1. Ar­nap katik­kusut­tup suut eq­qarsaatigisariaqar­pai?

KRISTUMIUT tamarmik Jiisusi niaqoraat. Ar­narli katik­kaangami angut naam­mal­luin­nan­ngitsoq aam­ma niaqoriler­tar­paa. Taman­na oqitsuin­naasan­ngilaq. Taamaat­tumik katin­niarluni eq­qarsaruni angut taan­na pil­lugu uku eq­qarsaatigisariaqar­pai: ‘Angut taan­na niaquul­luarsin­naar­pasip­pa? Anersaak­kut it­tut pingaar­ner­paatip­pai? Taamaan­ngip­pat sooq ilimagis­savara katereerut­ta niaquul­luarsin­naasoq?’ Soorunalimi ar­nap aam­ma uku eq­qarsaatigisariaqar­pai: ‘Aap­pariil­luas­sagut­ta uanga qanoq iliuuseqarsin­naavunga? Kamagit­tar­tuul­lungalu tuk­kor­tuuvunga? Jehovamut at­taveqarluar­punga?’ (Oqal 4:9, 12) Ar­naq eq­qarsarluaq­qaarluni uis­saminik toq­qaaguni katereerunik aap­pariit­tut iluatsil­lutil­lu pil­luarsin­naas­sap­put.

2. Al­laaserisami matumani suut sam­mineqas­sap­pat?

² Qatan­ngutit ar­nat uimin­nut naalan­nermik­kut maligas­siuil­luar­tut amerlaqaat. Nersualaar­neqar­tariaqar­put! Ar­nat taak­ku ilumoorfigin­nit­tut kif­far­toqatiginerat nuan­naarutigeqaar­put! Al­laaserisami matumani apeq­qutit uku akis­sutis­sarsis­savagut: (1) Nuliaasut qanoq unam­miniagas­saqar­tar­pat? (2) Sooq uimik oqar­tus­saas­suseqar­nerat ataq­qisar­paat? (3) Aap­pariit kristumiut oqar­tus­saas­suseqar­nermik ataq­qin­nin­nermut tun­ngatil­lugu Jiisusi, Abigaili Marialu qanoq ilin­niarfigisin­naavaat?

3. Sooq aap­pariit tamarmik ajor­nar­torsior­tar­pat?

³ Aap­pariin­neq Guutimit tunis­sutaavoq ajun­ngil­luin­nar­toq. Inuil­li naam­mal­luin­nan­ngitsuup­put. (1 Joh 1:8) Taman­na pil­lugu Biibilimi al­las­simavoq aap­pariit tamarmik ‘ul­luin­nar­ni inuunermin­ni ajor­nar­torsior­tarumaar­tut’. (1 Kor 7:28) Nuliaasunut ajor­nar­torsiutaasin­naasut ilaat maan­na sam­meriar­tigit.

4. Sooq nuliaasoq misigisin­naava uiminit oqar­tus­saaf­figineqar­neq nikanarsaataasoq?

⁴ Nuliaasoq peroriar­tor­nini pis­sutigalugu misigisin­naavoq uiminit oqar­tus­saaf­figineqar­neq nikanarsaataasoq. As­sersuutigalugu Marisol USA-mi najugalik ima oqar­poq: “Peroriar­tor­nin­ni ar­nat oqarfigineqar­tar­put ar­nat angutil­lu sutigut tamatigut naligiit­tut. Nalun­ngilara Jehovap uiusut oqar­tus­saas­susilersimagai nuliaasul­lu tamatumin­nga ataq­qin­neq­qugai. Taamaak­kaluar­toq uima oqar­tus­saas­susianik ataq­qin­nit­tuar­nis­sara saper­nar­tit­tar­para, taamaalior­tariaqar­nangami silarsuarmi paasitin­neqar­tar­punga.”

