Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Lelo batadi ba bipindi ne bakulumpe pa kipwilo bafwaninwe kulonga namani shi abapebwa bwendeji butamba ku bulongolodi bwa Leza?

Bafwaninwe kukōkela bukidibukidi. Babwanya kwiipangula’mba: ‘Le nkankamikanga batutu ne bakaka balamate kudi Yehova? Le ngikalanga na kampeja-bukidi ka kulondela bwendeji butamba ku bulongolodi bwa Leza?’​—w16.11, p. 14.

Lelo i kitatyi’ka kyātwele bene Kidishitu ba bine bu misungi mu Babiloni?

Kino kyālongekele kitatyi’tu kityetye pa kupwa kwa batumibwa kufwa. Mu kine kitatyi’kya, kwāpungilwe bisumpi bya bakulu ba bipwilo. Leta ne kipwilo bāshilula kwingidila pamo, basambakanya bwine Kidishitu bupondoke ne kulonga bukomo bwa kuvutakanya bene Kidishitu bādi pamo bwa ñano. Inoko kitatyi kilampe kumeso kwa 1914, bashingwe māni bashilwile kwinyongolola bityebitye.​—w16.11, p. 23-25.

Mwanda waka mwingilo wa Lefèvre d’Étaples i wa mvubu?

Mu myaka ya 1520, Lefèvre wāalamwine Bible mu Falanse mwanda wa bantu bavule bekale nandi. Bwalamuni bwandi bwa bisonekwa bya mu Bible bwāikele na lupusa padi ba Martin Luther, William Tyndale, ne John Calvin.​—wp16.6-F, p. 10-12.

Le “kuta mutyima ku ngitu” i kwishile namani na “kuta mutyima ku mushipiditu”? (Loma 8:6)

Boba batele mutyima ku bya kusakasaka bya abo bene besambilanga’po kyaba kyonso, balangulukila’po bininge ne kuleka bino bya kusakasaka bitādile būmi bwabo. Ino boba batele mutyima ku kwingidila Leza mu būmi bwabo balekanga mutyima wabo uludikwe na mushipiditu wa Yehova ne kwifunda kulanga na mwalangila. “Kuta mutyima ku ngitu i lufu ino kuta mutyima ku mushipiditu i būmi ne ndoe.”​—w16.12, p. 15-17.

I miswelo’ka imo ya kutyepeja’ko kukambakanya mutyima?

Tūla bintu bya mvubu mikatampe pa kufuko kibajinji, ikala na bujalale, wilamije’ko kitatyi kya kwitūkija difuku ne difuku, bandila bupangi bwa Yehova, sepa na bantu, witamune bidyoma kitatyi ne kitatyi ne kulāla mobifwaninwe.​—w16.12, p. 22-23.

“Enoke wātundulwilwe kutyina’mba wakamona lufu.” (Bahebelu 11:5) Muswelo’ka?

Bimweka bu Yehova wājimankenye būmi bwa Enoke, mwanda wa aleke kuyuka’mba kafunga.​—wp17.1, p. 12-13.

Mwanda waka butūkanye bukidi na mvubu?

Muntu mutūkanye wiyukile aye mwine ne kujingulula’mba kudi bintu byabwanya ne byakabwanyapo kulonga. Kino kimukwashanga alēmeke bakwabo ne kwikala nabo biyampe.​—w17.01, p. 18.

Lelo i bubinga’ka bulombola’mba Leza wāludikile kitango kyendeji mu myaka katwa kabajinji, enka na mwaludikila boba babundile Kitango Kyendeji dyalelo?

Mushipiditu ujila i mukwashe Kitango Kyendeji kivwanije bubine bwa mu Bible bokebadipo bevwanije mafuku kunyuma. Kyendejanga mwingilo wa busapudi na bukwashi bwa bamwikeulu, kadi boba babundile’kyo baludikwanga na Kinenwa kya Leza pobaleta buludiki. Kino kibingija’mba Yehova ye aye na bubine uludika bantu bandi dyalelo.​—w17.02, p. 26-28.

I bika bitulengeja tumone kinkūlwa bu kyabuntu kilēme?

I bino bintu biná: Mwine upēne’kyo, kine kyapēnine’kyo, byajimije pa kupāna’kyo, ne bisakibwa bya bine byokivuije. Kulangulukila pa bino bintu kubwanya kwitukwasha tutamije mutyima wetu wa kufwija’ko pa kinkūlwa, kyabuntu kikatakata kya Leza.​—wp17.2, p. 4-5.

Lelo mwine Kidishitu ubwanya kushinta butyibi bwaakwete?

Tufwaninwe kufikidija butyibi bwetu. Inoko, kyaba kimo bilombanga ne kutala monka butyibi botwakwete mafuku kunyuma, pakwabo ne kwibushinta. Yehova pa kumona’mba bene Nineva abaalamuka, wāshintyile butyibi bwandi. Kyaba kimo, tubwanya kushinta butyibi bwetu mwanda wa ngikadilo yashinta nansha kadi tubayukila’ko myanda mikwabo pa mwanda’wa.​—w17.03, p. 16-17.

Mwanda waka kubabañana kuletanga kyaka?

Kubwanya kukolomona myanda ne kwiibipija. Ekale tudi na bubinga nansha shi ketudipo nabo, kunenakanya bintu bitapa kekukapwija’po myanda’ya nansha dimo.​—w17.04, p. 21.