LƐSIN 24
Wetin Na di Tru Tin bɔt Enjɛl Dɛn?
Jiova want wi fɔ lan bɔt in famili we de na ɛvin. Di enjɛl dɛn de pat ɔf da famili de, ɛn di Baybul kɔl dɛn “Gɔd in pikin dɛn.” (Job 38:7) Wetin di Baybul se bɔt enjɛl dɛn? Aw dɛn de afɛkt pipul dɛn? Fɔ se ɔl di enjɛl dɛn de pat ɔf Gɔd in famili?
1. Udat na di enjɛl dɛn?
Jiova mek di enjɛl dɛn bifo i mek di wɔl. Jɔs lɛk am, dɛn na spirit dɛn we de na ɛvin. (Ibruz 1:14) Na bɔku bɔku enjɛl dɛn de, ɛn ɛni wan pan dɛn spɛshal. (Rɛvɛleshɔn 5:11) Dɛn “de du wetin [Jiova] want” ɛn dɛn “de obe in wɔd.” (Sam 103:20) Trade trade, Jiova bin de sɛn enjɛl dɛn fɔ gi mɛsej dɛn ɛn fɔ sɔpɔt ɛn sev in pipul dɛn sɔntɛnde. Tide, enjɛl dɛn de dayrɛkt Kristian dɛn to pipul dɛn we want fɔ lan bɔt Gɔd.
2. Udat na Setan ɛn in dimɔn dɛn?
Sɔm enjɛl dɛn nɔ bin kɔntinyu fɔ fetful to Jiova. Di fɔs enjɛl we tɔn in bak pan Gɔd na “di wan we dɛn de kɔl Dɛbul ɛn Setan, we de ful di wan ol wɔl.” (Rɛvɛleshɔn 12:9) Setan bin want fɔ rul ɔda pipul dɛn, so i mek di fɔs mɔtalman dɛn we Gɔd mek ɛn leta ivin ɔda enjɛl dɛn jɔyn am fɔ tɔn dɛn bak pan Gɔd. Dɛn de kɔl di enjɛl dɛn we tɔn dɛn bak pan Gɔd dimɔn dɛn. Jiova bin mek dɛn drɛb dɛn kɔmɔt na ɛvin ɛn kam na dis wɔl, ɛn dɛn gɛt fɔ dɔnawe wit dɛn.—Rid Rɛvɛleshɔn 12:9, 12.
3. Aw Setan ɛn di dimɔn dɛn de tray fɔ ful wi?
Setan ɛn di dimɔn dɛn de yuz dɛbul biznɛs ɔ juju biznɛs fɔ ful bɔku pipul dɛn. Dɛbul biznɛs ɔ juju biznɛs na we pɔsin de tray fɔ tɔk wit di spirit dɛn ɛn dis na bad tin. Fɔ ɛgzampul, sɔm pipul dɛn kin go to pipul dɛn we de stɔdi di sta dɛn fɔ no bɔt di bambay, lukin-grɔn pipul dɛn, ɛn wich dɔktɔ dɛn. Ɔda pipul dɛn kin go fɛn mɛrɛsin dɛn we gɛt fɔ du wit juju biznɛs. Dɛn kin ful pipul dɛn bak fɔ mek dɛn biliv se dɛn go ebul fɔ tɔk to pɔsin we dɔn day. Jiova wɔn wi se wi “nɔ fɔ go to dɛn wan we kin wek dayman ɔ kin tɔk bɔt wetin go apin bambay.” (Lɛvitikɔs 19:31) I gi wi dis wɔnin fɔ protɛkt wi frɔm Setan ɛn di dimɔn dɛn. Setan ɛn di dimɔn dɛn na Gɔd in ɛnimi dɛn, ɛn dɛn want fɔ du bad to wi.
LAN MƆ
Lan bɔt di gud tin dɛn we enjɛl dɛn de du, wetin mek juju biznɛs bad, ɛn aw wi go protɛkt wisɛf frɔm Setan ɛn di dimɔn dɛn.
4. Enjɛl dɛn de ɛp pipul dɛn fɔ lan bɔt Jiova
Gɔd in enjɛl dɛn nɔ de prich dayrɛkt wan to pipul dɛn. Bɔt dɛn kin dayrɛkt di wan dɛn we de wɔship Gɔd to pipul dɛn we want fɔ lan bɔt am. Rid Rɛvɛleshɔn 14:6, 7, dɔn una tɔk bɔt dɛn kwɛstyɔn dɛn ya:
-
Wetin mek wi nid di enjɛl dɛn fɔ ɛp wi fɔ prich?
-
Yu gladi fɔ no se enjɛl dɛn de dayrɛkt yu to pipul dɛn we nid fɔ lan bɔt di Baybul? Wetin mek?
