Jehovap oqaasia uumavoq

Samuelimik allakkat aappaat-nit pingaarnersat

Jehovap qilammi nunamilu kisimi oqartussaanera akueriniarlugu naalalluinnartariaqarpugut? Inuk assuarnaatsoq Guutip isaani eqqortuliortuaannarpa? Inuk ’Guutip uummataata iluarisaa’ qanoq ittuugami? (1 Samueli 13:14) Apeqqutit taakku Biibilimi Samuelimik allakkat aappaat-ni naammaginartumik akineqarput.

Samuelimik allakkat aappaat Gadimit Natanimillu allanneqarsimapput. Pruffiitit taakkua marluk kunngi Daavimut qanittumik attaveqarsimapput. * Atuagaq 1040-p u.n.s. missaani, Daavip ukiuni 40-ni kunngitut naalakkersuinerata naalernerani naammassineqarpoq, aamma Daavi taassumalu Jehovamut attaveqarnera pingaarnerutillugit sammineqarput. Oqaluttuami pissanganartumi tassani oqaluttuarineqarpoq inuiaqatigiit aaqqiagiinnginnerit pissutigalugit avissaartuussimasut kunngip sapiitsup naalakkersuinerani qanoq ilillutik inuiaqatigiinngorsimanersut siumukarluartut ataasiussuseqartullu. Pisimasoq tiguartinnartoq tamanna misigissutsinik inuppalaartunik qamanngarpiaq ersersinneqartunik ulikkaarpoq.

DAAVI „PISSAANERUJARTUINNARPOQ“

(2 Samueli 1:1–10:19)

Daavip Sauli Jonatanilu toqusimasut tusaramiuk iliuusianit erserpoq taakkua Jehovalu qanoq misigissuseqarfiginerai. Hebronimi Daavi naggueqatigiinnut Judakkunnut kunnginngortinneqarpoq. Saulip ernera Ishbosheti Israelip sinneranut kunnginngorpoq. Daavi „pissaanerujartuinnarpoq“, ukiullu arfineq marluk affarlu missiliorlugit qaangiuttut Israelimut tamarmut kunnginngorpoq.

Daavip Jebusikkut ajugaaffigalugit Jerusalemi tiguarpaa naalagaaffimminullu illoqarfittut pingaarnersanngortillugu. Angerutsip illerfianik siullermeerluni Jerusalemimut nuusseriaraluarnera ajunaarnermik kinguneqarpoq, aappassaanilli iluatsippaa, Daavilu nuannaanngaarami qitippoq. Jehovap Daavi naalagaaffik pillugu angerfigeqatigaa. Guutip ilagiuarmani Daavip akeqqani artorsartippai.

Allassimaffiit pillugit apeqqutit akineqartut:

2:18 — Sooq Joabi qatanngutaalu marluk Serujamit, anaanaminnit, ernerineqartutut eqqartorneqarpat? Allakkani Hebræerisuuni nalinginnaasumik ataataasoq aqqutigalugu kinguaariit allattorneqartarput. Serujap uia immaqa toqujaarsimavoq, imaluunniit Allakkani Illernartuni eqqaaneqarnissaa naleqqutinngitsutut isigineqarsimasinnaavoq. Seruja eqqaaneqartarpoq immaqa Daavip qatanngutigimmagu affarmilluunniit qatanngutigimmagu. (1 Nalunaarsuutit 2:15, 16) Qatanngutigiinnut taakkununnga pingasunut ataataasoq Betlehemimi  ilisaaffianut tunngatillugu taamaallaat eqqaaneqarsimavoq. — 2 Samueli 2:32.

5:1, 2 — Ishboshetip toqunneqarneraniit Daavip Israelimut tamarmut kunnginngortinneqarneranut qanoq sivisutigaa? Saulip toqunerata kinguninngua Ishbosheti ukiuni marlunni naalakkersuilersimassasoq isumaqassalluni silatusaarnerussaaq, Daavip Hebronimi kunnginngornerata missarpiaani. Daavi Hebronimiit Judamut naalakkersuivoq ukiut arfineq-marluk affarlu. Israelimut tamarmut kunnginngortinneqarnermi kinguninngua Jerusalemi illoqarfittut pingaarnersanngortippaa. Taamaammat Ishboshetip toqunerata kingorna ukiut tallimat missaat qaangiuttut aatsaat Daavi Israelimut tamarmut kunnginngorpoq. — 2 Samueli 2:3, 4, 8-11; 5:4, 5.

