1, 2. Ukiumi 33-mi Jiisusip ajoqersukkani poorskisioqatigereeramigit sua?

UKIUMI 33-mi nisanip ulluisa 14-ianni unnuaavoq. Jiisusi taassumalu ikinngutigilluagai poorskisioqatigeeqqammerput, tamatumanilu Guutip Israelikkunnik qanoq Egyptenimit aniguisitsisimaneranik eqqaasinneqarput. Jiisusilli ajoqersugai aalajaatsut suli annerungaartumik aniguisinneqartussaapput. Jiisusip akeqqaminit toqutaanissaanut aqaguppoq. Inuunerminik naammalluinnartumik pilliutiginninneratigut inuit tamarmik ajortimit toqumillu aniguisinneqarsinnaanngorput. — Hebr 9:12-14.

² Guutip asannittumik tunissutaa tamanna puiunnginniassagatsigu Jiisusi poorskisiorneq taarserlugu ukiumoortumik nalliuttorsiornermik nutaamik pilersitsivoq. Jiisusip timiusaq seernarsaateqanngitsoq tigoriarlugu aggorpaa ajoqersukkaminullu aalajaatsunut aqqanilinnut tunniullugu ima oqarfigai: “Tassa timiga ilissi pillusi tunniunneqartoq. Taamaaliortaritsi uanga eqqaaniarlunga!” Aamma ermuseq viinnimik imalik ajoqersukkaminut tunniuppaa imalu oqarluni: “Ermuseq manna tassa angerusisaaq uanga aakkut pillusi kuineqartukkut.” — Luk 22:19, 20.

3. (a) Jiisusip toqunerata kingorna qanoq annertuumik allannguisoqarpa? (b) Jiisusip qinnutaanik misissuinitsinni apeqqutit suut eqqarsaatigissavavut?

³ Guutip Israelikkullu Inatsisit tunngavigalugit angerusaat atuukkunnaangajalerpoq. Jiisusip ajoqersugaasa tanitat Jehovallu angerusaat nutaaq atuutilertussaavoq. Jiisusip ajoqersukkami atugarissaarnissaat pingaartilluinnarpaa. Israelikkut Guutimik pallorfiginninnerminni ataasioqatigiinnginnamik Guutip aqqa kanngunarsarpaat. (Joh 7:45-49; ApS 23:6-9) Jiisusip ajoqersukkami  Guutip aqqanik ataqqinarsisitsiniassagamik ataasioqatigiillutik suleqatigiinnissaat kissaatigaa. Taamaattumik Jiisusi qanoq iliorpa? Killitsinnarnerpaamik qinulluni Ataataminut ikioqquvoq, qinnummillu tamatuminnga atuarsinnaanerput immikkut pisinnaatitaaffigaarput. (Allaaserisap aallaqqaataani assiliaq takuuk). Qinnut tamanna Johannesi kapitali 17-imi allassimavoq. Qinnummik tamatuminnga misissuinitsinni apeqqutit uku eqqarsaatigikkit: “Jiisusip qinnutaa Guutimit akineqarpa? Qinnummut tamatumunnga naapertuuttumik inuuvunga?”

4, 5. (a) Jiisusip qinunermini aallarniutaa qanoq ilinniarfigaarput? (b) Jiisusip piumasani pillugu qinunera Jehovap qanoq akivaa?

⁴ Jiisusip ajoqersukkani unnuarsuarmut ilisimassusermik naleqangaartumik Guutimeersumik ilinniartippai. Jiisusip isini qilammut aarlortillugit ima qinuvoq: “Ataataq, maanna piffissaq nalliuppoq. Ernerit naalannarsisiguk Ernermit naalannarsisitaaqqullutit, soorlu taanna inunnut tamanut naalaganngortikkit taassumunnga tunniussatit tamaasa inuunermik naassaanngitsumik tuneqqullugit.” Imalu nangippoq: “Nunarsuarmi naalannarsisippagit suliassaq uannut suliareqqusat naammassigakku. Ataataq, maanna ilinni naalannarsisinnga, naalannassusermik silarsuaq pinngunngikkallarmalli uanga ilinni pigisannik.” — Joh 17:1-5.

⁵ Jiisusip qinunermini pingaarnerpaatitani aallarniutigai. Ataatami naalannarsisinneqarnissaa pingaarnerutillugu qinuvoq. Jiisusi qinunermut najoqqutassiamini aamma taamatut aallarniivoq. (Luk 11:2) Taava ajoqersukkami pisariaqartitaat, ‘inuunermik naassaanngitsumik tunineqarnissaat, pillugu qinuvoq. Tamatuma kingorna piumasani, qilak nunarsuarlu pinngunngikkallarmata naalannassuseqarnermisut Ataataminik peqateqalernissani, pillugu qinuvoq. Jehovap ernermi qinnutaa tusarpaa piumasaalu sinnerlugit tunillugu. Guutip ‘atermik inngilit aqqinit annerungaartumik’ tunivaa. — Hebr 1:4.

