“Kina qunugissavara?”

“Sorsuffigineqaleraluaruma taamaattoq aarlerissanngilanga.” — TUSSIAAT 27:3.

SAPIINNERULEQQULLUTIT VERSIT UKU QANOQ ILUAQUTIGISINNAAVIGIT?

Tussiaat 27:1

Tussiaat 27:4

Tussiaat 27:11

1. Apeqqutit suut Tussiaat 27-mi akineqassappat?

SILARSUARMI pissutsit ajorsingaluttuinnaraluartut sooq oqaluussinermi iliuuseqarneruvugut? Silarsuarmilu aningaasarsiornikkut ajornartorsiuteqangaaraluartoq sooq oqaluussinermut piffissarput nukivullu kajumilluta atortarpavut? Inuppassuit siunissamut siooragaluartut sooq isumalluartuarsinnaavugut? Apeqqutinut taakkununnga akissutit kunngip Daavip erinarsuusiaani Tussiaat 27-mi atuarsinnaavavut.

2. Qunugaanni qanoq misigisoqarsinnaava, uagulli suna qularutiginngilluinnarsinnaavarput?

² Daavip Tussiaat taanna ima aallartippaa: “Naalagaq qaammaqqutigigakku annatsitsisigalugulu kina ersigissavara? Naalagaq inuuninnut sernissortigigakku kina qunugissavara?” (Tussiaat 27:1) Inuk qunusoq, imaluunniit ersisorujussuaq, susinnaajunnaarsinnaavoq. Inulli Jehovamik tatiginnittoq inuit allat pisarnerattut qunutuujusanngilaq. (1 Petrusi 3:14) Jehova tatigalugulu sernissortigigutsigu ‘aarlerinaatsumi najugaqassaagut eqqissillutalu inuussalluta perlussanik aarlerigisaqarnata’. (Ussatit 1:33; 3:25) Sooq taamaappa?

JEHOVA ‘QAAMMAQQUTIGAARA ANNATSITSISIGALUGULU’

3. Jehova qanoq ‘qaammaqqutigisinnaavarput’, uagulli nammineq qanoq iliortariaqarpugut?

³ Jehova ‘qaammaqqummut’ assersuutigineqarmat ima paasisariaqarpoq Jehovap sallusuissummik ilinniartittaraatigut. (Tussiaat 27:1) Qaammaqqut iluaqutigalugu siunitsinni navianartoqarnera akornutissaqarneraluunniit paasisarparput, qaammaqqutilli taakku peerneq ajorpai. Navianartukkoornaveersaartariaqarpugut. Tamatumunnga assingusumik Jehovap silarsuarmi pisut qanoq paasisariaqarnerat uagutsinnut paasinarsisittarpaa. Silarsuarmi matumani ajortumi navianartunut mianersoqqusarpaatigut. Najoqqutassiat Biibilimiittut iluaqutaajuaannartut  aqqutigalugit siunnersortarpaatigut. Siunnersuutilli taakku iluaqutigissagutsigit uagut nammineq iliuuseqartariaqarpugut. Taakku malikkutsigit ilisimassusseqassaagut, soorlu tussiaasiortoq ‘akeqqaminit ilisimasaqarnerulersoq ilinniartitsisuminilluunniit tamanit paasisimasaqarnerulersoq’. — Tussiaat 119:98, 99, 130.

4. (a) Sooq Daavip qularani Jehova annatsitsisiginerarpaa? (b) Jehovap kiffani qaqugu annaatissavai?

⁴ Daavip Tussiaat 27:1-imi oqaasiinit erserpoq Jehovamit annaanneqartarsimanini puiorsimanngikkai. Assersuutigalugu Jehovap Daavi løvimit nannumillu annaappaa. Aamma Jehovap inorujussuarmut Goliatimut ajugaatippaa. Kingusinnerusukkut kunngip Saulip Daavi naalikkaminik toqoriartaraluarmagu Jehovap aniguisittarpaa. (1 Samueli 17:37, 49, 50; 18:11, 12; 19:10) Taamaattumik Daavip qularani Jehova annatsitsisiginerarpaa. Aamma Jehovap kiffani annaakkumaarpai, soorlu Daavi annaassimagaa. Qaqugu? Annikilliornartussarsuaq nalliuppat. — Saqqummersitat 7:14; 2 Petrusi 2:9.

