1, 2. Ilaqutariinni sallusuissummilu qanoq assigiinngitsunik tunuliaqutaqarpugut?

JEHOVAP ilaqutariittut aaqqissuussaaneq pilersippaa. (1 Mos 2:22-24) Ilaqutariinni pissuserineqartut pissutsillu atugarineqartut assigiinngitsuusinnaapput. Ilaat angajoqqaaqarlutik peroriartorsimapput. Allat nappaat ajutoornerluunniit pissutigalugu angajoqqaatik toqukkut annaasimavaat. Allallu allaat kikkut angajoqqaarinerlugit naluaat.

² Jehovap ilaqutariissortaanut pallorfiginnittunut ilaasut anersaakkut tunuliaqutaat aamma assigiinngitsuupput. Imaassinnaavoq najoqqutassianik Biibilimiittunik maleruaanissamik angajoqqaannit ilinniartinneqarlutit perorsarneqarsimasutit. (5 Mos 6:6, 7) Imaluunniit immaqa inuit tuusintillit Jehovap kiffaasa oqaluussinerat aqqutigalugu sallusuissummik ilinniarsimasut ilagaatsit. — Rom 10:13-15; 1 Tim 2:3, 4.

3. Tamatta suut assigiissutigaavut?

³ Assigiinngitsunik tunuliaqutaqaraluarluta tamatta assigiimmik kingornussaqarpugut. Adamip Guutimut naalanngitsuliornera pissutigalugu naammalluinnanngitsuullutalu ajortiliullutalu toqusarpugut. (Rom 5:12) Taamaakkaluartorli pallorfiginnittuugatta  ilumoortut Jehova ‘Ataatatsitut’ taasarsinnaavarput. Itsaq Guutip innuttamisut toqqagaasa Jehova ima taasinnaasimavaat: “Ataatarput.” (Es 64:7) Aamma Jiisusip qinnut Ataatarpooq ima aallarnerpaa: “Ataatarput qilanniittutit! Aqqit illernartitaali.” — Matt 6:9.

4, 5. Ataatatsinnik qilammiusumik asanninnerungaalerumalluta suut sammissavavut?

⁴ Ataatatta qilammiusup innuttani pisariaqartitaannik isumassorlugillu sernissortarpai. Tussiaasiortoq naapertorlugu Jehova pallorfiginnittoq ilumoortoq pillugu ima oqarpoq: “Attavigimmanga annaatissavara, sernigissavara atera ilisimammagu.” (Tuss 91:14) Jehovap innuttani akeraannit piuneerunneqaqqunagit asannilluni aniguisittarpai sernissorlugillu.

⁵ Ataatatsinnik qilammiusumik asanninnerungaalerumalluta Jehovap uagutsinnut (1) Pilersuisuunera, (2) Sernissuisuunera aamma (3) Ikinngutaanerpaanera sammissavavut. Taakkua samminerisigut Guutimut qanimut ikinngutaanerput eqqarsaatigeqqissaarlugulu Ataatatsitut qanoq ataqqisinnaagipput paasiniariartigu. Aamma Jehovap imminut qanilliartortunut pilluaqqussutigiumasai eqqarsaatigeriartigit. — Jaak 4:8.

6. Jehovap ‘ajunngitsunik tamanik’ tunisisartup tunissutaasa ilaat suua?

⁶ Ajoqersugaq Jaaku ima allappoq: “Tunissutit ajunngitsut naammalluinnartuusullu tamarmik pavannga qaamasut ataataannit ... pisarput.” (Jaak 1:17) Inuuneq Jehovamit tunissutisiaavoq nuannivissoq. (Tuss 36:10) Jehovap piumasai naapertorlugit inuugutta maannakkut pilluaqqussuterpassuaqarsinnaavugut silarsuassamilu nutaami naassaanngitsumik inuusinnaalluta. (Uss 10:22a; 2 Petr 3:13) Qanorli taamatut periarfissaqarsinnaavugut naammalluinnanngissuseq, ajorti toqulu Adamimit kingornussarigatsigit?

7. Guutimut attaveqarluarsinnaaqqulluta taassuma qanoq periarfissippaatigut?

⁷ Jehova assigiinngitsorpassuartigut Pilersuisuuvoq anneq. Ajunngisaarnini pisassarinngisaraluarput kajumississutigalugu aniguisittarpaatigut. Tamatta ajortiliuvugut Adamimillu naammalluinnanngissuseq kingornussaralugu. (Rom 3:23) Taamaakkaluartorli Jehova asanninnini pissutigalugu imminut attaveqarluarsinnaaqqulluta periarfissiivoq. Apustili Johannesi ima allappoq: “Matumuuna Guutip asanninnera akornatsinni saqqummersinneqarsimavoq: Guutip ernituani silarsuarmut aallartimmagu taassumuuna inooqqulluta. Asanninneq tassaanngilaq uagut Guuti asagatsigu, tassaavorli Guutip asammatigut erninilu aallartimmagu ajortivut pillugit pilliutitut saammaannartitsissutitut.” — 1 Joh 4:9, 10.

