3 Jiisusi pillugu sallusuissut paasiniaruk

“[Guutip] silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.” — Johannesi 3:16.

SOOQ TAMANNA SAPERNARPA? Inuit ilaasa isumaqalersikkusuppaatsit Jiisusi piusimanngisaannartoq. Allat inuusimanera akueraat, inuinnaanerarpaalli qangarsuarli toqoreersimasoq.

QANOQ ILILLUTIT PAASINIARSINNAAVIUK? Ajoqersukkap Nathanaelip pisimaneratut iliorit. * Ikinngutaata Filipip Missiarsi —  “Jiisusi Josefip ernera Nazaretimioq” — nanisimasorinerarpaa. Nathanaelip Filipip oqaasii upperiinnanngilai ima oqarami: “Sumik ajunngitsumik Nazaretimit pisoqarsinnaagami?” Taamaakkaluartorli Filipip ‘takuniaaqqusinera’ malillugu iliorpoq. (Johannesi 1:43-51) Aamma illit Jiisusi pillugu uppernarsaatinik misissuinerit nammineq iluaqutigissavat. Qanoq iliorsinnaavit?

Jiisusip piusimaneranut oqaluttuarisaanikkut uppernarsaatit misissukkit. Josefus Tacitusilu oqaluttuarisaanermik ilisimatuujupput nersugaasut ukiuni hundredelinni siullerni inuusut kristumiuunngitsullu. Taakkua Jiisusi Kristusi ilumut inuusimasutut eqqartorpaat. Tacitusip eqqaavaa Romamiut kaasariata Nerop ukiumi 64-imi Romami ikuallannermut kristumiut pisuutikkai. Ima allappoq: “Nerop inuit kristumiunik taaneqartartut, iliuuserisartakkatik pillugit Romamiunit uumissorneqangaartut, pisuutippai amiilaarnartumillu anniartillugit. Inuit taakku [kristumiut] Kristusi, Tiberiusip naalakkersuinerata nalaani Pontiusi-Pilatusimit toqutaasoq, ateqaatigaat.”

Jiisusip kristumiullu siulliit 100-kkunni 200-kkunnilu oqaluttuarisaanermik ilisimatuunit eqqaaneqartarnerat pillugu Encyclopædia Britannica-mi (2002) ima allassimasoqarpoq: “Paasissutissat imminnut attuumassuteqanngitsut tamakku itsaq allaat kristumiussutsimik akerlilersuisut Jiisusip ilumut inuusimaneranik qularutiginninnginnerannut uppernarsaataapput, siullermillu 1700-kkut naaneranni taavalu 1800-kkunni 1900-kkullu aallartinneranni atuakkiortunit arlalinnit pissutissaqavinngitsumik inuusimannginnerarneqarpoq.” 2002-mi The Wall Street Journal-imi allaaserisami pingaarnermi ima allassimavoq: “Ilisimatuut amerlanersaasa, guuteqannginneraasut ikittunnguit kisimik pinnatik, Jiisusi Nazaretimiu ilumut inuusimasutut akuerereerpaat.”

Jiisusip toqusunit makissimaneranut uppernarsaatit eqqarsaatigikkit. Jiisusi akerlilersortiminit  tigusarineqarmat qaniginerpaasaasa qimappaat, aamma ikinngutaata Petrusip qunulluni ilisarisimannginnerarpaa. (Matthæusi 26:55, 56, 69-75) Jiisusip tigusaanerata kingorna ajoqersugai siammarput. (Matthæusi 26:31) Tamatuma kingorna suliniartupilussuanngoriataarput. Petrusi Johannesilu Jiisusip toqutaanissaanik aaqqissuussisimasunut sapiillutik akerliliipput. Jiisusip ajoqersugai ima kajumissisimatigipput taassuma ajoqersuutaa Romamiut naalagaaffianni tamarmi siaruarterlugu, upperisamik akerlianik iliornissaminninngarnit toqorusunnerullutik.

Taamatut allanngorujussuartoqarneranut pissutaasut ilaat suua? Paulusi nassuiaavoq Jiisusi toqusunit makititaasimasoq “takuneqartorlu Kefasimit [Petrusimit] kingornalu taakkunannga aqqaneq-marluusunit”. Ima nangippoq: “Kiisalu qatanngutit 500-t qaangerlugit amerlassuseqartut ataatsikkut takuaat.” Paulusip tamakkua allammagit takunnittut amerlanersaat suli inuupput. (1 Korinthimiut 15:3-7) Qulartut immaqa takunnittut nalunaajaataasa ilaannik ataatsimik marlunnilluunniit itigartitseriaannaassagaluarput. (Lukasi 24:1-11) Takunnittulli 500-nit amerlanerusut nalunaajaataat Jiisusip toqusunit makissimaneranut uppernarsaataalluarput.

QANOQ ILUAQUTAASSAVA? Jiisusimut upperlutillu naalattut ajortiminnik isumakkeerfigineqarsinnaallutillu ilerasuuteqanngissinnaapput. (Markusi 2:5-12; 1 Timotheusi 1:19; 1 Petrusi 3:16-22) Taakku toqussagaluarpata Jiisusi neriorsuivoq “ullut naggatissaanni” toqusunit makitikkumaarlugit. — Johannesi 6:40.

Paasisaqarnerorusukkuit takukkit kapitali 4, “Hvem er Jesus Kristus?”, aamma kapitali 5, “Genløsningen — Guds største gave”, atuakkami Hvad er det Bibelen virkelig lærer?-imi *

[Quppernerup ataani ilanngussat]

[Qupp. 7-mi assiliartaq]

Nathanaelip pisimaneratut Jiisusi pillugu uppernarsaatit misissukkit