Minnertut pissuseqarit
‘Ilissinni minnerpaajusoq taanna angisuujuvoq.’ — LUKASI 9:48.
1, 2. Jiisusip ajoqersukkani qanoq oqaaqqissaarpai, aamma sooq taamaaliorpa?
UKIUMI 32-mi Jiisusi apustiliilu Galilæamiipput. Apustiliisa ilaasa akunnerminni kina arlartik annerpaajunersoq oqallisigilerpaat. Iivangkiiliumik allattup Lukasip qanoq pisoqarnersoq ima oqaluttuaraa: “Ajoqersukkat akunnerminni eqqarsaatigilerpaat kina arlartik ilaminit annerunersoq. Jiisusillu qamuuna eqqarsaataat tamanna nalunnginnamiuk meerannguaq saniminut pisillugu oqarfigai: ‘Uanga atikkut meeqqamik uuminnga ilassinnittup uanga ilassivaanga; uannillu ilassinnittup aallartitsisiga ilassivaa. Ilissinnimi minnerpaajusoq taanna angisuujuvoq.’” (Lukasi 9:46-48) Jiisusip apustilini maniguuttariaqarnerannik nikalluunnagit ilinniartippai.
2 Jiisusip maniguuttariaqarnermik apustiliminut oqaaqqissaarutaa juutit amerlanerit isiginnittaasiannut naapertuuppa? Naagga, akerlerluinnaraa. Taamanikkut innuttaaqatigiinnut tunngatillugu Theological Dictionary of the New Testament-imi ima allassimavoq: “Inuit sugaluaraangamilluunniit kina annerpaajunersoq apeqqutaatittuartarpaat, kikkut tamarmik ataqqineqarnissamittut ataqqineqarnissartik pingaartittorujussuuaat.” Tassa Jiisusip ajoqersukkani inunnit avatangiisiminnit allaanerussasut oqaaqqissaarpai.
3. (a) Minnertut pissusilersorneq qanoq paasisariaqarpa, aamma sooq taamaaliornissaq unamminiarnarsinnaava? (b) Apeqqutit suut allaaserisami matumani akineqassappat?
3 Grækerit oqaasiat ‘minnerpaajusumik’ nutserneqartoq isumaqarpoq inuk anneruniajuitsoq, maniguuttoq pingaanngitsorlu imaluunniit suunngitsutut oqaasissaqanngitsutullu naatsorsuussaq. Jiisusip ajoqersukkaminut erseqqissaatigaa meeqqatut maniguuttuullutillu anneruniajuitsuussasut. Ullumikkut kristumiut ilumoortut Jiisusip ajoqersukkaminut oqaaqqissaarutaa
ilinniarfigisariaqarpaat. Tamanna ilaannikkut unamminiarnartuusinnaavoq. Naammalluinnanngitsuunerput pissutigalugu makitasaaqqajaasarpugut allanillu pitsaanerusutut misigeqqajaasarluta. Aamma Saatanip silarsuaata sunniuteqarnera pissutaalluni namminissarsiulertarpugut, saassussiumatuujulertarpugut aqutsiumatuujulertarlutalu. Maniguuttuunissamut suna iluaqutigisinnaavarput? Jiisusip suna pivaa oqarami ‘minnerpaajusoq angisuujussasoq’? Qaqugukkut maniguuttuuniartassaagut?“ILAMI GUUTIP PISUUSSUSIATA ILISIMASSUSIATALU SIUNEQASSUSIATALU ITISSUSIAT!”
4, 5. Maniguunnissamut suna iluaqutigisinnaavarput? Assersuuteqarit.
4 Jehovap uagutsinnit annerungaarnerata eqqarsaatigeqqissaarnera maniguunnerulissutigisinnaavarput. Jehovammi ilisimasaasa ilaannai inuup ilisimasinnaavai. (Esaja 40:28) Jehovap angingaassusia apustilip Paulusip ima allaatigaa: “Ilami Guutip pisuussusiata ilisimassusiatalu siuneqassusiatalu itissusiat! Ilami eqqartuussinerisa paasiniarneq ajornassusii aqqutaasalu siunersissaanngissusii!” (Romamiut 11:33) Paulusi ukiut 2000-it matuma siorna allammalli inuit sorpassuarnik paasisaqarsimagaluartut oqaasii taakku suli ilumoorput. Qanorluunniit paasisaqartigigaluarutta Jehova taassumalu suliai eqqarsartaasialu pillugit ilinniagassarpassuaqartuaannassaagut.