8, 9. Aaperaap Iisaallu nalaanni Jehova qanoq Pilersuisutut annertut ippa? (Allaaserisap aallaqqaataani assiliaq takuuk).

⁸ Ukiut 1900-t missaat Jiisusip inunngornerata siorna Aaperaat Jehovap inunnik naalattunik asannilluni naassaanngitsumik inuunissamik tunisiumaarneranik ersersitsisumik misigisaqarpoq. Hebræerinut allakkani kapitali 11-mi ima allassimasoqarpoq: “Uppernikkut Aaperaap misilinneqarami Iisaaq pilliutissatut sassaappaa ernituamilu pilliutiginissaanut piareerluni naak neriorsuutisereeraluarluni imalu oqarfigineqarsimalluni: ‘Iisaamuna kinguaavi illit kinguaannik taaneqartassasut.’ Aaperaammi naatsorsuutigisimavaa Guuti ima pissaaneqartigisoq allaat toqusunit makititsisinnaalluni, tassanngalu assersuutikkut kingumut pivaa.” (Hebr 11:17-19) Soorlu Aaperaap ernini, Iisaaq, pilliutigeriaannaagaa Jehovap inuiaat annaakkumallugit kajumilluni ernini, Jiisusi Kristusi, pilliutigaa. — Johannesi 3:16, 36 atuakkit.

⁹ Takorloorsinnaaviuk Iisaaq toqumit aniguisinneqarami qanoq misigisimanersoq?  Qularnanngitsumik Jehovap pilliummik taartaasumik, savamik angutiviamik, pilersitsinera qujamasuutigaa. (1 Mos 22:10-13) Aaperaap sumiiffik tamanna taaguuserpaa: “Naalagaq isigivoq”. Oqaatsit hebræerisuut uani atorneqartut aamma ima nutserneqarsinnaapput: Jehova pilersitsissaaq. — 1 Mos 22:14.

10, 11. Kikkut ‘saammaannartitaanerup piinik kiffartuummi’ siuttuuppat, qanorlu taamaaliorpat?

¹⁰ Jehovap Pilersuisutut annertut uagut pilluta iliuuserisai tamaasa eqqarsaatigeqqissaarutsigit paasilluarsinnaavarput Jiisusi pilliuteqarsimasuunngippat Guuti ikinngutigilersinnaanatigu. Paulusi ima allappoq: “Isumarput [tassaavoq] ataatsip tamaasa toqussutigimmagit taava tamarmik toqusimasut. Taassumalu tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.” — 2 Kor 5:14, 15.

¹¹ Kristumiut siulliit Guutimik asanninnertik taassumunngalu kiffartornerminnik ataqqinaataasumik qujamasuutiginninnertik kajumississutigalugit ‘saammaannartitaanerup piinik kiffartuut’ kajumillutik suliaraat. ‘Kiffartuut’ tamanna tassaavoq oqaluussineq. Tamannalu pissutigalugu inuit Guutimik eqqisseqateqalersinnaallutillu Guutimut ikinngutaalersinnaapput, kingusinnerusukkullu allaat qilammi Guutimut erniulersinnaapput. Ullumikkut Jehovap kiffai tanitat taamatut kiffartuuteqarput. Taakku Guuti Kristusilu sinnerlugit oqariartortitaapput. Oqaluussinerat pissutigalugu inuit “eqqortumik isumaqarfiginnittut” Jehovamit kajungilersinneqarsinnaallutillu taassumunnga kiffartulersinnaapput. — ApS 13:48, NW; 2 Korinthimiut 5:18-20 atuakkit; Joh 6:44.

12, 13. Jehovap uagutsinnut tunissutaanut tamanut qujamasunnerput qanoq ersersissinnaavarput?

