Uno i mwanda ubadilwa mu bintu bivule byobādi batopeka Yesu ne bana ba bwanga kudi balwana nabo. Bijila bya Mosesa byāshintulwile kine kibwanya kusubija muntu, kimfwa, kutambwa na mema mu ngitu, makopo, kutenga umbidi mufwe wa nyema nansha wa muntu. Kadi Bijila byāletele bulombodi bulombola muswelo ubwanya kwitōkeja muntu. Padi i na kwela kitapwa, koya, nansha kukuswa mashi.​—Levi, shapita 11-15; Umbadilo, shapita 19.

Bafundiji Bayuda, betwa ne bu Balabi, bābwejeje’ko bijila bya abo bene. Bilembwa bimo binena’mba bābwejeje’ko bijila bya ntentekelo batwela mu kanda ne kanda pa byobya bibwanya kusubija muntu ne muswelo wakokeja kusubija bakwabo. Balabi batūdile ne bijila pa miswelo ya bingidilwa bikokeja kwikala bya disubi ne byampikwa disubi ne bisela byādi bifwaninwe kulonda bantu mwanda wa bekale monka batōka.

Balwana na Yesu bāmwipangwile amba: “Mwanda waka bobe bana ba bwanga kebalondangapo kishi kya bantu ba pa kala, ino badya’ko byakudya na makasa a disubi?” (Mako 7:5) Bano Bafadiseo kebādipo besambila pa bukundwe bufwaninwe, ko kunena’mba, koya ku makasa kumeso kwa kudya. Bafadiseo batūdile’ko kijila kya kulonga kumeso kwa kudya, bādi bafwaninwe kumwangila muntu mema ku maboko mungya kisela. Bilembwa bitelelwe kūlu bibweja’ko amba, Balabi “bādi batonga i kingidilwa’ka kya kwingidija pa kumwangila muntu mema, i mema’ka mafwaninwe, i ani ufwaninwe kumwangilañana mema, ne buvule bwa maboko a kubwanwa mema’a.”

Le Yesu wālongele namani pa bino bijila bya bantu? Wāsapwidile bendeji ba bipwilo bya Bayuda’mba: “Isaya wādi na nsambu pa kunena mu bupolofeto myanda yenu banwe banzazangi, monka mokilembelwe amba: ‘Bano bantu bandēmekanga na milomo yabo bitupu, inoko mityima yabo idi kulampe nami [Yehova]. I bya bitupu byobantōtanga, mwanda bafundijanga bijila bya bantu amba yo mfundijo.’ Mubaleka mbila ya Leza, mubalamata’ko ku kishi kya bantu.”​—Mako 7:6-8.