ບົດຄວາມສຶກສາທີ 3
ພະເຢໂຫວາໃຫ້ເຈົ້າປະສົບຜົນສຳເລັດ
“ພະເຢໂຫວາຢູ່ກັບໂຢເຊັບ . . . ໄດ້ຊ່ວຍລາວໃຫ້ເຮັດວຽກທຸກຢ່າງປະສົບຜົນສຳເລັດ.”—ປຖກ. 39:2, 3, ລ.ມ.
ເພງ 30 ພະອົງເປັນພະເຈົ້າ ເປັນພໍ່ ແລະເພື່ອນຂອງຂ້ອຍ
ໃຈຄວາມສຳຄັນ a
1-2. (ກ) ເປັນຫຍັງເຮົາຈຶ່ງບໍ່ແປກໃຈເມື່ອເຈິກັບບັນຫາ? (ຂ) ເຮົາຈະຮຽນຫຍັງໃນບົດຄວາມນີ້?
ເຮົາທີ່ເປັນປະຊາຊົນຂອງພະເຢໂຫວາເຮົາບໍ່ແປກໃຈເລີຍເມື່ອເຈິກັບບັນຫາ ເພາະເຮົາຮູ້ສິ່ງທີ່ຄຳພີໄບເບິນບອກທີ່ວ່າ: “ພວກເຮົາຈະມີສ່ວນໃນການປົກຄອງຂອງພະເຈົ້າໂດຍຜ່ານຄວາມທຸກລຳບາກຫຼາຍຢ່າງ.” (ກຈກ. 14:22) ເຮົາຍັງຮູ້ວ່າບັນຫາບາງຢ່າງຈະຍັງບໍ່ໝົດໄປຈົນກວ່າເຮົາຈະໄດ້ຢູ່ໃນໂລກໃໝ່ຂອງພະເຈົ້າ ເພາະຄຳພີໄບເບິນບອກວ່າໃນໂລກໃໝ່ “ຄວາມຕາຍຈະບໍ່ມີອີກຕໍ່ໄປ ຄວາມໂສກເສົ້າຫຼືສຽງຮ້ອງໄຫ້ເສຍໃຈຫຼືຄວາມເຈັບປວດຈະບໍ່ມີອີກເລີຍ.”—ພນມ. 21:4
2 ພະເຢໂຫວາບໍ່ໄດ້ປົກປ້ອງເຮົາຈາກບັນຫາຕ່າງໆ. ແຕ່ເພິ່ນຈະຊ່ວຍເຮົາໃຫ້ອົດທົນກັບບັນຫາເຫຼົ່ານັ້ນໄດ້. ຂໍໃຫ້ສັງເກດສິ່ງທີ່ໂປໂລຂຽນເຖິງພີນ້ອງໃນເມືອງໂຣມ. ໃນຕອນຕົ້ນຂອງຈົດໝາຍລາວໄດ້ເວົ້າເຖິງບັນຫາຫຼາຍຢ່າງທີ່ລາວແລະພີ່ນ້ອງເຈິ. ຈາກນັ້ນລາວກໍເວົ້າວ່າແຕ່ “ພວກເຮົາກໍຜ່ານມັນມາໄດ້ແລະໄດ້ຮັບໄຊຊະນະຢ່າງເດັດຂາດດ້ວຍຄວາມຊ່ວຍເຫຼືອຈາກຜູ້ນັ້ນທີ່ຮັກພວກເຮົາ.” (ຣມ. 8:35-37) ນີ້ສະແດງໃຫ້ເຫັນວ່າ ເຖິງວ່າເຮົາກຳລັງເຈິກັບບັນຫາຢູ່ ແຕ່ພະເຢໂຫວາກໍຈະຊ່ວຍເຮົາໃຫ້ຜ່ານມັນໄປໄດ້. ໃຫ້ເຮົາມາເບິ່ງວ່າພະເຢໂຫວາໄດ້ຊ່ວຍໂຢເຊັບແນວໃດ ແລະເພິ່ນຈະຊ່ວຍເຮົາແນວໃດ.
ເມື່ອສະພາບການປ່ຽນໄປແບບບໍ່ຄາດຄິດ
3. ຊີວິດຂອງໂຢເຊັບປ່ຽນໄປແບບບໍ່ຄາດຄິດແນວໃດ?
