Go dayrɛkt to di men tin

Go dayrɛkt to di say we di difrɛn difrɛn atikul dɛn de

Di Mɛmorial ɛn di Wanwɔd we Jiova in Pipul dɛn Gɛt

Di Mɛmorial ɛn di Wanwɔd we Jiova in Pipul dɛn Gɛt

“I fayn ɛn i swit wɛn PAPA GƆD in pipul gɛda wit wan at fɔ wɔship am.”—SAM 133:​1.

SIŊ DƐN: 18, 14

1, 2. Insay 2018, us program go briŋ pipul dɛn togɛda wan spɛshal we? Wetin mek? (Luk di pikchɔ nia dis atikul in taytul.)

MACH 31, 2018, bɔku bɔku pipul dɛn ɔlsay na di wɔl go atɛnd wan program we kin apin wan tɛm pan ia. Afta we di san dɔn go dɔŋ, Jiova Witnɛs dɛn ɛn bɔku ɔda pipul dɛn go kam togɛda fɔ mɛmba di day we Jizɔs day fɔ wi. Ɛvri ia, di mɛmba we wi de mɛmba Krays in day wan kin briŋ pipul dɛn kam togɛda, pas ɛni ɔda program we de apin na di wɔl.

2 Jiova ɛn Jizɔs kin rili gladi we dɛn de si bɔku bɔku pipul dɛn de atɛnd dis spɛshal program ɛvri awa insay di de, ɔlsay na di wɔl. Di Baybul tɔk bɔt “bɔku bɔku pipul we pɔsin nɔ ebul kɔnt. Dɛn bin kɔmɔt na ɔl dɛn trayb ɛn ɔl dɛn neshɔn na [di] wɔl, dɛn bin de tɔk ɔl dɛn difrɛn difrɛn laŋwej na [di] wɔl, sɔm bin wayt, sɔm bin blak,” ɛn dɛn bin de ala se: “Na Gɔd we sidɔm na di ay chia ɛn di Ship dɔn sev  wi.” (Rɛvɛleshɔn 7:​9, 10) I fayn fɔ no se ɛni ia, bɔku bɔku pipul dɛn we de kam di Mɛmorial de ɔnɔ Jiova ɛn Jizɔs fɔ di wɔndaful tin dɛn we dɛn dɔn du!

3. Us kwɛstyɔn dɛn dis atikul go tɔk bɔt?

3 Insay dis atikul, wi go gɛt ansa fɔ dɛn kwɛstyɔn dɛn ya: (1) Aw a go rɛdi misɛf fɔ di Mɛmorial so dat a go rili bɛnifit? (2) Us we dɛn di Mɛmorial go ɛp Gɔd in pipul dɛn fɔ gɛt wanwɔd? (3) Wetin a go du fɔ mek Gɔd in pipul dɛn kɔntinyu fɔ gɛt wanwɔd? (4) Yu tink se tɛm go kam we wi nɔ go gɛt Mɛmorial igen? If na so i bi, ustɛm dat go apin?

AW WI GO RƐDI WISƐF FƆ DI MƐMORIAL ƐN AW WI GO BƐNƐFIT?

4. Wetin mek i impɔtant fɔ lɛ wi atɛnd di Mɛmorial?

Jiova ɛn Jizɔs de si we wi ɔl de du wi bɛst fɔ atɛnd di Mɛmorial

4 Wetin mek i impɔtant fɔ lɛ wi atɛnd di Mɛmorial? Wan rizin we mek wi de atɛnd di mitin dɛn na bikɔs na wan we dat we wi de wɔship Jiova. Wi shɔ se Jiova ɛn Jizɔs de si we wi ɔl de du wi bɛst fɔ atɛnd dis impɔtant mitin insay di ia. Wi want Jiova ɛn Jizɔs fɔ si se wi de go di Mɛmorial, pas if siriɔs tin apin to wi we go mek wi nɔ ebul fɔ go ɛni say. If wetin wi de du de sho se di mitin dɛn impɔtant to wi, wi de gi Jiova ɔda rizin fɔ kip wi nem insay “wan buk usay i rayt dɛn wan we de fred am dɛn nem, so dat i go de mɛmba se na dɛn de tink bɔt am.” Dɛn kɔl dis buk bak “di buk we dɛn rayt dɛn pipul we gɛt layf sote go dɛn nem.” Na insay dis buk ɔl di wan dɛn we Jiova want fɔ gi layf we go de sote go dɛn nem dɛn de.—Malakay 3:​16; Rɛvɛleshɔn 20:​15.

