Biibilip ileqqussatigut najoqqutassiai pitsaanerpaappat?

„INUIAQATIGIIT ileqqussatigut najoqqutassanik tunngaviusunik innuttaasunut toqqissisimanermik ileqqorissaarnikkullu siunnersuutinik pisariaqartitsipput.“ Oqaatsit taakkua siuneqarluartut tyskimit atuakkiortumit aaqqissuisumillu oqaatigineqarput. Inuiaqatigiit allanngujaallutillu siuariassappata, naliginnaasumik akuerineqartunik, suup eqqortuuneranik suullu eqqunngitsuuneranik, suup ajortuuneranik suullu ajunngitsuuneramik tunngaviusunik najoqqutaqartariaqarput. Apeqqutaalerpoq: inuiaqatigiinnut innuttaasunullu najoqqutassat suut pitsaaneruppat?

Biibilip ileqqussatigut najoqqutassiai malillugit inuugunik inuit ataasiakkaat alajaallisimasariaqaraluarput pillualersimasariaqaraluarlutillu. Ataatsimut isigalugu inuiaqatigiit najoqqutassanik taakkuninnga malinnittut pilluarnerulerlutillu aalajaanerulissagaluarput. Taamaattoqarsinnaava? Apeqqutit marluk pingaarutillit pillugit Biibilimi qanoq allassimanersoq takoriartigu: Aappariinnermi ilumoorfigeqatigiinneq unneqqarinnerlu.

Aappat aappariinnaruk

Pinngortitsisup Adam pinngortereeramiuk, Evamik ikiortissiuuppaa. Tassa oqaluttuarisaanermi appariit siulliit, aappariittullu najuinnartussaapput. Guuti oqarpoq: „Tamanna pillugu angutip ataatani anaananilu qimallugit nuliani attavigissavaa, uiningussappullu ataaseq.“ Ukiut 4000-t missaat  qaangiummata aappariinnut najoqqutassiaq Jesusip ajoqersukkaminut uteqqippaa. Katissimananilu kinguaasiuutitigut atoqateqarneq aamma avoqqaaraa. — 1 Moses 1:27, 28; 2:24; Matîuse 5:27-30; 19:5.

Biibili malillugu pilluarluni aappariinnermi asanninneq ataqqinninnerlu pingaaruteqarnerpaapput. Uiusup, ilaqutariit ittuattut, asanninneq namminissarsiunngitsoq nuliami atugarissaanissaa eqqarsaatigalugu ersersittariaqarpaa. ’Silalimmik inooqatigisariaqarpaa’ ’ajuallaffiginagulu’. Nuliaasup ’uini mianerissavaa’. Aappariinni ajornartorsiutit amerlanerit pinngitsoorneqarsinnaapput imaluunniit anigorneqarsinnaapput aappariit najoqqutassiat tamakkua malippatigit. Angut nuliaminut atajumassaaq nuliaasorlu uiminut. — 1 Pîtruse 3:1-7; Kulorsamiut 3:18, 19; Evfisumiut 5:22-33.

Aappariit imminnut ilumoorfigeqatigiinnissaanik Biibilip najoqqutassiaa aappariinnut pilluarnerulersitsisarpa? Tysklandimi misissuinerup inernera eqqarsaatigeriassagit. Aappariit ingerlalluarnissaanut suna pingaarnerpaanersoq inuit apersorneqarput. Ilumoornissaq taaneqarnerpaavoq. Illit aamma isumaqanngilatit aappariit pilluarnerungaartartut nalunagu ilumoorfigeqatigiillutik?

Ajornartorsiuteqalerpat

Taavami aappariit ilungersunartunik isumaqatigiinngissuteqalerpata? Taavami asaqatigiinnerat nilloriartulersimappat? Taamaattoqartillugu pitsaanerunngila aappariikkunnaaraanni? Imaluunniit Biibilip najoqqutassiaa malissallugu suli silatusaarnerussava, allassimasoq aappariiginnassasut?

Biibilimik allattut miserratiginngilaat aappariit tamarmik inuttut naammalluinnanngitsuugamik ajornartorsiuteqartarumaartut. (1 Korintumiut 7:28) Aappariilli Biibilip ileqqussatigut najoqqutassiaanik malinnittut isumakkeerfigeqatigiinnissartik ilungersuutigissavaat marluullutillu ajornartorsiutiminnut aaqqiissutissarsiorlutik. Timikkut annersarneqartarnermik allasiornermillunniit pisoqarsimappat pissutissaqarluarluni kristumiu averuserneq avinnissarluunniit eqqarsaatigisinnaavai. (Matîuse 5:32; 19:9) Ajornerusumik pissuteqarnani avinniapallaannarneq allamulluuniit katinniaannarneq namminissarsiortuunermut allanillu suusupaginninnermut ersiutaavoq. Aalajaannerulernermik pilluarnerulernermillu kinguneqarnavianngilaq. Assersuuteqariarta.

