Lusangukilo lwa Yesu Lushintulula Būmi!
Lusangukilo lwa Yesu Lushintulula Būmi!
LUSANGUKILO lwa Yesu ke kintupo’tu kyālongekele pa kala kekidi na kamweno kotudi. Mutumibwa Polo wālombwele patōka kamweno kalo paāsonekele amba: “Kidishitu wasangulwa mu bafu, ke kipa kibajinji kya boba balāla mu tulo. Ke-luntu lufu byo lwatwelele pa muntu, ne kusanguka kwa bafu nako mo monka, kubatwela pa muntu. Ke-twi-bantu mo tufwila bātwe bonso mudi Adama, mo monka mo tukamwena ne būmi, bātwe bonso, mudi Kidishitu.”—1 Kodinda 15:20-22.
Yesu wāsangukile mu mafuku 16 Kweji wa Nisane, 33 K.K., difuku dine dya mu mwaka dyādi dilambula Bayuda bipa bibajinji bya miseke mibajinji ya mwangulo kumeso a Yehova Leza mu kipandulwa’mo kya tempelo mu Yelusalema. Polo pa kutela Yesu bu kipa kibajinji, wālombwele’mba kwādi bantu bakwabo bāsangwilwe mu lufu.
Binenwa bya Polo bilonda’ko bishintulula bintu bilupukile ku lusangukilo lwa Yesu. Polo wānene amba, “ke-luntu lufu byo lwatwelele pa muntu, ne kusanguka kwa bafu nako mo monka, kubatwela pa muntu.” Batwe bonso tufwanga mwanda twāpyene bubi ne kubulwa kubwaninina kudi Adama. Ino, Yesu pa kupāna būmi bwa bu muntu bwandi bubwaninine bu kikūlwa, wāshitwidile bantu dishinda dya kunyongololwa mu bupika bwa bubi ne lufu kupityila ku lusangukilo. Polo pa kwipipija uno mwanda biyampe, wāsonekele mu Loma 6:23 amba: “Mpalo ya bubi i lufu, ino kyabuntu kya Leza i būmi bwa nyeke monka mudi Kidishitu Yesu Mfumwetu.”
Yesu mwine wālombwele kamweno kadi na lufu ne lusangukilo lwandi kotudi. Wēsambīle padi aye mwine amba: “Mwanā muntu akēmikwe’nka nabya, amba bonso bakwitabija mudi aye kebakonekapo, mhm, poso batambule bidi būmi bwa kuladila monka nyeke ne nyeke. Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.”—Yoano 3:14-16.
Langa’po bidi—būmi bwampikwa mfulo, misongo, masusu, nansha bulanda bwine mpika! (Kusokwelwa 21:3, 4) Bine kino i kyepelo kisangaja’po kashā! Mufundi umo unena’kyo uno muswelo amba: “Bibundu byobivulujanga muntu amba būmi i bwīpi, lusangukilo lukulupija’mba lufu nalo i lwīpi.” Bine, lusangukilo lwa Yesu lushintulula būmi!
[Kifwatulo pa paje 7]