5. Sɔm wik bifo di Mɛmorial, aw yu go kɔntinyu ‘fɔ de jɔj yusɛf fɔ si if yu biliv gud gud’ wan?

5 Sɔm wik bifo di Mɛmorial, i go fayn fɔ mek wi spɛn mɔ tɛm fɔ pre ɛn tink gud gud wan bɔt aw wi padi biznɛs wit Jiova tayt. (Rid Sɛkɛn Lɛta Fɔ Kɔrint 13:​5.) Di apɔsul Pɔl bin tɛl Kristian dɛn se: “Una fɔ de jɔj unasɛf fɔ si if una biliv gud gud.” Aw wi kin du dat? Wi kin aks wisɛf se: ‘A rili biliv se dis na di wangren ɔganayzeshɔn we Jiova dɔn pik fɔ du wetin i want? A de du mi bɛst fɔ prich ɛn tich pipul dɛn di gud nyuz? Wetin a de du de sho se a rili biliv se wi de insay di las dez ɛn di tɛm fɔ lɛ Setan in rul dɔn nɔ de fa igen? Di we aw a biliv Jiova ɛn Jizɔs stil strɔng lɛk di tɛm we a jɔs stat fɔ sav Jiova?’ (Matyu 24:​14; Sɛkɛn Lɛta To Timoti 3:​1; Di Ibru Pipul Dɛn 3:​14) We wi de tink bɔt di ansa dɛn to dɛn kwɛstyɔn dɛn ya, dat go ɛp wi fɔ de kɔntinyu fɔ sho uskayn pɔsin wi bi.

6. (a) Us we nɔmɔ wi go gɛt layf we go de sote go? (b) Aw wan ɛlda kin pripia fɔ di Mɛmorial ɛni ia? Wetin yusɛf go du?

6 Wan we we wi go pripia fɔ di Mɛmorial, na bay we wi de rid ɛn tink bɔt di atikul dɛn we de ɛksplen wetin mek dis program rili impɔtant. (Rid  Jɔn 3:​16; 17:​3.) Di wangren we we wi go gɛt layf we go de sote go na we wi kam fɔ no Jiova ɛn gɛt fet pan in Pikin, Jizɔs. Fɔ pripia fɔ di Mɛmorial, wi kin disayd fɔ stɔdi tɔpik dɛn we go ɛp wi fɔ kam nia dɛn. Dis na wetin wan brɔda we bin dɔn bi ɛlda fɔ lɔng tɛm kin du. Fɔ lɔng tɛm, i bin de kip Wachtawa atikul dɛn we de tɔk bɔt di Mɛmorial ɛn di lɔv we Jiova ɛn Jizɔs dɔn sho to wi. Bifo di Mɛmorial, i kin rid dɛn atikul dɛn ya bak ɛn tink siriɔs wan bɔt di rizin we mek dis program rili impɔtant. Sɔntɛnde, i kin ad sɔm ɔda atikul dɛn to di wan dɛn we i bin dɔn gɛt. I kin rid bak di Mɛmorial Baybul ridin ɛn tek tɛm tink gud wan bɔt wetin i dɔn rid. Dis ɛlda se ɛni ia, i bin de lan nyu tin dɛn we i bin de du dis. Di tin we impɔtant pas ɔl na dat, di stɔdi we dis brɔda bin de stɔdi bin ɛp am fɔ lɛk Jiova ɛn Jizɔs mɔ ɛn mɔ. We yu stɔdi dis kayn we, yusɛf go kam fɔ lɛk Jiova ɛn Jizɔs mɔ ɛn mɔ. Yu go gladi bak fɔ wetin dɛn dɔn du fɔ wi, ɛn yu go bɛnifit frɔm di Mɛmorial mɔ ɛn mɔ.