3 ຢາໂຄບເຮັດໃຫ້ເຫັນແຈ້ງວ່າລາວຮັກໂຢເຊັບຫຼາຍເປັນພິເສດ. ຍ້ອນແນວນັ້ນ ພວກອ້າຍຈຶ່ງຊັງໂຢເຊັບຫຼາຍ. (ປຖກ. 37:3, 4) ເມື່ອມີໂອກາດ ເຂົາເຈົ້າກໍຂາຍໂຢເຊັບໃຫ້ພວກພໍ່ຄ້າຄົນມິດີອານ ແລ້ວພວກພໍ່ຄ້າກໍເອົາໂຢເຊັບໄປຂາຍຕໍ່ຢູ່ເອຢິບ ເຊິ່ງຢູ່ຫ່າງໄກຈາກບ້ານເກີດຂອງລາວຫຼາຍຮ້ອຍກິໂລແມັດ. ລາວຖືກຂາຍໃຫ້ເປັນທາດຂອງໂປຕີຟາເຊິ່ງເປັນຫົວໜ້າທະຫານປົກປ້ອງຟາໂຣ. ຊີວິດຂອງໂຢເຊັບປ່ຽນໄປແບບບໍ່ຄາດຄິດ ຈາກທີ່ເປັນລູກຊາຍຫົວແກ້ວຫົວແຫວນຂອງພໍ່ໄດ້ກາຍມາເປັນທາດທີ່ຕ່ຳຕ້ອຍຂອງຄົນເອຢິບ.—ປຖກ. 39:1
4. ເຮົາອາດຈະເຈິບັນຫາຫຍັງແນ່?
4 ຄຳພີໄບເບິນບອກວ່າ: “ເຫດການທີ່ບໍ່ຄາດຄິດອາດເກີດຂຶ້ນກັບພວກເຮົາທຸກຄົນໃນເວລາທີ່ຄາດບໍ່ເຖິງ.” (ຜູ້ປ. 9:11, ລ.ມ.) ບາງຄັ້ງເຮົາກໍເຈິບັນຫາທີ່ເຄີຍ “ເກີດຂຶ້ນກັບຄົນອື່ນມາແລ້ວ.” ນັ້ນແມ່ນຄວາມລຳບາກທີ່ມະນຸດທົ່ວໄປເຈິໃນຊີວິດ. (1ກຣ. 10:13) ຫຼືບາງຄັ້ງເຮົາອາດຈະເຈິບັນຫາຍ້ອນເຮົາເປັນລູກສິດຂອງພະເຢຊູ. ຕົວຢ່າງເຊັ່ນ: ເຮົາອາດຈະຖືກເຍາະເຍີ້ຍ ຖືກຕໍ່ຕ້ານ ຫຼືຖືກຂົ່ມເຫງຍ້ອນຄວາມເຊື່ອຂອງເຮົາ. (2ຕມ. 3:12) ບໍ່ວ່າເຮົາຈະເຈິບັນຫາໃນຮູບແບບໃດກໍຕາມ ພະເຢໂຫວາສາມາດຊ່ວຍເຮົາໃຫ້ຜ່ານບັນຫານັ້ນໄປໄດ້. ພະເຢໂຫວາໄດ້ຊ່ວຍໂຢເຊັບແນວໃດ?
5. ໂປຕີຟາເຂົ້າໃຈວ່າໂຢເຊັບປະສົບຜົນສຳເລັດຍ້ອນຫຍັງ? (ປະຖົມມະການ 39:2-6)
5 ອ່ານປະຖົມມະການ 39:2-6. ໂປຕີຟາໄດ້ສັງເກດເຫັນວ່າໂຢເຊັບເປັນຄົນເກັ່ງແລະດຸໝັ່ນໃນການເຮັດວຽກ. ແຕ່ລາວຮູ້ວ່າທີ່ເປັນແບບນັ້ນຍ້ອນຫຍັງ? ໂປຕີຟາເຫັນວ່າ “ພະເຢໂຫວາໄດ້ຊ່ວຍໂຢເຊັບໃຫ້ເຮັດທຸກຢ່າງປະສົບຜົນສຳເລັດ.” b ໃນທີ່ສຸດ ລາວກໍໄດ້ແຕ່ງຕັ້ງໂຢເຊັບໃຫ້ເປັນຜູ້ຊ່ວຍແລະເບິ່ງແຍງທຸກຢ່າງໃນເຮືອນຂອງລາວ. ແລ້ວຜົນເປັນແນວໃດ? ໂປຕີຟາກໍໄດ້ຮັ່ງມີຂຶ້ນ.
6. ໂຢເຊັບອາດຈະຮູ້ສຶກແນວໃດກັບສະພາບການຂອງລາວ?