5 Assersuutigalugu Leo * maniguunnerulerpoq Guutip pinngortitaasa ilaannai paasisinnaallugit paasigamiuk. Inuusuttuulluni ilisimatuussuseq soqutigingaarpaa. Avataarsua paasisaqarnerpaaffiginiarlugu ilisimatusalerpoq. Paasivaali ilisimatusarnikkuinnaq avataarsua paasilluarneqarsinnaanngitsoq. Taamaattumik inatsisilerituunngorniaannalerpoq. Eqqartuussissuserisunngorpoq kingusinnerusukkullu eqqartuussisunngorluni. Tamatuma kingorna nulianilu Jehovap Nalunaajaasuinit atuaqqissaaqatigineqartareerlutik sallusuissut ilassivaat kuisillutillu. Leo ilinniagartuujugaluarluni oqaluttuarpoq ‘Jehova avataarsualu pillugit qanorluunniit ilisimasaqartigigaluaraanni paasiniagassarpassuaqartuaannarneranik paasinninnini’ maniguunnissaminut iluaqutigisimallugu.
6, 7. (a) Jehovap maniguuttuunera qanoq maligassaalluarpa? (b) Guutip maniguunnera qanoq ililluni inummik ‘angisuujulersitsisarpa’?
6 Uagut maniguuttuunissatsinnut iluaqutigisinnaasarput alla tassaavoq Jehovap maniguunnermik ersersitsinera. Una eqqarsaatigiuk: “Tassaavugut Guutip suleqatai.” (1 Korinthimiut 3:9) Tupinnaqaaq! Jehovap Guutip, Qutsinnerussaartup, suleqatigerusuppaatigut. Taassuma ataqqivaatigut oqaatsini, Biibili, atorlugu nutaarsiassamik nuannersumik oqaluussissutiginninnissamut periarfissilluta. Jehovap ikkussuisillutalu imerterisuutippaatigut naak nammineq tassaagaluarluni naatsiiassanik naajartortitsisartoq. (1 Korinthimiut 3:6, 7) Jehovap taamatut maniguunnermik maligassiuinera nuanningaarpoq, ilaa? Aap, Jehovap taamaattuunera minnerpaajusutut pissusilersornissatsinnut kajumississutigisariaqarparput!
7 Guutip maniguunnermik maligassiuinera Daavimut sunniuteqangaarpoq. Jehovamut ima erinarsorpoq: “Eqqortinnaveeqqutinnik illersuutissannik tunivarma, ikiuinerpillu [maniguunnerpillu, NW] nakussassarpaanga.” (2 Samueli 22:36) Daavip nalunngilaa Israelikkunnut iliuuserisarpassuani iliuuserisinnaallugit Jehovap maniguulluni soqutigimmani ikiormanilu. (Tussiaat 113:5-7) Uagutsinnut tunngatillugu aamma taamaappoq. Pissuserinnerput, piginnaanivut immikkullu akisussaaffivut Jehovamit pivavut. (1 Korinthimiut 4:7) Minnerpaajusutut pissusilersortup ilaatigut taamaaliornermigut Jehovamut naleqarnerulertarami ‘angisuujuvoq’. (Lukasi 9:48) Sooq taamaannersoq misissoriartigu.
‘ILISSINNI MINNERPAAJUSOQ TAANNA ANGISUUJUVOQ’
8. Maniguuttuuneq Jehovap peqatigiissortaanut isiginnittaasitsinnut qanoq sunniuteqarpa?
8 Maniguuttuusut Guutip peqatigiissortaanut ilaanertik nuannaarutigaat ilagiinnilu aaqqissuussinerit tapersersortarlugit. Assersuutigalugu Petra, arnaq inuusuttoq ilaqutariinni Nalunaajaasuusuni peroriartortoq, eqqarsaatigeriartigu. Nammineq isummani malikkusukkamiuk ilagiinnit tunuarpoq. Ukiut arlallit tamatuma kingorna ilagiit peqatigeqqittalerpai. Maanna Jehovap peqatigiissortaanut ilaanini nuannaarutigaa ilagiinnilu aaqqissuussinerit tapersersorlugit. Maannakkut suna allaassutigaa? Ima oqaluttuarpoq: “Pissuserineqartussat pingaaruteqarnerpaat marluk paasisariaqakkakka ineriartortittariaqakkakkalu tassaapput maniguuttuuneq anneruniajuitsuunerlu.”
9. Inuup maniguuttuusup anersaakkut inuussutissat qanoq isiginnittaaseqarfigai, aamma sooq tamanna naleqarnerulissutigaa?
