„Oqaaqqissaarutitit nuannaraakka“

„Siornatigut allagaasut tamarmik allassimapput uatsinnut ilinniutissaallutik.“ — ROMAMIUT 15:4.

1. Jehovap qanoq ililluni oqaaqqissaartarpaatigut, aamma sooq oqaaqqissaarneqarnissarput pisariaqartipparput?

JEHOVAP kiffani oqaaqqissaaqattaartarpai ulluni ajornartorsiorfiusuni makkunani tatineqarnermik aniguinissaannut ikiorniarlugit. Oqaaqqissaarutit ilaat siumortarpavut nammineq Biibilimik atuarnitsinni, ilaallu kristumiutut ataatsimiinnerni saqqummiussisut akisullu tusarnaaraangatsigit eqqaaqqittarpavut. Pisuni tamakkunani atuakkavut tusakkavulluunniit nalunngereertarpavut. Qularnanngitsumik paasissutissat taakkua assigisaallu misissoreerpavut. Puioqqajaasarattali Jehovap siunertaanik, inatsisaanik ilinniartitsissutaanillu eqqaasinneqartuartarnissarput pisariaqartipparput. Guutip oqaaqqissaarisaqattaartarnera qujamasuutigisariaqarparput. Taakkua kajumissaatigisarpavut, Guutip iluarisaanik inooriaaseqalernissamut kajumississutigisatta eqqaamanissaanut iluaqutigisaratsigit. Taamaammat tussiaasiortup Jehova ima erinarsorfigaa: „Oqaaqqissaarutitit nuannaraakka.“ — Tussiaat 119:24, NV.

2, 3. (a) Sooq Jehovap inuit Biibilimi eqqaaneqartut inuunerannik oqaluttuat ullumikkumut tammatsaalineqartippai? (b) Allaaserisami matumani Biibilimi oqaluttuat suut misissussavavut?

² Guutip oqaasia ukiut hundredelippassuit matuma siorna allanneqarsimagaluarluni sunniisinnaassuseqarluarpoq. (Hebræerit 4:12) Inuit Biibilimi eqqaaneqartut inuunerat pillugu pisimasuinnik oqaluttuanik imaqarpoq. Ileqqut isummallu Biibilip nalaaniilli allanngornikupilussuugaluartut, ullumikkut ajornartorsiutigisartakkavut inuit taamanikkut ajornartorsiutigisartagaannut assingupput. Oqaluttuat ilarpassui, uagut iluaqutissatsinnut Biibilimi tammatsaalineqarsimasut, inuit erloqinartunik atugaqaraluarlutik Jehovamik asannittut aalajaallutillu taassumunnga kiffartortut pillugit oqaluttuanik killitsinnartunik imaqarput. Oqaluttuani allani saqqummersinneqarpoq ileqqut suut Guutip uumiginerai. Jehovap inuit assigiinngitsut inuunerannik oqaluttuat, nuannersut nuanniitsullu, uagutsinnut eqqaasitsissutissatut Biibilimi allanneqartippai. Soorlumi apustili Paulusi allattoq: „Siornatigut allagaasut tamarmik allassimapput uatsinnut ilinniutissaallutik, nikallujuilluta Allakkallu tunissutaat tuppallersaatigalugit neriuuterput aalajangiussinnaaqqullugu.“ — Romamiut 15:4.

³ Biibilimi oqaluttuat pingasut ukua sammeriartigit: Daavip Saulimut iliorfiginneriaasianik oqaluttuaq, Ananiamik Safiramillu oqaluttuaq, aammalu Josefip Potifarip nulianut qanoq periarneranik oqaluttuaq. Oqaluttuat tamaasa naleqangaartumik ilinniarfigisinnaavavut.

Pissutsini qanorluunniit ikkaluartuni Guutimik ilumoorfiginninneq

4, 5. (a) Kunngi Saulip Daavillu akornanni pissutsit qanoq ippat? (b) Daavi Saulip uumissuineranut qanoq periarpa?

⁴ Paasinarsivoq kunngi Sauli Jehovamut ilumuunngitsuusoq taassumalu innuttaanut naalakkersuinissamut qinngaqqunnartoq. Taamaammat Guutip taanna iluarinngilaa, pruffiitilu Samueli peqquaa Daavi Israelimi kunnginngortussatut tanissagaa. Daavi sorsuttartutut pikkorilluinnarlunilu sapiitsupilussuunerminik ersersitsimmat Israelikkullu unnersiutigimmassuk, Saulip taanna unammillertimisut isigilerpaa. Saulip arlaleriarluni Daavi toqoriaraluarpaa, Daavili aniguiuaannarpoq Jehovap najormani. — 1 Samueli 18:6-12, 25; 19:10, 11.

