Aappaqanngitsunut aappariinnullu siunnersuutit pitsaasut

‘Tamakku oqaaseraakka siunertaralugu akornusersorneqarasi assuarnaatsumik inuunissarsi Naalagaq attavigalugu.’ — 1 KORINTHIMIUT 7:35.

1, 2. Aappaqanngitsut aappariillu pillugit Biibilimi allassimasut sooq misissortariaqarpavut?

PILLUARNEQ, isumatsanneq isumakulunnerlu misigissusiupput aapparisatsinnut attaveqarnitsinni misigisartakkavut. Taamatut misigisaratta Guuti qinnuigisariaqartarparput siulersoqqulluta. Aammali taamatut siulersoqqunissatsinnut allanik pissutissaqarpugut. Assersuutigalugu kristumiut aappaqanngitsuunerminnik naammagisimaarinnittut ilaat immaqa aappartaarnissaminnut ilaquttaminnit ikinngutiminnilluunniit tatineqartutut misigisimapput. Allat immaqa aappartaarusukkaluarlutik imminnut tulluartumik suli nassaanngillat. Allallu aappariinnerup akisussaaffittaanut qanoq piareersarnissamik ilitsersuunneqartariaqarput. Aamma aappaqanngitsut aappariillu kristumiut kinguaassiuutitigut inuunerloqqunatik imminut illersortariaqarput.

² Pissutsinik taama ittunik atugaqarneq pilluarnissatsinnut sunniuteqaannarani aammali Jehovamut Guutimut attaveqarnitsinnut sunniuteqarsinnaavoq. Apustili Paulusi Korinthimiunut allakkamini siullerni kapitali 7-imi aappaqanngitsunik aappariinnillu siunnersuivoq. Taassuma allaffigisani kajumissisikkusuppai eqqortumik iliornissamut uummatikkullu iluunngarluni allamullu saasaateqarani Guutimut kiffartortuarnissamut. (1 Korinthimiut 7:35) Paulusip tamakkununnga tunngatillugu siunnersuutai iluaqutigisinnaavatit. Taassuma aappaqanngitsut aappariillu pissutsinik atukkaminnik atorluaallutik Jehovamut kiffartornermi iliuuseqarnerunissaat kissaatigaa.

Nammineq aalajangigassaq pingaarutilik

3, 4. (a) Ikinngutit ilaquttallu aappartaartitsiniaavallaarpata qanoq pisoqarsinnaava? (b) Paulusip allagai aappariinnermut eqqortumik isiginnittaaseqarnissamut qanoq iluaqutigisinnaavavut?

³ Ukiuni hundredelinni siullerni juutit pisarnerattut ullumikkut inuppassuit aappartaarnissaq pingaarutilipilussuartut isigisarpaat. Angut arnarluunniit inuusuttoq piffissap ingerlanerani aappartaarsimanngippat, taassuma ilaqutai ikinngutaalu isumaalulersinnaapput eqqarsalerlutillu taanna arlaatigut siunnersortariaqarlugu. Immaqa oqarfigaat aappassarsiorniarluni iliuuseqarnerusariaqartoq. Immaqa arlaannik piukkussaqarput. Immaqaluunniit allaat tulluarsorisaminnut peqqusersusaarlutik naapeqatigitinniarsaraat. Inuit taamaaliortartut peqqusiileqilersitsisinnaapput, inuit taamatut pisatik ikinngutigiunnaarsinnaallugit ajuallatsissinnaallugilluunniit.

⁴ Paulusip allat katinnissaannut kisimiittuunissaannulluunniit tatiniarsarinngilai. (1 Korinthimiut 7:7) Taassuma nuliaqarnani Jehovamut kiffartornini naammagisimaarpaa, allalli aappartaarusuttut isorinngilai. Ullumikkut kristumiut namminneq aalajangersinnaatitaapput aappartaassanerlutik kisimiittuussanerlutilluunniit. Allat taakkua qanoq aalajangernissaat sunniuteqarfiginiassanngilaat.

Aappaqanngitsuulluni pilluarluni inuuneq

5, 6. Sooq Paulusip aappaqannginnissaq kristumiunut kajumissaarutigaa?

⁵ Paulusip Korinthimiunut allagaani maluginiarnartoq tassaavoq taassuma aappaqanngitsuunermut ajunngitsumik isiginnittaaseqarnera. (Atuaruk 1 Korinthimiut 7:8). Paulusi aappaqanngikkaluarluni kristumiuunerartut upperisarsiornikkut siuttui aappaqaratik inuusut ilaasa pisarnerattut pinnani aappalinninngarnit imminut pitsaanerusorinngilaq. Paulusip erseqqissarpaa nutaarsiassamik nuannersumik oqaluussissutiginnittartut aappaqanngitsut ilarpassuisa periarfissarissaarnerunerat. Sumut periarfissarissaarnerugamik?

