Jehovap naapertuilluassusia nuannaarutigiuk

„Naapertuilluassusermik ilumoorlunilu tunniusimanermik noqqaassutiginnittup inuuneq, naapertuilluassuseq nersornaallu pissarsiarissavai.“ — USSATIT 21:21, NV.

1. Isiginnittaaseq nalinginnaasoq suna pissutsinik ajorsisitsiva?

„INGERLAVIK angutip eqqortuusorisaralua toqumik isuliffeqarsinnaavoq.“ (Ussatit 16:25) Ussatip Biibilimeersup tamatuma ullumikkut inuit amerlanerit inuunerminni toraagaat oqaatigilluarpaa. Inuit namminneq eqqortuusorisaannarminnik aallussisarnerat nalinginnaavoq, allaallu allat pisariaqartilluinnagaat soqutigineqartaratik. (Ussatit 21:2) Nunap inatsisai najoqqutassiaalu maleruarpasippaat, malinngitsoornissaannulli periarfissarsiortuarlutik. Tamatuma kinguneraa innuttaaqatigiinni avissaartuunneq paatsiveerusimaarnerlu. — 2 Timotheusi 3:1-5.

2. Suna pisariaqartingaarparput?

² Uagutsinnut — silarsuarmilu eqqissineq isumannaannerlu aamma eqqarsaatigalugit — pitsaanerpaassaaq inatsiseqarpat imaluunniit najoqqutassiaqarpat naapertuilluartunik inuit tamarmik akuerisinnaasaannik naalakkusutaannillu. Inuit qanorluunniit silassoritsigaluarunik ilumoortigigaluarunilluunniit inatsimmik najoqqutassiamilluunniit taamaattumik pisariaqartitsineq matussusersinnaanngilaat. (Jeremia 10:23; Romamiut 3:10, 23) Taamaattumik inatsiseqarpat sumiippa, sunalu siunertaa? Pingaarnerusumillu: Taassuminnga maleruaaneq kajumillunilu akuerinninneq nuannaarutigineqarsinnaappat?

Sumi naapertuilluartumik najoqqutassiaqarpa?

3. Kina tamanik akuerineqarsinnaasunik iluaqutaasunillu najoqqutassiilluarnerpaasinnaava, aamma sooq?

³ Najoqqutassiaq iluaqutaassaguni tamanillu akuerineqarsinnaassaguni, ammip qalipaataanik, kulturikkut politikkullu assigiinngissutinik pingaartitsinngitsumit inuillu siuneqanngitsuunnerannik naammalluinnanngitsuunerannillu naqisimaneqanngitsumit najoqqutassiaasariaqarpoq. Piumasaqaammik tamatuminnga eqqortitsisutuaq tassaavoq Pinngortitsisoq ajugaqanngitsoq, Jehova Guuti, ima nalunaartoq: „Soorlu qilak nunamit qutsinnerusoq, taama aqqutigisakka  ilissi aqqutigisassinnit qutsinnerupput pilersaarutikkalu pilersaarutissinnit qutsinnerullutik.“ (Esaja 55:9) Aammattaaq Jehova Biibilimi ima allaatigineqarpoq: „Guutiuvoq aalajaatsoq, salloqittaanngisaannartoq; naapertuilluartuuvoq peqqusersuitsuullunilu.“ (5 Mosesi 32:4) Biibilimi sumi tamani oqaatsit uku atuarneqarsinnaapput: „[Jehova] naapertuilluartuuvoq!“ (2 Nalunaarsuutit 12:6; 2 Mosesi 9:27; Tussiaat 11:7; 129:4; Upputit 1:18; Saqqummersitat 19:2) Aap, Jehova aalajaatsuugami naapertuilluartuullunilu najoqqutassiai najoqqutassianit allanit pitsaanerpaapput.