6 ໃຫ້ເຮົາເບິ່ງວ່າໂຢເຊັບຈະຮູ້ສຶກແນວໃດ. ສິ່ງທີ່ໂຢເຊັບຕ້ອງການຫຼາຍທີ່ສຸດແມ່ນຫຍັງ? ລາວຢາກໃຫ້ໂປຕີຟາເບິ່ງວ່າລາວເປັນຄົນພິເສດແລະໃຫ້ລາງວັນກັບລາວບໍ? ຄືຊິບໍ່ແມ່ນ. ທີ່ຈິງແລ້ວ ລາວຢາກໄດ້ອິດສະຫຼະແລະກັບບ້ານໄປຫາພໍ່. ເຖິງວ່າໂຢເຊັບຈະໄດ້ຮັບຄວາມພໍໃຈຈາກນາຍ ແຕ່ໂຢເຊັບກໍຍັງເປັນທາດຢູ່ແລະຮັບໃຊ້ນາຍທີ່ບໍ່ໄດ້ນະມັດສະການພະເຢໂຫວາ. ເຖິງວ່າສິ່ງທີ່ໂຢເຊັບຕ້ອງການແມ່ນຢາກກັບບ້ານ ແຕ່ພະເຢໂຫວາກໍບໍ່ໄດ້ໃຫ້ຕາມທີ່ລາວໄດ້ຕ້ອງການ. ແຖມຊີວິດລາວຕໍ່ຈາກນີ້ຈະຮ້າຍແຮງຂຶ້ນ.
ເມື່ອສະພາບການຮ້າຍແຮງຂຶ້ນ
7. ຊີວິດຂອງໂຢເຊັບຮ້າຍແຮງຂຶ້ນແນວໃດ? (ປະຖົມມະການ 39:14, 15)
7 ໃນປະຖົມມະການບົດ 39 ບອກວ່າ ເມຍໂປຕີຟາພະຍາຍາມຊັກຊວນໂຢເຊັບຫຼາຍເທື່ອໃຫ້ນອນນຳ ແຕ່ໂຢເຊັບໄດ້ປະຕິເສດ. ໃນທີ່ສຸດ ເມຍໂປຕີຟາຈຶ່ງໃຈຮ້າຍແລະໃສ່ຮ້າຍໂຢເຊັບວ່າ ພະຍາຍາມຈະຂົ່ມຂືນລາວ. (ອ່ານປະຖົມມະການ 39:14, 15) ເມື່ອໂປຕີຟາໄດ້ຍິນແບບນັ້ນ ກໍໄດ້ສັ່ງໃຫ້ຈັບໂຢເຊັບໄປຂັງໃນຄຸກ ແລະໂຢເຊັບຕ້ອງຕິດຄຸກເປັນເວລາຫຼາຍປີ. (ປຖກ. 39:19, 20) ຊີວິດໃນຄຸກເປັນແນວໃດ? ຄຳວ່າ “ຄຸກ” ທີ່ໂຢເຊັບໃຊ້ໃນພາສາເຮັບເຣີອາດໝາຍເຖິງ “ຂຸມ.” ນັ້ນໝາຍຄວາມວ່າໂຢເຊັບຢູ່ໃນຂຸມທີ່ມືດແລະເຮັດໃຫ້ຮູ້ສຶກບໍ່ມີຫວັງ. (ປຖກ. 40:15, ລ.ມ., ໄຂເງື່ອນ) ຄຳພີໄບເບິນຍັງບອກວ່າຕີນຂອງໂຢເຊັບຖືກລ່າມໂສ້ແລະຄໍຂອງລາວຖືກໃສ່ປອກເຫຼັກ. (ເພງ. 105:17, 18) ເຮົາເຫັນໄດ້ວ່າ ຊີວິດຂອງໂຢເຊັບຮ້າຍແຮງຂຶ້ນເລື້ອຍໆ. ຈາກການເປັນທາດທີ່ໜ້າໄວ້ໃຈກາຍມາເປັນນັກໂທດ.
8. ເຖິງວ່າສະພາບການຂອງເຮົາຈະຮ້າຍແຮງຂຶ້ນເລື້ອຍໆແຕ່ເຮົາສາມາດໝັ້ນໃຈໃນເລື່ອງຫຍັງ?
