Guutip ilisimassusia pinngortitami takuneqarsinnaavoq

“Aperisoqanngilarli: ‘Naak Guuti pinngortitsisiga . . . nunarsuup nersutaasa ilisimasaannit annerusumik uatsinnik ilisimasaqalersitsisoq qilaap timmiaanit uatsinnik ilisimassuseqarnerulersitsisoq?’” — JOBI 35:10, 11.

TIMMISSAT tupinnaannartumik piginnaasaqarput. Timmissat ajornaquteqanngitsumik timmisinnaanerat inuit timmisartuliortartut tupigusuutigisarpaat. Timmissat ilaat kilometerit tusindillit imarpissuaq assigiiginnangajattoq qulaallugu ornitartik toraarlugu timmisarput.

Suli annerusumik Pinngortitsisup ilisimassusianik ersersitsisoq maluginiarnartoq alla tassaavoq, qarlorlutik imminnut paasissutissiisinnaanerat qaaqqusisinnaanerallu. Assersuuteqariarta.

Timmissat attaveqatigiittarnerat

Timmissat ilaat suli tukernatilli imminnut attaveqatigiittarput. Assersuutigalugu aqissiusarsuaq arnaviaq ullormut ataasiinnarmik ikinnerpaamik arfineq-pingasunik manniliortarpoq. Manniit tamarmik assigimmik sukkassuseqarlutik ineriartussagaluarunik ullut arfineq-pingasut ingerlaneranni tamarmik tukissagaluarput. Anaanaasup ajornartorsiutigilersimassagaluarpaa timmiaaqqat sapaatip akunneranik utoqqaassusillit paariitigalugit ivassagaluaruni. Taamaattoqanngilarli, taamaattumik aqissiusarsuup piarai arfineq-pingasut tamarmik akunnerit arfinillit ingerlaneranni tukertarput. Qanoq taamaattoqarsinnaagami? Tamatumunnga pingaarnertut pissutaasoq misissuisartut ilimagaat, aqissiusarsuup piarai suli tukernatilli imminut attaveqatigiittartut, taamaattumillu qanoq ilillutik pinerpoq ataatsikkut tukernissartik pilersaarutigisarlugu.

Timmissat peroraangamik ingammik angutivissat qarlornerusarput. Pingaartumik nuliunermik nalaani ineqarfimminnik nalunaaqutsiiniarlutik arnavissamillu qaaqqusinerminnik taamaaliorajunnerusarput. Timmiarpassuit tusindillit immikkut assigiinngitsunik qarloriaaseqarput arnavissallu pissuseqatiminnik ujaasinerminnut ilisarsissutigisarlugu.

Timmissat ingammik ullaaralaakkut seqernullu tarrikkiartornerani qarlornerusarput, tamannalu pissutissaqarluarpoq. Tamatuma nalaani anorikinnerullunilu nipiliortoqannginnerusarpoq. Misissuisartut paasisimavaat ulluuneranut naleqqiullugu timmissat qarlorneri ullaakkut unnukkullu 20-riaammik nipitunerusartut.

 Naak angutivissat qarlortuunerusaraluartut, angutivissat arnavissallu assigiinngitsunik nipeqarlutik qaqqusisinnaasarput imaluunniit assigiinngitsunik isumalinnik naatsunik nipiliorsinnaasarlutik. Assersuutigalugu bogfinkit qulingiluanik assigiinngitsunik nipeqarlutik qaaqqusisinnaapput. Timmissamut tigutsisilimmut timmilluni piniarniartumut aalajangersimasumik nipeqarlutik mianersoqqusillutik qarlortarput, nunamiilli piniarniartumut mianersoqqusillutik allattut nipeqarlutik qarlortarput.

Tunissut anginerungaartoq

Timmissat pinngortitaassutsiminnik ilisimassusiat tupinnangaarpoq. Inuit oqaloqatigiissinnaassusiat eqqarsaatigissagaanni tupinnarnerungaarpoq. Jobi 35:11 (1990) naapertorlugu ‘timmissanit qilaap ataaniittunit silatunerulersilluta’ Guutip pinngortissimavaatigut. Torlukkut nipimik anitsisinnaaneq atorlugu imaluunniit ussersorluni eqqarsaatinik isumassarsianillu itisuunik ingerlatitseqqiisinnaaneq inunnut immikkorluinnaq ittuuvoq.

Pinngortitanit allanit allaanerussutigalugu naalungissat oqaatsit nalunartut ilikkarsinnaanissaannut pinngortitaasimapput. Nittartakkatigut aviisi American Scientist-imi allassimavoq: “Meeraaqqat angajoqqaamik oqaluffiginngikkaluaraatsik oqaatsinik ilikkarsinnaassuseqarput; allaat meeqqat tusilartut angerlarsimaffimminni ilinniartinneqanngikkaluarlutik namminneq ussersorlutik paasititsiniaasinnaapput.”

Eqqarsaatitsinnik misigissutsitsinnillu oqaatsitsigut ussersornikkulluunniit oqaatiginnissinnaaneq Guutimit tunissutaavoq nuanningaartoq. Inunnulli tunissut anginerungaartoq tassaavoq Guutimut qinunikkut oqaloqateqarsinnaaneq. Allaat Guutip Jehovap oqaloqatigissagitsinni kajumissaarpaatigut. “Sumilluunniit isumakuluuteqarnaveeritsi, kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu” Guutip oqaasiani Biibilimi allassimavoq. — Filippimiut 4:6.

Jehovap kissaatigaa ajornakusoortunik aalajangigassaqaraangatta ilisimassusia angingaartoq Biibilimi allaaserineqarsimasoq atortassagipput. Aamma siunnersuutit paasisavut qanoq atornissaannut ikiorusuppaatigut. “Ilisimassutsimigulli inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa”, Biibilimi allattoq Jaaku oqarpoq. — Jaaku 1:5.

Qanoq ilinnut sunniuteqarpa?

Timmiaaqqap qarlorpalaarnera imaluunniit meeraaqqap oqaasii siulliit tusaraangakkit qanoq ilinnut sunniuteqartarpat? Guutip ilisimassusia pinngortitaani takusinnaaviuk?

Qanoq pinngortitaasimanini eqqarsaatigeqqissaareerlugu tussiaasiortoq Daavi Guutimut ima oqarusuummerpoq: “Qutsavigissavakkit pinngortitaagama tupinnangaartumik, suliatit tupinnangaarput, tamanna nalunngilluinnarpara!” (Tussiaat 139:14) Guutip ilisimassusia pinngortitami takuneqarsinnaasoq qujamasullutit misissorukku siunnersuutit tutsuiginartut atorlugit ilinnik ikiuisinnaaneranik upperinninnerit allissaaq.

[Qupp. 5-mi issuagaq]

Oqaloqatigiissinnaaneq Guutimit tunissutaavoq

[Qupp. 4-mi suminngaanneernera]

© Dayton Wild/Visuals Unlimited