4. Oqaaseq „naapertuilluartoq“ imaluunniit „iluartoq“ qanoq isumaqarpa?

⁴ Oqaaseq „naapertuilluartoq“ imaluunniit oqaaseq „iluartoq“ ullumikkut nuannarineqarpallaanngilaq. Immaqa uppertuusaartunut ilumoortuusaartunullu tunngatittaramikku. Biibilimulli tunngatillugu oqaaseq „naapertuilluartoq“ imaluunniit „iluartoq“ isumaqarput: eqqortoq, ileqqorissoq, ileqqussatigut eqqortoq, pisuussuteqanngitsoq, ajorteqanngitsoq; Guutip najoqqutassiaanut ileqqussatigulluuniit najoqqutassianut nalinginnaasumik akuerineqartunut naapertuuttoq. Aamma eqqortumik naapertuilluartumillu iliornermut tunngatillugu atorneqartarpoq. Inatsit najoqqutassiarluunniit taamaattoq nuannaarutigineqartariaqanngila?

5. Biibili naapertorlugu naapertuilluartuuneq suua?

⁵ Pissuseq naapertuilluartuuneq pillugu Encyclopaedia Judaica-mi ima allassimavoq: „Naapertuilluartuuneq eqqarsaatersuutaannaanngilaq; iliuuserisartakkatsinniippoq, eqqortuuvoq naapertuilluartuullunilu, iliuutsini tamani.“ Assersuutigalugu Guutip naapertuilluartuunini, illernassusermisut minguissusermisullu, ilumiugiinnanngilaa. Naagga iliuusiiniippoq, qanoq ittuuneranik, tamatigut eqqortuliortuuneranik naapertuilluartuliortuuneranillu, ersersitsisuulluni. Oqartoqarsinnaavoq: Jehova illernartuugami minguitsuullunilu, iliuusii tamarmik taassumanngaaneersullu tamarmik naapertuilluartuupput. Ima allassimasutut ippoq: „Iluartuuvoq [Jehova] ingerlavimmini tamani, qanoq iliornermini tamani ilumoortuuvoq.“ — Tussiaat 145:17.

6. Juutit kristumiuunngitsut pillugit Paulusi qanoq oqarpa, aamma sooq?

⁶ Apustili Paulusip tamanna erseqqissarpaa Romami kristumiunut allakkamini, juutit kristumiuunngitsut pillugit ima allakkami: „Paasisimanngilaat Guutip iluarnera sunaasoq namminnerli iluarnertik atortinniarlugu, taamaattumillu Guutip iluarneranut naalatsigitinngillat.“ (Romamiut 10:3) Sooq Paulusi oqarpa ’paasisimangikkaat Guutip iluarnera suunersoq’? Inatsisinik, Guutip najoqqutassiaanik naapertuilluartunik, ilinniartitaannginnamik? Ilumut. Amerlanerilli isumaqarput upperisarsiornikkut malittarisassanik maleruaaqqissaarnikkut aatsaat naapertuilluartuuneq ineriartortinneqarsinnaasoq. Inunnut allanut attaveqarnerminnut siulersortissatut isiginngilaat. Jiisusip nalaani upperisarsiornikkut siuttutut naapertuilluartuunerup siunertaa paatsoorluinnarsimavaat. — Matthæusi 23:23-28.

7. Jehovap naapertuilluassusia qanoq ersertarpa?

⁷ Akerlianilli Jehovap naapertuilluassusia iliuusiini tamani erserluartarpoq. Jehova naapertuilluartuugami piaaralutik ajortuliortut unioqqutitsineri isiginngitsuusaaginnarsinnaanngilai, taamaanneratali Guutitut misigittaatsunngortinngilaa sukannersoq qanillissallugu siooranartoq. Akerlianilli iliuutsimigut naapertuilluartutigut tunngavissippaatigut tassunga ajunngitsumik attaveqalersinnaanissatsinnut ajortillu kingunerisaanit ilungersunartunit aniguisinnaanissatsinnut. Taamaattumik tulluarpoq Jehova „Guutimik iluartumik, Guutimik annaassisartumik“ taaneqarmat. — Esaja 45:21.

Naapertuilluartuuneq annaassinerlu

8, 9. Guutip naapertuilluassusia Inatsisini qanoq erserpa?