⁵ Daavi ukiorpassuarni qimaasutut inuusariaqarsimavoq. Saulimik toqunitsinissamut periarfissaqalermat Daavip angutitaasa Daavi  kajumissaarpaat taanna toqoqqullugu. Taakkua oqarput akerartortini Jehovap assaminut tunniussimagaa. Daavilli tamanna itigartippaa. Taamatut periarneranut pissutaavoq Jehovamik ilumoorfiginninnera Saulillu Guutip innuttaanut tanitatut kunngiuneranik ataqqinninnera. Jehovap Sauli Israelikkunnut kunnginngortissimannginnerpaa? Aamma Jehovap piffissanngorpat taanna peersikkumaarpaa. Daavi eqqarsarluariarluni isummerpoq tamatuma nammineq iliuuseqarfiginissaanut pisinnaatitaanani. Daavi Sauli saammarsarniarlugu sapinngisaminik tamanik ilioreerluni ima oqarpoq: „[Jehovap] nammineq pillarliuk toquffissaa nalliutitillugu imaluunniit sorsunnermi toqutaatillugu. [Jehovalli] tanitami uannit ajoquserneqarnissaa pinngitsoortikkiliuk [Jehova ataqqigakku Jehovap tanitaa silugunnavianngivippara, NV].“ — 1 Samueli 24:4-16; 26:7-20.

6. Sooq Daavimik Saulimillu oqaluttuaq uatsinnut soqutiginaateqarpa?

⁶ Oqaluttuaq taanna pingaarutilimmik ilinniarfigisinnaavarput. Ilagiinni kristumiuni sooq ajornartorsiuteqalertarnersoq eqqarsaatiginikuuiuk? Immaqa ilagiinniittut ilaat assuarnartumik pissusilersorpoq. Imaassinnaavoq sualuttumik ajortuliorsimanngitsoq, pissusilersornerali eqqissiunnaarutigaat. Qanoq iliorsinnaavit? Taassuminnga kristumiutut isumassuigavit Jehovamillu ilumoorfiginnikkavit, immaqa inussiarnersumik oqaloqatiginiarlugu aalajangerputit ikiornissaa siunertaralugu. Ajornartorsiummi aaqqinneqanngippat? Ingasaassinatit sapinngisannik iliuuseqareerlutit immaqa aalajangerumassaatit tamanna Jehovamut isumagisassanngortinniarlugu. Daavi taamaaliorpoq.

7. Naapertuilluanngitsumik paqumisuttumilluunniit pineqaraangatta Daavi qanoq ilaarsinnaavarput?

⁷ Aamma imaassinnaavoq innuttaaqatigiinni naapertuilluannginneq upperisarsiornikkulluunniit paqumisunneq pissutigalugu ajornartorsiortutit. Maannakkut ajornartorsiutit immaqa immannguaannaq iliuuseqarfigisinnaavatit iliuuseqarfigisinnaanngilluinnarlugilluunniit. Pissutsit taamaattut naammagalugit atornissaat artornartupilussuusinnaavoq, Daavilli naapertuilluanngitsumik pineqarnerminut periarnera ilinniarfigisinnaavarput. Tussiaatit allagai Saulip assaanit annaanneqarnissamik Guutimut qamannga pisumik qinnutaanik issuaanerinnaanngillat killitsinnartut; aammali taassuma Jehovamik ilumoorfiginninneranik taassumalu aqqanik illernarsisitserusunneranik ersersitsipput. (Tussiaat 18:2-7, 26-28, 31-33, 49-51; 57:2-12) Daavi Saulimit ukiorpassuarni naapertuilluanngitsumik pineqartuaraluarluni Jehovamik ilumoorfiginnittuarpoq. Uaguttaaq qanorluunniit naapertuilluanngitsumik pineqaraluarutta aamma allat qanorluunniit ilioraluarpata Jehovamut peqatigiissortaanullu aalajaattuartariaqarpugut. Tuppallersaataasinnaavoq nalunagu pissutsit atukkavut Jehovap ilisimalluinnarai. — Tussiaat 86:2.

