Pingaar­nersiuigit: Biibilimi kajumis­saar­neqar­pugut ‘suut pingaar­nerusut qulak­keer­niaq­qul­lugit’. (Filip­pimiut 1:10, NW) Sulias­satit pingaar­nerit al­lat­tuk­kit. Eq­qaamajul­li pingaar­nerit ilaat nukingius­sas­saan­ngim­mata. As­sersuutigalugu nerisas­sanik pisiniar­nis­saq pingaaruteqar­poq, nukingius­sas­saasariaqan­ngilarli. Nukingius­sas­saasorisal­li – as­sersuutigalugu fjer­nsynimi filmip nuan­narisavit aal­lar­tit­tup isigin­naar­nis­saa – pingaaruteqar­tariaqan­ngilaq.

Pilersaarusiortarit. “Ulimaat ik­kiil­lisoq kiin­nan­neqan­ngik­kuni as­soroorutigisariaqar­tar­poq.” Taama Oqaluus­sisar­tup oqaasii 10:10-mi al­las­simavoq, nangip­porlu: “Eq­qarsarluaq­qaar­tar­torli iluatsitsinerusar­poq.” (Testamentitoqaq 1990-imi naqitigaq) Qanoq paasisariaqar­pa? Pilersaarusior­nik­kut pif­fis­samik atorluaasin­naavutit. Sulias­sat pingaaruteqan­ngitsut pif­fis­saajaataasut nuk­kior­nar­tul­lu kinguar­tik­kit taamaatil­lugil­luun­niit. Suliarerusutatit iliuuserereeruk­kit sulilu pif­fis­saqaruit sulias­saq tul­liut­toq aal­lar­tiguk. Pilersaarusior­nik­kut naam­mas­sisaqar­nerusin­naavutit, soorlu sulisoq ulimaam­minik kiin­naasoq.

Pilersaaruteqar­pallaar­tarnak. Sulias­sat pingaaruteqar­pian­ngitsut pif­fis­saajaataasul­luun­niit itigar­tik­kit. Sam­misas­saqar­pal­laar­neq akuersaar­pal­laar­nerlu pisariaqan­ngitsumik uip­pakajaalersitsisin­naap­put nuan­naarun­naarsitsil­lutil­lu.

Suliassanik kinguar­titsineq aalajangerumaataar­nerlu. “Anorimik aarleq­quteqar­tuar­toq siaruar­terin­ngitsoor­tus­saavoq, aarleril­lunilu nuis­sanik alaatsinaataqar­tuar­toq katersuin­ngitsoor­tus­saavoq.” (Oqaluus­sisar­tup oqaasii 11:4) Qanoq ilin­niarfigisin­naavar­put? Sulias­sanik kinguar­titsisarut­ta pif­fis­sar­put atulus­sin­narlugulu angusaqar­piar­navian­ngilagut. Naasoris­saasoq silagis­sinis­saanut utaq­qisoq siaruar­terinanilu inerititanik katersuin­ngitsoorsin­naavoq. Tamatumun­nga as­singusumik atuk­kat­ta pitsaaneruler­nis­saat utaq­qiin­narutsigu naam­mas­sisaqar­piar­navian­ngilagut. Im­maqa aam­ma misigaagut aalajangiin­ngin­nitsin­ni pisariaqar­tut tamaq­qis­saasa paaseq­qaar­tariaqarlugit. Ilumooraluar­poq pingaarutilim­mik aalajangiin­ngin­nermi misis­sueq­qis­saar­nis­saq eq­qarsaatigin­neq­qis­saar­nis­sarlu pingaaruteqar­tut. Us­satit 14:15-imi al­las­simavoq: “Silatuup al­loriar­nini sianigeq­qis­saar­tar­pai.” Amerlaner­tigul­li paaserusutagut tamak­kerlugit paaseq­qaan­ngik­kaluarlugit aalajangiisariaqar­tar­pugut. – Oqaluus­sisar­tup oqaasii 11:6.

Eqqoq­qis­saar­tumik inernileerusunneq. ‘Ilisimas­sut pavan­nga [Guutimit] pisoq ingasaas­sinian­ngitsuuvoq’, Jaaku 3:17-imi al­las­simavoq. (NW) Soorunami pitsaaner­paamik iliuuseqar­niar­toq nersor­tariaavoq, im­minul­li piumaf­figival­laar­toq im­minut pakatsisis­sin­naavoq. As­sersuutigalugu oqaatsinik ilin­niar­tup kuk­kusar­nis­sani ilimagis­savaa kuk­kus­sutinilu ilin­niutigis­sal­lugit. Eq­qoq­qis­saar­tumil­li iner­nileerusut­tuar­tup oqalun­nermini kuk­kunis­sani an­nilaangagisaramiuk oqaatsinik ilik­kan­ngitsoor­tar­poq. Taamaat­tumik im­minut piumaf­figival­laan­ngin­nis­saq pitsaanerus­saaq. Biibilimi aam­ma al­las­simavoq ‘an­neruniajuitsut ilisimas­suseqar­tut.’ (Us­satit 11:2, NW) Aap, an­neruniajuil­lunilu maniguut­toq pingaakujut­tuun­ngilaq kuk­kusar­ninilu il­laatigiin­narsin­naasarlugit.

