1, 2. Aw Jiova dɔn sho se i fri an to wi?

JIOVA na Gɔd we fri an. Na in gi wi ɔltin we wi gɛt. Na in gɛt ɔl di valyu tin dɛn we de na dis wɔl, ɛn i de yuz dɛn fɔ sɔpɔt ɔltin we gɛt layf. (Sam 104:​13-15; Egay 2:​8) Insay di Baybul, wi lan aw Jiova bin de yuz dɛn valyu tin dɛn ya fɔ ɛp in pipul dɛn.

² Fɔ ɛgzampul, fɔ 40 ia Jiova bin de gi di Izrɛlayt dɛn wan it we dɛn kɔl mana, ɛn wata di tɛm we dɛn bin de na di ɛmti land we pɔsin nɔ go ebul fɔ liv. (Ɛksodɔs 16:​35) Dis bin mek di Izrɛlayt dɛn gɛt ɔltin we dɛn nid. (Nɛimaya 9:​20, 21) Leta, Jiova bin gi pawa to prɔfɛt Ilaysha fɔ mek wan fetful uman we in man bin dɔn day in smɔl ɔyl nɔ dɔn. Dis gift we Gɔd bin gi bin ɛp am fɔ pe ɔl in dɛt dɛn, ɛn i bin stil ebul fɔ gɛt sɔm mɔni fɔ in ɛn in bɔy pikin fɔ kɔntinyu fɔ liv. (Sɛkɛn Kiŋ 4:​1-7) Ɛn Jiova bin ɛp Jizɔs fɔ  gi it ɛn ivin mɔni di tɛm we i si se nid de fɔ lɛ i du dat.—Matyu 15:​35-38; 17:​27.

3. Wetin wi go tɔk bɔt insay dis atikul?

³ Jiova kin yuz ɛnitin fɔ sɔpɔt di tin dɛn we i mek. Bɔt pan ɔl dat, i de kɔl in savant dɛn fɔ gi wetin dɛn ebul fɔ sɔpɔt di wok we in ɔganayzeshɔn de du. (Ɛksodɔs 36:​3-7; rid Prɔvabs 3:​9.) Wetin mek Jiova want wi fɔ yuz wi valyu tin dɛn fɔ sɔpɔt in ɔganayzeshɔn? Aw Jiova in savant dɛn we bin de di tɛm we dɛn bin de rayt di Baybul bin de sɔpɔt in wok? Aw di ɔganayzeshɔn de yuz di mɔni we wi de gi tide? Dis atikul go ansa dɛn kwɛstyɔn dɛn ya.

4. We wi sɔpɔt Jiova in wok, wetin dat de sho?

⁴ Wi de gi to Jiova bikɔs wi lɛk am ɛn wi gladi fɔ wetin i de du fɔ wi. We wi de tink bɔt ɔl wetin Jiova dɔn du fɔ wi, dat kin rili tɔch wi at. Kiŋ Devid bin fil dis kayn we we i bin de tɔk bɔt wetin dɛn go nid fɔ bil di tɛmpul. Devid bin tɔk se na Jiova gi wi ɔl di tin dɛn we wi gɛt, ɛn ɛnitin we wi gi to Jiova na sɔntin we wi gɛt frɔm wetin i dɔn ɔlrɛdi gi wi.—Rid Fɔs Kronikul 29:​11-14.

5. Aw di Baybul dɔn ɛp wi fɔ no se fɔ gi na impɔtant tin pan tru wɔship?

⁵ Wi de gi bak to Jiova bikɔs na wan we dat fɔ wɔship am. Insay wan vishɔn, di apɔsul Jɔn bin yɛri Jiova in savant dɛn na ɛvin de tɔk se: “Wi Masta ɛn wi Gɔd [“Jiova,” NW]! Yu fit fɔ mek wi fɔdɔm na yu fut, ɛn prez yu, ɛn sho se yu gɛt pawa, bikɔs na yu mek ɔltin ɛn yu mek dɛn ɛn gi dɛn layf bikɔs na dat yu want.” (Rɛvɛleshɔn 4:​11) Fɔ tru, Jiova fit fɔ gɛt ɔl di prez ɛn ɔnɔ, so wi want fɔ gi am wi bɛst. Jiova bin tɛl Mozis fɔ tɛl di Izrɛlayt dɛn fɔ gɛt fɛstival tri tɛm insay di ia. Fɔ gi to Jiova na bin wan we dat we dɛn bin de wɔship am na dɛn fɛstival dɛn de. Mozis bin tɛl di pipul dɛn se “ɔlman fɔ kɛr sɔntin go fɔ go gi PAPA GƆD [“Jiova,” NW]. Tide bak, fɔ gɛt fri an ɔ fɔ gi wit ɔl wi at na wan impɔtant tin pan wi wɔship. We wi du dis, wi de sho se wi de sɔpɔt ɛn wi valyu di wok we Jiova in ɔganayzeshɔn de du.