8. Jehovap Nalunaajaasui Mocambiquemiittut Jehovamik ilumoorfiginninnertik misilinneqarmat qanoq pippat?

⁸ Ullumikkuttaaq kristumiut Mocambiquemiittut misilinneqarnermik nalaani ilumoorfiginnillutik Jehovamut attaveqartuarnermikkut maligassaalluarput. 1984-imi illoqarfeeqqat taakkua najugaat isertortukkut akiuunnianut  ilaasortaasunit sakkulisartunit saassunneqaqattaarput, taakkulu ujajaallutillu illut ikuallattarpaat, toqutsisarlutillu. Kristumiut taakkua imminnut illersorniarlutik iliuuseqarsinnaanngingajavipput. Pikitsitsisut tamaani innuttaasunik pinngitsaaliillutik sakkutuunngortitseriaraluarput imaluunniit pinngitsaaliillutik allatigut isertortukkut akiuunnianik tapersersuisitseriaraluarlutik. Jehovap Nalunaajaasuisa tamanna kristumiutut kalluunnaveersaartuunerminnut naapertuutinngitsutut isigaat, taamaammallu piumasaqaatigineqartoq naammassiumanngilaat. Tamanna akiuiniaqatigiit kamaatigeqaat. Jehovap Nalunaajaasui 30-t piffissami eqqissiviilliorfiusumi tassani toqutaapput, toqunneqarnissamilluunniilli sioorasaarneqarnerit Guutip innuttaanik ilumoorfiginnikkunnaarsitsisinnaasimanngillat. * Daavitut naapertuilluannginnerit naammagalugit atorpaat, naggataatigullu ajugaapput.

Mianersoqqussut

9, 10. (a) Biibilimi oqaluttuat ilaat qanoq ilinniutigisinnaavavut? (b) Ananiap Safirallu iliuuserisaannut tunngatillugu suna ajorami?

⁹ Inuit Biibilimi eqqaaneqartut ilaat pissuserinaveersaartariaqakkatsinnik pissuseqarput, taakkualu uagutsinnut mianersoqqussutaapput. Aap, Biibilimi inuit, Guutimut kiffaasut allaat, eqqunngitsuliorsimasut tamatumalu kingunipiluinik atugaqartariaqarsimasut pillugit oqaluttuarpassuaqarpoq. (1 Korinthimiut 10:11) Oqaluttuat taakkua ilaat, Ananiamik Safiramillu, aappariinnik Jerusalemimi kristumiut siulliit ilagiivineersunik, oqaluttuaq misissoriartigu.

¹⁰ Ukiumi 33-mi piinsip ulluata kingorna uppertunngorlaat apustilinik peqateqarneq iluaqutiginiarlugu Jerusalemimiiginnarsimasut nunap piisigut ikiorneqarnissamik pisariaqartitsilerput. Ilagiinniittut ilaannik ajorsaateqartoqannginnissaa qulakkeerniarlugu pigisaminnik tuniniaapput. (Apustilit Suliaat 2:41-45) Ananiap Safirallu nunaatimik ilaat tunivaat aningaasat isertitamik ilaannaat apustilinut tunniullugit, isertitatilli tamaasa tunissutiginerarpaat. Soorunalimi Ananiap Safirallu namminneq aalajangertussaavaat qanoq tunisitigissanerlutik imaluunniit qanoq tunisinikitisigissanerlutik, pissutiginiagaalli ajorpoq aamma peqquserluttuliorput. Iluareqqusaarput tunniussatillu tunniussaminnit amerlanerusutut isikkoqarterusullugit. Apustili Petrusi anersaamit illernartumit isumassarsisinneqarpoq taakkua peqqusersusaarnerannik pisuusaarnerannillu qulaarinissamut, Jehovallu toqutippai. — Apustilit Suliaat 5:1-10.

11, 12. (a) Unneqqarissuunissap pingaaruteqassusia Biibilimi qanoq erseqqissarneqarpa? (b) Unneqqarissuuneq qanoq iluaqutissartaqarpa?

¹¹ Qaquguluunniit iluareqqusaarniarluta ilumoortumik killormut saatitsinissamut ussernartorsiussagaluarutta, Ananiamik Safiramillu  oqaluttuaq sakkortuumik mianersoqqussutaavoq. Imaassinnaavoq inoqativut salloqittarsinnaagivut, Jehovali salloqittarsinnaanngilarput. (Hebræerit 4:13) Biibilimi oqaaqqissaarneqaqattaartuarpugut ilumoorfigeqatigiissasugut, sallutuummi nunarsuarmi naapertuilluanngissuseerussimasumi inuutinneqarnavianngillat. (Ussatit 14:2; Saqqummersitat 21:8; 22:15) Tamatumunnga pissutaasoq erseqqippoq. Salluliuutinik ilumuunngitsunillu tamanik aallarniisoq tassaavoq Saatani Diaavulu. — Johannesi 8:44.