6. Ajoqersukkat naassaanngitsumik inuuneqalerumallutik susariaqarpat, taamalu iliorsimanerat qanoq nalunngilarput?

⁶ Jiisusip qinunermini aamma eqqaavaa naassaanngitsumik inuuneqalerumalluta susariaqartugut. (Johannesi 17:3 atuaruk). Jiisusi oqarpoq Guutimik Kristusimillu ‘ilisimannilertariaqartugut’. Qanoq taamaaliorsinnaavugut? Siullertut, Jehova taassumalu ernera sapinngisatsinnik ilisimalerniartuartariaqarpavut. Aappassaattut, ilikkakkavut malillugit inuusariaqarpugut. Jiisusip qinunermini taakku marluk eqqaasai ajoqersukkat iliuuserereersimavaat: “[Oqaatsit] uannut tunniussatit taakkununnga tunniuppakka, ilassivaallu.” (Joh 17:8) Naassaanngitsumilli inuulerumallutik Guutip oqaasianik eqqarsaatiginneqqissaartariaqarlutillu ilikkakkatik malillugit inuusariaqarput. Ajoqersukkat nunarsuarmi inuunerminni taama iliortuarpat? Aap, taakku aqqi Jerusalemip nutaap ujaqqani aqqaneq-marlunni tunngaviini allassimammata tamanna nalunngilarput. — Saqq 21:14.

7. Guutimik “ilisimanninneq” qanoq paasisariaqarpa, aamma sooq tamanna pingaaruteqarpa?

⁷ Naassaanngitsumik inuuneqalerusukkutta Guutimik ‘ilisimannittariaqarpugut’. Tamanna qanoq paasisariaqarami? Oqaaseq grækerisooq matumani ‘ilisimanninnermik’ nutserneqarsimasoq aamma ‘ilisimannilertuarniarnermik’ nutserneqarsinnaavoq. Taamaattumik Guutimik “ilisimanninneq” taassuminnga ilisimannilerniartuarnertut paasisariaqarpoq. Taassumali pissusiinik siunertaanillu ilisimanninnermit annerusumik iliuuseqartoqartariaqarpoq. Asangaartariaqarlugulu ikinngutigilluartariaqarparput.  Aamma qatanngutitsinnut asannittuliortariaqarpugut. Biibilimi allassimavoq ‘asanninngitsup Guuti ilisimanngikkaa’. (1 Joh 4:8) Guutimut naalanneq taassuminnga ilisimanninnermut ilaavoq. (1 Johannesi 2:3-5 atuakkit). Jehovamik ilisimannittutut naatsorsuunneqarneq immikkut pisinnaatitaaffigaarput angisooq! Taassuminngali ikinnguteqarnitsinnik naleqangaartumik Judasi Iskariotitut annaasaqannginnissarput mianersuutigisariaqarparput. Taamaattumik Jehovamik ikinnguteqarnitsinnik nakussatsitsinissarput tamaviaarutigisigu. Taama iliorutta Jehovap tunissummik pisassarinngisaraluatsinnik, inuunermik naassaanngitsumik, tunissavaatigut. — Matt 24:13.

8, 9. Jiisusip nunarsuarmiinnermini suna pingaarnerpaatittuarpaa, ajoqersuullu suna uumigisimassagunarpaa?

⁸ Jiisusip qinnutaa Johannesi kapitali 17-imi allassimasoq atuareerlugu paasissavarput Jiisusip ajoqersukkaminut asanningaaginnarani aamma uagutsinnut asanningaarnera. (Joh 17:20) Annaanneqarnissarpulli Jiisusimut pingaarnerpaanngilaq. Taassuma Ataatami aqqanik naalannarsisitsinissaq nunarsuarmiinnermini pingaarnerpaatittuarpaa. Assersuutigalugu Jiisusip sooq nunarsuarmukarsimanini nassuiaramiuk Esajap allagaaneersut uku atuarpai: “Naalakkap [Jehovap, NW] anersaavata tikippaanga Naalakkap [Jehovap, NW] tanitarimmanga. Aallartippaanga nalunaarut nuannersoq piitsunut tusarliuteqqullugu.” Qularinngissinnaavarput Jiisusip allassimaffik taanna atuaramiuk Guutip aqqanik erseqqissumik oqaatiginnissimanissaa. — Luk 4:16-21.