6. Wetin mek i fayn fɔ lɛ wi gɛt fri an? (Luk di pikchɔ nia dis atikul in taytul.)

⁶ I fayn fɔ mek wi gɛt fri an ɛn nɔto fɔ de gɛt nɔmɔ. (Rid Prɔvabs 29:​21.) Tink bɔt wan smɔl pikin we in mama ɛn papa de gi mɔni, dɔn i tek pan da smɔl mɔni de we in mama ɛn papa dɔn gi am fɔ bay gift fɔ dɛn. Aw da pikin in mama ɛn papa go fil? Ɔ tink bɔt wan yɔŋ payɔnia we stil de na os wit in mama ɛn papa, bɔt we de gi sɔm mɔni fɔ ɛp fɔ pe fɔ di os rɛnt ɔ fɔ bay it fɔ di famili. In mama ɛn papa nɔ go want mek i du dat, bɔt dɛn go gri fɔ tek di mɔni. Wetin mek? Na bikɔs dat na wan we we di pikin de sho se i gladi fɔ wetin in mama ɛn papa de du fɔ am. Semweso, Jiova no se i fayn fɔ mek wi gi am wi valyu tin dɛn.

7, 8. Aw Jiova in pipul dɛn we bin de di tɛm we dɛn bin de rayt di Baybul sɛt ɛgzampul fɔ wi we i kam to fɔ (a) gi kɔntribyushɔn fɔ du sɔm patikyula wok dɛn? (b) sɔpɔt Jiova in wok?

⁷ Insay di Baybul, wi lan se Jiova in pipul dɛn bin de gi kɔntribyushɔn fɔ sɔpɔt in wok. Sɔntɛnde, dɛn bin de gi dɛn valyu tin dɛn fɔ du sɔm patikyula wok dɛn. Fɔ ɛgzampul, Mozis bin ɛnkɔrej di Izrɛlayt dɛn fɔ gi kɔntribyushɔn fɔ bil di tabanakul. Leta, Kiŋ Devid bin du di sem tin we dɛn bin de bil di tɛmpul. (Ɛksodɔs 35:​5; Fɔs Kronikul 29:​5-9) Di tɛm we Kiŋ Joash bin de rul, di prist dɛn bin yuz di mɔni we di pipul dɛn bin dɔn gi fɔ mek di say dɛn we bin dɔn pwɛl pan di tɛmpul. (Sɛkɛn Kiŋ 12:​4, 5) Insay di fɔstɛm Kristian dɛn tɛm, Kristian dɛn bin kam fɔ no se bɛtɛ tin nɔ de fɔ it na Judia, ɛn dɛn Kristian brɔda ɛn sista dɛn we bin de de bin nid ɛp. So dɛn ɔl bin disayd wetin dɛn fɔ gi fɔ sɛn fɔ dɛn Kristian brɔda ɛn sista dɛn na Judia.—Di Apɔsul Dɛn Wok [Akt] 11:​27-30.

⁸ Jiova in pipul dɛn kin gi bak mɔni fɔ sɔpɔt di wan dɛn we de bifo pan in wok. Fɔ ɛgzampul, di Lɔ we Jiova bin gi Mozis bin se di Livayt dɛn nɔ fɔ gɛt prɔpati lɛk di ɔda trayb dɛn. So ɔl di ɔda Izrɛlayt dɛn bin gi di Livayt dɛn tɛn pat pan ɛnitin we dɛn bin de gɛt. Dat bin mek di Livayt dɛn bin de pe atɛnshɔn mɔ pan dɛn wok na di tabanakul. (Di Nɔmba Dɛm 18:​21) Semweso, uman dɛn we bin gɛt fri an bin de yuz wetin dɛn gɛt fɔ sɔpɔt Jizɔs ɛn in apɔsul dɛn.—Lyuk 8:​1-3.