⁸ Guutip naapertuilluassusia inuit annaanniarlugit asannittuliorneranut qanoq attuumassuteqarnersoq paasiniarlugu, misissorsinnaavavut Mosesi aqqutigalugu Israelimut inatsisigititai. Inatsisit taakku naapertuilluartuunerat apeqquserneqarsinnaanngilaq. Mosesip Israelikkut naggammik oqaluukkamigit oqarpoq: „Sumi inuiaqarnerpa pissaanilissuarnik inatsisinik malittarisassianillu pigisaqartunik inatsisitut ullumi ilissinnut saqqummiussattut naapertuilluartigisunik?“ (5 Mosesi 4:8) Ukiut hundredellit tamatuma  kingorna Israelikkut kunngiat Daavi ima nalunaarpoq: „[Jehovap] inassutai sallusuitsuupput, tamarmik naapertuilluarnerupput.“ — Tussiaat 19:10.

⁹ Suup eqqortuuneranik suullu eqqunngitsuuneranik naammalluinnartunik najoqqutassiani Jehovap erseqqissumik takutippai Inatsisit atorlugit. Inatsisini annikitsualuit tamaasa ilanngullugit allassimapput Israelikkut qanoq pissusilersussanersut, upperisarsiornermut tunngasuniinnaanngitsoq aammali niuernermut, aappariinnermut, nerisassanut, eqqiluisaarnermut soorunami aamma eqqartuussinermut tunngasuni. Aamma inatsisit naapertorlugit inatsisinik unioqqutitsisut sukannersumik, ilaatigut allaat toqumik, pillarneqartussaapput. * Guutilli aalajangersagai naapertuilluartut, Inatsisini allassimasut, nanertuutaappat sukannersut qasunartullu Israelikkunnik kiffaanngissusiiaasut nuannaarunnaarsitsisullu?

10. Jehovamik asannittut inatsisai qanoq isigaat?

¹⁰ Jehovamik asannittut inatsisaanik aalajangersagaanillu maleruaanertik nuannaarutigingaarpaat. Eqqaaneqareersutut kunngi Daavip nassuerutigaa Jehovap inassutai sallusuitsuusut naapertuilluartuusullu. Aammali nuannareqai uummammillu tamakkiisumik pingaartillugit. Jehovap inatsisai aalajangersagaalu pillugit ima allappoq: „Erlinnarnerupput kuultimit, kuulterpassuarnit akuinnerpaanit, tungusunninnerupput tungusunnitsuummit, tungusunnitsuummit imerpalasumit. Kiffat taakkununnga ilitsersortippoq, maleruaraanni tamanna naammattumik akissarsissutaassaaq.“ — Tussiaat 19:8, 11, 12.

11. Inatsisit qanoq ’Kristusimut perorsaasuuppat’?

¹¹ Ukiut hundredellit tamatuma kingorna Paulusip Inatsisinut tunngasoq alla pingaaruteqarnerusoq uparuarpaa. Galatiamiunut ima allappoq: „Inatsisit perorsaasigaavut Kristusip tikiunnissaata tungaanut, uppernikkut iluartuutinneqaqqulluta.“ (Galatiamiut 3:24) Paulusip nalaani inoqutigiinni angisuuni perorsaasoq („pædagog“, NV-mi ataani ilanngussaq) tassaavoq inussiaq imaluunniit kiffaq. Meeqqat sernissornissaat atuarfiliaannissaallu pisussaaffigaa. Taamatulli Israelikkut Inatsisit sernissortigaat inuiannut eqqaamiuminnut ileqqussatigut upperisarsiornikkullu ajortunngorsimasunut. (5 Mosesi 18:9-13; Galatiamiut 3:23) Aammattaaq Inatsisit Israelikkut paasitippaat ajortiliunerannik, isumakkeerfigineqarnissamik annaanneqarnissamillu pisariaqartitsinerannik. (Galatiamiut 3:19) Pilliisarnermik aaqqissuussineq Israelikkunnut paasititsivoq utertitsissutitut pilliummik pisariaqartitsisut, najoqqutassatullu siulittuutaalluni missiarsimut ilumoortumut tikkuussisoq. (Hebræerit 10:1, 11, 12) Tassa inuit atugarissaarnissaat naassaanngitsumillu annaanneqarnissaat eqqarsaatigalugu Jehovap naapertuilluartuunini Inatsisitigut ersersippaa.