JEHOVAMIT IKIORNEQARTARSIMANITIT EQQAAMAKKIT

5, 6. (a) Siornatigut misigisimasavut qanoq sapiinnerulissutigisinnaavavut? (b) Sooq Jehovap itsaq innuttaminik ikiuisimaneranik eqqarsaatiginninneq iluaqutigisinnaavarput?

⁵ Daavip Tussiaat 27:2, 3-imi eqqaavaa akeqqaminit Jehovap aniguisissagaani. (Atuakkit). Daavi arlaleriarluni taamatut misigisaqartarsimavoq. (1 Samueli 17:34-37) Pisimasut taakku eqqarsaatigigaangamigit ajornartorsiutini naammagalugit atorsinnaanngortarpai. Illit Jehovamit ikiorneqartarsimanitit eqqaamavigit? Misigisimasatit taakku nakussatsissutigisarpigit? Assersuutigalugu isumakuluuteqaraangavit qamannga pisumik qinusarnikuuit? Misigisimavit Jehovap ilisimassuseqalersissimagaatit ajornartorsiutivillu naammagalugit atornissaannut nakussatsissimagaatit? Imaluunniit ajornartorsiutivit nuannaarlutit kiffartorninnut akornutaasut aaqqinnissaannut kiffartornermiluunniit periarfissaqarlualerninnut Jehovamit ikiorneqarsimaninnik eqqaamasaqarpit? (1 Korinthimiut 16:9) Misigisimasatit tamakku eqqarsaatigigaangakkit qanoq misigisarpit? Pisimasut tamakku eqqaamajuarukkit allaat erloqinarnerpaanik ajornartorsiuteqaraluarlutit Jehovamit ikiorneqarsinnaanerit qularutigiunnaassavat. — Romamiut 5:3-5.

⁶ Naalakkersuisut pissaaneqangaartut Jehovap Nalunaajaasuisa peqatigiiffiannik  suujunnaarsitsilluinnarniarlutik aalajangersimappata qanoq iliussaagut? Ukiuni kingullerni inuit ilaat taamaalioriartarsimagaluarput — iluatsinngitsumilli. Eqqaamagutsigu Jehovap itsaq innuttaminik ikiuisarsimanera siunissami qanorluunniit pisoqassagaluarpat sapiitsuusinnaallutalu pinertusaarsinnaassaagut. — Danieli 3:28.

PALLORFIGINNINNEQ ILUMOORTOQ PINGAARTIGUK

7, 8. (a) Tussiaat 27:4 naapertorlugu Daavip Jehovamut suna qinnutigaa? (b) Jehovap naalaffissua anersaakkut ittoq suua, qanorlu ullumikkut tassani pallorfiginnissinnaavugut?

⁷ Pallorfiginninneq ilumoortoq pingaartikkutsigu sapiitsuusinnaassaagut. (Atuaruk Tussiaat 27:4). Daavip nalaani Jehovap ‘illua’ tassaavoq tupeq naapeqatigiittarfik. Daavilli suut tamaasa piareersarpai ernini Salomo kusanartumik Jehovamut naalaffiliorsinnaaqqullugu. Ukiut hundredellit tamatuma kingorna Jiisusip nassuiarpaa inuit Jehovamik pallorfiginninniarlutik naalaffimmukartariaarutissasut. (Johannesi 4:21-23) Jehova Jiisusip utertitsissutitut pilliutaanik upperinninnitsigut akuerisinnaasaminik imminik pallorfiginnissinnaaqqulluta aaqqissuussivoq. Apustilip Paulusip Hebræerinut allakkani kapitalini 8-mit 10-mut nassuiarpaa Guutimik pallorfiginninnermik aaqqissuussineq tamanna ‘assannik sanaajunani’ naalaffissuusoq anersaakkut ittoq. Paulusip nassuiarpaa ukiumi 29-mi Jiisusi kuisinnermigut Jehovap piumasaatut iliorniarluni sassarmat taamaalillunilu imminut pilliutigiumanini ersersimmagu naalaffik tamanna piulersoq. (Hebræerit 10:10) Naalaffimmi tassani Jehova qanoq pallorfigisinnaavarput? Taamaaliorsinnaavugut Jehovamut “uummatitsigut ilumoorluta, uppernermi aalajaalluta” qinusarnitsigut, taannalu pillugu sapiilluta allanut oqaluussisarnitsigut. Aamma naalaffimmi tamatumani Jehova pallorfigisinnaavarput ataatsimiikkaangatta isumassoqatigiittarnitsigut kajumissaaqatigiittarnitsigullu ilaqutariittullu atuaqqissaaqatigiittarnitsigut. (Hebræerit 10:22-25) Pallorfiginninnermik ilumoortumik pingaartitsigutta ullut kingulliit atugarliungaarfiusut naammagalugit atorsinnaassavavut.

