Tamanut peqqinneq — anguneqarsinnaava?

KISSAATIGISINNAAVIUK ilaquttatillu peqqinnerulernissarsi? Soorunami. Amerlanersagut arlaatigut ajoquteqalaartarput millionillillu inuunertik naallugu nappaammik akiugaqartariaqarlutik.

Ullumikkut nappatsaaliuilluni ilungersortoqangaarpoq. Assersuutigisinnaavagut FN-ip ataani suliniaqatigiiffiup WHO-p suliniutai. 1978-imi ataatsimeersuarnermi WHO-mit aningaasaliiffigineqartumit nunat 134-t FN-illu ataani suliniaqatigiiffiit 67-it allartitaat isumaqarput peqqinneq tassaaginnanngitsoq napparsimannginneq sanngiitsuunnginnerlu. Aalajangiusimavaat peqqinneq tassaasoq „timikkut, sianissutsikkut inuillu atugarisaasigut iluarusulluinnarneq“. Taava aallartitat sapiiserlutik nalunaarput peqqinneq „tunngaviusumik inuit pisinnaatitaaffigigaat“. WHO imminut anguniagassippoq „akuerineqarsinnaasumik tamanut peqqissuunissaq“ anguniarniarlugu.

Anguniagaq kissaatiginartuuvoq pitsaalluinnarlunilu. Anguneqarsinnaanerali qanoq ilimanartigaa? Inuit nersornerpaasaat tatiginerpaasaallu tassaavoq nakorsaatitigut ilisimatuussuseq. Tuluit Nunaanni aviisi The European naapertorlugu nunani killerni inuppassuit sungiusimavaat „tupinnartuliornikkut nakorsaat: ajornartorsiutinut tamanut iisartagaq ataaseq“. Allatut oqaatigalugu ilimagaarput pisariitsumik nappaatinullu tamanut sunniuteqartumik nakorsaariaaseqassasoq. Nakorsaatitigut ilisimatuussutsip ilimagisarput tamanna eqquutitissinnaavaa?