8 ເຈົ້າເຄີຍເປັນແບບນີ້ບໍ ເຖິງວ່າຈະອະທິດຖານຫຼາຍເທື່ອເພື່ອຂໍໃຫ້ພະເຢໂຫວາຊ່ວຍ ແຕ່ສະພາບການກໍບໍ່ດີຂຶ້ນເລີຍ? ເຮົາອາດຈະເຄີຍເປັນແບບນັ້ນ ຍ້ອນວ່າພະເຢໂຫວາບໍ່ໄດ້ປົກປ້ອງເຮົາຈາກບັນຫາຕ່າງທີ່ຢູ່ໃນໂລກຂອງຊາຕານ. (1ຢຮ. 5:19) ແຕ່ເຮົາກໍໝັ້ນໃຈວ່າ ພະເຢໂຫວາເຫັນເຫດການທຸກຢ່າງທີ່ເກີດຂຶ້ນກັບເຮົາ ແລະຢາກຊ່ວຍເຮົາ. (ມທ. 10:29-31; 1ປຕ. 5:6, 7) ພະເຢໂຫວາສັນຍາວ່າ “ເຮົາຈະບໍ່ມີວັນປະເຈົ້າ ເຮົາຈະບໍ່ມີວັນຖິ້ມເຈົ້າ.” (ຮຣ. 13:5) ຈາກຂໍ້ພະຄຳພີນີ້ເຮົາເຫັນໄດ້ວ່າ ພະເຢໂຫວາຈະຊ່ວຍເຮົາໃຫ້ອົດທົນກັບບັນຫາຕ່າງໆໄດ້ ເຖິງວ່າເຮົາຈະຢູ່ໃນສະພາບການທີ່ຮ້າຍແຮງແລະເບິ່ງຄືວ່າບໍ່ມີຫວັງແລ້ວ. ໃຫ້ເຮົາມາເບິ່ງເລື່ອງຂອງໂຢເຊັບນຳກັນ.
9. ສິ່ງໃດສະແດງໃຫ້ເຫັນວ່າພະເຢໂຫວາຢູ່ນຳໂຢເຊັບຕອນທີ່ລາວຢູ່ໃນຄຸກ? (ປະຖົມມະການ 39:21-23)
9 ອ່ານປະຖົມມະການ 39:21-23. ພະເຢໂຫວາໄດ້ຊ່ວຍໂຢເຊັບໃຫ້ປະສົບຜົນສຳເລັດແນວໃດຕອນທີ່ຢູ່ໃນຄຸກ? ໂຢເຊັບຄ່ອຍໆໄດ້ຮັບຄວາມນັບຖືແລະຄວາມໄວ້ໃຈຈາກຫົວໜ້າຜູ້ຄຸມຄຸກ ຄືກັບຕອນທີ່ລາວຢູ່ກັບໂປຕີຟາ. ໃນທີ່ສຸດລາວກໍຖືກແຕ່ງຕັ້ງໃຫ້ເບິ່ງແຍງນັກໂທດຄົນອື່ນໆທີ່ຢູ່ໃນຄຸກ. ຄຳພີໄບເບິນບອກວ່າ: “ເມື່ອມອບວຽກໃຫ້ໂຢເຊັບເຮັດ ຫົວໜ້າຜູ້ຄຸມຄຸກກໍບໍ່ຕ້ອງກັງວົນເລື່ອງຫຍັງເລີຍ.” ໂຢເຊັບໄດ້ເຮັດວຽກທີ່ສຳຄັນຫຼາຍເຊິ່ງເປັນການປ່ຽນແປງທີ່ເຫຼືອເຊື່ອແທ້ໆ! ຈະເປັນໄປໄດ້ແນວໃດທີ່ນັກໂທດຜູ້ໜຶ່ງເຊິ່ງຖືກກ້າວຫາວ່າພະຍາຍາມຂົ່ມຂືນເມຍນາຍ ໄດ້ກາຍມາເປັນຜູ້ທີ່ໄດ້ຮັບຄວາມໄວ້ໃຈແລະໄດ້ເຮັດວຽກທີ່ສຳຄັນ? ມີທາງດຽວເທົ່ານັ້ນທີ່ເປັນໄປໄດ້ກໍຄື “ພະເຢໂຫວາຢູ່ນຳໂຢເຊັບ ແລະພະເຢໂຫວາໄດ້ຊ່ວຍໂຢເຊັບໃຫ້ເຮັດວຽກທຸກສິ່ງທຸກຢ່າງສຳເລັດ.”
10. ໂຢເຊັບຮູ້ສຶກວ່າໂຕເອງປະສົບຜົນສຳເລັດໃນທຸກສິ່ງບໍ? ຂໍໃຫ້ອະທິບາຍ.