⁸ Silarsuaq tamakkerlugu Jehovap kiffai aalajaatsut oqaluussinermi peqataanerulerput, allat allamiut oqaasiinik ilinniartarput, allallu oqaluussisartunik pisariaqartitsiffiunerusunut nuuttarput. Taakkua iliuutsimikkut ersersippaat tussiaasiortutut iliorusullutik. Tussiaasiortup ‘tipaatsuutigiumavaa Naalakkap alutornassusia, akissutisiffigiumallugulu naalaffiani’. Ullumikkut Jehovap kiffaasa taassumannga pilluaqquneqarnissartik kissaatigaat, qanorluunniillu pisoqassagaluarpat Jehova pallorfigiuarumavaat. — Atuaruk Tussiaat 27:6.

GUUTIMIT IKIORNEQARNISSAT UPPERIUK

9, 10. Tussiaat 27:10-mi qanoq qularunnaarsinneqarpugut?

⁹ Daavip Jehovamit ikiorneqarnissani upperilluinnarlugu ersersippaa ima allakkami: “Ataatamami anaanamalu qimakkaluarpannga Naalakkap ilasiarissavaanga.” (Tussiaat 27:10, 1990) Samuelimik allakkat siulliit kapitali 22 naapertorlugu nalunngilarput Daavi angajoqqaaminit qimanneqarsimanngitsoq. Ullumikkulli inuppassuaqarpoq ilaquttaminnit sumiginnarneqarsimasunik. Taamatulli sumiginnarneqarsimasut ilarpassui ilagiinnit kristumiunit isumassorneqarlutillu ikiorneqarsimapput.

¹⁰ Jehovap kiffani allanit qimanneqarsimagaluartut ikiorumammagit upperilluinnarsinnaavarput taakku allanik ajornartorsiuteqaraluarpata isumassussagai. Assersuutigalugu ilaquttatta pilersornissaat isumakuluutigigutsigu qularutiginngilluinnarsinnaavarput Jehovap ikiorumassagaatigut. (Hebræerit 13:5, 6) Pissutsit atukkavut paasillugillu pisariaqartitavut nalunngilai.

11. Jehovamik upperinnilluinnarnerput inunnut allanut qanoq sunniuteqarsinnaava? Assersuuteqarit.

¹¹ Assersuutigeriartigu Biibilimik atuaqqissaartartoq,  Victoria Liberiamiu. Kuisingajalerami meeqqanilu inooqatiminit qimanneqarput. Angerlarsimaffeerullunilu suliffeqanngikkaluarluni Biibilimik atuaqqissaartarnini unitsinngilaa, kingusinnerusukkullu kuisippoq. Ullut ilaanni paniata 13-inik ukiullip aningaasivik aningaasarpassuarnik imalik nassaaraa. Ussernartorsiorusunnginnamik aalajangerput aningaasat kisinniarnagit. Aningaasivimmilli piginnittoq, sakkutuujusoq, ujapallappaat. Nanimmanni oqarfigai inuit tamarmik Jehovap Nalunaajaasuisut unneqqaritsigigaluarpata silarsuaq tamarmi najugariuminarnerullunilu eqqissinarnerussagaluartoq. Victoriap Jehovap silarsuassaq nutaaq pillugu neriorsuutai Biibilimeersut sakkutuumut takutippai. Sakkutuup Victoriap uppernera unneqqarissusialu tupigusuutigingaaramigit akissarsiserujussuarpaa. Jehovap Nalunaajaasuisa Jehovap isumassuisinnaanera upperilluinnaramikku unneqqarissuupput, tamannalu inuit sumiluunniit najugaqaraluartut maluginiartarpaat.