8:2 — Moabikkut Israelikkullu aaqqiagiinngiissuteqarmata Moabikkut qanoq amerlatigisut toqutaappat? Immaqa toqutat qassiussanersut uuttortaanikkut, kisitsinikkuunngitsoq, aalajangerneqarsimavoq. Daavip Moabikkut sanileriiaarlugit nallakaatissimagunarpai. Taava sanileriiaat allunaasamik uuttortartippai. Allunaasap marloriaataanik takissusillit, tassa Moabikkut 2/3-ii, toqutaasimagunarput allunaasallu takeqqatai, tassa pingasorarterutaat, inuusussanngortinneqarsimagunarlutik.

Ilinniarfigisinnaasavut:

2:1; 5:19, 23. Daavip Hebronimut nuutsinnani akeqqaminillu saassussiartunnginnermini Jehova siunersiorpaa. Uaguttaaq anersaakkut peqqissutsitsinnut sunniuteqartussanik aalajangiitinnata Jehova siunersiortariaqarparput.

3:26-30. Akiniaaneq alianartunik kinguneqartarpoq. — Romamiut 12:17-19.

3:31-34; 4:9-12. Daavi akiniaajumatuujunanilu akeqqersimaartuunngilaq, taamaattumillu uagutsinnut maligassaalluarluni.

5:12. Jehovap aqqutigeqqusaminik ilinniartissimagaatigut imminullu attaveqarlualernissamut periarfississimagaatigut puigunngisaannartariaqarparput.

6:1-7. Daavip, pitsaanerpaamik siunertaqarluni, angerutsip illerfia qamutiniitillugu nooriaraluaramiuk Guutip peqqussutaanik unioqqutitsivoq, tamannalu iluatsinngitsoorpoq. (2 Mosesi 25:13, 14; 4 Mosesi 4:15, 19; 7:7-9) Aamma Uzzap illerfik najumminiarlugu attormagu pisimasumi takutinneqarpoq ajunngitsumik pissuteqarluni iliuuserisaagaluit Guutip piumasaqaataanik allanngortitsineq ajortut.

6:8, 9. Ilungersunartorsiornermini Daavi kamaqqaariarluni tamatuma kingorna annilaangalerpoq — allaallu immaqa Jehova pisimasumut alianartumut pisuutillugu. Uagut peqqussutaanik tusaaniarsimannginnerput pissutigalugu ajornartorsiutigilersimasatsinnut Jehova pisuutinnaveersaartariaqarparput.

7:18, 22, 23, 26. Daavip maniguuttuunera, Jehovamut tunniusimalluinnartuunera Guutillu aqqanik qutsissisitserusuttuunera ilaarsinnaavarput.

8:2. Siulittuut ukiut 400-t tamatuma siorna missiliorlugu siulittuutigineqarsimasoq piviusunngorpoq. (4 Mosesi 24:17) Jehovap oqarneratut pisoqartuaannarpoq.

9:1, 6, 7. Daavip neriorsuutini eqqortippaa. Uaguttaaq neriorsuutivut piviusunngortinniartariaqarpavut.

JEHOVA TANITAMINUT PERLUMMIK NALLIUTITSIVOQ

(2 Samueli 11:1–20:26)

„Uanga perlummik nalliutitsivigiumaarpakkit illit nammineq ilaquttannit pisussamik,“ Jehova Daavimut oqarpoq, „isigitillutit nuliatit angummut allamut tunniutissavakka, taassumalu isertuanngivilluni innaatissavai.“ (2 Samueli 12:11) Taamatut oqarneranut suna pissutaava? Daavip Batsebamik ajortulioqateqarsimanera. Daavip peqqissimigaluarluni isumakkeerfigineqaraluarlunilu ajortuliami kingunipilui atunngitsoorsinnaanngilai.

Siullermik Batsebap meerartaava toquvoq. Taava Daavip pania inuusuttoq Tamari pinngitsaalisaavoq affarmik qatanngutiminit Amnonimit. Tamarip qatanngutiviata Absalomip Amnoni akiniaalluni toquppaa. Absalomi nammineq ataataminut perlulioqatigiinnianik pilersitsivoq Hebronimilu imminut kunngitut  suaarutigaluni. Daavi Jerusalemimiit qimaasariaqalerpoq. Absalomip ataatami panerfaasa ilaat qulit illu paariniassammassuk qimataasimasut innaappai. Absalomi aatsaat toqutaareermat Daavi kunnginngoqqissinnaanngorpoq. Sheba Benjaminikkuusoq toqutaanerminik kinguneqartumik pikitsitsivoq.