5. Angutit ilaat ar­nat pil­lugit qanoq kuk­kusumik isigin­nit­taaseqar­pat?

⁵ Akerlianil­li uiusut ilaat eq­qarsarsin­naap­put ar­nat angutinit pingaaruteqan­ngin­nerusut. Ivon Amerikami Kujal­lermi najugalik ima oqar­poq: “Nunagisan­ni angutit aatsaat nerereeraangata ar­nat nerisar­put. Niviarsiaq­qat igasus­satut eq­qiaasus­satul­lu isigineqar­tar­put, nukap­piaq­qal­li anaanamin­nit, aleqamin­nit najamin­nil­lu kun­ngisut pineqar­tar­put.” Qatan­ngut ar­naq Asiami najugalik ima oqar­poq: “Nunatsin­ni oqar­toqar­tar­poq ar­nat silas­soris­suusariaqaratil­lu pik­korif­feqar­tariaqan­ngitsut. Il­luleriin­nar­tus­satut isigineqar­tar­put, isum­mamin­nil­lu uimin­nut an­nis­seq­qusaaneq ajor­put.” Uiusoq taama isigin­nit­taaseqar­toq asan­nit­tuun­ngilaq Biibilimilu al­las­simasunik maleruaanani. Aam­ma Jiisusimik ilaarsin­ngilaq Jehovamil­lu iluarisaanani, nulianimi ar­torsaatis­siin­nar­tar­paa. – Ef 5:28, 29; 1 Petr 3:7.

6. Nuliaasut Jehovamut qanit­tumik at­taveqar­tuar­niarlutik qanoq ilior­tariaqar­pat?

⁶ Al­laaserisap siuliani eq­qaaneqareersutut uiusup ilaqut­tami anersaak­kut, misigis­sutsitigut timik­kul­lu pisariaqar­titaan­nik isumagin­nin­nis­saa Jehovap naatsorsuutigaa. (1 Tim 5:8) Taamaat­torli nuliaasup ulapik­kaluarluni nukis­saqan­ngitsutul­lu misigigaluarluni ul­lut tamaasa Biibilimik atuar­tar­nis­sani, atuak­kaminik eq­qarsaatigin­neq­qis­saar­tar­nis­sani Jehovamul­lu qaman­nga pisumik qinusar­nis­sani pif­fis­saqarfigisariaqar­pai. Sooq taama pingaaruteqar­tigaa? Jehovap kis­saatigim­magu tamat­ta im­mik­kut im­minut qanit­tumik at­taveqar­tuas­sasugut. – ApS 17:27.

7. Nuliaasup uiminit siulersor­tin­nis­sani qanoq ajor­nan­ngin­nerutis­sin­naavaa?

⁷ Paasinar­poq nuliaasup uiminit naam­mal­luin­nan­ngitsuusumit siulersor­tin­nis­sani saper­nar­tis­sin­naagaa. Taamaalior­nis­sanili ajor­nan­ngin­nerutis­savaa siulersuinermik najoq­qutas­siaq pil­lugu Biibilimi tun­ngavilersuutigineqar­tut paasil­lugil­lu akuerigunigit.

8. Efesosimiut 5:22-24 al­laatigineqar­tutut sooq nuliaasup kristumiuusup uimi oqar­tus­saas­suseqar­nera akueris­savaa?

⁸ Nuliaasup kristumiuusup Jehovamit peq­quneqar­nini pis­sutigalugu uimi oqar­tus­saas­suseqar­nera akueriumas­savaa. (Efesosimiut 5:22-24 atuakkit). Ataatani qilam­miusoq tatigigamiuk qularin­ngilaa piumasaqaatai tamaasa iluaqutigiumaarlugit. Aam­ma  nalun­ngilaa iliuusai tamarmik asan­nin­nermik aal­laaveqar­tuaan­nar­tut. – 5 Mos 6:24; 1 Joh 5:3.

9. Nuliaasoq Jehovamut naalal­luni uimi oqar­tus­saas­susianik ataq­qin­nik­kaangat susoqar­tar­pa?

⁹ Uiusup ilaqutariin­ni oqar­tus­saas­suseqar­nera ar­nanut nikanarsaataasutut inup­pas­suar­nit isigineqar­tar­poq. Taamatut isum­mer­tar­tut Guutip asan­nil­luni najoq­qutas­siuisar­nera ilisiman­ngilaat. Uagul­li nalun­ngilar­put Jehovap ar­nat naleqar­tingaarai taamaat­tumil­lu nikanarsar­navian­ngik­kai. Nuliaasoq Jehovamut naalat­toq uimi oqar­tus­saas­suseqar­neranik ataq­qin­nis­saaq, taman­nalu ilaqutariit­tut eq­qis­seqatigiin­neran­nut iluaqutaas­saaq. – Tuss 119:165.