5. Nɔ put an pan juju biznɛs
Setan ɛn di dimɔn dɛn na Jiova in ɛnimi dɛn. Dɛn na wi ɛnimi dɛn bak. Rid Lyuk 9:38-42, dɔn una tɔk bɔt dis kwɛstyɔn:
-
Aw di dimɔn dɛn de trit pipul dɛn?
Wi nɔ fɔ alaw di dimɔn dɛn fɔ afɛkt wetin wi de du. Rid Ditarɔnɔmi 18:10-12, dɔn una tɔk bɔt dɛn kwɛstyɔn dɛn ya:
-
Us we dɛn di dimɔn dɛn de tray fɔ afɛkt wetin wi de du? Aw dɛn de tray fɔ tɔk to wi? Us kɔmɔn tin dɛn we gɛt fɔ du wit juju biznɛs we pipul dɛn de du na di say we yu de?
-
Yu tink se i mek sɛns we Jiova tɔk se wi nɔ fɔ put an pan juju biznɛs? Wetin mek?
Ple di VIDIO, dɔn una tɔk bɔt di kwɛstyɔn dɛn we de dɔŋ.
-
Yu tink se di tay-tay we bin de pan Palesa in galpikin bin bad? Wetin mek?
-
Wetin Palesa bin nid fɔ du fɔ protɛkt insɛf frɔm di dimɔn dɛn?
Tru Kristian dɛn de agens di dimɔn dɛn ɔltɛm. Rid Akt 19:19 ɛn 1 Kɔrintians 10:21, dɔn una tɔk bɔt dis kwɛstyɔn:
-
Wetin mek i impɔtant fɔ dɔnawe wit ɛnitin we yu gɛt we gɛt fɔ du wit dɛbul biznɛs?
6. Win di fɛt agens Setan ɛn in dimɔn dɛn
Na Setan de rul di dimɔn dɛn. Bɔt na Maykɛl we na di ɔda nem fɔ Jizɔs ɛn we na di enjɛl dɛn edman de dayrɛkt di fetful enjɛl dɛn. Us pawa Maykɛl gɛt? Rid Rɛvɛleshɔn 12:7-9, dɔn una tɔk bɔt dɛn kwɛstyɔn dɛn ya:
-
Udat gɛt mɔ pawa? Maykɛl ɛn in enjɛl dɛn ɔ Setan ɛn in dimɔn dɛn?
-
Yu tink se Jizɔs in disaypul dɛn nid fɔ fred Setan ɛn in dimɔn dɛn?
Yu go ebul win Setan ɛn in dimɔn dɛn. Rid Jems 4:7, dɔn una tɔk bɔt dis kwɛstyɔn:
-
Aw yu go protɛkt yusɛf frɔm Setan ɛn di dimɔn dɛn?
SƆM PIPUL DƐN KIN SE: “I nɔ bad fɔ ple gem dɛn ɔ wach fim dɛn we gɛt fɔ du wit juju biznɛs. Na jɔs fɔ ɛnjɔy misɛf.”
-
Wetin mek fɔ tink da we de rili bad?
WETIN YU DƆN LAN?
Fetful enjɛl dɛn de ɛp wi. Setan ɛn in dimɔn dɛn na Jiova in ɛnimi dɛn, ɛn dɛn de yuz juju biznɛs fɔ ful pipul dɛn.
Rivyu
-
Aw Jiova in enjɛl dɛn de ɛp pipul dɛn fɔ lan bɔt am?
-
Udat na Setan ɛn in dimɔn dɛn?
-
Wetin mek yu nɔ go want fɔ gɛt ɛnitin fɔ du wit juju biznɛs?
DU MƆ RISACH
Lan bɔt wetin mek wi no se Jizɔs na Maykɛl, di enjɛl dɛn edman.
“Udat Na Maykɛl di Enjɛl dɛn Edman?” (Atikul na di wɛbsayt)
Lan bɔt wetin pruv se di Dɛbul na rial pɔsin.
“Di Dɛbul Na Rial Pɔsin?” (Atikul na di wɛbsayt)
Lan bɔt aw wan uman stɔp fɔ gɛt ɛnitin fɔ du wit di dimɔn dɛn.
Lan bɔt aw Setan de yuz juju biznɛs fɔ ful pipul dɛn.
“Di Tru bɔt Majik, Juju Biznɛs, ɛn Wich” (Di Rod to Layf we Go De Sote Go, pat 5)
You May Also Like
KWƐSTYƆN DƐN WE PIPUL DƐN KIN AKS ƆLTƐM
Wetin na Baybul Stɔdi?
Lan di ansa dɛn to kwɛstyɔn dɛn we gɛt fɔ du wit wi Baybul stɔdi program.