⁹ Jiisusip nunarsuarmukarnissaa sioqquterujussuarlugu juutit upperisarsiornikkut siuttuisa inuit Guutip aqqanik atuisannginnissaannik ajoqersortalerpaat. Takorlooruk Jiisusip ileqqutoqaq tamanna qanoq uumigitigisimassagaa. Upperisarsiornikkut siuttut taakku ima oqarfigai: “Uffa Ataatama aqqani tikiuttunga ilissi ilassinngilassinga; allali nammineq atermini tikiuppat ilassiumassagaluarparsi.” (Joh 5:43) Jiisusip toqunissani ullualuit sioqqullugit qinunermini pingaarnerpaatitani ima eqqaavaa: “Ataataq, aqqit naalannarsisiguk!” (Joh 12:28) Qinnummilu  sammisatsinni aamma ersarippoq Jiisusip Ataatami aqqanik naalannarsisitsinissani pingaarnerpaatikkaa.

10, 11. (a) Jiisusip Ataatami aqqa qanoq ilisimaneqalersippaa? (b) Sooq Jiisusip ajoqersugai Jehovap aqqanik ilisimaneqalersitsippat?

¹⁰ Jiisusi ima qinuvoq: “Aqqit saqqummiuppara inunnut silarsuarmit uannut tunniussannut. Pigisatit taakku illit uannut tunniuppatit, taakkualu oqaatsitit aalajangiuppaat.” (Joh 17:6) Imalu nangippoq: “Uanga silarsuarmiikkunnaarpunga, taakkuli silarsuarmiipput, uangalu ilinnut pissaanga. Ataataq illernartutit, illit atit uannut tunniussat pillugu taakku nakkutigikkit uatsitut ataasioqatigeeqqullugit.”— Joh 17:11, NW.

¹¹ Jiisusip Ataatami aqqa ajoqersukkaminut ‘saqqummiukkamiuk’, imaluunniit ilisimaneqalersikkamiuk, Jehovap aqqa atuinnanngilaa. Jiisusip ajoqersukkani Jehovap kinaaneranik paasinninnissaannut ikiorpai. Guutip pissusaanik nuannersunik uagutsinnillu asannittumik pinnittarneranik ilinniartippai. (2 Mos 34:5-7) Maanna Jiisusip qilammi kunngiunermini ajoqersukkani Jehovap aqqanik ilisimalersitsiniarlutik nunarsuaq tamakkerlugu suliniarneranni ikiorpai. Tamatumani suna siunertarineqarpa? Pissutsit aaqqissuussaanerata ajortup matuma naggatissaa nalliutsinnagu sapinngisamik inuit amerlanerpaat Jehovamik ilisimannilernissaannut ikiuinissaq. Piffissanngorpallu nalunaajaasuni ilumoortut aniguisissavai, Jehovallu aqqa qutsinnerussaartoq kikkunnit tamanit ilisimaneqalissaaq! — Ez 36:23.

12. Suliaq Jiisusip aallartitaa naammassiumallugu suut pingasut iliuuserisariaqarpavut?

¹² Jiisusip ajoqersukkani peqquai suliamik aallartitaminik naammassinneqqullugit. Ima qinuvoq: “Soorlu illit uanga silarsuarmut aallartikkimma, uangattaaq taakku silarsuarmut aallartippakka.” Jiisusilli nalunngilaa suliamik tamatuminnga suliarinninnissaminnut ikiorneqartariaqartut. Jiisusip ajoqersukkani najortillugit sanngiissutiminnik ajugaaffiginninnissaannut tamaviaarluni ikiorpai. Qinunerminilu Jehova qinnuigaa ajoqersukkani pingaarutilinnik pingasunik iliuuseqarnissaannut ikioqqullugit. Siullertut, ajoqersukkami Saatanip silarsuaanut ilaannginnissaat pillugu qinuvoq. Aappassaattut, ajoqersukkami Guutip oqaasianik maleruaanissaat illernarsisinneqarnissaallu pillugit qinuvoq. Pingajussaattut, nammineq ataatanilu ataasioqatigiinnermissut ajoqersukkami ataasioqatigiinnissaat pillugu Jiisusi kimigiiserpoq. Tamatta imminut ima aperisariaqarpugut: ‘Jiisusip qinunermini pingasut eqqaasai iliuuserisarpakka?’ Taakku eqqaaneqartut pingasut ajoqersukkami iliuuserippatigit tusarliussaat inuppassuarnit ilassineqarumaarnera Jiisusip qularinngilluinnarpaa. — Johannesi 17:15-21 atuakkit.