10. Carolip oqaasii qanoq ilin­niarfigaagut?

¹⁰ Jehovap siulersuinermut najoq­qutas­siaq pilersip­paa. Taamaat­tumik nuliaasoq uimi siulersuisus­saaneranik akuersisoq Jehovamut asan­nil­lunilu ataq­qin­nip­poq. Carol, Amerikami Kujal­lermi najugalik, ima oqar­poq: “Nalun­ngilara uiga kuk­kusarumaar­toq. Aam­mali nalun­ngilara kuk­kugaangat qisuariar­nerma ersersit­taraa Jehovamik ikin­nguteqar­nera qanoq pingaar­titsigigiga. Taamaat­tumik uima oqar­tus­saas­suseqar­nera ataq­qiniar­tuar­tar­para, taman­nami Jehovap iluaraa.”

11. Isumak­keerfigin­nin­nermut tun­ngatil­lugu Aneese qanoq ilin­niarfigisin­naavar­put?

¹¹ Nuliaasoq misigiguni isumakuluutini misigis­sutsinilu uimi soqutigin­ngik­kai oqar­tus­saas­suseqar­neranik ataq­qin­nin­nis­saminik saper­nar­titsinerusin­naavoq. Qatan­ngul­li ar­naq Aneesemik atilik taamatut misigisaqaraangami qanoq ilior­tar­nersoq maluginiaruk. Ima oqar­poq: “Nalun­ngin­nak­ku tamat­ta kuk­kusar­tugut narrutsan­naveersaar­tar­punga. Jehovatut isumak­keerfigin­nik­kusut­tar­punga, taamaalioraangamami eq­qis­sisar­punga.” (Tuss 86:5) Nuliaasup isumak­keerfigin­nit­tar­tup uiminit oqar­tus­saaf­figineqar­nis­sani ajor­nan­ngin­nerutit­tar­paa.

12. Sunis­samut Biibilimi maligas­sin­neqar­pugut?

¹² Inuit ilaasa inuk oqar­tus­saaf­figineqar­toq san­ngiitsuusorisar­paat. Taamatul­li isigin­nit­taaseqar­neq  kuk­kuneruvoq. Oqar­tus­saas­suseqar­nermik ataq­qin­nin­nermut tun­ngatil­lugu maligas­siuisor­pas­suit sapiitsut Biibilimi al­laaserineqar­put. Taak­kualu ilagaat Jiisusi, Abigajili Marialu.

13. Sooq Jiisusi Jehovap oqar­tus­saas­susianik ataq­qin­nip­pa? Nas­suiaruk.

¹³ Jiisusi Jehovap oqar­tus­saas­susianik ataq­qin­nip­poq, imaan­ngilarli sianiil­lunilu pigin­naasakitsuusoq. Pik­koris­suugami paasiuminar­tumik erseq­qis­sumil­lu ilin­niar­titsisin­naavoq. (Joh 7:45, 46) Jiisusip pigin­naasaqarluar­nera Jehovap nalun­ngin­namiuk sunik tamanik pin­ngor­titseqataatip­paa. (Uss 8:30; Hebr 1:2-4) Aam­ma Jehovap Jiisusi makitereeramiuk “qilam­mi nunamilu oqar­tus­saaneq” tamaat tun­niup­paa. (Matt 28:18, NW) Jiisusi pigin­naasaqarluaraluaqaluni suli Jehovamit siulersor­neqarusup­poq. Sooq? Ataatani asagamiuk. – Joh 14:31.

14. (a) Uiusut Jehovap ar­nanut isigin­nit­taasia qanoq ilin­niarfigisin­naavaat? (b) Us­satit 31-mi al­las­simasut uiusut qanoq ilin­niarfigisin­naavaat?

¹⁴ Uiusut qanoq ilin­niarfigisin­naagaat. Jehovap ar­nat angutinit nikanar­nerusutut isigin­ngilai. Taamaat­tumik angutit ar­nal­lu Jiisusimik naalak­kersueqataasus­satut toq­qar­pai. (Gal 3:26-29) Jehovap er­nini akisus­saaf­fileramiuk taas­sumin­nga tatigin­nin­nini ersersip­paa. Taamatut­taaq uiusup silatuup nuliani akisus­saaf­filersin­naavaa. Nuliaasoq pigin­naasaqarluar­toq Biibilimi as­sersuusiarineqar­poq. Taan­na il­lumi sulias­sanik isumagin­nit­tar­poq, narsaatinik pisil­lunilu tuniniaasar­poq niueqateqar­tarlunilu. (Ussatit 31:15, 16, 18 atuakkit). Inus­siaataan­ngilaq isum­maminik an­nis­seq­qusaan­ngitsoq. Uiatali tatigaa isumaalu tusaaniar­tarlugit. (Ussatit 31:11, 26, 27 atuakkit). Nuliaasoq uiminit taamatut ataq­qineqar­toq kajumil­luni taas­suman­nga siulersor­tik­kusus­saaq.