DI MƐMORIAL DE ƐP WI FƆ GƐT WANWƆD

7. (a) Di fɔstɛm we dɛn bin mek di Ivintɛm it fɔ Mɛmba di Masta, wetin Jizɔs bin pre fɔ? (b) Wetin sho se Jiova dɔn ansa Jizɔs in prea?

7 Di fɔstɛm we dɛn bin mek di Ivintɛm It fɔ Mɛmba di Masta, Jizɔs bin pre wan spɛshal prea. I bin pre bɔt di wanwɔd we in ɛn in Papa gɛt. Jizɔs bin pre bak fɔ lɛ ɔl in disaypul dɛn gɛt wanwɔd di sem we. (Rid Jɔn 17:​20, 21.) Fɔ tru, Jiova dɔn ansa dis prea we in pikin bin dɔn pre to am. Pan ɔl di mitin dɛn we Jiova Witnɛs dɛn kin gɛt, di Mɛmorial de sho klia wan se dɛn gɛt wanwɔd. Da de de, bɔku bɔku pipul dɛn na difrɛn kɔntri dɛn ɛn we gɛt difrɛn kɔlɔ dɛn go kam togɛda ɔlsay na di wɔl fɔ sho se dɛn biliv se na Jiova bin sɛn in Pikin. Na sɔm ples dɛn, i nɔ rili izi fɔ lɛ pipul dɛn we gɛt difrɛn kɔlɔ ɛn we de na di sem rilijɔn mit togɛda, ɔ if dɛn de du dat, ɔda pipul dɛn kin fil se i nɔ rayt. Bɔt nɔto da we de Jiova ɛn Jizɔs de fil. To dɛn, di wanwɔd we wi gɛt na di Mɛmorial na sɔntin we rili fayn.

8. Us mɛsej Jiova bin gi Izikɛl?

8 As Jiova in pipul dɛn, wi nɔ sɔprayz fɔ si di kayn we we wi gɛt wanwɔd. Insay di mɛsej we Jiova bin gi Izikɛl, i bin dɔn tɔk bɔt dis kayn wanwɔd. I bin tɛl Izikɛl fɔ tek tu tik dɛn, wan tik “fɔ Juda” ɛn wan tik “fɔ Josɛf,” ɛn i fɔ tay dɛn togɛda so dat dɛn go bi wan. (Rid Izikɛl 37:​15-17.) Di atikul “Questions From Readers” we de insay di Julay 2016 Wachtawa bin ɛksplen se: “Jiova bin yuz in prɔfɛt Izikɛl fɔ tɔk se, Gɔd in pipul dɛn go kam bak na di land we i bin dɔn prɔmis dɛn ɛn dɛn go gɛt wanwɔd bak jɔs lɛk wan neshɔn. Di tin dɛn we Izikɛl bin tɔk, bin sho se dɛn wan dɛn we de wɔship Gɔd insay dis las dez go gɛt wanwɔd.”