9 Maniguuttuusup qujamasuutigingaarpai Jehovap uagutsinnut tunniussai ajunngitsut, ilaatigut anersaakkut inuussutissat. Taamaattumik inuup maniguuttuusup Biibili eqiasuilluni atuaqqissaartarpaa atuagassiallu Napasuliaq Alapernaarsuiffik aamma Vågn op! atuagassiallu allat atuartarlugit. Jehovamut kiffarpassuit atuagassiat nutaat tamaasa atuartarpaat ilisivimmut ilitinnagit. Atuagassiaatitsinnik atuaqqissaartarnikkut qujamasunnerput maniguulluta ersersittarutsigu anersaakkut siumukassaagut Jehovamullu kiffartornitsinni atorneqarnerusinnaalluta. — Hebræerit 5:13, 14.
10. Ilagiinni minnerpaajusutut qanoq pissusilersorsinnaavugut?
10 Minnerpaajusutut pissusilersortoq aamma allatigut ‘angisuujuvoq’. Jehovap Nalunaajaasuisa ilagiivini tamani Jehovap anersaava illernartoq siulersortigalugu angutinik piukkunnartunik utoqqaanertatut kiffartortussanik toqqagaqarpoq. Anersaakkut ittunik soorlu ilagiit ataatsimiinnissaannik, oqaluussinissamik paarsisutullu pulaarnissaminnik aaqqissuussisarput. Aaqqissuussinernik tamakkunannga tapersersuinikkut minnerpaajusutut pissusilersortarutta ilagiinni nuannaarnermut, eqqissinermut ataasiussuseqarnermullu ilasaataassaagut. (Atuakkit Hebræerit 13:7, 17). Utoqqaanertatut ilagiinniluunniit kiffartortutut immikkut pisinnaatitaaffeqaruit taama akisussaaffeqarnerit maniguullutit Jehovamut qujamasuutigaat, ilaa?
11, 12. Sooq inunnit avatangiisitsinniittunit allaanerussaagut?
Lukasi 9:46-mi ima allassimavoq: “Ajoqersukkat akunnerminni eqqarsaatigilerpaat kina arlartik ilaminit annerunersoq.” Uagummi aamma eqqarsalersinnaavugut uppeqatitsinnit ajunnginnerulluta inunnilluunniit amerlanernit pingaarnerulluta? Silarsuarmi avatangiisitsinni inuppassuit makitasuujupput namminissarsiortuullutillu. Maniguuttuunitsigut taakkua isiginnittaasiattut isiginnittaaseqarnaveersaarta. Taamaaliorutta Jehovallu piumasaa siulliuttarutsigu qatanngutitsinnut qiimmassaataassaagut.
11 Minnerpaajusutut pissusilersortoq ‘angisuujuvoq’, imaluunniit Jehovap peqatigiissortaani naleqarneruvoq, maniguuttuunerata ilakkuminarnerulersimmagu. Jiisusip ajoqersukkani minnerpaajusutut pissusilersornissaannik oqaaqqissaarpai taakkua ilaat taamanikkut avatangiiserisaminnit sunnerteqqammata.12 Jiisusip minnerpaajusutut pissusilersornissamik oqaaqqissaarutaa ilumut kajumissaataavoq. Inuunermut tunngasuni tamani minnerpaajusutut pissusilersorniartariaqarpugut, ilaa? Inuunermut tunngasut pingasut sammeriartigit.
MINNERPAAJUSUTUT PISSUSILERSORNIARSARIGIT
13, 14. Uiusoq nuliaasorluunniit minnerpaajusutut qanoq pissuseqartariaqarpa, tamannalu aappariinnerannut qanoq iluaqutaassava?
13 Aappariinnermi. Inuppassuit inuttut pisinnaatitaaffitik eqqarsaatigisangaaramikkit taakku suna tamaat atorlugu eqqortinniarsarisarpaat, allaat inuit allat pisinnaatitaaffiinik unioqqutitsigaluarunik soqutiginagu. Minnerpaajusorli Paulusip isiginnittaasereqqusaatut isiginnittaaseqarpoq. Romamiunut ima allappoq: “Eqqissinartut ineriartorteqatigiinnerlu noqqaassutiginiartigit.” (Romamiut 14:19) Inuk minnerpaajusutut pissusilersortoq tamanik ingammillu aapparminik eqqisseqatiginninniartuartarpoq.
14 Assersuutigalugu sulinngiffimmi uiusoq nuliami sammerusutaanit allaanerusumik sammisaqarusussinnaavoq. Immaqa uiusoq angerlarsimaannarluni eqqissilluni atuakkamik atuarusuppoq. Nuliali immaqa neriniartarfiliarusuppoq ikinngutinulluunniit pulaarusulluni. Nuliata ataqqiuminartinnerussavaa uiusup maniguulluni nuliami nuannarisai aamma eqqarsaatigippagit. Uiatalu asanerussavaa pingaartinnerullugulu nuliaasup piumasani piniartuaannanngippagu, uimili kissaatai aamma eqqarsaatigisarpagit. Nuliaasoq uiusorlu minnerpaajusutut pissusilersortarunik aappariilluarnerulissapput. — Atuakkit Filippimiut 2:1-4.