Peter misigisimavoq aappariinnertik qangatut ikkunnaarsimasoq. * Taammaattumik nuliani qimappaa, uiminillu qimatsisimasumut Monikamut nuulluni. Qanoq pisoqarpa? Qaammatialunnguit qaangiummata Peter nassuerpoq Monikamik inooqateqarnini ilimagisamisut oqitsiginngitsoq. Sooq? Inuttut sanngiissutit aappariinnermi siullermitulli iinnarmata. Ajortoq ajornerulersiinnarlugu pipallattumik namminissarsiortumillu aalajangernerata aningaasatigut ajornartorsiortupilussuanngortippaa. Monikallu meeraasa ilaqutariinnerminni allanngortoqapiloornera aliasuutigingaarpaat.

Misigisap tamatuma takutippaa aappariit annertuunik ajornartorsiuteqaleraangata qaqutiguinnaq qimannissaq aaqqiissutaasartoq. Aappariinnermili ajornartorsiutit aaqqinneqarsinnaapput aappariit marluullutik ileqqussatigut najoqqutassiat Guutip oqaasiani Biibilimeersut atorpatigik. Tamanna Thomasimut Dorisimullu pisimavoq.

Thomas Dorisilu ukiut 30-t sinnerlugit aappareereersut Thomas akulikitsumik imeruluttalerpoq. Dorisilu isumatsassimanermik nappaateqalermat avinnissartik eqqartulerpaat. Doris Jehovap Nalunaajaasuanut oqaluttuarpoq. Nalunaajaasulli aappariinneq pillugu Biibilimi qanoq allassimasoqarnera takutippaa, kajumissaarlugulu pipallattumik averuserniaqqunagu, marluullutilli aaqqiissutissarsioqqullugit. Siunnersuut Dorisip malippaa. Qaammatialunnguit qaangiuttut avinnissaq eqqartorneqarunnaarpoq. Thomas Dorisillu ajornartorsiutitik sulissutigaat. Biibilip siunnersuutaasa malinnerisigut aappariinnerat nakussatsinneqarpoq, pissutsinillu aqutsinissaminnut ikiorneqarlutik.

Tamatigut assuarnaatsuuneq

Aappariinnermi ilumoorfigeqatigiinniarluni aalajangivissimasariaqarpoq aalajaatsumillu pissuseqartariaqarluni. Silarsuarmi unneqaserluffiusumi unneqqariinnarniaraanni taama ittunik pissuseqartariaqarpoq.  Biibili unneqqarinnissaq pillugu unnersuusuterpassuaqarpoq. Ukiuni hundredelinni siullerni Paulus kristumiunut Judæamiittunut allappoq: „Isumalluarpugummi sumik ilerasuutigisaqarnata, tamatigut assuarnaatsutut iliorniaratta.’ (Eprîarit 13:18) Oqaatsit taakku isumaat sunaava?

Unneqqarissup ilumoorneq aalajangiussimasarpaa peqquserluttuunanilu. Allanut ilumoortarpoq — tatigisassaasoq ileqqorissorlu allanik allamut saasaanngitsoq. Unneqarissoq assuarnaatsuuvoq inoqatinilu peqquserluttuliorfigineq ajorlugit. Unneqqarissut tatiginninnermik, allanut ajunngitsumik qanimullu attaveqarnermik pilersitsisarput.

Inuit unneqqarissut pilluarpat? Taamaannissaminnut pissutissaqarluarput. Ileqqorlunneq peqquserlunnerujussuarlu siaruarsimagaluartut — immaqaluunniit tamanna pissutigalugu — inuit unneqqarinnertik allanit nersorneqaatiginngitsoorsinnaanngilaat. Inuusuttut akornanni misissuinermi pissuseq unneqqarinneq 70 procentinit pingaartinneqarnerpaavoq. Qassinilluuniit ukioqaraluarpata pissuseq unneqqarinneq ikinngutitsitut isigisatsinnut piumasaqaatigisarparput.

Christine aqqaneq-marlunnilli ukioqarluni tillinnermik ilinniartinneqarsimavoq. Ukiut ingerlaneranni kaasarfissiuinermik sungiussilluinnarsimavoq. „Ullut ilaanni aningaasanik 5000 D-markinik angerlaassisarpunga,“ oqaluttuarpoq. Christineli arlaleriarluni politiinit tigusaasarpoq, paarnaarussivimmukartitaanissanili annilaagassutigiuaannarpaa. Jehovap Nalunaajaasuisali unneqqarinneq pillugu Biibilimi qanoq allassimasoqarneranik oqaluttuummani Biibilip ileqqussatigut najoqqutassiai kajungernartippai. Oqaaqqissaarut naalattalerpaa: ’Tillittartoq tillissaarli.’ — Evfisumiut 4:28.

