Kinaassusilik ataaseq ajussutsimut pisuua?

“DIAAVULUP assakkut eqippaanga,” taama oqarpoq FN-ip sakkutuuisa Rwandami naalagaanertaat. Taama oqarami 1994-imi inuiannik toqoraaneq akuliuffiginngisartik eqqarsaatigaa. Amiilaarnangaartunik taamanikkut pisunik takunnissimasoq alla ima oqarpoq: “Saatanimik suli piunnginneraasoqarpat, Rwandami ataatsimut iliviliarsuup eqqaani taama isumaqartoq naapikkusuppara.” Ilumoorpa naakkittaatsuliornerit taamaattut Diaavulup piliarigai?

Inuit amerlanerit isumaqanngillat nakuuserneq siunertaqanngitsoq naakkittaannerlu anersaap ajortup ersinngitsup piliarigai. Inuppassuit isumaqarput tamakku tamarmik pissuteqartut inuit inunnguuseralugu ajortulioqqajaanerannit. Allat isumaqarput inuit pisuut pissaanilissuillu silarsuaq aqussinnaajumallugu isertortumik aaqqissuussartik atorlugu ukiorpassuarni inunnik uukapaatitsisartut. Soorunami aamma naapertuilluanngissusermut naalliuutinullu pisartunut naalakkersuisut pisuutinneqartarput.

Illit qanoq isumaqarpit? Soormiuna nakuuserneq, ajussuseq, naalliuutit amiilaarnartullu sapinngisaq tamaat killilersimaarniarneqaraluartut ingasatsikkiartuinnartut? Soormiuna inuit mianersoqqussutigineqartuartut tusaanngitsuusaarlugit isumaarullutik piuneerussaaffissaminnut ingerlarsorsuataartullusooq? Tamakkununnga tamanut kinaassusilik ataaseq pisuua? Kinarpiaq silarsuarmi aqutsisuua? Tamatuma akissutaa immaqa tupaallaatigissavat.