15, 16. Tussiaasiortoq Tussiaat 130, 131-milu qanoq isiginnittaaseqaqqusiva, ilageeqatigisatsinnullu pissusilersornitsinnut qanoq sunniuteqartariaqarpa?
15 Ilagiinni. Silarsuarmi inuppassuit kissaatitik massakkorpiaq piumasarpaat. Taakku utaqqisinnaassuseqanngingajapput utaqqinerlu misilinneqaatitut isigisarlugu. Minnerpaajusutut pissusilersortarneq ineriartortikkutsigu Jehovamik utaqqinissamut iluaqutigissavarput. (Atuakkit Tussiaat 130:7; 131:1-3) Maniguuttuunerup Jehovamillu utaqqisinnaanerup iluaqutissartai tassaapput toqqissisimaneq, pilluaqqusaaneq, tuppallersarneqarneq nalerisimaarnerlu. Tupinnanngilaq tussiaasiortup nunaqqatini Israelikkut Guutimik utaqqinissaannut kajumissaarmagit!
16 Aamma illit tuppallersarneqarsinnaavutit maniguullutit Jehova utaqqigukku. (Tussiaat 42:6) Immaqa ‘nakkutilliisutut’ kiffartorusupputit ilagiinni iluaqutaanerusinnaajumallutit. (1 Timotheusi 3:1-7) Soorunami anersaaq illernartoq iluaqutigalugu pissuserineqartussat nakkutilliisup pissuserisariaqagai sapinngisannik ineriartortittariaqarpatit. Taavami allanut sanilliullugu ilinnut tunngatillugu sivitsortoorsorinarpat? Minnerpaajusutut pissusilersortup, erinitsajuilluni immikkut pisinnaatitaaffeqalernissaminik utaqqisup, Jehovamut kiffartornerminik nuannaarutiginniitigaluni sumilluunniit suliassinneqarnini nuannaarutigissavaa.
17, 18. (a) Allanik isumakkeerfiginnikkusussuseqarneq utoqqatsernerlu qanoq kinguneqarsinnaappat? (b) Ussatit 6:1, 3-imi qanoq siunnersorneqarpugut?
17 Inunnut allanut attaveqarnitsinni. Inuit amerlanerit utoqqatserneq ajornakusoortittarpaat. Guutimulli kiffaasut minnerpaajusutut pissusilersorneq ineriartortittarpaat kukkussutimik nassuerutigisarnerisigut isumakkeerfigeqqusarnermikkullu. Aamma allat unioqqutitsinerinik isumakkeerfigeriaannaasarpaat. Makitasuujuneq avissaartuutaallunilu isumaqatigiinngilersitsisarpoq, isumakkeerfiginninnerli ilagiinni eqqissinermik siuarsaasarpoq.
18 Piffissami allami maniguunneq ilumoorlunilu utoqqatserneq pisariaqarsinnaapput. Assersuutigalugu immaqa isumaqatigiissuteqarpugut pissutissaqarluarlutali oqarnitsitut iliorsinnaanata. Taamaattoqartillugu isumaqatigiissuteqarfigisarput aamma kukkussuteqarsimagaluarpalluunniit nammineq kukkussutigisavut eqqarsaatigisariaqarpavut nassuerutigalugillu. — Atuakkit Ussatit 6:1, 3, NW. *
19. Sooq minnerpaajusutut pissusilersornissamik Biibilimi oqaaqqissaarut qujamasuutigisariaqarparput?
19 Minnerpaajusutut pissusilersornissamik Biibilimi kajumissaarut qujamasuutigingaarparput, ilaannikkullu unamminiarnartuusinnaagaluartoq Jehovap uagutsinnik annerungaarnera eqqarsaatigigutsigu maniguuttuuneralu eqqaamagutsigu pissuserineqartussamik nuannersumik tamatumannga ineriartortitsinissatsinnut kajumississutigissavarput. Taamaaliornikkut Jehovamut kiffatut naleqarnerulissaagut. Taamaattumik tamatta sapinngisatsinnik minnerpaajusutut pissuseqarniartuarta!
^ imm. 5 Atit allanngortitaapput.
^ imm. 18 Ussatit 6:1, 3, NW: “Ernera, tullinnut akiligassarsisumut qularnaveeqqusiisimaguit, takornartaq assammillugu uppernarsaaffigisimagukku, taava ernera, aniguiumallutit . . . imaaliorit: Orniguk, maniguugit, tullit kimigiiserfigiuk.”