Allassimaffiit pillugit apeqqutit akineqartut:

14:7 — „Aamaq“ eqqaaneqartoq sumut assersuutaava? Tassani aamarsuit aamaat ikumarusaartartut kinguaanut inuusunut assersuutaatinneqarput.

19:30 — Sooq Daavi Mefiboshetip nassuiaataanut taamatut qisuariarpa? Daavip Mefiboshetip nassuiaataa tusaramiuk takusinnaalersimassavaa Sibap oqaasii upperisussaasimanngikkaluarlugit. (2 Samueli 16:1-4; 19:25-29) Tamanna Daavip uumitsaatigisimassagunarpaa, tamannalu pillugu tusagaqaqqikkusussimagunarani.

Ilinniarfigisinnaasavut:

11:2-15. Daavip kukkussutaasa isertuarani oqaluttuarineqarnerat Biibilip Guutimit isumassarsiarititaaneranut uppernarsaataavoq.

11:16-27. Sualuttumik ajortuliorutta Daavip iliorsimaneratut isertorniartariaqanngilarput. Ajortuliarpulli Jehovamut anngiiaatigissavarput ilagiinnilu utoqqaanertanut ikiortissarsiorluta. — Ussatit 28:13; Jaaku 5:13-16.

12:1-14. Natani ilagiinni utoqqaanertanut maligassaalluarpoq. Sualuttumik unioqqutitsisimasut ikiortussaavaat. Utoqqaanertat akisussaaffik tamanna periaaserillutik suliarisariaqarpaat.

12:15-23. Daavip nalaatani eqqortumik isumaqarfigai atugarliornerminilu eqqortumik iliuuseqarnissaminut tamanna iluaqutigalugu.

15:12; 16:15, 21, 23. Absalomi kunnginngortussanngortoq nalunarunnaarmat siunnersortip pikkorissup Akitofelip pingaarniartuunini ataqqineqarumatuninilu killuussisunnguutigai. Tamatuma takutippaa silassorissuseq maniguunnertaqanngitsoq ilumoorfiginninnertaqanngitsorlu napiaaniutaasinnaasoq.

19:25, 31. Mefiboshetip Daavip ilumoorfiginnilluni tunniusimanera pingaartingaarpaa. Siba pillugu kunngip aalajangiinera kajumilluni akueraa. Jehovamik taassumalu peqatigiissortaanik pingaartitsinerput naalatsigiterusulissutigissavarput.

20:21, 22. Inuup ataatsip ilisimassusiata inuppassuit ajunaarnissaraluat pinngitsoortissinnaavaa. — Oqaluussisartup oqaasii 9:14, 15.

’JEHOVAP ASSAANUT TUNNIUTIINNARTA’

(2 Samueli 21:1–24:25)

Saulip Gibeonimiunik toqoraanera pissutigalugu ukiuni pingasuni kaannersuaqarpoq. (Josva 9:15) Toqoraanersuarmut  akiniutitut Gibeonimiut Saulip erneri arfineq-marluk tunniuteqquaat toqunniassagamikkit. Daavip Gibeonimiunut tunniuppai, panernersuaqarfiusumilu siallilerpoq. Filisterit inorujussuit sisamat „Daavimit sakkutuuinillu toqutaapput“. — 2 Samueli 21:22.

Daavi sualuttumik ajortuliorpoq inatsisinik unioqqutitsilluni inuit kisinneqartikkamigit. Isumataarpoq aalajangerlunilu Jehovap ’assaanut tunniutiinnarniarluni’. (2 Samueli 24:14) Tamatuma kingunerisaanik inuit 70.000-it nappaassuarmik toqquteqarput. Daavip Jehovap peqqussutaa malippaa, nappaassuarlu kipitinneqarpoq.