9. Trade trade, usay Jiova in pipul dɛn bin de pul kɔntribyushɔn?

⁹ Dɛn kɔntribyushɔn dɛn de bin kɔmɔt difrɛn say dɛn. I go bi se di Izrɛlayt dɛn we bin gi kɔntribyushɔn fɔ bil di tabanakul, go dɔn pul dɛn valyu tin dɛn frɔm di tin dɛn we dɛn bin pul na Ijipt. (Ɛksodɔs 3:​21, 22; 35:​22-24) Insay di fɔstɛm Kristian dɛn tɛm, sɔm Kristian dɛn bin sɛl dɛn prɔpati dɛn lɛk dɛn land ɔ os dɛn, ɛn dɛn bin kɛr di mɔni go to di apɔsul dɛn. Di apɔsul dɛn bin yuz di mɔni fɔ ɛp dɛn Kristian brɔda ɛn sista dɛn we bin nid ɛp. (Di Apɔsul Dɛn Wok [Akt] 4:​34, 35) Ɔda Kristian dɛn bin de kip mɔni so dat dɛn go gi fɔ sɔpɔt di wok. (Fɔs Lɛta Fɔ Kɔrint 16:​2) So i nɔ mata if wi jɛntri ɔ wi po, wi ɔl kin gi sɔntin.—Lyuk 21:​1-4.

10, 11. (a) Aw wi go falamakata Jiova in savant dɛn we bin de di tɛm we dɛn bin de rayt di Baybul fɔ sho se wi gɛt fri an? (b) Aw yu de fil we yu de sɔpɔt di wok we Gɔd in Kiŋdɔm de du?

¹⁰ Tide, dɛn kin aks wi bak fɔ gi sɔntin fɔ sɔpɔt wan patikyula wok. Sɔntɛm, yu kɔngrigeshɔn de plan fɔ mek di say dɛn we dɔn pwɛl pan una Kiŋdɔm Ɔl ɔ una go want fɔ bil nyu wan. Ɔ sɔntɛnde, dɛn kin want fɔ mek di say we dɔn pwɛl pan  di branch ɔfis we de na yu kɔntri. Wi go ebul bak fɔ ɛp fɔ gi di mɔni we dɛn kin spɛn pan wi kɔnvɛnshɔn. Ɔ sɔntɛm wi brɔda ɛn sista dɛn we de na ɔda kɔntri de sɔfa bikɔs atkwek ɔ ebi ebi ren dɔn ambɔg dɛn ɛn dɛn nid wi fɔ ɛp dɛn. Dɔn wi kɔntribyushɔn de sɔpɔt mishɔnari dɛn, spɛshal payɔnia dɛn, sakit ovasia dɛn, ɛn dɛn wan dɛn we de wok na wi wɔl ɛdkwata, ɛn na di branch ɔfis dɛn we de ɔlsay na di wɔl. Ɛni mɔnt, yu kɔngrigeshɔn de sɛn mɔni fɔ ɛp fɔ bil Asɛmbli Ɔl ɛn Kiŋdɔm Ɔl dɛn fɔ wi brɔda ɛn sista dɛn we de na ɔda kɔntri dɛn.

¹¹ Wi ɔl kin gi sɔntin fɔ sɔpɔt di wok we Jiova in ɔganayzeshɔn de du insay dis las dez. Bɔku pan di kɔntribyushɔn dɛn nɔ kin gɛt nem pan am. We wi de put mɔni na di kɔntribyushɔn bɔks na Kiŋdɔm Ɔl ɔ we wi de yuz di Intanɛt fɔ gi mɔni na jw.org, wi nɔ de tɛl nɔbɔdi ɔmɔs wi dɔn gi. Bɔt wetin yu go du if yu fil se di mɔni we yu gi tu smɔl ɔ i nɔ min natin? Wan tin we wi fɔ no na dat, bɔku pan di mɔni ɛn ɔda tin dɛn we di ɔganayzeshɔn kin gɛt, de kɔmɔt frɔm di smɔl smɔl gift dɛn we pipul dɛn kin gi. Ivin wi brɔda dɛn we nɔ gɛt bɛtɛ mɔni kin falamakata di fɔstɛm Kristian dɛn we bin de na Masidonia. Dɛn na bin “po po pipul,” bɔt dɛn bin beg fɔ mek dɛn alaw dɛn fɔ gi wetin dɛn gɛt ɛn dɛn bin gi wit ɔl dɛn at.—Sɛkɛn Lɛta Fɔ Kɔrint 8:​1-4.