¹² Savat allat Jehovap Pilersuisorsuunera qujamasuutigigamikku tanitat nutaarsiassaq nuannersoq pillugu oqaluusseqatigaat. Oqaluussigaangatta Guutimit tunissutisiaasoq nuannersoq alla, Biibili, atorluartarparput. (2 Tim 3:16, 17) Oqaluussinermi Biibilimik atuillaqqinnitsigut inuit allat naassaanngitsumik inuulernissaannut periarfissittarpavut. Jehovap aamma anersaaminik illernartumik — oqaluussinitsinni pisariaqartitatsinnik — tunisarpaatigut. (Zak 4:6; Luk 11:13) Jehovas Vidners Årbog-init erserpoq oqaluussinermi angusavut immikkorluinnaq ittuusut. Suliamut tamatumunnga Ataatatsinnik Pilersuisutsinnillu unnersiutiginnissutaasumut peqataanerput immikkut pisinnaatitaaffiuvoq!

¹³ Guutip uagutsinnik tunisingaarnera pissutigalugu imminut ima aperisariaqarpugut: ‘Jehovap uanga pillunga iliuuserisaanut qujamasunnera Jehovamut ersersinniarlugu sapinngisara tamaat oqaluussisarpunga? Qanoq oqaluussillaqqinnerulersinnaavunga?’ Guutip tunissutai tamaasa qujamasuutigigutsigit taassuma naalagaaffia inuunitsinni salliutissavarput. Taamaaliorutta Jehovap pisariaqartitatsinnik matussusiiuarnissani isumagiumaarpaa. (Matt 6:25-33) Jehova asannittuummat sapinngisarput tamaat uummataa nuannaartikkusupparput. — Uss 27:11.

14. Jehovap innuttaminik qanoq Aniguisitsisuua?

¹⁴ Tussiaasiortoq Daavi ima erinarsorpoq: “Ikiortarialiuvunga piitsuullungalu, isumagissavaanga Naalakkap. Illit tassa ikiortiga aniguisitsisigalu.” (Tuss 40:18) Jehovap arlaleriarluni innuttani ataatsimut isigalugit aniguisittarpai, ingammik taakkua akeqqaminnit ingasattumik malersorneqaraangata. Piffissani artornartorsiorfiusuni aalajaattuarsinnaaqqulluta Jehovap pisariaqartitatsinnik tunisiuarneranut qujamasungaarpugut!

15. Ataataasup asannittup qitornaminik qanoq annaassisimanera oqaluttuariuk.

¹⁵ Ataataasup asannittup qitornami pisariaqartitai isumagiinnarnagit aammali qitornani sernissortarpai. Navianartorsioraangata ingerlaannaq ikiorniartarpai. Qatanngutip angutip nukappiaraalluni ataatami annaassimagaani eqqaamavaa. Ataatanilu oqaluussereerlutik angerlaramik kuussuaq ikaartussaavaat. Ullaakkut siallerujussuarnera pissutigalugu kuussuaq qarsutsissimavoq. Ikaassagunikkulu ujarassuarmiit ujarassuarmut pisseqattaartariaqarput. Ataatani tunuminiittoq kuussuarmut isippoq marloriarlunilu morsulluni. Ataataata tuisigut tigullugu qaqipallammani nukappiaqqap annaanneqarnini qujamasuutigeqaa! Taamatuttaaq Ataatatta qilammiusup navianartunit silarsuarmi ajortumiittunit taassumalu naalagaaneranit, Saatanimit, sernissortarpaatigut. Jehova Sernissuisuuvoq pitsaanerpaaq. — Matt 6:13; 1 Joh 5:19.

16, 17. Israelikkut Amalekikkunnut sorsummata Jehovap taakku qanoq sernissorlugillu ikiorpai?

¹⁶ Ukiumi 1513-imi Kr.in.si. Jehovap innuttani asannilluni sernissorpai. Israelikkut inussiaataanermit aniguisereersimallugillu Immakkut Aappalaartukkut ikaarnerisigut sernissoreersimavai. Inoqajuitsukkut Qaqqamut Sinajimukartillutik Israelikkut Refidimimut apuupput.

¹⁷ Siulittuut Mosesimik allakkat siulliit 3:15-imiittoq pissutigalugu Saatani Israelikkut sernissorneqarpasinngitsut saassunnissaannut periarfissarsiorsuataarsimassaaq. Guutip innuttaanut akeraasut, Amalekikkut, atorlugit saassussivoq. (4 Mos 24:20) Jehovap Josva, Mosesi, Aroni Hurilu aqqutigalugit innuttani qanoq sernissornerai eqqarsaatigeriaruk. Josva sakkutuunilu Amalekikkunnut sorsuuttut Mosesi, Aroni Hurilu ungasinngitsumi qattunermiipput. Mosesip talini qullarsimatikkaangagit Israelikkut iluatsitsisarput. Mosesilu qasuleraangat  Aronip Hurillu taassuma talii najummisarpaat. Naggataatigut Jehovap ikiuineratigut sernissuineratigullu “Josvap Amalekikkut ... ajugaaffigai.” (2 Mos 17:8-13) Tamatuma kingorna Mosesi tassani pilliiviliorpoq imalu taallugu: “Naalagaq tassa katinngatissara.” — 2 Mosesi 17:14, 15 atuakkit.