9. Aw wi de si di wanwɔd we Izikɛl bin dɔn tɔk bɔt we wi de atɛnd di Mɛmorial ɛvri ia?

9 Frɔm di ia 1919, Jiova bin dɔn bigin fɔ ɔganayz ɛn fɔ mek di anɔyntɛd dɛn gɛt wanwɔd bak. Dɛn bin tan lɛk di tik “fɔ Juda.” Dɛn bɔku bɔku pipul dɛn we gɛt di op fɔ de na dis wɔl sote go bin bigin fɔ jɔyn di anɔyntɛd dɛn. Di wan  dɛn we gɛt di op fɔ de na dis wɔl tan lɛk di tik “fɔ Josɛf.” Jiova bin prɔmis se i go jɔyn dɛn tu tik dɛn ya ɛn “mek dɛn wan tik” na in an. (Izikɛl 37:​19) I dɔn mek di anɔyntɛd ɛn di “ɔda ship” dɔn “miks” fɔ bi wan. (Jɔn 10:​16; Zɛkaraya 8:​23) Tide, dɛn tu grup ya dɔn gɛt wanwɔd ɛn dɛn de sav Jiova togɛda. Ɛn dɛn gɛt wan Kiŋ, we na Jizɔs Krays, we Izikɛl bin kɔl Gɔd in “savant Devid.” (Izikɛl 37:​24, 25) Ɛvri ia fɔ di Mɛmorial, we wi de mit togɛda fɔ mɛmba di day we Jizɔs day fɔ wi, wi kin si di wanwɔd we dɛn tu grup ya gɛt jɔs lɛk aw Izikɛl bin dɔn tɔk. Bɔt wetin wi ɔl go du fɔ mek Gɔd in pipul dɛn kɔntinyu fɔ gɛt wanwɔd?

WETIN WI ƆL GO DU FƆ MEK WANWƆD GO KƆNTINYU FƆ DE?

10. Wetin wisɛf go du fɔ mek Gɔd in pipul dɛn kɔntinyu fɔ gɛt wanwɔd?

10 Wetin na di fɔs tin we go mek Gɔd in pipul dɛn kɔntinyu fɔ gɛt wanwɔd? Na bay we wi de tray tranga wan fɔ put wisɛf dɔŋ. We Jizɔs bin de na dis wɔl, i bin tɛl in disaypul dɛn fɔ put dɛnsɛf dɔŋ. (Matyu 23:​12) Bɔku tɛm, pipul dɛn na di wɔl kin tink ɔltɛm se dɛn impɔtant pas ɔda pipul dɛn. Bɔt if wi put wisɛf dɔŋ, dat go mek wi rɛspɛkt di brɔda dɛn we de bifo na di kɔngrigeshɔn, ɛn wi go fala di tin dɛn we dɛn de tɛl wi. Na dat nɔmɔ go mek di kɔngrigeshɔn gɛt wanwɔd. Bɔt di tin we impɔtant pas ɔl, na dat if wi put  wisɛf dɔŋ, Gɔd go gladi fɔ wi, bikɔs i “go tɔn in bak pan dɛn pipul we prawd ɛn i go sho dɛn wan we nɔ prawd aw i gud.”—Pita In Fɔs Lɛta 5:​5.

11. We wi tink bɔt di bred ɛn di wayn we wi de yuz na di Mɛmorial, aw dat de ɛp wi fɔ kɔntinyu fɔ gɛt wanwɔd?

11 Wetin na di sɛkɔn tin we go mek wanwɔd kɔntinyu fɔ de? Na we wi de tink gud gud wan bɔt wetin di bred ɛn wayn rili min. Wi fɔ du dis bifo di Mɛmorial ɛn mɔ di nɛt fɔ di Mɛmorial. (Fɔs Lɛta Fɔ Kɔrint 11:​23-25) Di bred tinap fɔ Jizɔs in pafɛkt bɔdi we i gi fɔ wi. Ɛn di rɛd wayn tinap fɔ in blɔd. Bɔt wi nɔ fɔ jɔs ɔndastand wetin dɛn tin ya min. Wi nid fɔ mɛmba se di day we Jizɔs day fɔ wi gɛt sɔntin fɔ du wit di lɛk we Jiova ɛn Jizɔs rili lɛk wi. Jiova gi in Pikin to wi, ɛn Jizɔs insɛf bin rɛdi fɔ gi in layf fɔ wi. We wi tink bɔt di lɛk we dɛn lɛk wi, dat go mek wisɛf lɛk dɛn. Ɛn di lɔv we wi gɛt fɔ Jiova de briŋ wi togɛda ɛn mek wi kɔntinyu fɔ gɛt wanwɔd.

