowa utu unyoka aba badi basue kumusadila. Kadi nansha mutu dinyoka dipatula bipeta bimpe, kabitu bipepele bua kuditaba to. Bushuwa, minga misangu ditu difila “kanyinganyinga.” (Ebelu 12:6, 11) Kadi tuetu ‘bumvue diyisha [anyi dinyoka],’ tudi mua kuakajilula malanda etu ne Yehowa. (Nsumuinu 8:33) Bua Yehowa kutungunuka ne kutupesha nyuma wende, tudi ne bua kuitaba dinyoka ne kudienzeja bua atuanyishe.

Kutekemenyi bubanji budi mua kujimina tshitupa tshîpi

15. (a) Mmu mishindu kayi mutu bamue bantu benza mudimu ne bubanji buabu? (b) Mmunyi muvua Davidi mujinge kuenza mudimu ne bubanji buende?

¹⁵ Kakuena muaba nansha umue udibu baleje ne: Davidi uvua muntu muende lumu kumpala anyi se: dîku diabu divua dibanji to. Kadi mu bukokeshi buende, Davidi wakapeta bubanji buvulavulayi. Anu muudi mumanye, bantu ba bungi batu basokoka bubanji buabu, bajinga ne lukuka luonso bua kubuvudija, anyi kubudia anu buobu nkayabu. Bakuabu batu benza mudimu ne makuta abu bua kuditumbisha. (Matayo 6:2) Kadi Davidi wakenza yeye mudimu ne bubanji buende mushindu mukuabu. Wakajinga kunemeka Yehowa. Wakaleja Natana dijinga diende dia kuibakila Yehowa ntempelo bua kutekamu mushete wa tshipungidi, uvua mu Yelushalema mu ‘nzubu wa [bilamba].’ Meji a Davidi aa akasankisha Yehowa, kadi wakamuambila ku butuangaji bua Natana ne: Solomo muana wa Davidi ke uvua ne bua kuibaka ntempelo.​—2 Samuele 7:1, 2, 12, 13.

16. Mmalu kayi akalongolola Davidi bua luibaku lua ntempelo?

¹⁶ Davidi wakasangisha bintu bia kuenza nabi mudimu eu wa bungi wa luibaku. Davidi wakambila Solomo ne: ‘Ngakamana kulongoluela nzubu wa Yehowa binunu lukama lua ntalanta ya or ne binunu tshinunu bia ntalanta ya argent ne biamu  bia mitaku ne biamu bifike bidibu kabayi bamanye mua kubala, bualu bua bidi bia bungi; ngakalongolola mabaya ne mabue kabidi; wewe udi mumanye mua kusangishila bintu pa mutu pabi.’ Mu bubanji buvuaye nabu, wakafila ntalanta ya or 3 000 ne ntalanta 7 000 ya argent. * (1 Kulondolola 22:14; 29:3, 4) Davidi kakafila dipa dia kalolo edi bua kuditambisha to, kadi divua dileja ne: uvua muitabuje Yehowa ne mudilambule kudiye. Bu muvua Davidi mumanye kuvua bubanji buende bufumine, wakambila Yehowa ne: “Bintu bionso bidi bifumina kûdi, tuakafila anu bintu biebe kûdi.” (1 Kulondolola 29:14) Mutshima wa kalolo wa Davidi wakamusaka bua kuenza bionso bivuaye mua kuenza bua kutuma ntendelelu mukezuke kumpala.

