Enda ku bidi'mo

Le “Mfungulo ya Bulopwe” I Bika?

Le “Mfungulo ya Bulopwe” I Bika?

Bilondolola Bible

“Mfungulo ya Bulopwe” yelekeja lupusa lwa kushitwila bantu dishinda dya “kutwela mu Bulopwe bwa Leza.” (Mateo 16:19; Bilongwa 14:22) * Yesu wāpele Petelo “mfungulo ya Bulopwe bwa mūlu.” Ko kunena’mba Petelo wāpelwe lupusa lwa kusokola muswelo wādi wa kwikala bantu ba kikōkeji na dyese dya kutwela mu Bulopwe bwa mūlu pa kupwa kupebwa mushipiditu ujila wa Leza.

Le mfungulo yāingidijibwe mwanda wa bāni?

Petelo wāingidije lupusa lwāmupele Leza mwanda wa kushitwila bibumbo bisatu bya bantu dishinda dya kutwela mu Bulopwe.

  1. Bayuda ne Bayuda ba kwalamuka. Kitatyi kityetye na pāfwile Yesu, Petelo wākankamikile kibumbo kya Bayuda ba lwitabijo, betabije amba Yesu ye utongelwe na Leza mwanda wa kuludika mu Bulopwe. Petelo wēbalombwele bya kulonga pa kupanda. Mu uno muswelo wēbashitwila dishinda dya kutwela mu Bulopwe, kupwa bantu tununu na tununu “[baitabija] binenwa byandi.”​—Bilongwa 2:38-41.

  2. Bene Samadia. Bātumine Petelo mwenda mafuku ku bene Samadia. * Kadi wāingidija lufungulo lwa Bulopwe, kitatyi kyobālombelele bantu aye ne mutumibwa Yoano ‘amba batambule mushipiditu ujila.’ (Bilongwa 8:14-17) Kulonga namino kwāshitwidile bene Samadia dishinda dya kutwela mu Bulopwe.

  3. Bajentaila. Myaka isatu ne kipindi papo Yesu ke mufwe kala, Leza wāsokwedile Petelo amba Bajentaila (bantu ke Bayudapo) bakekala na mukenga wa kutwela mu Bulopwe. Ebiya Petelo wāingidija lufungulo lumo, wāsapwila Bajentaila, kadi mu uno muswelo wēbashitwila kibelo kya kutambula mushipiditu ujila, kwikala bene Kidishitu, ne kya kubadilwa mu bantu ba Bulopwe.​—Bilongwa 10:30-35, 44, 45.

Le ‘kutwela mu Bulopwe’ Kushintulula Bika?

Boba ‘batwela mu Bulopwe’ baludikanga pamo na Yesu momwa mūlu. Bible wālaile amba ‘bakashikata pa mpona’ ne amba “bakabikalanga bu balopwe pa ntanda.”​—Luka 22:29, 30; Kusokwelwa 5:9, 10.

Milangwe ya bubela pa mwanda utala mfungulo ya Bulopwe

Milangwe ya bubela: Petelo ukwatanga butyibi pa muntu ubwanya kwenda mūlu.

Bubine: Bible unena’mba ke Petelopo, ino i Kidishitu Yesu “mutyibi wa bōmi ne bafwe” (2 Temote 4:1, 8; Yoano 5:22) Bine, enka ne Petelo mwine wānenene amba Yesu “ye aye watūdilwe na Leza bu mutyibi wa bōmi ne bafwe.”—Bilongwa 10:34, 42.

Milangwe ya bubela: Madiulu ākungile Petelo atunge kitatyi kya kwingidija mfungulo ya Bulopwe.

Bubine: Yesu pawāesambīle pa mfungulo ya Bulopwe, wāsapwidile Petelo amba: “Kyonso kyo wakakuta panopanshi, nabya ne mūlu kibakutwe, kadi kyonso kyo wakakutulula pano, nanshi nankyo kadi ne mūlu namo kibakutululwa.” (Mateo 16:19, Mukanda Ukola) Nansha bantu bamo byobamonanga bu bino binenwa bishintulula’mba Petelo wākwete butyibi mūlu, byubwa bya Kingidiki kibajinjibajinji bilombola’mba butyibi bwa Petelo bwādi bulonda bobwa bwādi kala bukwatwe mūlu, ino ke kwibubadikidilapo. *

Bible ulombola pa bifuko bikwabo amba wādi ukōkele madiulu paādi wingidija mfungulo ya Bulopwe. Kimfwa, pawāingidije lufungulo lwa busatu wālondele misoñanya ya Leza.​—Bilongwa 10:19, 20.

^ mus. 1 Kyaba kimo, kishima “lufungulo” mu Bible kyelekeja lupusa ne mingilo.​—Isaya 22:20-22; Kusokwelwa 3:7, 8.

^ mus. 4 Bene Samadia bādi mu mutōtelo mwishile na wa Bayuda, inoko bādi’mo na bufundiji ne bintu bimo bya mu Bijila bya Mosesa.

^ mus. 10 Tala bilembwa bya kwifunda bya Mateo 16:19 mu Bisonekwa Bijila Bwalamuni bwa Ntanda Mipya (Bible wa Kwifunda).