Inuit Guutimit naapertuilluartuutitaasut

12. Inatsisit maleruaqqissaarnerisigut Israelikkut suna angusinnaavaat?

¹² Jehovap inatsisai tamavimmik naapertuilluartuummata Israelikkut inatsisinut naalattuugunik Guutimit naapertuilluartuutitaassagaluarput. Nunamut neriorsuutigisamut isingajalersut Mosesip una eqqaasitsissutigaa: „[Jehovap] Guutitta peqqussutigisai taakku malillugit kiinaata saani inuunissaq pingaartikkutsigu taava taamaaliornerput  iluartuutitaassutigissavarput.“ (5 Mosesi 6:25) Aammattaaq Jehova oqarpoq: „Inatsisikka malittarisassiakkalu maleruassavasi. Maleruaasoq taakkunuunatigut inuussaaq. Uangami tassaavunga [Jehova].“ — 3 Mosesi 18:5; Romamiut 10:5.

13. Jehovap inatsisini naapertuilluartut Israelikkunnut maleruaqqugamigit naapertuilluanngitsuliorpa? Nassuiaruk.

¹³ Alianaraluartumik Israelikkut inuiattut isigalugit ’Jehova Guutimik peqqussutigisai malillugit kiinaata saani’ inuunngillat, taamaalillutik pilluaqqussutissat neriorsuutigineqartut pilluaqqussutisiarinngitsoorpaat. Guutip inassutai tamaasa maleruarsinnaanngilaat, Guutimmi inatsisai naammalluinnartuupput Israelikkullu naammaalluinnanngitsuullutik. Taavami Guuti naapertuilluanngitsuliorpa? Naamerluinnaq. Paulusi allappoq: „Taava qanoq oqassaagut? Guutimimi iluanngitsoqarnerpa? Naamerluinnaq!“ (Romamiut 9:14) Inatsiseqanngikkallarmat Inatsiseqalerneratalu kingorna Guutip inuit ataasiakkaat naapertuilluartutut isigai, naak naammalluinnanngitsuugaluartut ajortiliullutillu. Ilaatigut taaneqarsinnaapput Guutimik mianerinnittut Noa, Aaperaat, Jobi, Rahabi Danielilu. (1 Mosesi 7:1; 15:6; Jobi 1:1; Ezekieli 14:14; Jaaku 2:25) Taamaattumik una apeqqutaavoq: Suna tunngavigalugu inuit ataasiakkaat Guutimit naapertuilluartuutitaappat?

14. Inuk „naapertuilluartutut“ imaluunniit „iluartutut“ Biibilimi taaneqaraangat qanoq isumaqartarpa?

¹⁴ Biibilimi inuit „naapertuilluartutut“ imaluunniit „iluartutut“ eqqaaneqaraangata isumaqarneq ajorpoq pineqartut ajorteqanngitsuusut naammalluinnartuusulluunniit. Akerlianilli isumaqarpoq Guutimut inunnullu pisussaaffitik eqqortikkaat. Assersuutigisinnaavarput Noa ’angut iluartoq naligisami akornanni assuarnaatsumik inuuseqartoq . . . Guutip peqqusineratorluinnaq iliorami’. (1 Mosesi 6:9, 22; Malaki 3:18) Johannesi Kuisisup angajoqqaavi, Zakaria Elisabethilu, „tamarmik Guutip takkuani iluartuupput assuarnaatsumik inuullutik [Jehovap] inassutai ileqqoreqqusaalu maleruarlugit“. (Lukasi 1:5, 6) Israelikkuunngitsoq, sakkutuut naalagaat Italiamiu, Corneliusimik atilik ’iluartuullunilu Guutimik mianerinnittuusutut’ allaatigineqarpoq. — Apustilit Suliaat 10:22.