⁶ Kristumiu aappaqanngitsoq amerlanertigut  Jehovamut kiffartornermi suliassiissutigineqartunut aappallit periarfissaqarfiginngisaannut akuersisinnaasarpoq. Paulusip “Guutimik nalusunut apustiliusutut” aallartinneqarnini immikkut pisinnaatitaaffigilerpaa. (Romamiut 11:13) Apustilit Suliaanni kapitalit 13-imiit 20 ilanngullugu atuarukkit Paulusip ajoqersuiartortitat allat peqatigalugit oqaluussiffigineqarsimanngitsunut angalanerata ilagiinnillu pilersitsiortornerata allaatigineqarnera atuassavat. Taassuma erloqinartut ullumikkut ikittuinnarnit nalaanneqartartut kiffartornermini naammagalugit atortarpai. (2 Korinthimiut 11:23-27, 32, 33) Paulusilli ajoqersuganngortitsiortornerminik nuannaarutiginninnini erloqinartut tamakkua tamaasa naammagalugit atornissaannut piumassuseqalissutigaa. (1 Thessalonikamiut 1:2-7, 9; 2:19) Paulusip aappaqarsimasuuguni naammassisani tamaasa naammassisimasinnaanavianngikkaluarpai.

7. Nalunaajaasut aappaqanngitsut marluk pissutsinik atukkaminnik qanoq atorluaappat?

⁷ Kristumiut aappaqanngitsut ilarpassui pissutsit atukkatik atorluarlugit oqaluussinermi iliuuseqarnerusarput. Sara Limbanialu qatanngutaapput arnat marluk aappaqanngitsut pioneriusut Boliviami najugallit. Nunaannarmi illoqarfimmut ukiorpassuarni oqaluussiffiusimanngitsumut nuupput. Illoqarfimmi tamatumani innaallagiaqanngilaq, qatanngutillu arnat taakku oqaluttuarput inuit tassaniittut fjernsynerneq ajorlutillu radiumik tusarnaarneq ajoramik atuarneq aliikkutarinerusaraat. Ilaasa Jehovap Nalunaajaasuisa atuagassiaataat atuagaataallu pisoqqat naqiterneqartarunnaareersut suli atuartarpaat. Qatanngutit arnat taakkua naapitaat tamangajammik Biibilimik soqutiginnipput, taamaammallu tamaaniittut tamaasa oqaluussiffiginiarnissaat unamminiarnartippaat. Arnap utoqqaap taakku ima oqarfigai: “Naggatissaq qanillisimassaaq Jehovap Nalunaajaasuisa kiisami angummatigut.” Sivitsunngitsoq inuit tassaniittut ilaat ataatsimiinnernut najuuttalerput.

8, 9. (a) Sooq Paulusip aappaqanngitsuulluni Jehovamut kiffartorneq ajunngitsumik eqqartorpaa? (b) Kisimiittuulluni Jehovamut kiffartorneq sunik iluaqutissartaqarpa?

⁸ Ilumoorpoq kristumiut aappariit sumiiffinni oqaluussiffigiuminaatsuni angusaqarluartartut. Suliassiissutigineqartulli pionerit aappaqanngitsut suliarisinnaasaasa ilaat kristumiunut aappalinnut meeralinnulluunniit suliariuminaassinnaapput. Paulusip ilagiit allaffigigamigit nalunngilaa nutaarsiassamik nuannersumik oqaluussissutiginninnermut tunngatillugu suli suliassarpassuaqartoq. Aamma ajoqersuganngortitsiortornerup nuannersua kikkunnut tamanut misigitikkusuppaa. Taamaattuminguna Paulusip aappaqanngitsuulluni Jehovamut kiffartorneq ajunngitsumik eqqartoraa.