12. Aw di ɔganayzeshɔn de tray fɔ yuz di mɔni we pipul dɛn kin gi di rayt we?

¹² Di Gɔvnin Bɔdi fetful ɛn gɛt sɛns we i kam pan aw dɛn de yuz di mɔni we pipul dɛn de gi. (Matyu 24:​45) Di Gɔvnin Bɔdi mɛmba dɛn kin pre fɔ mek dɛn go ebul fɔ disayd di rayt tin, ɛn dɛn kin tek tɛm plan aw fɔ yuz di mɔni we dɛn de gɛt. (Lyuk 14:​28) Insay di tɛm we dɛn bin de rayt di Baybul, di fetful man dɛn we bin de kia fɔ di mɔni bin de mek shɔ se dɛn de yuz di mɔni fɔ Jiova in wɔship. Fɔ ɛgzampul, Ɛzra bin kam bak na Jerusɛlɛm wit ɔl di valyu tin dɛn we di kiŋ na Pashia bin gi am, tin dɛn lɛk silva, gold, ɛn ɔda valyu tin dɛn we tide i go rich lɛk 100 milyɔn dɔla. Ɛzra bin si ɔl dɛn tin ya as gift to Jiova. So i bin gi spɛshal advays fɔ lɛ dɛn protɛkt di gift dɛn we dɛn bin de pas na dɛn denja say dɛn. (Ɛzra 8:​24-34) Afta sɔm tɛm, di apɔsul Pɔl bin gɛda mɔni fɔ ɛp di brɔda ɛn sista dɛn we po na Judia. I bin de mek shɔ se di wan dɛn we bin de kɛr di mɔni, na pipul dɛn we dɔn “mekɔp fɔ du wetin rayt, bifo Gɔd ɛn bifo man.” (Rid Sɛkɛn Lɛta Fɔ Kɔrint 8:​18-21.) Tide, wi ɔganayzeshɔn de falamakata Ɛzra ɛn Pɔl, ɛn dɛn de tek tɛm yuz di mɔni we pipul dɛn de gi di rayt we.

13. Wetin mek di ɔganayzeshɔn mek sɔm chenj dɛn dɛn biɛn tɛm ya?

¹³ Sɔm famili kin tray fɔ chenj di we aw dɛn bin de yuz mɔni so dat dɛn nɔ go de spɛn pas wetin dɛn de gɛt. Ɔ dɛn kin tink bɔt aw dɛn go liv simpul layf so dat dɛn go du mɔ fɔ sav Jiova. Na di sem tin Jiova in ɔganayzeshɔn de du. Dɛn biɛn tɛm ya, wi gɛt bɔku nyu wok dɛn fɔ du, ɛn sɔntɛnde, di mɔni we wi kin spɛn kin bɔku pas wetin wi de gɛt. So jɔs lɛk ɛni famili, di  ɔganayzeshɔn kin luk fɔ we dɛn fɔ sev mɔni ɛn mek di wok simpul, so dat dɛn go yuz di mɔni we pipul dɛn de gi fayn fayn wan.

14-16. (a) Wetin dɛn de du wit di mɔni we wi kin gi? (b) Aw di wok dɛn we dɛn de du dɔn ɛp yu?

¹⁴ Bɔku pipul dɛn we dɔn de na di trut fɔ lɔng tɛm kin se, naw wi de gɛt mɔ gift frɔm di ɔganayzeshɔn pas aw i bin de bi trade. Tide wi gɛt di jw.org ɛn di JW TV. Wi gɛt di New World Translation of the Holy Scriptures insay bɔku bɔku langwej dɛn. Insay 2014 ɛn 2015, wi bin gɛt di tri dez “Kɔntinyu fɔ Put Gɔd in Kiŋdɔm Fɔs!” Intanashɔnal Kɔnvɛnshɔn, we dɛn bin gɛt na sɔm pan di big big stediɔm dɛn na 14 siti dɛn na difrɛn say dɛn na di wɔl. Ɔlman we bin go bin gladi fɔ de de!

¹⁵ Bɔku pipul dɛn dɔn tɔk bɔt aw dɛn gladi fɔ dɛn tin ya we Jiova in ɔganayzeshɔn de du. Fɔ ɛgzampul, wan man ɛn in wɛf we de sav na Eshia bin rayt se: “Wi bin gɛt wi asaynmɛnt na wan smɔl tɔŋ. Dis kin mek sɔntɛnde, wi kin fil se na wi wangren de, ɛn i kin izi fɔ lɛ wi fɔgɛt di big wok we Jiova gi wi. We wi kin jɔs wach di difrɛn program dɛn na JW TV, wi kin mɛmba se wi de na ɔganayzeshɔn we de ɔlsay na di wɔl. Wi brɔda ɛn sista dɛn kin rili gladi fɔ wach di JW TV. Bɔku tɛm wi kin yɛri dɛn de tɔk se, afta we dɛn dɔn wach di program we wi kin gɛt ɛvri mɔnt, dɛn kin fil lɛk se dɛn de nia di Gɔvnin Bɔdi. Naw dɛn gladi pasmak fɔ de na Gɔd in ɔganayzeshɔn.”