Allassimaffiit pillugit apeqqutit akineqartut:

21:9, 10 — Rispap ernini marluk Saulillu erngutai tallimat, Gibeonimiunit toqutaasimasut, qanoq sivisutigisumik nakkutigai? Angutit arfineq-marluk taakku „katersuiffiup ulluini siullerni“ nivinngarneqarput, tassa marsimi apriilimiluunniit. Timaat toqungasut qaqqamut qimanneqarput. Rispap timit toqungasut arfineq-marluk ulloq unnuarlu nakkutigai, Jehovap panernersuaqartitsiunnaarnermigut kamakkunnaarsimanerminik ersersitsinissaata tungaanut. Oktobarimi katersuiffiujunnaannginnerani sialussuaqarnissaa ilimananngilluinnarpoq. Taamaammat Rispa qaammatini tallimani arfinilinniluunniit nakkutiginnissimasinnaavoq. Tamatuma kingorna Daavip angutit saarngisa ilineqarnissaat isumagaa.

24:1 — Sooruna Daavip inunnik kisitsisitsinera sualuttumik ajortuliornerusoq? Mosesip inatsisai malillugit inunnik kisitsisitsineq immini unioqqutitsinerunngilaq. (4 Mosesi 1:1-3; 26:1-4) Biibilimi eqqaaneqanngilaq suna tunngavigalugu Daavi inunnik kisitsisitsisimanersoq. Nalunaarsuutit siulliit 21:1-ili naapertorlugu Saatanip taamaaliornissaanut sunnersimavaa. Daavip sakkutuuisa naalagaata, Joabip, nalusimanngilaa Daavip kisitsisitsinera eqqunngitsuliornerusoq unitsinniarsimagaluarlugulu.

Ilinniarfigisinnaasavut:

22:2-51. Daavip erinarsuutaani Jehova Guutitut ilumoortutut uagutsinnit tatigilluinnarneqarnissaminut qinngaqqunnanngitsuusoq kusanaqisumik oqaluttuarineqarpoq!

23:15-17. Guutip inuuneq aallu pillugit inatsisaanik Daavi ima ataqqinnitsigaaq pisimasumi matumani inatsisinik unioqqutitsinermut eqqaanalaarsinnaasunik iliuuseqarani. Uaguttaaq Guutip peqqussutaanut tamanut taamatut isiginnittaaseqarneq ineriartortittariaqarparput.

24:10. Daavi nalunngeqatiginnissusiata allamik isumataartippaa. Uaguttaaq nalunngeqatiginnissuserput ima misikkaritsigaa taamatut ilioriaannaalluta?

24:14. Daavip nalunngilaa Jehova inunnit naakkinninnerusoq. Uaguttaaq taama isumaqarpugut?

24:17. Daavip ajortuliami inuiaqatiminut naalliuutaalersimanera aliasuutigaa. Unioqqutitsisimasup peqqissimisup iliuutsimi ilagiinnut narrunarsaataalersimasinnaanerat aliasuutigisariaqarpaa.

Uagut tassaasinnaavugut inuk ’Guutip uummataata iluarisaa’

Israelikkut kunngiisa aappaat tassaasimavoq ’angut Jehovap uummataata iluarisaa’. (1 Samueli 13:14) Daavip Jehovap najoqqutassiai naapertuilluartut qularutigisimanngisaannarpai, Guutimillu avissaarnianngisaannarsimalluni. Daavip kukkugaangami tamatigut ajortuliani nassuerutigisarpaa, perorsaatissinneqarnini akuerisarlugu periaatsinilu allanngortittarlugu. Daavi angutaavoq assuarnaatsoq. Ingammik kukkusimatilluta ilaassallugu silatusaarnerussaaq, ilaa?

Daavip inuuneranik oqaluttuami erseqqilluinnarpoq Jehovap qilammi nunamilu kisimi oqartussaaneranik akuerinninneq taassuma ajunngitsut ajortullu pillugit najoqqutassiaanik akuerinninnermik pallorfiginnittutullu assuarnaatsutut taakkuninnga aalajangiusimanninniarnermik nassataqartoq. Tamanna uagutsinnut ajornanngilaq. Samuelimik allakkat aappaat-ni ilinniakkavut qujamasuutigingaarsinnaavavut! Atuakkap tamatuma quppernerini tusarliussaq isumassarsiarititaasoq ilumut uumavoq sunniisinnaassuseqarlunilu. — Hebræerit 4:12.  (wE 5/15 05)

[Quppernerup ataani ilanngussaq]

[Qupp. 8-mi assiliartaq]

Kia kunngiunerminik aalajangersaasuuneranik ilisimanninnini Daavip maniguuttuarnissaminut iluaqutigaa

[Qupp. 10-mi assiliartaq]

„Uanga perlummik nalliutitsivigiumaarpakkit illit nammineq ilaquttannit pisussamik“

Batseba

Tamari

Amnoni