15. Nuliaasut Jiisusi qanoq ilin­niarfigisin­naavaat?

¹⁵ Nuliaasut qanoq ilin­niarfigisin­naagaat. Jiisusip maluginiar­nar­tor­pas­suar­nik suliaqar­nikuugaluarluni Jehovamit siulersor­tin­neq nikanarsaatitut isigin­ngilaa. (1 Kor 15:28; Fil 2:5, 6) Taamatut­taaq ar­nap Jiisusip maligas­siaanik maleruaasup uiminit siulersor­tin­nis­sani nikanarsaatitut isiginavian­ngilaa. Uiminik asan­nin­nini pis­sutigiin­nar­nagu pingaar­ner­tul­li Jehovamik asan­nin­nini ataq­qin­nin­ninilu pis­sutigalugit uini tapersersus­savaa.

16. Samuelimik al­lak­kat siul­liit 25:3, 23-28 naaper­torlugit Abigajili qanoq unam­miniagaqar­pa? (Saq­qaani as­siliaq takuuk).

¹⁶ Abigajili ueqar­poq Nabalimik atilim­mik. Nabali nam­minis­sarsior­tuuvoq, makitasuujuvoq qujasuitsuul­lunilu. Taamaak­kaluar­torli Abigajilip uini qiman­niarsarin­ngilaa. Taamaaliorusus­simagaluarunimi uini Daavimut toqutsiin­narsimas­sagaluar­paa. Uinili inoqutitil­lu sapin­ngisaminik il­lersor­pai. Angutit sak­kulersorsimasut 400-t or­nil­lugit Daavi ataq­qin­nit­tumik oqaluuk­kamiuk sapiis­suseqangaarsimas­saaq. Al­laat uimi iliuusai pil­lugit utoq­qatser­poq. (1 Samueli 25:3, 23-28 atuakkit). Daavip paasivaa kuk­korujus­suar­nis­sani pin­ngitsoor­tin­niarlugu Jehovap ar­naq taan­na sapiitsoq atoraa.

17. Uiusut Daavi Abigajililu qanoq ilin­niarfigisin­naavaat?

¹⁷ Uiusut qanoq ilin­niarfigisin­naagaat. Abigajili ar­naavoq silatooq, Daavilu taas­suma siun­nersuutaanik maleruaagami silatusaar­poq. Tamatuma kingunerisaanik Daavi inun­nik pisuus­suteqan­ngitsunik toqutsin­ngilaq. Taamatut­taaq uiusup silatuup pingaarutilin­nik aalajangiinialeraangami nuliami isumaa eq­qarsaatigeq­qaar­tar­paa. Taamaalior­nermigut  aalajangiinerlun­nis­saraluani pin­ngitsoor­tis­sin­naavaa.

18. Nuliaasut Abigajili qanoq ilin­niarfigisin­naavaat?

¹⁸ Nuliaasut qanoq ilin­niarfigisin­naagaat. Nuliaasoq Jehovamik asan­nil­lunilu ataq­qin­nit­toq ilaqut­taminut sun­niuteqarluarsin­naavoq, aam­ma uini Nalunaajaasuun­ngik­kaluar­pat anersaak­kul­luun­niit san­ngiik­kaluar­pat. Uini Biibilimut naaper­tuutin­ngitsumik qiman­niarsaris­san­ngilaa. Ataq­qin­nin­nermigul­li naalan­nermigul­lu uini Jehova pil­lugu ilin­niar­nis­saanut kajumis­saas­savaa. (1 Petr 3:1, 2) Maligas­siuinera uiusup qisuariarfigin­ngik­kaluar­paguluun­niit taas­suma uiminut ilumoorfigin­nin­nera oqar­tus­saas­susianil­lu ataq­qin­nin­nera Jehovap nuan­naarutigis­savaa.

19. Nuliaasup uini qaquguk­kut naalat­tus­saan­ngilaa?

¹⁹ Nuliaasup kristumiup uimi Biibilimut naaper­tuutin­ngitsunik iliuuseqaq­qup­pani naalan­navian­ngilaa. As­sersuutigalugu takorlooruk nuliaasoq uiminit Nalunaajaasuun­ngitsumit sal­loq­quneqar­toq, til­leq­quneqar­toq al­latul­luun­niit Jehovap iluarin­ngisaanik ilioq­quneqar­toq. Kristumiut tamarmik, aam­ma ar­nat katisimasut, Jehova pingaar­ner­tut naalat­tus­saavaat. Taamaat­tumik nuliaasoq Biibilimi najoq­qutas­sianik unioq­qutitseq­quneqaruni itigar­titsisariaqar­poq, aam­ma sooq taamaaliorusun­ngin­nini inus­siar­nersumik aalajangersimar­palut­tumil­li nas­suis­savaa. – ApS 5:29.