Sulinermik sukisaar­sar­nermillu oqimaaqatigiis­saarigit. “Pitsaaneruvoq itum­map ataasiin­naap imaanik peqaraan­ni qasuersaarsin­naal­lunilu itum­mat il­lut­tut suleruloor­nik­kut ulik­kaar­neran­nit anorimil­lu tigusiniarsarinermit.” (Oqaluus­sisar­tup oqaasii 4:6) Suliuaan­nar­tup ‘suleruloor­nermini’ naam­mas­sisani amerlaner­tigut nuan­naarutigin­ngitsoor­tar­pai, qasusarami pif­fis­saqar­nerlu ajorluni. Aam­ma eqiasut­tup as­sani il­lut­tut sarliaan­nar­tar­pai pif­fis­sarlu atulus­sin­nar­tarlugu. Biibilimili oqimaaqatigiis­saarinis­satsin­nik kajumis­saar­neqar­pugut: Eqiasuitsuugit naam­mas­sisatil­lu nuan­naarutigalugit. Suliamik nalerisimaarutigin­nin­neq nuan­naarutigin­nin­nerlu tas­sa “Guutip tunis­sutaa”. – Oqaluus­sisar­tup oqaasii 5:18.

Sinilluartarit. Biibilimi al­lat­tut ilaat oqar­poq: “Eq­qis­sil­lunga in­nas­saanga sinilerlungalu.” (Tus­siaat 4:9) Inersimasut amerlanerit timi, misigis­sutsit, eq­qarsarsin­naas­suserlu iluaqutigil­luas­sagunik­kit ul­lormut nalunaaqut­tap-akun­neri arfineq-pingasut sinit­tar­nis­sar­tik pisariaqar­tip­paat. Sinin­neq pif­fis­samik atorluaaneruvoq eq­qarsarsin­naas­susermik eq­qaaman­nis­sin­naas­susermil­lu ineriar­tor­titsisarami ilik­kariaan­naalersitsisarlunilu. Paarlat­tuanil­li sin­nakil­lior­toq ilik­kar­tik­kuminaat­tar­poq, kuk­kugajun­nerusarlunilu arrajasuuvoq.

Akis­saqartin­ngisannik kissaateqaqinak. “Pigisaq naam­magigaan­ni pitsaaneruvoq al­lanik kis­saateqar­tuaan­nar­nermit.” (Oqaluus­sisar­tup oqaasii 6:9, Testamentitoqaq 1990-imi naqitigaq) Qanoq paasisariaqar­pa? Silatusaar­toq kis­saatiminit, pingaar­tumik piviusun­ngorsin­naan­ngitsunit, aqun­neqar­tin­neq ajor­poq. Taamaat­tumik pilerisaarutit akiligas­sarsinis­samil­lu neqeroorutit ingerlaan­naq akuerineq ajor­pai. ‘Pigisaminik naam­magin­nin­neq’ ilik­karsimagamiuk aatsaat akilersin­naasaminik kis­saateqar­tar­poq.

Pingaartitatit nalilersukkit. Suut pingaar­tis­sanerlugit eq­qarsaatigiuk. Ajun­ngitsut eq­qor­tul­lu pingaar­tik­kuk­kit taak­ku ajun­ngitsumik aalajangiinis­san­nut pif­fis­samil­lu atorluaanis­san­nut iluaqutigis­savatit. Suut pingaar­tis­sanerlugit qanoq paasisin­naaviuk? Inup­pas­suit Biibili ilisimas­suseqalersitsisar­toq paasigamik­ku najoq­qutas­siat tas­saniit­tut malerualersimavaat. – Us­satit 2:6, 7.

Asanninneq pingaar­nerutiguk. Asan­nin­neq tas­saavoq “ataasius­sutsip qilerutaa naam­mal­luin­nar­toq”. (Kolos­semiut 3:14, NW) Asan­nis­suseqan­ngik­kut­ta pil­luar­natalu toq­qis­sisimasin­naan­ngilagut, pingaar­tumik ilaqutariit iluan­ni. Inuit aningaasanik sulinermil­lu pingaar­nerutitsisut pil­lualivis­sin­naan­ngil­lat. Taamaat­tumik pis­sutis­saqarluar­tumik asan­nin­neq Biibilimi pingaar­tin­neqangaar­tus­satut ersersin­neqar­poq, al­laal­lu hundredileriarluni eq­qaaneqarluni. – 1 Korinthimiut 13:1-3; 1 Johan­nesi 4:8.

Inuunermi apeq­qutit pingaarutillit akissutis­sar­siniakkit. Angut Geof­fimik atilik asan­nit­tumik nuliaqar­poq, marlun­nik meeraqar­poq, nuan­narisaminil­lu ikin­nguteqarlunilu nap­parsim­mavim­mi sulif­feqar­poq. Sulif­fim­minili naal­liut­tut toqusul­lu takujuar­tar­pai. Eq­qarsar­tar­poq: “Inuunerup siuner­taa ilumut taamaagin­nas­sava?” Ul­lut ilaan­ni Jehovap Nalunaajaasuisa Biibililersaarutaasa ilaan­nik atuar­til­luni apeq­qutini naam­maginar­tumik akis­sutis­sarsivai.

Geof­fip nuliani meeq­qanilu atuarsimasaminik oqalut­tuup­pai. Ilaqutariit soqutigin­nilerlutil­lu Biibilimik atuaq­qis­saar­taler­put, taamaalior­nermik­kul­lu inuunerin­nerulerlutil­lu pif­fis­samik atorluaaneruler­put. Aam­ma paratiisimi inuunermik naas­saan­ngitsumik naal­liuteqarfiun­ngitsumil­lu neriuuteqaler­put. – Saq­qum­mersitat 21:3, 4.

Geof­fip misigisaanit erser­poq Jiisusip oqaasii uku ilumoor­tuusut: “Pil­luar­put anersaak­kut pisariaqar­titsinermin­nik eq­qumaf­figin­nit­tut.” (Mat­thæusi 5:3, NW) Il­lit anersaak­kut pisariaqar­titsiner­pit matus­suser­nis­saanut pif­fis­sat atorusup­piuk? Taamaalioruit pif­fis­san­nik atorluaaner­paas­saatit.