Wi de mek wanwɔd kɔntinyu fɔ de we wi de fɔgiv ɔda pipul dɛn (Luk na paregraf 12 ɛn 13)

12. Insay di stori bɔt di kiŋ ɛn in slev dɛn, aw Jizɔs bin sho wi klia wan se Jiova want fɔ lɛ wi fɔgiv ɔda pipul dɛn?

12 Wetin na di tɔd tin we go mek wi kɔntinyu fɔ gɛt wanwɔd? Na we wi rɛdi fɔ fɔgiv ɔda pipul dɛn. We wi du dis, wi de sho se wi rili gladi fɔ we Jiova dɔn yuz Jizɔs in sakrifays fɔ fɔgiv wi fɔ wi sin dɛn. Fɔ sho wi wetin mek i impɔtant fɔ fɔgiv, Jizɔs bin tɛl wi wan stori bɔt wan kiŋ ɛn in slev dɛn. Duya rid Matyu 18:​23-34 ɛn aks yusɛf dɛn kwɛstyɔn ya: ‘A rili want fɔ du di tin dɛn we Jizɔs bin de tich? A de peshɛnt ɛn sho sɔri at fɔ mi brɔda ɛn sista dɛn? A rɛdi fɔ fɔgiv di wan dɛn we de du bad tin to mi?’ Na tru se sɔm bad tin dɛn we dɛn kin du to wi kin rili siriɔs pas di ɔda wan dɛn. Ɛn as mɔtalman wi nɔ pafɛkt, so sɔm bad tin dɛn de we dɛn kin du to wi we kin mek i nɔ rili izi fɔ lɛ wi fɔgiv. Jizɔs in stori tich wi se Jiova want wi fɔ fɔgiv ɔda pipul dɛn. (Rid Matyu 18:​35.) Jizɔs bin mek wi no klia wan se Jiova nɔ go fɔgiv wi if wi nɔ fɔgiv wi brɔda ɛn sista dɛn we dɔn rili ripɛnt. Dat na sɔntin we wi fɔ rili tek tɛm tink bɔt. Fɔ lɛ wi go kɔntinyu fɔ gɛt wanwɔd, wi nid fɔ fɔgiv ɔda pipul dɛn jɔs lɛk aw Jizɔs bin tich wi.

13. Aw wi go mek wanwɔd de we wi mek pis wit wi brɔda ɛn sista dɛn?

13 We wi fɔgiv ɔda pipul dɛn, wi de kɔntinyu fɔ gɛt pis wit wi brɔda ɛn sista dɛn. Di apɔsul Pɔl bin se wi fɔ wok tranga wan fɔ gɛt wanwɔd wit wi brɔda ɛn sista dɛn ɛn kɔntinyu fɔ gɛt pis. (Lɛta Fɔ Ɛfisɔs 4:​3) So we di Mɛmorial tɛm rich, mɔ di nɛt fɔ di Mɛmorial, i go fayn fɔ mek yu tink gud wan bɔt aw yu go trit ɔda pipul dɛn. Aks yusɛf dɛn kwɛstyɔn dɛn ya: ‘Ɔlman no se mi na pɔsin we nɔ de kip grɔj we sɔmbɔdi ɔfɛnd mi? Pipul dɛn de si mi as pɔsin we de tray tranga wan fɔ mek pis ɛn kɔntinyu fɔ mek wanwɔd de?’ Dis na siriɔs kwɛstyɔn dɛn we wi fɔ de tink bɔt.