12. Sooq suliffeerukkaluarluta aningaasanillu annaasaqaraluarluta Jehovamut kiffartortuarpugut? Assersuuteqarit.

¹² Aamma takorlooriaruk Thomas, oqaluussisartoq kuisimanngitsoq Sierra Leonemeersoq, qanoq misigisimasimassasoq. Ilinniartitsisutut suliffittaarpoq, ukiorli ataasingajanngorpoq suli akissarsisinneqanngitsoq. Aningaasarsissaguni palasi atuarfimmi pisortaasoq oqaloqatigeqqaartariaqarpaa. Palasip Thomas oqarfigaa Jehovap Nalunaajaasuisa upperisaat atuarfimmi akuerineqarsinnaanngitsoq. Palasip piumasaraa Thomasip suliffini suliffigiinnassaguniuk Jehovamut nalunaajaasuujunnaassasoq. Thomas ukioq ataasingajak akissarsinani suliffimminit soraarpoq. Allamilli suliffittaarpoq radionik mobilinillu iluarsaasartunngorluni. Oqaluttuarpassuaqarpoq Jehovamik upperinnilluinnarutta amigaateqalernissarput annilaangatigisariaqanngikkipput. Jehova sunik tamanik pinngortitsisuullunilu innuttaminik illersuiuarmat nalunngilluinnarparput isumassussagaatigut.

13. Oqaluussineq nunani inuuniarnikkut pissakilliorfiusuni qanoq ingerlava?

¹³ Qatannguterpassuaqarpoq nunani inuuniarnikkut pissakilliorfiusuniittunik oqaluussinermik ulapputeqarluartunik. Sooq? Immikkoortortaqarfiit ilaat ima allappoq: “Biibilimik atuaqqissaaqatigineqalertartorpassuit suliffeqannginnamik ullup ingerlanerani atuaqqissaarnissaminnut piffissaqarnerusarput. Qatanngutit aamma oqaluussinermut piffissaqarnerusarput.” Inuit taakkua pissutsit atukkatik ajugaarmata ingerlaannaq paasisarpaat ulluni kingullerni inuusugut. Nunami allami oqaluussisartut agguaqatigiissillugu pingasunit amerlanerusunik atuaqqissaaqatigisartagaqartarput. Ukiut aqqaneq-marluk sinnerlugit nunami tassani ajoqersuiartortitaasimasoq ima allappoq: “Oqaluussisartorpassuit pilimanianngitsumik inooriaaseqaramik oqaluussinermut  Biibilimillu atuaqqissaaqateqarnermut piffissaqarnerupput.”

14. Guutip ‘amerlangaartut’ qanoq illersorsinnaavai?

¹⁴ Jehova neriorsuivoq innuttani ataatsimut isigalugit ikiorniarlugit, illersorniarlugit aniguisinniarlugillu, neriorsuutiminillu eqqortitsinissaa upperilluinnarparput. (Tussiaat 37:28; 91:1-3) Inuppassuit ‘amerlangaartut’ ‘annikilliortitaangaarneq’ anigussavaat. (Saqqummersitat 7:9, 14) Guutip amerlangaartut taakku illersussavai pissutsit aaqqissuussaanerata ajortup matuma ulluini kingullerni suujunnaarsinneqannginniassammata. Jehovap aamma ikiussavai misilinneqarnerit suulluunniit naammagalugit atorsinnaaqqullugit imminullu attaveqarluartuarsinnaaqqullugit. Harmagedonimilu Jehovap kiffani annaatissavai.

“AQQUTIGEQQUSANNIK AJOQERSUNNGA, NAALAGAQ”

15, 16. Jehovamit ilinniartinneqarnerput qanoq iluaqutigaarput? Assersuuteqarit.