15. Naapertuilluartuunermut suna attuumassuteqarluinnarpa?

¹⁵ Aammattaaq inuup naapertuilluartuliornera uummataanut — upperneranut, Jehovamut neriorsuutaanillu pingaartitsineranut asanninneranullu — attuumassuteqarluinnarpoq, Guutip piumasaqaataanik eqqortitsinermut attuumassuteqaannarani. Biibilimi allassimavoq ’Aaperaap upperimmani tamanna [Jehovap] taassumunnga iluartuutitaassutigitikkaa’. (1 Mosesi 15:6) Aaperaap Guutip piunera upperiinnanngilaa, aammattaarli ’kinguaassaq’ pillugu neriorsuutaa upperaa.  (1 Mosesi 3:15; 12:2; 15:5; 22:18) Upperneq taamaattoq suliatigut ersertoq tunngavigalugu Jehovap Aperaat uppertullu allat pilluaqqusinnaasimavai naammalluinnanngitsuugaluartullu ajunngitsumik attaveqarfigisinnaallugit. — Tussiaat 36:11; Romamiut 4:20-22.

16. Inuit utertitsissutitut pilliummut uppernerat sumik kinguneqarpa?

¹⁶ Inuit naapertuilluartutut isigineqarsinnaanerannut aalajangiisuulluinnarpoq Jiisusi Kristusip utertitsissutitut pilliutaanik upperinninnersut. Ukiuni hundredelinni siullerni kristumiut pillugit Paulusi allappoq: „Taama pineqartussaanngikkaluarlutik Guutip saammaanneranit iluartuutitaapput Kristusi-Jiisusikkut aniguisitaagamik.“ (Romamiut 3:24) Paulusip uani eqqartugai tassaapput qilaap naalagaaffiani Kristusip kingornusseqatissaasut toqqarneqarsimasut. Jiisusilli utertitsissutitut pilliutaataa inuit millionillit allat Guutip isaani aamma naapertuilluartuulersinnaatippai. Apustili Johannesi takorruuisinneqarpoq ’inuppassuarnik amerlangaaramik kisinneqarsinnaanngitsunik’ taakkulu „issiavissaarsuup sioraani Savaaqqallu saavani qeqarput qaqortunik atisaqarlutik“. Atisaat qaqortut assersuutaapput Guutimit minguitsutut naapertuilluartutullu isigineqarnerannut, ’atisatimmi Savaaqqap aavanut eqqiarsimavaat qaqortitillugit’. — Saqqummersitat 7:9, 14.

Jehovap naapertuilluarneranik nuannaarutiginninneq

17. Naapertuilluarneq ’noqqaassutiginiarlugu’ qanoq iliuuseqartoqartariaqarpa?

¹⁷ Jehovap asannilluni erni, Jiisusi Kristusi, pilliutissanngortikkaluaraa, inuit pinngitsooratik naapertuilluartuutitaasussaanngillat. Utertitsissutitut pilliut upperisariaqarpoq, Guutip piumasaanut naapertuuttumik inuuneqalerluni, Jehovamut tunniulluinnarluni tamannalu kikkut tamarmik takkuanni kuisinnikkut takutillugu. Taava naapertuilluartuuneq ’noqqaassutigineqartuartariaqarpoq’, tassa pissuseq taanna pissutsillu allat anersaakkut ittut ineriartortinnissaat ilungersuutigalugu. Paulusip Timotheusi, kristumiu kuisimasoq qilaliarnissamut qaaqqusaq, ima kajumissaarpaa: ’Noqqaassutigikkit iluarneq, Guutimik mianerinninneq, upperneq, asanninneq, nikallujuinneq qanilaarnerlu.’ (1 Timotheusi 6:11; 2 Timotheusi 2:22) Aamma Jiisusip erseqqissarpaa iliuuseqartuarnissap qanoq pingaaruteqartiginera. Oqarpoq: „Naalagaaffik naapertuilluassuserlu taassuma pia salliutittuaannarsigik.“ Qularnanngilaq Guutip naalagaaffianut attuumassuteqartunik pilluaqqussutissarserusungaartugut, Jehovalli najoqqutassiai naapertuilluartut taamatulli maleruarusutsigaavut? — Matthæusi 6:33, NV.