10 ລອງຄິດເບິ່ງວ່າ ໂຢເຊັບຈະຮູ້ສຶກແນວໃດໃນຕອນນັ້ນ. ຫຼັງຈາກທີ່ຖືກກ້າວຫາຢ່າງຜິດໆແລະຕ້ອງຕິດຄຸກ ເຈົ້າຄິດວ່າໂຢເຊັບຖືວ່າໂຕເອງປະສົບຜົນສຳເລັດໃນທຸກສິ່ງແລ້ວບໍ? ໂຢເຊັບຕ້ອງການຫຍັງຫຼາຍທີ່ສຸດ? ລາວຕ້ອງການຄວາມເຂົ້າໃຈຈາກຫົວໜ້າຜູ້ຄຸມຄຸກບໍ? ຄືຊິບໍ່. ສິ່ງທີ່ລາວຕ້ອງການຫຼາຍທີ່ສຸດແມ່ນຢາກຖືກປ່ອຍໂຕອອກຈາກຄຸກ. ລາວເຖິງຂັ້ນຂໍໃຫ້ນັກໂທດອີກຄົນໜຶ່ງທີ່ກຳລັງຈະຖືກປ່ອຍໂຕອອກຈາກຄຸກໃຫ້ໄປຂໍຟາໂຣໃຫ້ປ່ອຍໂຕລາວຄືກັນ. (ປຖກ. 40:14) ແຕ່ນັກໂທດຄົນນັ້ນກໍບໍ່ໄດ້ບອກຟາໂຣທັນທີ ໂຢເຊັບກໍເລີຍ ຕ້ອງໄດ້ຢູ່ໃນຄຸກອີກ 2 ປີ. (ປຖກ. 40:23; 41:1, 14) ເຖິງຈະເປັນແນວນັ້ນ ພະເຢໂຫວາກໍຍັງເຮັດໃຫ້ໂຢເຊັບປະສົບຜົນສຳເລັດ. ພະເຢໂຫວາໄດ້ເຮັດແນວໃດ?
11. ຄວາມສາມາດທີ່ພິເສດຫຍັງທີ່ພະເຢໂຫວາໃຫ້ກັບໂຢເຊັບ? ແລະເລື່ອງນີ້ມີສ່ວນເຮັດໃຫ້ຄວາມຕ້ອງການຂອງພະເຢໂຫວາເກີດຂຶ້ນແທ້ແນວໃດ?
11 ຕອນທີ່ໂຢເຊັບຢູ່ໃນຄຸກ ພະເຢໂຫວາໄດ້ເຮັດໃຫ້ກະສັດຟາໂຣຝັນເຖິງສອງເລື່ອງທີ່ເຮັດໃຫ້ບໍ່ສະບາຍໃຈແລະຢາກຮູ້ວ່າຄວາມຝັນນັ້ນໝາຍເຖິງຫຍັງ. ເມື່ອກະສັດຮູ້ວ່າໂຢເຊັບສາມາດແປຄວາມຝັນໄດ້ ລາວຈຶ່ງໄດ້ໃຫ້ຄົນພາໂຢເຊັບມາຫາ. ດ້ວຍຄວາມຊ່ວຍເຫຼືອຈາກພະເຢໂຫວາໂຢເຊັບສາມາດແປຄວາມຝັນ ເຊິ່ງນີ້ເຮັດໃຫ້ຟາໂຣປະທັບໃຈຫຼາຍ. ແລະເມື່ອຟາໂຣເຫັນວ່າພະເຢໂຫວາຢູ່ກັບໂຢເຊັບ ລາວຈຶ່ງໄດ້ແຕ່ງຕັ້ງໃຫ້ໂຢເຊັບເບິ່ງແຍງສະບຽງອາຫານທົ່ວປະເທດເອຢິບ. (ປຖກ. 41:38, 41-44) ຕໍ່ມາກໍເກີດການຂາດແຄນອາຫານຢ່າງຮຸນແຮງໃນເອຢິບແລະປະເທດອ້ອມຂ້າງ ເຊິ່ງລວມເຖິງການາອານທີ່ຄອບຄົວຂອງໂຢເຊັບອາໄສຢູ່. ນີ້ເຮັດໃຫ້ໂຢເຊັບສາມາດຊ່ວຍຄອບຄົວໃຫ້ຜ່ານຄວາມອຶດຢາກໄປໄດ້ ເຊິ່ງເປັນການປົກປ້ອງເຊື້ອສາຍຂອງເມຊີອາທີ່ຈະເກີດມາ.
12. ພະເຢໂຫວາເຮັດໃຫ້ໂຢເຊັບປະສົບຜົນສຳເລັດແນວໃດ?
