Anersaaq illernartoq — Sooq suunera paatsiveerunneqartarpa?

ANERSAAQ illernartoq suua? Apeqqut nalunarpalunngilaq, paasiuminartumilli akissutissarsiuminaassinnaavoq. Pave Benedikt XVI Australiami inuppassuarnut ima oqarpoq: “Anersaamik illernartumik paasinnilluartoqarsinnaanngingajakkunarpoq.”

Apeqqut manna assigiinngitsorpassuarnik isumaqarfigineqarlunilu nalornissutigineqaqaaq: “Anersaaq illernartoq suua?” Apeqqummut tamatumunnga akissutigineqartartut ilaat imaapput:

• Tassa kinaassusilik piviusoq Kristusip ajoqersugaasa iluiniittoq.

• Tassa Guutip najuunnerata silarsuarmi ersiutaa.

• Ataasiullunilu pingasuussutsimi pingajuuvoq.

Anersaap illernartup suunera sooq taama paatsiveerunneqartartigaa? Paatsiveerunneqartalerpoq 300-kkunnili teologit ilaasa anersaaq illernartoq kinaassusiliunerarmassuk, anersaaq illernartoq Guutilu arlaatigut assigiissuteqarnerarlugit. Tamannali Biibilimi Kristusilluunniit ajoqersugaanit siullernit ajoqersuutigineqanngilaq. New Catholic Encyclopedia-mi ima nassuiarneqarpoq: “Testamentitoqqami Guutip anersaava kinaassusilittut allaatigineqanngilluinnarpoq . . . Guutip anersaava tassaaginnarpoq Guutip nukinga.” Imalu nangippoq: “Allakkat Testamentitaamiittut amerlanersaanni Guutip anersaava sutut, kinaassusilittuunngitsoq, allaatigineqarpoq; tamanna ingammik erserpoq Guutip anersaavata Guutillu nukingata assigiissinneqartarnerannit.”

Paasinarpoq inuit nukik kinaassusilittut takorlooruminaatsimmassuk. USA-mi qanittukkut misissuilluni apersuinermi qulaarneqarpoq inuit amerlanersaasa anersaaq illernartoq kinaassusilittut imaluunniit “uumassusilittut” isiginngikkaat. Taamatut eqqarsarneq eqqortuliornerua, imaluunniit teologit upperissavavut oqarmata “Anersaaq Illernartoq kinaassusiliusoq Ataatamit Ernermillu immikkoortoq”?

Tutsuiginartumik akissutissarsiumalluta Biibili misissortariaqarparput, tassanimi anersaaq illernartoq sukumiisumik allaatigineqarpoq. Apustili Paulusi ima allappoq: “Allakkat Illernartut . . . Guutimit anersaarfigineqartut tamarmik iluaqutaapput ajoqersuinermut, uppernarsaanermut.” — 2 Timotheusi 3:15, 16.

Sooq anersaamut illernartumut tunngatillugu ilumoortoq paasiniarneqartariaqarpa? Apeqqut tamanna pillugu ilumoortumik ilisimanninneq Guutimit ikiorneqarnissamut periarfissiisinnaammat. Illit ilaannikkut misigisarpit nammineq ingerlaannarnissamut naammattumik nukissaqarnak? Jiisusip ajoqersukkani ima neriorsorpai: “Qinugitsi, tunineqassaasi taava . . . Ilissimi . . . qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.” — Lukasi 11:9, 13.

Allaaserisani tulliuttuni Biibili iluaqutigalugu anersaaq illernartoq suunersoq paasiniassavarput. Aamma anersaap illernartup inuunitsinni qanoq iluaqutaasinnaanera misissussavarput.

[Qupp. 3-mi issuagaq]

Biibilimi paasitinneqarpugut anersaaq illernartoq suunersoq