¹⁵ Sapiitsuussagutta Guutimit ilinniartinneqartuartariaqarpugut. Daavi ima qinuvoq: “Aqqutigeqqusannik ajoqersunnga, Naalagaq, ingerlatinnga aqqusininnguakkut manissukkut.” (Tussiaat 27:11) Guutimit ilinniartinneqarumalluta siunnersuutit Biibilimik tunngavillit Jehovap peqatigiissortaaneersut eqqumaffigisariaqarlugillu ilikkakkavut malillugit ingerlaannaq iliuuseqartariaqarpugut. Assersuutigalugu qatannguterpassuit inooriaatsimik pisariillisaanissamik siunnersuutinik malinnittut akiitsueruttullu kingusinnerusukkut aningaasarsiornikkut ajornartorsiuteqalermat siunnersuutit taakku iluaqutigaat. Pigisanik akissaqarfiginngisaminnik akilersuigaluarunik suleruluussagaluarput, maannakkulli oqaluussinerusinnaalerput. Imminut ima aperisariaqarpugut: ‘Biibilimi Biibililersaarutinilu inussiamit aalajaallunilu silatuumeersut ilikkakkakka sapernartikkaluarlugit ingerlaannaq iliuuseriniartarpakka?’ — Matthæusi 24:45, NW.

¹⁶ Jehovamit ilinniartinneqartillutalu siulersortikkutta qunugisaqassanngilagut. Pioneri USA-meersoq ilaquttanilu pioneriujuarsinnaaqqullutik suliffimmini qaffasinnerusumik atorfeqalernissaminik qinnuteqarpoq. Ittuatali universitetimi ilinniarsimanngimmat taamatut atorfinissinnaannginnerarpaa. Illit taamatut misigisaqartuuguit qaffasinnerusumik ilinniagaqarnak piffissaq tamaat kiffartortungorsimagavit peqqissimisimassagaluarpit? Sapaatip-akunneri marluk qaangiuttut ittuusoq taanna soraarsitaavoq, ittuusulli allap qatanngut aperaa sumik anguniagaqarnersoq. Qatanngutip nassuiaappaa nulianilu piffissaq tamaat kiffartorlutik Jehovamut Nalunaajaasuullutik taamatullu ingerlaannarusukkaluarlutik. Qatanngulli suli oqaqqerianngitsoq ittuusup ima oqarfigaa: “Malugaara allanit allaanerusutit! Ataataga toqungajalersoq uppeqativit marluk ullut tamaasa Biibilimik atuffattarpaat. Aalajangerpunga Jehovap Nalunaajaasuisa ilaata ikiornissaanut periarfissaqalissagaluaruma ikiussallugu.” Aqaguani ullaakkut qatanngutip ittorisimasami atorfittaareqqunngisaa atorfittaaraa. Aap, Guutip naalagaaffia siulliullugu noqqaassutigigutsigu Jehovap pisariaqartitatsinnik isumagiumalluta neriorsuutini eqqortissavaa. — Matthæusi 6:33.

UPPERNERUP NERIUNNERULLU PINGAARUTEQASSUSIAT

17. Sooq siunissaq qilanaarisinnaavarput?

¹⁷ Daavip erseqqissarpaa uppernerup neriunnerullu pingaaruteqassusiat ima oqarluni: “Qulanngilanga takussallugit Naalakkap ajunngissusia inuusut nunaanni.” (Tussiaat 27:13) Guutimit neriuuteqalersinneqarsimanngitsuugutta aamma Tussiaat 27-mi eqqartorneqartut paasisimanngikkaluarutsigit inuunerput qanormita issagaluarpa? Taamaattumik ulluni kingullerni makkunani Jehova qinnugiuartariaqarparput Harmagedonernissaatalu tungaanut nakussatseqqullutalu illersoqqulluta. — Atuaruk Tussiaat 27:14.

[Atuaqqissaarnermi apeqqutit]

[Qupp. 23-mi assiliartaq]

Daavip Jehovamit aniguisinneqarsimanini eqqarsaatigigaangamigit nakussatsissutigisarpai

[Qupp. 25-mi assiliartaq]

Aningaasarsiornikkut ajornartorsiuteqarneq oqaluussinermi iliuuseqarnerunissamut periarfissatut isigisarpiuk?