12 ໃຫ້ຄິດເຖິງເລື່ອງທີ່ໜ້າເຫຼືອເຊື່ອທີ່ເກີດຂຶ້ນກັບໂຢເຊັບ. ເຈົ້າຄິດວ່າໃຜເປັນຜູ້ເຮັດໃຫ້ໂປຕີຟາສົນໃຈໂຢເຊັບເປັນພິເສດທັງໆທີ່ໂຢເຊັບເປັນພຽງທາດທີ່ຕ່ຳຕ້ອຍ? ຫຼືໃຜທີ່ເຮັດໃຫ້ຫົວໜ້າຜູ້ຄຸມຄຸກພໍໃຈໂຢເຊັບທັງໆທີ່ລາວເປັນພຽງນັກໂທດທີ່ຢູ່ໃນຄຸກ? ໃຜທີ່ເຮັດໃຫ້ຟາໂຣຝັນແລະເຮັດໃຫ້ໂຢເຊັບສາມາດແປຄວາມຝັນນັ້ນໄດ້? ແລະໃຜທີ່ຢູ່ເບື້ອງຫຼັງໃນການແຕ່ງຕັ້ງໂຢເຊັບໃຫ້ເປັນຜູ້ເບິ່ງແຍງສະບຽງອາຫານທົ່ວປະເທດເອຢິບ? (ປຖກ. 45:5) ແນ່ນອນວ່າຈະເປັນໃຜບໍ່ໄດ້ນອກຈາກພະເຢໂຫວາຜູ້ທີ່ຊ່ວຍໂຢເຊັບໃຫ້ປະສົບຜົນສຳເລັດໃນທຸກສິ່ງ. ພະເຢໂຫວາໄດ້ປ່ຽນແຜນຮ້າຍຂອງພວກອ້າຍຂອງໂຢເຊັບເພື່ອໃຫ້ຄວາມຕ້ອງການຂອງເພິ່ນສຳເລັດເປັນຈິງ.
ພະເຢໂຫວາເຮັດໃຫ້ເຈົ້າປະສົບຜົນສຳເລັດແນວໃດ
13. ພະເຢໂຫວາໄດ້ເຂົ້າມາຄວບຄຸມຊີວິດສ່ວນຕົວຂອງເຮົາບໍ? ຂໍໃຫ້ອະທິບາຍ.
13 ເຮົາໄດ້ບົດຮຽນຫຍັງຈາກເລື່ອງຂອງໂຢເຊັບ? ພະເຢໂຫວາໄດ້ເຂົ້າມາຄວບຄຸມຊີວິດສ່ວນຕົວຂອງເຮົາບໍ? ເພິ່ນໄດ້ເຂົ້າມາແຊກແຊງບັນຫາທີ່ເຮົາເຈິແລະປ່ຽນສິ່ງ ທີ່ບໍ່ດີໃຫ້ກາຍເປັນສິ່ງທີ່ດີບໍ? ບໍ່. ຄຳພີໄບເບິນບໍ່ໄດ້ເວົ້າແບບນັ້ນ. (ຜູ້ປ. 8:9; 9:11) ແຕ່ເຮົາຮູ້ວ່າເມື່ອເຮົາເຈິບັນຫາ ພະເຢໂຫວາຮູ້ແລະໄດ້ຍິນເມື່ອເຮົາຮ້ອງຂໍຄວາມຊ່ວຍເຫຼືອ. (ເພງ. 34:15; 55:22; ອຊຢ. 59:1) ແລະເຮົາກໍໝັ້ນໃຈວ່າເພິ່ນສາມາດຊ່ວຍເຮົາໃຫ້ອົດທົນກັບບັນຫາຕ່າງໆໄດ້. ເພິ່ນເຮັດແນວໃດ?
14. ພະເຢໂຫວາຊ່ວຍເຮົາແນວໃດຕອນທີ່ເຮົາເຈິບັນຫາ?
14 ວິທີໜຶ່ງທີ່ພະເຢໂຫວາຊ່ວຍເຮົາແມ່ນ ເພິ່ນໃຫ້ກຳລັງໃຈໃນເວລາທີ່ເຮົາຕ້ອງການພໍດີ. (2ກຣ. 1:3, 4) ເລື່ອງນີ້ໄດ້ເປັນຈິງກັບພີ່ນ້ອງຊາຍຄົນໜຶ່ງທີ່ຊື່ເອຊິດຊ໌ຢູ່ປະເທດຕວກເມນິສະຖານ ທີ່ຖືກຈັບເຂົ້າຄຸກຍ້ອນຄວາມເຊື່ອເປັນເວລາສອງປີ. ລາວເວົ້າວ່າ “ໃນຕອນເຊົ້າຂອງມື້ທີ່ຈະໄປຂຶ້ນສານ ພີ່ນ້ອງຊາຍຄົນໜຶ່ງໄດ້ເປີດເອຊາຢາ 30:15 ໃຫ້ຂ້ອຍເບິ່ງ. ຂໍ້ນັ້ນບອກວ່າ ‘ຖ້າພວກເຈົ້າເຮັດໃຈໃຫ້ສະຫງົບແລະໄວ້ວາງໃຈເຮົາ ພວກເຈົ້າຈະເຂັ້ມແຂງ.’ ຂໍ້ພະຄຳພີນີ້ໄດ້ຊ່ວຍໃຫ້ຂ້ອຍມີໃຈສະຫງົບແລະຝາກທຸກເລື່ອງໄວ້ກັບພະເຢໂຫວາ. ການຄິດຕຶກຕອງຂໍ້ພະຄຳພີນີ້ໄດ້ຊ່ວຍຂ້ອຍໃຫ້ອົດທົນຕະຫຼອດເວລາທີ່ຂ້ອຍຢູ່ໃນຄຸກ.” ລອງຄິດເບິ່ງວ່າ ໃນຊີວິດຂອງເຈົ້າມີຕອນໃດແດ່ທີ່ພະເຢໂຫວາໄດ້ໃຫ້ກຳລັງໃຈເຈົ້າໃນເວລາທີ່ເຈົ້າຕ້ອງການຫຼາຍທີ່ສຸດ?