17. Mmunyi mudi mubelu udi mu 1 Timote 6:17-19 ukumbanyina babanji ne bapele?

¹⁷ Tuetu petu tudi mua kufila bintu bietu bua kuenza malu makane. Pamutu pa kuditua mu dikeba dia bintu mu nsombelu wetu, bidi bimpe bua tuetu kukeba dianyishibua kudi Nzambi, nanku eu ke njila wa meji ne disanka bilelela. Paulo wakafunda ne: ‘Udimuije bantu badi babanji mu tshikondo tshia mpindieu, bua buobu kabadisu, kabateki ditekemena diabu kudi bubanji budi mua kujimina tshitupa tshîpi; kadi batekemene Nzambi, udi utupa bintu bionso bivule bua tuetu kusanka nabi. Buobo benzele bakuabu bimpe, bikale ne bubanji bua bienzedi bimpe; badilongolole bua kupangana bintu; basue kuikala ne bakuabu luse; badibutshile bidi bitekibua bimpe bua matuku alualua, bua buobu balamate muoyo udi muoyo wa bushuwa mene.’ (1 Timote 6:17-19) Nansha nsombelu wetu mu malu a makuta mua kuikala munyi, tueyemenayi nyuma wa Nzambi ne tuikale ne nsombelu wikala ne bua kutuvuija ‘babanji ku mêsu kua Nzambi.’ (Luka 12:21) Kakuena tshintu tshidi ne mushinga mupite kuikala ne lumu luimpe kumpala kua Tatuetu wa dinanga udi mu diulu to.

Umueneke ku mêsu kua Nzambi bu muntu muanyishibue

18. Ntshilejilu kayi tshimpe tshivua Davidi mushile bena Kristo?

¹⁸ Mu nsombelu wende mujima, Davidi wakakeba dianyishibua kudi Yehowa. Wakela lubila mu musambu ne: ‘Umfuile luse, Nzambi, umfuile luse, bualu bua muoyo wanyi udi unyemena kuudi.’ (Musambu 57:1) Dieyemena diende dia Yehowa kadivua dia patupu to. Davidi wakakola, kuenzaye “matuku a bungi.” (1 Kulondolola 23:1) Nansha muvua Davidi muenze mpekatu minene, mbashale bamuvuluke bu umue wa ku bantemu ba Nzambi ba bungi bakaleja ditabuja dia dikema.​—Ebelu 11:32.

19. Mmunyi mutudi mua kumueneka ku mêsu kua Nzambi bu bantu banyishibue?

¹⁹ Padi nsombelu webe ushintuluka, ikala muvuluke ne: anu muvua Yehowa mukuatshishe Davidi, mumukoleshe ne mumupeshe dinyoka, Udi mua kukuenzela pebe nanku. Anu bu Davidi, nsombelu wa mupostolo Paulo wakapeta mashintuluka a bungi. Kadi yeye pende wakashala ne lulamatu pa kueyemena nyuma wa Nzambi. Wakafunda ne: ‘Ndi mumanye mua kuenza malu onso mu Mukalenge udi unkolesha.’ (Filipoi 4:12, 13) Tuetu beyemene Yehowa, neatuambuluishe bua kupeta diakalenga. Mmusue bua tupete diakalenga. Tuetu bamuteleje ne basemene pabuipi nende, neatupeshe bukole bua kuenza disua diende. Ne tuetu batungunuke ne kueyemena nyuma wa Nzambi, netuikale bakumbane bua ‘kumueneka ku mêsu kua Nzambi bu bantu banyishibue’ mpindieu, kashidi ne tshiendelele.​—2 Timote 2:15, MML.

[Mêyi adi kuinshi]

Newandamune munyi?

• Mmunyi mutudi mua kuepuka maditambisha?

• Bua tshinyi katuena ne bua kudisombuela?

• Mmuenenu kayi utudi ne bua kuikala nende bua dinyoka?

• Bua tshinyi tudi ne bua kueyemena Nzambi pamutu pa bubanji?

[Nkonko ya dilonga]

[Tshimfuanyi mu mabeji 16, 17]

Davidi uvua mueyemene nyuma wa Nzambi ne ukeba bua kuanyishibua kudiye. Ke tshiudi pebe wenza anyi?

[Tshimfuanyi mu dibeji 18]

“Bintu bionso bidi bifumina kûdi, tuakafila anu bintu biebe kûdi”