13. Jiisusip ukiuni hundredeni siullerni qinnutaa Jehovamit qanoq akineqarpa?

¹³ Apustilit Suliaat atuaqqissaarutsigu Jiisusip qinnutaa Jehovamit akineqartoq paasissavarput. Ukiuni hundredeni siullerni juutit juutiunngitsullu, pisuut piitsullu, inussiat inussiaatillillu kristumiut ilagiivinut ilaammata avissaartuuttoqaleriaannaavoq. Ataasioqatigiilluinnarneralli pissutigalugu Paulusip timimut ataasiakkaanit assigiinngitsunit katitigaasumut Jiisusimillu niaqulimmut assersuuppai. (Ef 4:15, 16) Jehovap anersaava illernartoq pissaaneqaqisoq taamaallaat pissutigalugu Saatanip silarsuaani avissaartuuffiusumi taamatut ataasioqatigiittoqarsinnaasimavoq. — 1 Kor 3:5-7.

14. Jiisusip qinnutaa nalitsinni qanoq akineqarpa?

¹⁴ Ajoraluartumik apustilit toqunerisa kingorna ataasioqatigiittoqarunnaarpoq. Siulittuutigineqartutulli tunussinersuaqarpoq, tamatumalu kingunerisaanik kristumiut immikkoortunut avissaartuutilerput. (ApS 20:29, 30) 1919-imili Jiisusip kristumiut tanitat upperisarsiornermit eqqunngitsumit  aniguisillugillu ‘ataasiussutsip qilerutaani naammalluinnartumi’ katersorpai. (Kol 3:14, NW) Ataasiussuseqarlutik oqaluussinerat qanoq kinguneqarpa? Inuit 7 millioninit amerlanerusut “inuiaqatigiinnit naggueqatigiinnillu inuiannillu immikkullu oqaasilinnit tamanit pisut” massakkut tanitallu ataasiussuseqarlutik Jehovamik pallorfiginnipput. (Saqq 7:9; Joh 10:16) Tamanna akissutaavoq tupinnartoq Jehovameersoq Jiisusip ima qinnutaanut: “Ataasioqatigiilluinnaqqullugit, silarsuarmut paaseqqullugu illit aallartikkimma taakkulu asagitit, soorlu uanga asagimma.” — Joh 17:23.

15. Jiisusi ajoqersukkani tanitat pillugit qanoq immikkut ittumik qinnuteqarpa?

¹⁵ Nisanip 14-ianni unnukkiartulernerani Jiisusip apustilini naalagaaffimmini taakkuninnga naalakkersueqatiginninnissani pillugu angerfigeqatiginerisigut ‘naalannassusermik’, imaluunniit ataqqinaammik, tunivai. (Joh 17:22; Luk 22:28-30) Taamaattumik Jiisusi tanitanngortussat pillugit ima qinuvoq: “Ataataq, uannut tunniussatit uanneeqquakka najukkanni, taakkununnga takoqqullugu naalannassusera uannut tunniussat, asagammami silarsuaq tunngavilerneqanngikkallarmalli.” (Joh 17:24) Savanut allanut ilaasut tanitat akissarsinissaat pillugu usorunnatik nuannaarput. Tamanna kristumiut ilumoortut ataasioqatigiilluinnarnerannut aamma uppernarsaataavoq.

16, 17. (a) Jiisusip qinunermi naggataatungaani qanoq iliortuarniarluni eqqaavaa? (b) Qanoq iliortuartariaqarpugut?

¹⁶ Silarsuarmiut amerlanersaat aalajangernikuupput Jehovap ataasioqatigiillutik namminerminik ilisimannilluartunik innuttaqarneranik upperinninniaratik. Upperisarsiornikkut siuttut sallullutik ajoqersuisarnerat pissutigalugu tamanna ullumikkut Jiisusillu nalaani nalinginnaavoq. Taamaattumik Jiisusip qinnutini ima asannittumik naggaserpaa: “Ataataq naapertuilluartutit, silarsuup naluaatit, uangali ilisimavakkit, taakkualu nalujunnaarpaat illit aallartikkimma; aqqillu taakkununnga ilisimalersippara ilisimalersikkumaarlugulu, asannissuseq uannut asannissuserisat taakkunaneeqqullugu uangalu taakkunaneeqqullunga [taakkulu ataasioqatigisinnaaqqullugit, NW].” — Joh 17:25, 26.

¹⁷ Jiisusip Ataatami aqqa ilisimaneqalersilluinnarpaa. Maannalu ilagiinnut niaquusutut uagut taassuma Ataataata aqqanik siunertaanillu ilisimalersitsiniarluta suliniarnitsinni ikiortuarpaatigut. Jiisusip siulersuineranik maleruaallutalu aallussilluarluta oqaluussillutalu ajoqersuganngortitsiortorta. (Matt 28:19, 20; ApS 10:42) Guutip innuttaatut ataasioqatigiinnissarput aamma tamaviaarutigisariaqarparput. Taama iliorutta Jiisusip qinnutaanut naapertuuttumik inuussaagut. Tamanna Jehovap aqqanik naalannarsisitsinermik naassaanngitsumillu inuuneqalernermik kinguneqassaaq.