LƐSIN 26

Wetin Mek Bad Tin dɛn De Apin ɛn Wetin Mek Pipul dɛn De Sɔfa?

PLE

We bad tin kin apin, i nɔmal fɔ lɛ pɔsin aks se, “Wetin mek dis tin apin?” Wi gladi fɔ no se di Baybul gi klia ansa to da kwɛstyɔn de!

1. Aw Setan bin mek bad tin dɛn bigin apin na di wɔl?

Setan di Dɛbul bin tɔn agens Gɔd. Setan bin want fɔ rul ɔda pipul dɛn, so i mek di fɔs man ɛn uman we na Adam ɛn Iv, jɔyn am fɔ tɔn agens Gɔd. Setan bin du dis bay we i lay to Iv. (Jɛnɛsis 3:1-5) I bin mek i tink se Jiova de ayd gud tin frɔm am. I bin mek dɛn fil se mɔtalman go gladi if dɛn nɔ obe Gɔd. Setan bin tɔk di fɔs lay bay we i tɛl Iv se i nɔ go day. Na dat mek di Baybul kɔl Setan “layman ɛn na di papa pan lay.”—Jɔn 8:44.

2. Wetin Adam ɛn Iv bin disayd fɔ du?

Jiova bin rili gud to Adam ɛn Iv. I bin tɛl dɛn se dɛn kin it frɔm ɔl di tik dɛn na di gadin na Idɛn, na wan nɔmɔ dɛn nɔ fɔ it frɔm. (Jɛnɛsis 2:15-17) Bɔt dɛn bin disayd fɔ it di frut we de na da tik de. Iv “tek di frut ɛn i it am.” Leta, Adam “insɛf it am.” (Jɛnɛsis 3:6) Dɛn ɔl tu nɔ bin obe Gɔd. Bikɔs Adam ɛn Iv bin pafɛkt, dɛn bin fɔ ebul fɔ du wetin rayt. Bɔt we dɛn nɔ obe Gɔd bay wilful, dɛn sin ɛn dɛn sho se dɛn nɔ want mek i rul dɛn. Da tin de we dɛn bin disayd fɔ du, bin mek dɛn sɔfa bad bad wan.—Jɛnɛsis 3:16-19.

3. Aw di tin we Adam ɛn Iv bin disayd fɔ du de afɛkt wi?

We Adam ɛn Iv bin sin, dɛn nɔ bin pafɛkt igen, ɛn dɛn mek ɔl dɛn pikin dɛn nɔ pafɛkt. Di Baybul tɔk bɔt Adam se: “Na . . . wan man mek sin kam na di wɔl ɛn sin briŋ day, ɛn ɔlman de day bikɔs dɛn ɔl dɔn sin.”—Romans 5:12.

Wi kin sɔfa bikɔs ɔf difrɛn rizin dɛn. Sɔntɛnde, wi kin sɔfa bikɔs wi nɔ disayd fɔ du di rayt tin. Sɔm ɔda tɛm dɛn wi kin sɔfa bikɔs ɔda pɔsin nɔ disayd fɔ du di rayt tin. Sɔntɛnde bak, wi kin sɔfa bikɔs wi de na di rɔng ples di rɔng tɛm.—Rid Ɛkliziastis 9:11, NWT.

LAN MƆ

Lan bɔt wetin mek nɔto Gɔd de mek bad tin dɛn de apin ɛn nɔto in de mek wi de sɔfa na di wɔl, ɛn lan bak bɔt aw i de fil we wi de sɔfa.

4. Di pɔsin we de mek wi sɔfa

Bɔku pipul dɛn biliv se na Gɔd de kɔntrol di wan ol wɔl. Yu tink se dat na tru? Ple di VIDIO.

VIDIO: Udat De Kɔntrol di Wɔl? (1:24)

Rid Jems 1:13 ɛn 1 Jɔn 5:19, dɔn una tɔk bɔt dis kwɛstyɔn:

Yu tink se na Gɔd de mek wi de sɔfa ɛn na in de mek bad tin dɛn de apin?

5. Wetin dɔn de apin frɔm we Setan bigin rul?

Ple di VIDIO.

VIDIO: Wetin Mek Gɔd De Alaw Wi fɔ Sɔfa?—Shɔt Pat (3:07)

Rid Jɛnɛsis 3:1-6, dɔn una tɔk bɔt dɛn kwɛstyɔn dɛn ya:

Us lay Setan bin lay?—Rid vas 4 ɛn 5.
Wetin Setan bin tɔk we mek i tan lɛk se Jiova de ayd gud tin frɔm mɔtalman?
Frɔm wetin Setan bin tɔk, yu tink se mɔtalman nid fɔ gɛt Jiova as dɛn Rula fɔ mek dɛn gladi?

Rid Ɛkliziastis 8:9, dɔn una tɔk bɔt dis kwɛstyɔn:

Wetin dɔn apin insay dis tɛm we Jiova nɔ de rul di wɔl?

Adam ɛn Iv bin pafɛkt ɛn dɛn bin de na Paradays. Bɔt dɛn bin lisin to Setan ɛn dɛn bin tɔn agens Jiova
Afta we dɛn bin tɔn agens Jiova, di wɔl bin ful-ɔp wit sin, sɔfa, ɛn day
Jiova go mek sin, sɔfa, ɛn day nɔ de igen. Tɛm go kam we mɔtalman go pafɛkt bak ɛn de na Paradays

6. Jiova bisin bɔt di sɔfa we wi de sɔfa

Yu tink se Gɔd bisin bɔt wi we wi de sɔfa? Lan bɔt wetin Kiŋ Devid ɛn di apɔsul Pita bin se. Rid Sam 31:7 ɛn 1 Pita 5:7, dɔn una tɔk bɔt dis kwɛstyɔn:

Aw yu de fil we yu no se Jiova de notis di sɔfa we yu de sɔfa, ɛn i bisin bɔt yu?

7. Gɔd go mek mɔtalman dɛn lɛf fɔ sɔfa

Rid Ayzaya 65:17 ɛn Rɛvɛleshɔn 21:3, 4, dɔn una tɔk bɔt dis kwɛstyɔn:

Wetin mek wi de fil fayn fɔ no se Jiova go pul ɔl di tin dɛn we de mek mɔtalman de sɔfa?

Yu bin no?

We Setan bin lay di fɔs lay, i bin mek Jiova gɛt badnem. Setan bin mek pipul dɛn tink bad bɔt Jiova bay we i tɔk se Jiova nɔ lɛk wi ɛn i nɔ de rul fia wan. Tumara bambay, we Jiova go pul ɔl di tin dɛn we de mek wi de sɔfa, i go pul di badnem we Setan bin dɔn put pan am. We min se, i go sho se di we aw i de rul na di bɛst. Di tin we impɔtant pas ɔl na di wan ol wɔl, na fɔ pul di badnem we Setan bin dɔn put pan Jiova.—Matyu 6:9, 10.

SƆM PIPUL DƐN KIN SE: “Gɔd de tɛst pipul dɛn bay we i de mek dɛn sɔfa.”

Wetin yu go se?

WETIN YU DƆN LAN?

Di men pipul dɛn we mek bad bɔku na di wɔl na Setan di Dɛbul ɛn Adam ɛn Iv. Jiova rili bisin bɔt di sɔfa we wi de sɔfa, ɛn i go du sɔntin jisnɔ fɔ mek wi lɛf fɔ sɔfa.