Christine Jehovap nalunaajaasuatut kuisikkami tillinniaajunnaarpoq. Tamatigut assuarnaatsuunissani ilungersuutigaa soorlu Jehovap nalunaajaasui unneqqarinnissamik allanillu kristumiut pissusiinik pingaartitsisut. Aviisi Lausitzer Rundschau allappoq: „Nalunaajaasut upperisaanni illeqqussanik paasisat, soorlu unneqqarinneq, ingasaassinaveersaarneq tullermullu assanninneq pingaartinneqartupilussuupput.“ Inuunermini allannguisimanini Christinep qanoq igivaa? „Tillittarunnaarama pilluarnerujussuanngorpunga. Misigaanga inuiaqatigiinni innutaalluarlunga.“

Inuiaqatigiinnut tamanut iluaqutaasut

Aapparminnik ilumoorfiginnittut, aammattaaq unneqqarissut pilluaannanngillat, aammali inuiaqatigiinnut iluaqutaagajuttarlutik. Sulisitsisut peqquserlunngitsunik sulisoqarusunnerusarput. Tamatta tatigisinnaasatsinnik affarleqarusuttarpugut, pisiniarfinnilu inatsisinik maleruaaniartunik niuertulinni pisiniarusuttarluta. Politikkerit, politiit eqqartuussisullu peqquserluttanngitsut ataqqisariaqannginnerpavut? Innuttaasut iluaqutissaannarminniunngitsoq pisarnermissut unneqqarikkaangamika inuiaqatigiinnut iluaqutaasorujussuusarput.

Aappariit aalajaatsut ilaqutariinnut allanngujaatsunut tunngaviusarput. Qularnanngitsumik amerlasuut politikkerip europamiup oqaasii isumaqatigissavaat ima oqarmat: „Ilaqutariit [ileqqutoqqat malillugit inuusut] ullumimut allaat toqqissisimanermik isummanillu aallerfigissallugit pitsaanerpaaput.“ Ilaqutariinnik aaqqissuussaaneq eqqissinartoq tamanna inersimasut meeqqallu misigissutsimikkut toqqissisimanermik misigiffiginerpaasinnaavaat. Taamaattumik aappariit aalajaatsut inuiaqatigiinnut allanngujaallisaaqataasarput.

Eqqarsaatigeriaruk tamanut iluaqutaagaluaqisoq aappariinnik qimattoqartanngikkaluarpat, avittunut eqqartuussiveqanngikkaluarpat angajoqqaallu oqartussaanerat pillugu suliassaqanngikkaluarpat. Eqqarsaatigeriaruk kaasarfissiuisoqassaaraluarpat, pisiniarfinni tillinniartoqassaaralluarpat, peqquserluttoqassaaraluarpat, atorfilinnik peqquserluttoqassaaraluarpat ilisimatuunillu unneqqaserluttoqassaaraluarpat. Tamakku kissaatigisaannaappat inornartut? Biibilimik taassumalu siunissarput pillugu oqariartuutaanik soqutiginningaarnerminnik ersersitsisunuunngitsoq. Guutip oqaasiani neriorsuutigineqarpoq Jehovap Messiasikkut naalagaaffia erniinnaq inuiaqatigiinnut tamanut aqutsilissasoq.  Naalagaaffimmi tamatumani innuttaasut Biibilip ileqqussatigut najoqqutassiai naapertorlugit inuunissartik ilinniassavaat. Taamanikkussaq „iluartut nuna kingornutissavaat najugaqassallutillu tassani naassaanngitsussamut“. — Tussiaat 37:29.

Biibilip ileqqussatigut najoqqutassiai pitsaanerupput

Millionillit Biibilimik misissuisimasut paasisimavaat maleruagassiai ilisimassummik Guutimeersumik inuit eqqarsariartaasiannit qutsinnerungaartumik tunngaveqartut. Silarsuarmi moderniusumi Biibili najoqqutassatut tatiginartutut atorluarsinnaasutut isigaat. Nalunngilaat Guutip oqaasiani siunnersuutigineqartut malikkunikkit imminnut pitsaanerpaasoq.

Taamaattumik inuit taakkua Biibilip unnersuutaa Ussatit 3:5, 6-imi allassimasoq eqqumaffigaat, allassimagami: „[Jehova] tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Taamaaliornermikkut imminnut pitsaanerusumik atugaqartipput allanullu iluaqutaallutik. Aammattaaq ’inuunermut . . . piumaartumut’, inuiaat tamarmik Biibilip ileqqussatigut najoqqutassiaanik malinnilernissaannut, upperneq aalajaatsoq ineriartortippaat. — 1 Timûtiuse 4:8. (wE 1/11 2000)

[Quppernerup ataani ilanngussaq]

[Qupp. 14-mi issuagaq]

Aappariinnermi ajornartorsiutit aaqqinneqarsinnaapput aappariit marluullutik Biibilip ileqqussatigut najoqqutassiai atorpatigik

[Qupp. 15-mi issuagaq]

Ileqqorlunneq peqquserlunnerujussuarlu siaruarsimagaluartut — immaqaluunniit tamanna pissutigalugu — inuit unneqqarinnertik allanit nersorneqaatiginngitsoorsinnaanngilaat.