15-16. ເຮົາໄດ້ຮຽນຫຍັງຈາກປະສົບການຂອງໂທຣີ?
15 ເມື່ອເຮົາຄິດຄືນຫຼັງ ເຮົາກໍຈະເຫັນວ່າພະເຢໂຫວາໄດ້ຊ່ວຍເຮົາໃຫ້ຜ່ານບັນຫາຕ່າງໆມາໄດ້ແນວໃດ. ໃຫ້ເຮົາມາເບິ່ງຕົວຢ່າງຂອງພີ່ນ້ອງຍິງຄົນໜຶ່ງທີ່ຊື່ໂທຣີ. ເມຊັນລູກຊາຍຂອງລາວຕ້ອງຕໍ່ສູ້ກັບໂລກມະເຮັງເປັນເວລາ 6 ປີ ແລະໃນທີ່ສຸດລາວກໍຕາຍ ໂທຣີບອກວ່າ: “ສຳລັບຜູ້ເປັນແມ່ແລ້ວ ບໍ່ມີຫຍັງທີ່ເຈັບປວດຫຼາຍກວ່າການທີ່ເຫັນລູກຕົວເອງຕາຍ. ແຕ່ຂ້ອຍກໍໝັ້ນໃຈວ່າພໍ່ແມ່ຄົນອື່ນໆກໍຄືຊິຮູ້ສຶກຄືກັນກັບຂ້ອຍວ່າ ການເຫັນລູກເຈັບມັນຮ້າຍແຮງກວ່າທີ່ເຮົາເຈັບເອງດ້ວຍຊ້ຳ.”
16 ເຖິງວ່າເລື່ອງນັ້ນຈະເຮັດໃຫ້ໂທຣີເສົ້າໃຈຫຼາຍ ແຕ່ເມື່ອລາວໄດ້ຄິດຄືນຫຼັງກໍເຫັນວ່າພະເຢໂຫວາໄດ້ຊ່ວຍລາວແນວໃດໃຫ້ຜ່ານບັນຫາຕ່າງໆມາໄດ້. ລາວເວົ້າວ່າ “ຕອນນັ້ນຂ້ອຍເຫັນເລີຍວ່າພະເຢໂຫວາຮັກຂ້ອຍຫຼາຍແທ້ໆ. ຕົວຢ່າງ ຕອນທີ່ເມຊັນອາການໜັກຈົນບໍ່ສາມາດໃຫ້ຄົນອື່ນເຂົ້າພົບໄດ້ ແຕ່ກໍມີພີ່ນ້ອງຢູ່ໂຮງໝໍຕະຫຼອດທີ່ພ້ອມຈະໃຫ້ຄວາມຊ່ວຍເຫຼືອເຮົາ. ບາງຄົນຂີ່ລົດຕັ້ງ 2 ຊົ່ວໂມງເພື່ອມາຢາມລາວຢູ່ໂຮງໝໍ. ແລະແມ່ນແຕ່ໃນຍາມທີ່ຫຍຸ້ງຍາກ ເຂົາເຈົ້າກໍຍັງຢູ່ຄຽງຂ້າງເຮົາສະເໝີ.” ພະເຢໂຫວາໄດ້ຊ່ວຍໂທຣີໃຫ້ອົດທົນກັບບັນຫາ ແລະເພິ່ນໄດ້ຊ່ວຍເມຊັນຄືກັນ.—ເບິ່ງຂອບ “ ພະເຢໂຫວາໄດ້ໃຫ້ສິ່ງຈຳເປັນກັບເຮົາໃນເວລາທີ່ຕ້ອງການພໍດີ”
ໃຫ້ຄິດເຖິງສິ່ງທີ່ພະເຢໂຫວາໄດ້ເຮັດເພື່ອຊ່ວຍເຫຼືອເຮົາ
17-18. ສິ່ງໃດຈະຊ່ວຍເຮົາໃຫ້ເຫັນວ່າ ພະເຢໂຫວາຊ່ວຍເຮົາຕອນທີ່ເຮົາເຈິບັນຫາ? (ຄຳເພງ 40:5)