14. Aw wi go sho se ‘wi de bia wit wi kɔmpin dɛn fɔ sho se wi lɛk dɛn’?

14 Wetin na di nɔmba 4 tin we go mek wi kɔntinyu fɔ gɛt wanwɔd? Na we wi de falamakata Jiova fɔ sho lɔv. (Jɔn In Fɔs Lɛta 4:​8) Wi nɔ fɔ ɛva tɔk se, “A fɔ gɛt pis wit mi Kristian brɔda ɛn sista  dɛn bɔt a nɔ nid fɔ lɛk dɛn.” If wi de tink dis kayn we, wi nɔ de fala di advays we Pɔl bin gi wi we i se, “una fɔ de bia wit una kɔmpin fɔ sho se una lɛk dɛn.” (Lɛta Fɔ Ɛfisɔs 4:​2) Pɔl nɔ bin jɔs se “una fɔ de bia wit una kɔmpin,” bɔt i se wi fɔ du am wit lɔv. Wetin na di difrɛns? Wi gɛt difrɛn kayn pipul dɛn na wi kɔngrigeshɔn, ɛn na Jiova dɔn kɔl dɛn ɔl fɔ kam nia am. (Jɔn 6:​44) I go mɔs bi se Jiova dɔn si bɔku gud rizin dɛn we mek i lɛk dɛn. So if wi brɔda ɛn sista dɛn fit fɔ gɛt Gɔd in lɔv, aw wi go se dɛn nɔ fit fɔ gɛt wi lɔv? Wi fɔ gladi fɔ lɛk dɛn di we aw Jiova want fɔ mek wi lɛk dɛn.—Jɔn In Fɔs Lɛta 4:​20, 21.

USTƐM WI GO GƐT DI LAS MƐMORIAL?

15. Aw wi no se wi go gɛt wan las Mɛmorial?

15 Wan de, wi go atɛnd di Mɛmorial fɔ di las tɛm. Aw wi no dis? Pɔl bin tɛl anɔyntɛd Kristian dɛn se: “Sote di Masta kam, ɛnitɛm we una de it dis bred ɛn drink dis wayn, una de mek pipul no se di Masta day fɔ mɔtalman.” (Fɔs Lɛta Fɔ Kɔrint 11:​26) Jizɔs bak bin tɔk bɔt di tɛm we i go “kam” we i bin de tɔk bɔt di tɛm we di wɔl go dɔn. We Jizɔs bin de tɔk bɔt di big trɔbul [gret tribyuleshɔn] we go kam jisnɔ, i bin se: “Ɔlman go si di sayn na di klawd we go sho se Mɔtalman Pikin de kam. Ɔlman na wɔl go kray we dɛn si Mɔtalman Pikin de kɔmɔt na [di] klawd kam. I go kam wit pawa, ɛn brayt layt go de shayn rawnd am. Trɔmpɛt go blo lawd wan, dɔn i go sɛn in enjɛl dɛn ɔlɔbɔt na [di] wɔl frɔm wan ɛnd to di ɔda fɔ gɛda dɛn pipul we i dɔn pik fɔ bi in yon, ɛn briŋ dɛn kam to am.” (Matyu 24:​29-31) Jizɔs go “gɛda dɛn pipul we i dɔn pik fɔ bi in yon,” we i go kɛr go na ɛvin ɔl dɛn Kristian dɛn we Gɔd dɔn anɔynt we stil de na dis wɔl. Dat go apin afta di big trɔbul dɔn stat ɛn bifo Amagɛdɔn bigin. We da wɔ de go stat, Jizɔs wit ɔl di 144,000 anɔyntɛd Kristian dɛn go win di fɛt we dɛn go fɛt wit di kiŋ dɛn na dis wɔl. (Rɛvɛleshɔn 17:​12-14) Di Mɛmorial we wi go atɛnd bifo Jizɔs “kam” fɔ gɛda di anɔyntɛd dɛn go bi di las Mɛmorial we wi go gɛt.

16. Wetin mek yu dɔn mekɔp yu maynd fɔ atɛnd di Mɛmorial dis ia?

16 Mekɔp yu maynd fɔ atɛnd di Mɛmorial we wi go gɛt Mach 31, 2018. Ɛn beg Jiova fɔ ɛp yu fɔ du wetin go mek in pipul dɛn kɔntinyu fɔ gɛt wanwɔd. (Rid Sam 133:​1.) Wan de wi go atɛnd di Mɛmorial fɔ di las tɛm. Te da tɛm de kam, mek wi sho se wi valyu di wanwɔd we wi kin gɛt ɛvri ia we wi de atɛnd di Mɛmorial.