 ⁹ Qatanngutip arnap pioneriusup USA-miittup aappaqanngitsuuneq pillugu qanoq misiginini nassuiarpaa. Allappoq inuit ilaat isumaqartut aappaqanngitsut pilluarsinnaanngitsut. Namminerli nalunngilaa Jehovamut ikinngutaaneq piviusumik pilluarnartuusoq. Aappaqanngitsuuneq pilliuteqarnarigaluarlugu isumaqarpoq pissutsit atukkat atorluaraanni, aappaqanngitsuuneq tunissutisiaasinnaasoq nuannersoq. Pilluarnissamut akornutaanani pilluarnissamut periarfissaavoq. Ima allappoq: “Nalunngilara Jehova kikkuugaluartunilluunniit, aappaqanngitsunik aappariinnillu, isumassuingaartuusoq.” Qatanngut arnaq taanna maanna nunami Guutip naalagaaffianik oqaluussissutiginnittunik pisariaqartitsiffiunerusumi nuannaarluni kiffartorpoq. Illit aappaqanngikkuit, sallusuissut allanut ilinniartitsissutigiumallugu iliuuseqarnerusinnaavit? Taamaaliorsinnaaguit kisimiittuuneq Jehovamit tunissutitut erlinnangaartutut isigissavat.

Aappaqanngitsut aappartaarusuttut

10, 11. Tulluartumik suli aappassarsinngitsut Jehovap qanoq ikiortarpai?

¹⁰ Jehovamut nalunaajaasut ilaat piffissap ilaani kisimiittooreerlutik aalajangersinnaapput aappassarsiorniarlutik. Jehovamit siulersorneqartariaqarnertik nalunnginnamikku taassumunnga ikioqqusarput aappartaarisinnaasaminnik tulluartumik nassaarsinnaaqqullutik. — Atuaruk 1 Korinthimiut 7:36, NV. *

¹¹ Uummatikkut iluunngarluni Jehovamut kiffartortumik aappartaarusukkuit, taava Jehova kissaatigisat pillugu qinnuigiuartaruk. (Filippimiut 4:6, 7) Qanorluunniit sivisutigisumik utaqqisariaqaraluaruit nikalloqinak. Jehovap pisariaqartitatit nalunngilai, tatigigunnilu pissutsinik atukkannik akuerinninnissannut ikiussavaatit. — Hebræerit 13:6.

12. Kristumiup arlaannit ajuutigineqarluni sammerusunneqaleruni suut eqqarsaatigeqqissaartariaqarpai?

¹² Taavami Guutimut attaveqarluanngitsup Jehovamulluunniit nalunaajaasuunngitsup ajuutigilerlutit sammerusulerpatit? Immaqa aappartaarnissat assut kissaatigivat. Aalajangiinerlukkuilli kisimiittuuninni kiserliorninnit naalliunnarnerusumik misigissutsikkut naalliussaatit. Eqqaamajuk aappartaarisat aappariuassagakku. Aalajangiussat inuunivit sinneranut sunniuteqassaaq. (1 Korinthimiut 7:27) Allamik neriuutissaarussorinerit piinnarlugu kingusinnerusukkut peqqissimissutigiumaakkannik aappartaarniaqinak. — Atuaruk 1 Korinthimiut 7:39.

Aappaqalernissannut piareersarit

13-15. Akerleriissutaalersinnaasut suut aappassiariit katinnginnerminni oqaloqatigiissutigisariaqarpaat?

¹³ Paulusip kisimiittuulluni Jehovamut kiffartorneq ajunngitsumik eqqartorpaa, aappartaarniarlutilli aalajangertunit pitsaanerusorinngilaq. Paulusi aappariinnik ikiuerusuppoq, taassumalu siunnersuutai isumassarsiarititaasut aappariit katereernerup kingorna pissutsinik piviusunik qanorlu aappariittuarsinnaanerminnik paasinninnissamut iluaqutigisarpaat.

¹⁴ Aappariit ilaat aappariinnerup qanoq innissaanik takorluukkaminnik allannguisariaqarsinnaapput. Aappassiariinnerminni asaqatigiinnertik immikkorluinnaq ittuusorisinnaavaat. Taamatut misigalutik aappariilertarput isumaqarlutillu aappariittut pilluarunnaanngisaannassallutik. Taamatulli eqqarsarneq piviusorsiornerunngilaq. Pilluaannaavittoqarsinnaanngilaq. Ilumoorpoq aappariinneq nuannersortaqartoq, taakkuli ajornartorsiutinut unamminiarnartunullu aappariit tamarmik misigisartagaannut aaqqiissutissatut naammanngillat. — Atuaruk 1 Korinthimiut 7:28. *