¹⁶ Rayt naw, na lɛk 2,500 Kiŋdɔm Ɔl dɛn we dɛn dɔn bil ɔ mek ɔlsay na di wɔl. Di brɔda ɛn sista dɛn na wan kɔngrigeshɔn insay Ɔnduras bin tɔk se, dɛn bin dɔn de drim fɔ gɛt dɛn yon  Kiŋdɔm Ɔl, bɔt naw dɛn drim dɔn kam tru. Dɛn bin rayt se: “Wi rili gladi fɔ de na Jiova in big famili ɛn fɔ ɛnjɔy fɔ de wit wi wɔndaful brɔda ɛn sista dɛn we de ɔlsay na di wɔl.” Bɔku pipul dɛn kin tɔk dis kayn we we dɛn de gɛt di Baybul ɛn ɔda buk ɛn magazin dɛn insay dɛn yon langwej. Dɛn kin tɔk dis sem kayn we bak we dɛn Kristian brɔda ɛn sista dɛn kin ɛp dɛn di tɛm we bad bad tin kin mit dɛn lɛk atkwek ɔ ebi ebi ren, ɔ we dɛn kin si di we aw mɛtropolitan witnɛsin ɛn pɔblik prichin de ɛp pipul dɛn fɔ lan bɔt di trut.

17. Aw wi no se Jiova de sɔpɔt in ɔganayzeshɔn tide?

¹⁷ Bɔku pipul dɛn we nɔto Jiova Witnɛs nɔ kin ɔndastand aw wi kin yuz wi kɔntribyushɔn dɛn fɔ du ɔl dɛn tin ya. Wan bigman na wan big kɔmni bin go visit wan pan di say dɛn we wi kin print. I bin sɔprayz fɔ no se ɔl di wan dɛn we de wok de nɔ de gɛt pe, ɛn di mɔni we dɛn de yuz, na di mɔni we di brɔda ɛn sista dɛn de gi, ɛn wi nɔ de ɛva ɔganayz program fɔ gɛda mɔni. I tɔk se if na bay wisɛf, di tin we wi de du nɔ pɔsibul. Wi gri! Wi no se na bikɔs Jiova de sɔpɔt di wok na dat mek i pɔsibul.—Job 42:​2.

18. (a) Us blɛsin dɛn yu go gɛt we yu gi fɔ sɔpɔt di Kiŋdɔm? (b) Aw wi kin tich wi pikin dɛn ɛn dɛn wan dɛn we jɔs kam na di trut fɔ du di sem tin?

¹⁸ Na big big ɔnɔ wi gɛt fɔ sɔpɔt Jiova in wok. Ɛn Jiova prɔmis wi se i go blɛs wi if wi sɔpɔt in Kiŋdɔm. (Malakay 3:​10) Jiova dɔn prɔmis wi se, if wi fri an, tin go fayn fɔ wi. (Rid Prɔvabs 11:​24, 25.) I tɛl wi bak se wi go gladi we wi de gi, bikɔs “di pɔsin we de gi go gladi pas di pɔsin we dɛn gi.” (Di Apɔsul Dɛn Wok [Akt] 20:​35, NW) Bay wetin wi de tɔk ɛn du, wi kin tich wi pikin dɛn ɛn dɛn wan dɛn we jɔs kam na di trut aw dɛnsɛf kin sɔpɔt dis wok ɛn ɛnjɔy bɔku blɛsin dɛn.

19. Wetin dis atikul dɔn ɛnkɔrej yu fɔ du?

¹⁹ Ɔl wetin wi gɛt kɔmɔt frɔm Jiova. We wi gi Jiova bak wetin wi gɛt, wi de sho se wi lɛk am ɛn wi valyu ɔl wetin i dɔn du fɔ wi. (Fɔs Kronikul 29:​17) We di Izrɛlayt dɛn bin de gi kɔntribyushɔn fɔ bil di tɛmpul, dɛn bin “gladi bikɔs dɛn dɔn gi wit ɔl dɛn at, ɛn na wit ɔl dɛn at dɛn gi fri wan to PAPA GƆD [“Jiova,” NW].” (Fɔs Kronikul 29:​9) Lɛ wi kɔntinyu fɔ gɛt gladi-at as wi de gi bak to Jiova frɔm di tin dɛn we i dɔn gi wi.