20. Qanoq nalun­ngilar­put Mariap Jehova qanimut ikin­ngutigisimagaa?

²⁰ Mariap Jehova qanimut ikin­ngutigaa. Aam­ma Al­lak­kat ilisimal­luar­pai. Johan­nesip Kuisisup anaanaanik, Elisabethimik, oqaloqateqar­nermini Hebræerisut Al­lak­kani Il­ler­nar­tuni al­las­simasut 20-nit amerlanerusut is­suar­pai. (Luk 1:46-55) Aam­ma una eq­qarsaatigiuk: Naak Mariap Josefi aap­pas­siarigaluaraa Jehovap in­ngiliata Josefi siul­liul­lugu saq­qum­merfigin­ngilaa. Mariali siul­liul­lugu toq­qaan­nar­tumik oqaluup­paa oqarfigalugu Guutip er­nera naar­torilis­sagaa. (Luk 1:26-33) Jehovap Maria ilisarisimal­luaramiuk qularin­ngilaa Mariap Jiisusi asal­lugulu isumagil­luarumaaraa. Jiisusil­lu toqunerata  qilaliar­tin­neqar­neratalu kingor­na Mariap Jehova qanimut ikin­ngutigiuarsimas­savaa. – ApS 1:14.

21. Maria pil­lugu Biibilimi al­las­simasut uiusut qanoq ilin­niarfigisin­naavaat?

²¹ Uiusut qanoq ilin­niarfigisin­naagaat. Uiusup silatuup nuliami Al­lak­kanik ilisimasaqarluar­nera nuan­naarutigisar­paa. Taman­na narrutsas­sutigineq ajor­paa nulianilu unam­mil­ler­titut isigisar­nagu. Nalun­ngilaa nuliani Biibilimik Biibilimilu najoq­qutas­sianik ilisimasaqarluar­pat ilaqutariit­tut iluaqutigiumaaritsik. Nuliaasoq ilin­niagaqar­nerugaluar­pal­luun­niit uiusoq suli anersaak­kut siulersuisuusus­saavoq ilaqut­tamilu pal­lorfigin­nin­nerat akisus­saaf­figalugu. – Ef 6:4.

22. Nuliaasut Maria qanoq ilin­niarfigisin­naavaat?

²² Nuliaasut qanoq ilin­niarfigisin­naagaat. Nuliaasup uini siulersor­tigaa, up­perluar­tuujuar­nis­sanili nam­mineq akisus­saaf­figaa. (Gal 6:5) Taamaat­tumik nam­mineq atuaq­qis­saar­tar­nis­saminut eq­qarsaatigin­neq­qis­saar­tar­nis­saminul­lu pif­fis­saqar­tariaqar­poq. Taamaalior­taruni Jehova asal­lugulu ataq­qiuarsin­naas­savaa uiminil­lu siulersor­neqar­nini nuan­naarutigalugu.

23. Nuliaasut uimik oqar­tus­saas­suseqar­neran­nik ataq­qin­nit­tut qanoq taak­kunun­nga, ilaqutaan­nut ilagiin­nul­lu iluaqutaap­pat?

²³ Nuliaasut Jehovamik asan­nin­ner­tik kajumis­sis­sutigalugu uimik oqar­tus­saas­suseqar­neran­nik ataq­qin­nit­tut nuan­naar­nerul­lutil­lu nalerisimaar­nerusar­put. Taak­ku inuusut­tunut maligas­siuil­luar­put. Aam­ma ilaqut­tamin­ni ilagiin­nilu eq­qis­seqatigiis­sitsisuul­lutil­lu asan­nin­nermik ineriar­tor­titsisuup­put. (Tit 2:3-5) Ul­lutsin­ni Jehovamut kif­faasut amerlaner­paar­taat ar­naap­put. (Tuss 68:12) Tamat­tali, ar­naagaluarut­ta angutaagaluarut­taluun­niit, ilagiit nuan­naar­neran­nik ineriar­tor­titseqataasin­naavugut. Taman­na al­laaserisami tul­liut­tumi sam­mineqas­saaq.