Ebaruha Oku Tito 3:1-15
3 Wulhole embere eribibukya wuthi baghondere abathabali n’ab’ehamuli n’eribowa, eribya ibanayitheghekere obuli mubiiri owuwene,
2 isibakanaya nabi oko wosi-wosi, isibabya banegheni, aliwe babye n’obuyitheghererya, bakanganaye ndeke obwolho okwa bandu abosi.
3 Kundi nethu thwanabya bakiru, abathowa, abaherire, abakobe b’esyongumbu muthina-muthina n’eby’eriyitsemesya, abakakolha ebithuwene kandi ab’eritsuru, abak’itha nye, abakaponangana.
4 Aliwe olhukeri lhw’Omulhamya wethu, Nyamuhanga, n’olhwanzo olho awithire abandu byabere byaminyikalibwa
5 (isi busana n’ebyosi-byosi ebithunganene ebya thwabirikolha, aliwe busana n’obughanyiri bwiwe), mwathulhamya erilhabira omw’ithwoya eryathuletha okwa ngebe n’omw’ithuyiramo bahya-bahya erilhabira omwa mulimu abuyirire.
6 Mwathuthulirako omulimu oyu omwa bungyi* erilhabira omu Yesu Kristo Omulhamya wethu,
7 nuku thukendibya thwabirighanzwa mwa bathunganene erilhabira omwa lhukogho lhw’oyo, ithwabya bawetwa erikwamana n’amaha w’engebe y’erikotha.
8 Ebinywe ebi ni by’eriyikethera, kandi nganzire iwahira omuwatho oko myatsi eyi, nuku ababirikirirya Nyamuhanga ibalholha embere erihira obulengekania bwabu okw’ibya ibanemukolha ebikorwa bibuya. Emyatsi eyi yuwene kandi yikaghasira abandu.
9 Aliwe siwusangire omw’ikakalhukana ery’obukiru n’omwa by’esyondengo n’omwa by’obuhaka n’omwa malhwa okwa by’Emighambo, kundi sibiwithe mughaso kandi ni buyira.
10 Omundu oyukakulha-kulhanaya erighabulhana omwa nyikirirya, wumughane wabimuhabulha* omurundi w’erimbere n’owakabiri,
11 kundi omundu ng’oyo abirithalha okwa nzira kandi akahalhaya kandi abiritswerwa.
12 Ngendibya ingakuthumira Artema kutse Tikiko, wulhangire wuthi wukasa eyo ngali e Nikopoli, kundi eyo yanabirithwamu eribya omwa buthuku bw’eritsuku.
13 Wuhe Zena, oyuwasi ndeke Emighambo, y’ebyosi eby’akayithagha, kuthya na Apolo nuku sibabulhawe kindu omwa lhughendo lhwabo.
14 Aliwe wulhangire wuthi abandu bethu nabo bakalholha embere erisangira omwa bikorwa ebyuwene nuku banga wathikya omughulhu hali obuyithawa obwalhuba-lhuba, nuku sibabye abathe hulhukaya ebyuwene.*
15 Abosi abo ngali nabo bamakuramukya. Wunyiramukiraye abathwanzire omw’ikirirya.
Ambi olhukogho ilhwabya nenyu inywe bosi.