¹² Unneqqarissutsip inuttut pissuserilernera iluaqutissartarpassuaqarpoq. Assersuutigalugu ilerasuuteqarunnaarnarpoq allanillu tatigineqarneq nuannaarutigineqarsinnaalluni. Pisimasuni arlalinni kristumiut unneqqarissuunertik pissutigalugu suliffittaarsimallutilluunniit suliffitik suliffigiinnarsimavaat. Pitsaaqutaanerpaasorlu tassaavoq unneqqarissuunitsigut Guutimut Ajugaqanngitsumut ikinngutaalertaratta. — Tussiaat 15:1, 2.

Qanoq ileqqussatigut minguitsuujuartoqartartoq

13. Josefi qanoq nalaataqarpa, nalaataminullu qanoq periarpa?

¹³ Josefi, ataataanerpaap Jaakup ernera, 17-inik ukioqarluni inussiatut tunisaavoq. Kingusinnerusukkut kunngikkormiumut Egyptenimiuusumut Potifarimut kiffartulerpoq, tassanilu naalakkami nulianit malugineqarpoq. Taassuma Josefi, angut inuusuttoq isikkuminartuusoq, kinguaassiuutitigut atoqatigerusuppaa, ullullu tamaasa kimigiiserfigisarpaa: „Innaatinnga!“ Josefi nunamiippoq ilaquttaminit ungasissumiittumi, tassanilu ilisarisimasaqanngilaq. Immaqa arnaq taanna paasineqarani kinguaassiuutitigut atoqatigeriaannaasimagaluarpaa. Naggataatigulli Potifarip nuliata tigummani qimaavoq. — 1 Mosesi 37:2, 18-28; 39:1-12.

14, 15. (a) Sooq Josefimik oqaluttuaq uagutsinnut soqutiginaateqarpa? (b) Sooq arnap kristumiup Guutip oqaaqqissaarutaanik malinninnini qujamasuutigaa?

¹⁴ Josefi ilaqutariinni Guutimik mianerinnittuni peroriartorpoq, nalunngilaalu katissimanngisamik kinguaassiuutitigut atoqateqarneq eqqunngitsuliornerusoq. Taanna ima aperaaq: „Qanoq taama ajortigisumik iliorsinnaavunga Guutimut ajortulillunga?“ (NV) Ilimanarpoq taamatut isummersimasoq aappariinnermut najoqqutassiaq Guutip Naatsiivimmi Edenimi aalajangigaa ilisimagamiuk, tassa ataasiinnarmik aappaqartoqassasoq. (1 Mosesi 2:24) Ullumikkut Guutip innuttaasa Josefip pissutsini taamaattuni qanoq periarneranik eqqarsaatiginninnertik iluaqutigisinnaavaat. Silarsuarmi sumiiffiit ilaanni inuit kinguaassiuutitigut atoqatigiinnermut ima qasungatigisumik isiginnittaaseqarput, inuusuttut kinguaassiuutitigut inuunerlukkumanngitsut kammalaatiminnit mitaatigineqartarlutik. Aappap saniatigut allamik atoqateqartarneq inersimasut akornanni nalinginnaalluinnarpoq. Taamaammat Josefimik oqaluttuaq uagutsinnut eqqaasitsissutaavoq  naleqqulluinnartoq. Kinguaassiuutitigut inuunerlunneq allasiornerlu pillugit Guutip najoqqutassiaa allanngorsimanngilaq. (Hebræerit 13:4) Kinguaassiuutitigut atoqateqarnissamut kimigiiserfigineqarlutik nakkaannarsimasut arlallit nassuerutigaat taamaaliunnginnissamut pissutissaqarluartoq. Kingunipiluit kissaatiginanngitsut ilaat tassaasinnaapput nikanarsagaasutut misigineq, ilerasunneq, sinnganeq, naartulerneq kinguaassiuutitigullu nappaateqalerneq. Soorlumi Biibilimi allassimasoq — kinguaassiuutitigut inuunerluttoq „nammineq timiminut ajortuliortarpoq“. — 1 Korinthimiut 5:9-12; 6:18; Ussatit 6:23-29, 32.