¹⁵ Katerngaat ilaasa pingaarutilinnut tunngatillugu isumaqatigiinngissuteqarnertik tupaallaatigisarpaat, imaluunniit allaat pakatsissutigisarpaat. Assersuutigalugu aningaasaatimik sumut atorneqarnissaat isumaqatigiinngissutigisinnaavaat. Imaluunniit sunngiffimmi sammisassanut tunngatillugu, sumi najugaqarnissaminnut tunngatillugu ilaquttaminnullu qanoq pulaakulatigisassanerminnut tunngatillugu isumaqatigiinngissuteqarsinnaapput. Aamma tamarmik naammalluinnanngissuteqarput aappaata paamitsaatigisarsinnaasaanik. Aappassiariit eqqarsarsinnaapput pingaarutillit tamakku oqaloqatigiissutigisariaqarnagit.  Oqaloqatigiissutiginngippatigilli kingusinnerusukkut akerleriissutinngorsinnaapput. Taamaattumik aappassiariit silatusaassapput tamakku katinnginnerminni oqaloqatigiissutigigunikkit.

16. Sooq aappariit unamminiarnartunik qanoq aaqqiinissartik isumaqatigiissutigisariaqarpaat?

¹⁶ Aappariittut pilluarumallutik aappariit ataasiussuseqarlutik akisussaaffitik suliarisariaqarpaat. Aamma isumaqatigiillutik meeqqaminnik perorsaasariaqarput angajoqqaaminnillu utoqqalisimasunik isumaginnittariaqarlutik. Ilaqutariit tamarmik unamminiarnartunik nalaataqartarput, unamminiarnartulli taakku aappariit avissaassutigisussaanngilaat. Biibilimi siunnersuutigineqartut malinnerisigut ajornartorsiutit aaqqissinnaavaat, ajornartorsiutit aaqqeriaannaanngitsut naammagittarlutik atorsinnaallugit pilluarlutillu aappariittuarsinnaallutik. — 1 Korinthimiut 7:10, 11.

17. Sooq aappariit ‘silarsuarmiittunik’ isumakuluutiginnittarpat?

¹⁷ Paulusi aappariinnut tunngasunik suli allanik Korinthimiunut allakkamini siullerni 7:32-34-mi nassuiaavoq. (Atuakkit). Aappariit ‘silarsuaq sammisarisarpaat’, tassa nerisassat, atisassat, najugassaq pisariaqartitallu tunngaviusut allat isumakuluutigisarpaat. Sooq? Imaassinnaavoq qatanngutip angutip kisimiittuutilluni piffissarujussuaq nukippassuillu kiffartornermut atortarai. Aappartaareeramili piffissap nukimmilu tamatumunnga atortakkami ilaa nuliaminik isumassuinermut atortariaqarpaa. Aamma nuliaasoq uini pillugu taama iliortarpoq. Jehovap nalunngilaa uiusup nuliaasullu kissaatigigaat aapparminnik nuannaartitsinissartik. Aamma nalunngilaa aappariit aappariinnerminnik nakussatsitsinissamut piffissaqartariaqarlutillu nukissaqartariaqaramik kisimiittuunerminnisulli kiffartornermut piffissaqartiginatillu nukissaqartiginngitsut.

18. Aappariit sunngiffimmi sammisassanut tunngatillugu qanoq allannguisariaqarsinnaappat?

¹⁸ Piffissarmi uiusup nuliaasulluunniit kisimiittuunermini sunngiffimmi sammisassanut atortarsimasaa? Aappariit piffissap nukiillu Jehovamut kiffartornermut atortarsimasamik imminnut atortalertariaqarsimappatigik, piffissamut nukinnullu kisimiittuunerminni sunngiffimmi sammisassanut  atortarsimasaminnut tunngatillugu aamma taamaaliortariaqarsimassapput. Uiusup katinnginnerminisulli ikinngutini timersoqatigitigisarpagit, nulia qanoq misigissagaluarpa? Imaluunniit uiusoq qanoq misigissagaluarpa nuliaasup katinnginnerminisulli ikinngutini sunngiffimmi sammisaqaqatigitigisarpagit? Tamarmik immaqa kiserliortutut, pilluaatsutut asaneqanngitsutulluunniit misigissagaluarput. Aappariit tamanna pinngitsoortissinnaavaat aappariinnerminnik nakussatsitsiniarlutik sapinngisartik tamaat iliuuseqarunik. — Efesosimiut 5:31.

Jehovap ileqqussatigut minguitsuunissarput piumasaraa

19, 20. (a) Sooq aappariit kinguaassiuutitigut inuunerlukkumanatik imminnut illersortariaqarpat? (b) Aappariit sivisuumik imminnut najunngisimaartarnissaat qanoq navianaateqarpa?