17 ອ່ານຄຳເພງ 40:5. ເປົ້າໝາຍຂອງນັກປີນພູກໍຄື ປີນຂຶ້ນໄປເທິງຈອມພູ. ແຕ່ໃນລະຫວ່າງທາງນັ້ນ ລາວສາມາດຢຸດພັກເພື່ອຊື່ນຊົມທຳມະຊາດທີ່ຊ່ວຍງາມໄດ້. ເຮົາກໍຄືກັນຄວນຢຸດແລະຄິດເປັນປະຈຳວ່າພະເຢໂຫວາກຳລັງຊ່ວຍເຮົາໃຫ້ປະສົບຜົນສຳເລັດແນວໃດແມ່ນແຕ່ຕອນທີ່ເຈິບັນຫາ. ແລະໃນຕອນແລງຂອງແຕ່ລະມື້ ຂໍໃຫ້ຖາມຕົວເອງວ່າ ‘ມື້ນີ້ພະເຢໂຫວາໄດ້ເຮັດສິ່ງດີໆຫຍັງໃຫ້ຂ້ອຍແດ່? ເຖິງວ່າຂ້ອຍກຳລັງເຈິບັນຫາຢູ່ ແຕ່ພະເຢໂຫວາຊ່ວຍຂ້ອຍໃຫ້ອົດທົນແນວໃດ?’ ໃຫ້ຄິດເຖິງຈັກໜຶ່ງຢ່າງທີ່ພະເຢໂຫວາກຳລັງຊ່ວຍເຈົ້າຢູ່.
18 ເປັນເລື່ອງທຳມະດາທີ່ເຮົາອາດຈະອະທິດຖານຂໍໃຫ້ພະເຢໂຫວາກຳຈັດບັນຫາຂອງເຮົາໃຫ້ໝົດໄປ ແລະການຂໍແບບນັ້ນກໍບໍ່ໄດ້ຜິດຫຍັງ. (ຟລປ. 4:6) ແຕ່ເຮົາຄວນຄິດເຖິງສິ່ງດີໆທີ່ເຮົາໄດ້ຮັບໃນຕອນນີ້ນຳ ແລະພະເຢໂຫວາສັນຍາວ່າ ເພິ່ນຈະໃຫ້ເຮົາມີກຳລັງແລະອົດທົນກັບບັນຫາຕ່າງໆໄດ້. ດັ່ງນັ້ນ ຂໍໃຫ້ເຮົາເຫັນຄ່າທີ່ພະເຢໂຫວາໄດ້ຊ່ວຍເຫຼືອເຮົາ. ແລະເມື່ອເຮົາເຮັດແບບນັ້ນ ເຮົາກໍຈະເຫັນວ່າພະເຢໂຫວາໄດ້ຊ່ວຍເຮົາໃຫ້ປະສົບຜົນສຳເລັດແນວໃດຄືກັບທີ່ເພິ່ນຊ່ວຍໂຢເຊັບແມ່ນແຕ່ຕອນທີ່ເຈິຄວາມຍາກລຳບາກ.—ປຖກ. 41:51, 52
ເພງ 32 ຂໍໃຫ້ຢູ່ຝ່າຍພະເຢໂຫວາ
a ຕອນທີ່ເຮົາກຳລັງເຈິກັບບັນຫາ ເຮົາຄືຊິບໍ່ສາມາດຄິດໄດ້ວ່າພະເຢໂຫວາກຳລັງຊ່ວຍເຮົາຢູ່. ເຮົາຈະຄິດແບບນັ້ນໄດ້ກໍຕໍ່ເມື່ອບັນຫາຂອງເຮົາໝົດໄປ. ແຕ່ເລື່ອງຂອງໂຢເຊັບສອນບົດຮຽນທີ່ສຳຄັນກັບເຮົາວ່າ ພະເຢໂຫວາສາມາດຊ່ວຍເຮົາໃຫ້ປະສົບຜົນສຳເລັດໄດ້ເຖິງວ່າເຮົາກຳລັງເຈິກັບບັນຫາຢູ່. ໃນບົດຄວາມນີ້ເຮົາຈະມາເບິ່ງວ່າພະເຢໂຫວາຊ່ວຍເຮົາແນວໃດ.
b ໃນຄຳພີໄບເບິນມີພຽງບໍ່ເທົ່າໃດຂໍ້ທີ່ເວົ້າເຖິງຊີວິດຂອງໂຢເຊັບຕອນທີ່ເປັນທາດ. ແຕ່ຄວາມເປັນຈິງແລ້ວການປ່ຽນແປງນັ້ນໃຊ້ເວລາຫຼາຍປີ.