18. (a) Naapertuilluartuliorniarneq sooq oqitsuunngila?(b) Lotimik oqaluttuaq qanoq ilinniarfigisinnaavarput?

¹⁸ Naapertuilluartuliorniarneq oqitsuinnaanngilaq, tamattami naammalluinnanngitsuuvugut inunnguuseralugulu naapertuilluanngitsulioqqajaasarluta. (Esaja 64:5) Aammattaaq inunnik Jehovap najoqqutassiaanik naapertuilluartunik soqutigisaqarpallaanngitsunik avatangiiseqarpugut. Pissutsit atukkavut Lotip atugaanut assingupput. Loti Sodomami guutiitsuuffiusutut ilisimaneqartumi najugaqarpoq. Apustili Petrusip nassuiarpaa sooq Jehova Loti aseruinissamit anigusinniarlugu aalajangertoq. Petrusi allappoq: „Angut iluartuusoq taanna taakkua akornanni najugaqartoq ullut tamaasa tarnimigut iluartukkut erloqissuteqartarpoq iluaatsuliornerit tusartakkani takusartakkanilu pissutigalugit.“ (2 Petrusi 2:7, 8) Taamaattumik tamatta immikkut imminut ima aperigutta pitsaassaaq: ’Inuunerlunneq nalinginnaasoq qamuuna akuersaarpara? Aliikkusersuutit timersuutilluunniit nuannarineqartut nakuusernertallilli qanoq isigaakka? Kusanaatsutut isigiinnarpakka, imaluunniit Lotitut naapertuilluanngitsuliorneq taamaattoq erloqissutigaara?’

19. Guutip naapertuilluartuunera nuannaarutigigutsigu qanoq pilluaqqusaassutigisinnaavarput?

 ¹⁹ Piffissami matumani ulorianartumi nalorninartumilu Jehovap naapertuilluartuuneranik nuannaarutiginninnerput illersuutigissavarput toqqissisimassutigalugulu. Apeqqut una: „[Jehova], kinaava tupinni tikeraajusinnaasoq, qaqqanni illernartumi inissarsisinnaasoq?“ kunngi Daavip ima akivaa: „Tassaavoq taanna assuarnaalluni inuusoq, innarluitsumik iliortoq.“ (Tussiaat 15:1, 2) Guutip naapertuilluassusia noqqaassutigalugu nuannaarutigalugulu Jehova ajunngitsumik attaveqarfigiuarsinnaavarput taassuminngalu iluarissaanerput pilluaqqusaanerpullu malugisinnaallugit. Taamaalilluta nalerisimaarsinnaavugut, imminut tatigilerluta isumakkullu eqqissilluta. „Naapertuilluassusermik ilumoorlunilu tunniusimanermik noqqaassutiginnittup inuuneq, naapertuilluassuseq nersornaallu pissarsiarissavai.“ (Ussatit 21:21, NV) Inuunitsinni tamani eqqortuliorniarutta naapertuilluartuliorniaruttalu aamma allanut ajunngitsumik attaveqalissaagut inooriaaserinnerulerlutalu — ileqqussatigut anersaakkullu. Tussiaasiortoq oqarpoq: „Pilluarput innarluissummik sianiginnittut tamatigullu naapertuilluartumik iliuuseqartut.“ — Tussiaat 106:3.

[Quppernerup ataani ilanngussaq]

Uku nassuiarsinnaavigit?

• Naapertuilluartuuneq suua?

• Annaanneqarnissaq qanoq ililluni Guutip naapertuilluassusianut attuumassuteqarpa?

• Suna tunngavigalugu Guutip inuit naapertuilluartuutitaatittarpai?

• Jehovap naapertuilluassusia qanoq nuannaarutigisinnaavarput?

[Atuaqqissaarnermi apeqqutit]

[Qupp. 11-mi assiliartaq]

Kunngi Daavip Guutip inatsisaanik nuannarisaqarnini ersersippaa

[Qupp. 12-mi assiliartaq]

Noa, Aperaat, Zakaria Elisabethilu aamma Corneliusi Guutimit naapertuilluartutut isigineqartunut ilaapput. Nalunngiliuk sooq?