¹⁹ Jehovamut kiffaasut ileqqussatigut minguitsuujuarumallutik sapinngisartik tamaat iliuuseqartarput. Ilaat kinguaassiuutitigut inuunerlukkumanatik aappartaarniarlutik aalajangertarput. Aappariinnerinnarli kinguaassiuutitigut inuunerlunnginnissamut illersuutaasinnaanngilaq. Aappaqaraluartorluunniit ileqqussatigut minguitsuujuarumalluni mianersortariaqarpoq. Biibilip nalaani inuit illoqarfimmi pallittaalisalimmiittut aatsaat illoqarfiup qarmarsuisa iluatungaanniikkunik illersugaasinnaapput. Illoqarfiulli qarmarsuisa silataanniinnissaq navianarsinnaasarpoq ujajaasut pinerlunniallu pissutigalugit. Tamatumunnga assingusumik aappariit aatsaat Jehovap aappariinnut najoqqutassiaanik maleruaagunik kinguaassiuutitigut inuunerlunnginnissamut illersorneqarsinnaapput.

²⁰ Paulusip najoqqutassiat taakku Korinthimiunut allakkamini siullerni 7:2-5-imi allaatigai. Aappariit taamaallaat aapparisaminnik atoqateqartartussaapput. Guuti oqarpoq taakkua tamarmik immikkut aappartik aappaasutut pisassaanik erliguutissanngikkaat. Aappariit sivisuumik takunngisimaarnerminni aappartik pisassaanik tamatuminnga tunisinnaanngilaat. Aappariit ilaat feeriarlutik immikkut aallartarput. Allat suliffitsik pissutigalugu aappartik sivisuumik najorneq ajorpaat. Saatanip aappariinnernik aseruiniarluni tamakku atornerlussinnaavai. Uiusup nuliaasullu aapparmik kinguaassiuutitigut pisariaqartitai eqqarsaatiginngippatigit arlaat allasiornissamut ussernartorsiulersinnaavoq. Jehovap ilaqutariinni ittuusut ilaquttaminnik isumassuisut aappariinnerminnillu navianartorsiortitsinngitsut pilluaqqusarpai. — Tussiaat 37:25.

Biibilimi siunnersuutigineqartut malikkit

21. (a) Sooq kisimiittuunissamut aappartaarnissamulluunniit tunngatillugu aalajangigassat aalajangeruminaattarpat? (b) Siunnersuutit Korinthimiunut allakkani kapitali 7-imiittut qanoq iluaqutigisinnaavavut?

²¹ Kisimiittuunissamut aappartaarnissamulluunniit tunngatillugu aalajangigassat aalajangeruminaannerpaanut ilaapput. Kikkut tamarmik naammalluinnanngitsuummata qanorluunniit aalajangeraluarutta arlaatigut imaannaanngitsunik atugaqassaagut. Taamaammat Jehovamit iluarisaagaluarluta pilluaqqusaasaraluarlutalu inuunitsinni pisut ilaannik pakatsissuteqartarumaarpugut. Siunnersuutinilli pitsaasunik Korinthimiunut allakkani siullerni kapitali 7-imiittunik maleruaanerit ajornartorsiutinut ikilisaatigissavat. Aappaqanngitsuugaluarutta aamma aappaqaraluarutta Jehovamit iluarisaasinnaavugut. (Atuaruk 1 Korinthimiut 7:38). Inuunitsinni pilluaqqussutisiarisinnaasatta pingaarnerpaartaat tassaavoq Guutimit akuerisaaneq. Taassumannga akuerisaasinnaavugut maanna aamma siunissami silarsuassami nutaami Guutip neriorsuutigisaani inuulerutta. Taamanikkussamut arnat angutillu attaveqatigiinnerat pissutsinit ullumikkut nalinginnaaqisunit sunnerneqartarnavianngilaq. (w11 10/15-E)

[Quppernerup ataani ilanngussat]

Qanoq akissavit?

• Sooq aappaqanngitsunik aappartaartitsiniaasassanngilagut?

• Jehovamut kiffaasup aappaqanngitsup pissutsit atukkani pitsaanerpaamik qanoq atorluarsinnaavai?

• Aappassiariit aappariinnermi akerleriissutaalersinnaasunut qanoq piareersarsinnaappat?

• Sooq aappariit kinguaassiuutitigut inuunerlukkumanatik imminnut illersortariaqarpat?

[Atuaqqissaarnermi apeqqutit]

[Qupp. 18-mi assiliartaq]

Kristumiut aappaqanngitsut Jehovamut kiffartornermi iliuuseqarneruleraangamik nuannaalertarput

[Qupp. 20-mi assiliartaq]

Aappartaarnerup kingorna sunik allannguisariaqartoqarsinnaava?