18, 19. Ukiuni kingullerni Guutip kiffani qanoq sernissortarsimavai?

¹⁸ Jehovap imminut asannittut naalattullu sernissortarpai. Israelikkut Refidimimi Guutimik tatiginnissimanerattut Guutip akeqqatsinnit sernissorumaaraatigut qularutiginngilarput. Jehovap innuttani ataatsimut isigalugit arlaleriarluni sernissortarlugillu Diaavulup saassussinerinit illersortarpai. Assersuutigalugu qatanngutivut kristumiutut kalluunnaveersaarnertik pissutigalugu malersorneqartut Guutip arlaleriarluni sernissortarsimavai. Tamanna 1930-kkunni 1940-kkullu aallartinneranni nazistit nalaanni Tysklandimi nunanilu allani pisimavoq. Misigisalikkersaarutini Jehovas Vidners Årbog-inilu misigisani malersorneqarnerup nalaani Guutip sernissuinera pillugu atuartarnerput eqqarsaatiginneqqissaartarnerpullu Jehovamik tatiginninnerulissutigissavarput. — Tuss 91:2.

¹⁹ Jehovap peqatigiissortani Biibililersaarutillu aqqutigalugit asannittumik oqaaqqissaarisarnermigut sernissortarpaatigut. Tamanna ukiuni kingullerni qanoq iluaqutigisimaneripput eqqarsaatigeriaruk. Silarsuarmi kinguaassiuutitigut ileqqorlunneq, imigassamik atornerluineq pornografiimillu isiginnaartarneq nalinginnaaleraluttuinnarput. Jehovalli taassumunnga attaveqarnitsinnik innarliisinnaasunit illersorniarluta oqaaqqissaarutinik pingaarutilinnik immikkullu iluaqutigisinnaasatsinnik tunisimavaatigut. Assersuutigalugu internetikkut attaveqaqatigiiffiusartut atorlugit ikinngutipalaaqarneq pillugu Ataatatsinnit mianersoqquneqarsimavugut. * — 1 Kor 15:33.

20. Ilagiinni qanoq sernissorneqarlutalu siulersorneqartarpugut?

²⁰ ‘Naalakkamit ajoqersorneqarnerput’ qanoq ersersissinnaavarput? Oqaaqqissaarutaanik maleruaaqqissaarnikkut. (Es 54:13) Ilagiit toqqissisimaffiupput, tassanilu sernissorneqartarpugut siulersorneqarlutalu, aamma utoqqaanertanit ikiorneqartarlutalu Biibili iluaqutigalugu siunnersorneqartarpugut. (Gal 6:1) Jehova ‘inuit tunissutaasut’ taakku asannittumik isumassorniarluta atortarpai. (Ef 4:7, 8, NW) Utoqqaanertanit siunnersorneqarutta qanoq pissaagut? Kajumilluta naalattariaqarpavut. Taamaalioruttalu Jehovamit pilluaqquneqarumaarpugut. — Hebr 13:17.

21. (a) Sunissarput aalajangiusimavarput? (b) Allaaserisami tulliuttumi suna sammineqassava?

²¹ Taamaattumik anersaap illernartup uagutsinnik ikiuinissaa tutsuigalugulu Ataatatta qilammiusup siulersuinera akuerisigu. Aamma Jiisusip inuuneranik eqqarsaatiginneqqissaartariaqarpugut taassumalu maligassiaa asseqanngilluinnartoq malinniarlugu sapinngisarput tamaat iliuuseqartariaqarpugut. Taanna akissarsiaqangaarpoq ‘toqumut allaat naalakkami’. (Fil 2:5-11) Uaguttaaq pilluaqquneqarumaarpugut uummatikkut iluunngarluta Jehova tatigigutsigu. (Uss 3:5, 6) Jehova Pilersuisorput allanillu tamanit pitsaanerusumik uagutsinnik Sernissuisorput tamatigut tatigitigu. Taanna kiffartorfigisinnaagatsigu immikkut pisinnaatitaaffiuvoq nuannaarutaangaartoq. Jehova qanoq ikinngutiginerpaavarput? Apeqqutip tamatuma allaaserisami tulliuttumi sammineratigut Jehovamik asanninnerulissaagut.