¹⁵ Jenny, * arnaq aappaqanngitsoq Jehovamut kiffartortoq, Guutip oqaaqqissaarisaqattaartarneranik qujamasuutiginninnissaminut pissutissaqarpoq. Suliffiani suleqataa angut takujuminartoq qaninniartalerpoq. Jenny taassuma soqutiginninnera akillugu iliuuseqanngimmat taanna Jennymut suli malugitinniarnerulerpoq. Jenny ima nassuerpoq: „Ileqqussatigut minguitsuujuarnissara ilungersuutigaara, arnaagaannimi angummit malugineqarneq usorsisimaarnartarami.“ Jennylli paasilerpaa angutip taassuma arnarpassuit allat atoqatigereersimagamigit aamma nammineq atoqatiginiarsariinnaraani. Nakkaannangajalersutut misigigaangami, Jehova qinnuigisarpaa aalajaattuarnissaminut ikioqqulluni. Jennyp paasivaa Biibilimik kristumiullu atuagaataannik atuagassiaataannillu misissuigaangami paasisani mianersornissaminut nakussatsissutigisarlugit. Oqaluttuarineqartut atuagaasa ilaat tassaavoq Josefimik Potifarillu nulianik oqaluttuaq. Taanna ima isummerpoq: „Jehova qanoq asatigalugu imminut eqqaasittuartillunga taama ajortigisumik iliornissara taamalu taassumunnga ajortuliornissara annilaangagisariaqanngilara.“

Guutip oqaaqqissaarutai eqqumaffigikkit

16. Inuit Biibilimi oqaluttuarineqartut inuunerannik eqqarsaatiginninneq qanoq iluaqutigisinnaavarput?

¹⁶ Jehovap najoqqutassiaanik tamatta pingaartitsinerulersinnaavugut oqaluttuanik aalajangersimasunik sooq oqaatsimini allatsitsisimaneranik eqqarsaatiginninnikkut. Qanoq ilinniarfigaavut? Inuit Biibilimi oqaluttuarineqartut pissusii iliuuserisartagaallu suut ilaassavavut, suullu ilaarnaveersaassavavut? Inuit hundredelippassuit inuunerat Biibilimi allaatigineqarpoq. Guutip siunnersuutaanik nuannarinnittut tamarmik ilisimassusermik inuunartumik, aamma oqaluttuat Jehovap tammatsaalilluarsimasaasa ilinniutissartaannik, kajungerinninnerminnik ineriartortitsinertik iluaqutigisinnaavaat. Atuagassiami matumani inuit taamaattut pillugit allaaserisaqartarpoq, inuillu taakku misigisimasaat ilinniarfigisinnaavavut. Soormi taakkua misissoqqilaarukkit?

17. Jehovap oqaaqqissaarutai qanoq isigaagit, aamma sooq?

¹⁷ Jehovap piumasamisut iliorniarsuataartunik asannilluni isumassuinera qujamasuutigingaarsinnaavarput! Naammalluinnartuunngilluinnarpugut, soorluttaaq angutit arnallu Biibilimi oqaluttuarineqartut naammalluinnartuunngitsut. Taakkuali pillugit oqaluttuat uagut assut iluaqutigisinnaavavut. Jehovap oqaaqqissaarutigisartagaanik eqqumaffiginninnikkut sualuttumik kukkorujussuanngitsoorsinnaavugut, aamma silatusaassaagut naapertuilluarnerup aqqutaatigoortut ilaarutsigit. Taamaaliorutta tussiaasiortup erinarsorneratut erinarsorsinnaassaagut: „Pilluarpoq oqaaqqissaarutaanik maleruaasoq, taassuminngalu ujarlersoq uummatimigut iluunngarluni. Maleruarpakka oqaaqqissaarutitit nuannaringaarlugillu.“ — Tussiaat 119:2, 167. (wE 6/15 06)

[Quppernerup ataani ilanngussat]

Qanoq akissavit?

• Daavip Saulimut isiginnittaasia sumik ilinniarfigisinnaavarput?

• Ananiamik Safiramillu oqaluttuaq qanoq ilinniutigaarput?

• Sooq Josefimik oqaluttuaq pingaartumik ullumikkut uagutsinnut soqutiginaateqarpa?

[Atuaqqissaarnermi apeqqutit]

[Qupp. 28-mi assiliartaq]

Sooq Daavip Sauli toqunneqaqqunngilaa?

[Qupp. 29-mi assiliartaq]

Ananiamik Safiramillu oqaluttuaq qanoq ilinniutigaarput?

[Qupp. 30-mi assiliartaq]

Josefip suna pissutigalugu ileqqorluttumik qaninniarnerit itigartippai?